ಕೇರಳ ಇನ್ನು ಮುಂದೆ ‘ಕೇರಳಂ’: ಹೆಸರು ಬದಲಾವಣೆಗೆ ಕೇಂದ್ರ ಸಚಿವ ಸಂಪುಟದ ಅಸ್ತು

ದಕ್ಷಿಣ ಭಾರತದ ಪ್ರಮುಖ ರಾಜ್ಯವಾದ ಕೇರಳವನ್ನು ತನ್ನ ಸ್ಥಳೀಯ ಭಾಷೆಯ ಸೊಗಡಿಗೆ ತಕ್ಕಂತೆ ‘ಕೇರಳಂ’ ಎಂದು ಮರುನಾಮಕರಣ ಮಾಡುವ ಐತಿಹಾಸಿಕ ನಿರ್ಧಾರಕ್ಕೆ ಕೇಂದ್ರ ಸಚಿವ ಸಂಪುಟ ಮಂಗಳವಾರ (ಫೆಬ್ರುವರಿ 24, 2026) ಅಧಿಕೃತವಾಗಿ ಹಸಿರು ನಿಶಾನೆ ತೋರಿದೆ.

ಈ ಮೂಲಕ ರಾಜ್ಯದ ಜನರ ಬಹುಕಾಲದ ಬೇಡಿಕೆಯೊಂದು ಈಡೇರುವ ಹಾದಿ ಸುಗಮಗೊಂಡಿದ್ದು, ಬ್ರಿಟಿಷರ ಕಾಲದ ವಸಾಹತುಶಾಹಿ ಹೆಸರಿನಿಂದ ಮುಕ್ತಿ ಪಡೆದು ತನ್ನ ಮೂಲ ಸಾಂಸ್ಕೃತಿಕ ಗುರುತನ್ನು ಮರಳಿ ಪಡೆಯುವಲ್ಲಿ ರಾಜ್ಯ ಯಶಸ್ವಿಯಾಗಿದೆ. ಕೇಂದ್ರ ಸಚಿವ ಡಾ. ಜಿತೇಂದ್ರ ಸಿಂಗ್ ಅವರು ತಮ್ಮ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ ಈ ಕುರಿತು ಮಾಹಿತಿ ಹಂಚಿಕೊಂಡಿದ್ದು, ರಾಷ್ಟ್ರಮಟ್ಟದಲ್ಲಿ ‘ಕೇರಳಂ’ ಹೆಸರಿಗೆ ಅಧಿಕೃತ ಚಾಲನೆ ದೊರೆತಿರುವುದನ್ನು ಖಚಿತಪಡಿಸಿದ್ದಾರೆ.

ಕೇರಳ ವಿಧಾನಸಭೆಯು 2024ರ ಜೂನ್ ತಿಂಗಳಿನಲ್ಲಿಯೇ ರಾಜ್ಯದ ಹೆಸರನ್ನು ಬದಲಾಯಿಸುವಂತೆ ಕೋರಿ ಒಕ್ಕೊರಲಿನ ನಿರ್ಣಯವನ್ನು ಅಂಗೀಕರಿಸಿ ಕೇಂದ್ರ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿತ್ತು. ಮಲಯಾಳಂ ಭಾಷೆಯಲ್ಲಿ ‘ಕೇರ’ ಎಂದರೆ ಕಲ್ಪವೃಕ್ಷ ತೆಂಗು ಹಾಗೂ ‘ಆಲಂ’ ಎಂದರೆ ಭೂಮಿ ಅಥವಾ ನಾಡು ಎಂಬ ಅರ್ಥವಿದೆ. ಒಟ್ಟಾರೆಯಾಗಿ ‘ಕೇರಳಂ’ ಎಂದರೆ ತೆಂಗಿನ ಮರಗಳ ನಾಡು ಅಥವಾ ಫಲವತ್ತಾದ ಕಡಲತೀರದ ಭೂಮಿ ಎಂಬ ಸುಂದರವಾದ ಭೌಗೋಳಿಕ ಹಾಗೂ ಸಾಂಸ್ಕೃತಿಕ ಹಿನ್ನೆಲೆಯನ್ನು ಈ ಹೆಸರು ಹೊಂದಿದೆ. ಭಾರತದಲ್ಲಿ ಸ್ಥಳಗಳ ಹೆಸರುಗಳನ್ನು ವಸಾಹತುಶಾಹಿ ಪ್ರಭಾವದಿಂದ ಮುಕ್ತಗೊಳಿಸುವ (ಡಿಕೊಲೋನೈಸೇಶನ್) ನಿರಂತರ ಪ್ರಕ್ರಿಯೆಯ ಭಾಗವಾಗಿ ಈ ಮಹತ್ವದ ಹೆಜ್ಜೆಯನ್ನು ಇಡಲಾಗಿದೆ. 1995ರಲ್ಲಿ ಬಾಂಬೆ ನಗರವನ್ನು ಮುಂಬೈ ಎಂದು ಮರುನಾಮಕರಣ ಮಾಡಿದ ಮಾದರಿಯಲ್ಲೇ ಇದೀಗ ಕೇರಳವು ತನ್ನ ಅಪ್ಪಟ ಮಲಯಾಳಂ ಗುರುತಾದ ಕೇರಳಂ ಹೆಸರನ್ನು ತನ್ನದಾಗಿಸಿಕೊಳ್ಳುತ್ತಿದೆ.

ಶೀಘ್ರದಲ್ಲೇ ಪ್ರಕ್ರಿಯೆ ಆರಂಭ

ಕೇಂದ್ರ ಸಚಿವ ಸಂಪುಟದ ಒಪ್ಪಿಗೆ ದೊರೆತಿರುವ ಹಿನ್ನೆಲೆಯಲ್ಲಿ, ಹೆಸರು ಬದಲಾವಣೆಯ ಮುಂದಿನ ಸಾಂವಿಧಾನಿಕ ಪ್ರಕ್ರಿಯೆಗಳು ಶೀಘ್ರದಲ್ಲೇ ಆರಂಭವಾಗಲಿವೆ. ಭಾರತೀಯ ಸಂವಿಧಾನದ 3ನೇ ವಿಧಿಯ ಅನ್ವಯ, ರಾಷ್ಟ್ರಪತಿಗಳು ‘ಕೇರಳ (ನಾಮ ಬದಲಾವಣೆ) ಮಸೂದೆ, 2026’ ಅನ್ನು ಕೇರಳ ವಿಧಾನಸಭೆಯ ಅಧಿಕೃತ ಅಭಿಪ್ರಾಯಕ್ಕಾಗಿ ಕಳುಹಿಸಿಕೊಡಲಿದ್ದಾರೆ. ರಾಜ್ಯ ವಿಧಾನಸಭೆಯು ತನ್ನ ನಿಲುವನ್ನು ಸ್ಪಷ್ಟಪಡಿಸಿದ ಬಳಿಕ, ಈ ಮಸೂದೆಯನ್ನು ಸಂಸತ್ತಿನ ಉಭಯ ಸದನಗಳಲ್ಲಿ ಮಂಡಿಸಿ ಅಂಗೀಕಾರ ಪಡೆಯಲಾಗುವುದು. ಸಂಸತ್ತಿನ ಅಸ್ತು ದೊರೆತ ತಕ್ಷಣವೇ ಕೇರಳಂ ಎಂಬ ಹೊಸ ಹೆಸರು ಅಧಿಕೃತವಾಗಿ ಮತ್ತು ಕಾನೂನುಬದ್ಧವಾಗಿ ಬಳಕೆಗೆ ಬರಲಿದೆ. ಭಾಷೆ, ಸಂಸ್ಕೃತಿ ಮತ್ತು ಇತಿಹಾಸವನ್ನು ಗೌರವಿಸುವ ನಿಟ್ಟಿನಲ್ಲಿ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳ ಸಮನ್ವಯದಿಂದ ನಡೆಯುತ್ತಿರುವ ಈ ಪ್ರಕ್ರಿಯೆಯು ರಾಜ್ಯದ ಸಾಂಸ್ಕೃತಿಕ ಇತಿಹಾಸದಲ್ಲಿ ಹೊಸದೊಂದು ಮೈಲುಗಲ್ಲಾಗಿ ದಾಖಲಾಗಲಿದೆ.

‘ಕೇರಲಮೈಟ್’ ಅಂದ್ರೆ ಸೂಕ್ಷ್ಮಾಣುಜೀವಿ: ಶಶಿ ತರೂರ್ ಭಾಷಾ ಚಟಾಕಿ

ಕೇರಳ ರಾಜ್ಯವನ್ನು ‘ಕೇರಳಂ’ ಎಂದು ಮರುನಾಮಕರಣ ಮಾಡುವ ಕೇಂದ್ರ ಸಚಿವ ಸಂಪುಟದ ಐತಿಹಾಸಿಕ ನಿರ್ಧಾರಕ್ಕೆ ತಿರುವನಂತಪುರಂ ಸಂಸದ ಹಾಗೂ ತಮ್ಮ ವಿಶಿಷ್ಟ ಇಂಗ್ಲಿಷ್ ಶಬ್ದಭಂಡಾರಕ್ಕೆ ಹೆಸರುವಾಸಿಯಾಗಿರುವ ಹಿರಿಯ ನಾಯಕ ಶಶಿ ತರೂರ್ ತಮ್ಮದೇ ಶೈಲಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ. ರಾಜ್ಯದ ಹೆಸರು ಬದಲಾವಣೆಯನ್ನು ಸ್ವಾಗತಿಸಿರುವ ಅವರು, ಇದರ ಬೆನ್ನಲ್ಲೇ ಆಂಗ್ಲ ಭಾಷಿಕರಿಗೆ ಎದುರಾಗಬಹುದಾದ ಒಂದು ಸಣ್ಣ ಭಾಷಾಶಾಸ್ತ್ರದ ಗೊಂದಲವನ್ನು ಅತ್ಯಂತ ಹಾಸ್ಯಮಯವಾಗಿ ತಮ್ಮ ಟ್ವಿಟರ್ (ಎಕ್ಸ್) ಖಾತೆಯಲ್ಲಿ ಪ್ರಸ್ತಾಪಿಸಿದ್ದಾರೆ. ಇದುವರೆಗೂ ಕೇರಳಿಗರನ್ನು ಇಂಗ್ಲಿಷ್‌ನಲ್ಲಿ 'ಕೇರಳೈಟ್' (Keralite) ಅಥವಾ 'ಕೇರಳನ್' (Keralan) ಎಂದು ಕರೆಯಲಾಗುತ್ತಿತ್ತು. ಆದರೆ ಈಗ ರಾಜ್ಯದ ಹೊಸ ಹೆಸರು ‘ಕೇರಳಂ’ ಆಗಿರುವುದರಿಂದ, ಅಲ್ಲಿನ ನಿವಾಸಿಗಳನ್ನು ಆಂಗ್ಲ ಭಾಷೆಯಲ್ಲಿ ಏನೆಂದು ಕರೆಯಬೇಕು ಎಂಬ ಕುತೂಹಲಕಾರಿ ಪ್ರಶ್ನೆಯನ್ನು ಅವರು ಸಾರ್ವಜನಿಕವಾಗಿ ಹುಟ್ಟುಹಾಕಿದ್ದಾರೆ.

ಹೊಸ ಹೆಸರಿನ ಆಧಾರದ ಮೇಲೆ ಜನರನ್ನು ಗುರುತಿಸಲು ಹೋದರೆ ಎದುರಾಗುವ ತಮಾಷೆಯ ಸನ್ನಿವೇಶವನ್ನು ತರೂರ್ ತಮ್ಮ ಪೋಸ್ಟ್‌ನಲ್ಲಿ ವಿವರಿಸಿದ್ದಾರೆ. ಒಂದು ವೇಳೆ ‘ಕೇರಳಂ’ ನಿವಾಸಿಗಳನ್ನು ಇಂಗ್ಲಿಷ್‌ನಲ್ಲಿ 'ಕೇರಲಮೈಟ್' (Keralamite) ಎಂದು ಕರೆದರೆ, ಅದು ವಿಜ್ಞಾನದ ಭಾಷೆಯಲ್ಲಿ ಯಾವುದೋ ಸೂಕ್ಷ್ಮಾಣು ಜೀವಿಯ (Microbe) ಹೆಸರಿನಂತೆ ಕೇಳಿಸುತ್ತದೆ. ಇನ್ನು 'ಕೇರಲಮಿಯನ್' (Keralamian) ಎಂದು ಕರೆದರೆ ಅದು ಭೂಮಿಯ ಆಳದಲ್ಲಿ ಸಿಗುವ ಯಾವುದೋ ಅಪರೂಪದ ಖನಿಜದ (Rare earth mineral) ಹೆಸರಿನಂತೆ ಭಾಸವಾಗುತ್ತದೆ ಎಂದು ಅವರು ತಮಾಷೆ ಮಾಡಿದ್ದಾರೆ. ಇದೇ ವಿಚಾರವಾಗಿ ಕೇರಳ ಮುಖ್ಯಮಂತ್ರಿಗಳ ಕಚೇರಿಯನ್ನು (CMO Kerala) ಟ್ಯಾಗ್ ಮಾಡಿರುವ ಅವರು, ಈ ಚುನಾವಣಾ ಉತ್ಸಾಹದಿಂದಾಗಿ ನಡೆದಿರುವ ನಾಮಕರಣ ಪ್ರಕ್ರಿಯೆಯಿಂದ ಉದ್ಭವಿಸಿರುವ ಇಂತಹ ಹೊಸ ಪದಗಳ ಗೊಂದಲವನ್ನು ಬಗೆಹರಿಸಲು ಹೊಸ ಪದಗಳನ್ನು ಹುಡುಕುವ ಸ್ಪರ್ಧೆಯೊಂದನ್ನು ಆಯೋಜಿಸುವುದು ಸೂಕ್ತ ಎಂದು ವ್ಯಂಗ್ಯವಾಗಿ ಸಲಹೆ ನೀಡಿದ್ದಾರೆ.