ರಾಜ್ಯಸಭೆಗೆ ಮೇನಕಾ ಗುರುಸ್ವಾಮಿ: ದೇಶದ ಮೊದಲ LGBTQ ಸಂಸದೆಯಾಗುವ ಹೊಸ್ತಿಲಲ್ಲಿ ಹಿರಿಯ ವಕೀಲೆ

ಮುಂಬರುವ ರಾಜ್ಯಸಭಾ ಚುನಾವಣೆಗೆ ಅಖಿಲ ಭಾರತ ತೃಣಮೂಲ ಕಾಂಗ್ರೆಸ್ (ಎಐಟಿಎಂಸಿ) ತನ್ನ ಅಭ್ಯರ್ಥಿಗಳ ಪಟ್ಟಿಯನ್ನು ಪ್ರಕಟಿಸಿದ್ದು, ಹಿರಿಯ ವಕೀಲೆ ಮೇನಕಾ ಗುರುಸ್ವಾಮಿ ಅವರಿಗೆ ಟಿಕೆಟ್ ನೀಡುವ ಮೂಲಕ ದೇಶದ ರಾಜಕೀಯ ಇತಿಹಾಸದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಲು ಮುಂದಾಗಿದೆ. ಈ ಆಯ್ಕೆಯು ಭಾರತೀಯ ಸಂಸತ್ತಿನಲ್ಲಿ ಲೈಂಗಿಕ ಅಲ್ಪಸಂಖ್ಯಾತರ ಪ್ರಾತಿನಿಧ್ಯದ ದೃಷ್ಟಿಯಿಂದ ಅತ್ಯಂತ ಮಹತ್ವದ ಹೆಜ್ಜೆಯೆಂದು ವಿಶ್ಲೇಷಿಸಲಾಗುತ್ತಿದೆ.

ಪಕ್ಷದ ಅಧಿಕೃತ 'ಎಕ್ಸ್' ಖಾತೆಯ ಮೂಲಕ ಈ ಘೋಷಣೆ ಮಾಡಲಾಗಿದ್ದು, ಮೇನಕಾ ಗುರುಸ್ವಾಮಿ ಅವರೊಂದಿಗೆ ಮಾಜಿ ಕೇಂದ್ರ ಸಚಿವ ಬಾಬುಲ್ ಸುಪ್ರಿಯೋ, ರಾಜ್ಯಸಭಾ ಸದಸ್ಯ ರಾಜೀವ್ ಕುಮಾರ್ ಮತ್ತು ಖ್ಯಾತ ನಟಿ ಕೋಯಲ್ ಮಲ್ಲಿಕ್ ಅವರ ಹೆಸರನ್ನೂ ಟಿಎಂಸಿ ಅಂತಿಮಗೊಳಿಸಿದೆ. ಈ ಮೂಲಕ ಪಶ್ಚಿಮ ಬಂಗಾಳದ ಆಡಳಿತಾರೂಢ ಪಕ್ಷವು ವೃತ್ತಿಪರರು ಮತ್ತು ಜನಪ್ರಿಯ ವ್ಯಕ್ತಿಗಳನ್ನೊಳಗೊಂಡ ಸಮತೋಲಿತ ಪಟ್ಟಿಯನ್ನು ಬಿಡುಗಡೆ ಮಾಡಿದಂತಾಗಿದೆ.

ಸುಪ್ರೀಂ ಕೋರ್ಟ್‌ನ ಹಿರಿಯ ವಕೀಲರಾಗಿ ದಶಕಗಳ ಕಾಲ ಸಾಂವಿಧಾನಿಕ ಹೋರಾಟ ನಡೆಸಿರುವ ಮೇನಕಾ ಗುರುಸ್ವಾಮಿ ಅವರು ರಾಜ್ಯಸಭೆಗೆ ಆಯ್ಕೆಯಾದಲ್ಲಿ, ಭಾರತದ ಮೊದಲ ಎಲ್‌ಜಿಬಿಟಿಕ್ಯೂ (LGBTQ+) ಸಮುದಾಯದ ಸಂಸದೆಯಾಗಲಿದ್ದಾರೆ. ದೇಶದ ಕಾನೂನು ರೂಪಿಸುವ ಅತ್ಯುನ್ನತ ಸದನದಲ್ಲಿ ಈ ಸಮುದಾಯಕ್ಕೆ ನೇರ ಪ್ರಾತಿನಿಧ್ಯ ಸಿಗುತ್ತಿರುವುದು ಸಾಮಾಜಿಕ ಒಳಗೊಳ್ಳುವಿಕೆಯ ದೃಷ್ಟಿಯಿಂದ ದೊಡ್ಡ ಯಶಸ್ಸು ಎನ್ನಲಾಗಿದೆ. ಸೆಕ್ಷನ್ 377 ರದ್ದತಿಯಂತಹ ಐತಿಹಾಸಿಕ ಕಾನೂನು ಹೋರಾಟಗಳಲ್ಲಿ ಮೇನಕಾ ಅವರ ಪಾತ್ರ ಅತಿ ದೊಡ್ಡದಾಗಿದೆ.

ಇತ್ತೀಚೆಗಷ್ಟೇ ರಾಜಕೀಯ ಚಟುವಟಿಕೆಗಳ ಕೇಂದ್ರಬಿಂದುವಾಗಿದ್ದ ಐ-ಪ್ಯಾಕ್ (I-PAC) ಆವರಣದಲ್ಲಿ ಜಾರಿ ನಿರ್ದೇಶನಾಲಯ (ಇಡಿ) ನಡೆಸಿದ ಶೋಧ ಕಾರ್ಯವನ್ನು ಪ್ರಶ್ನಿಸಿ ನಡೆದ ಕಾನೂನು ಸಮರದಲ್ಲಿ ತೃಣಮೂಲ ಕಾಂಗ್ರೆಸ್ ಪರವಾಗಿ ಮೇನಕಾ ಗುರುಸ್ವಾಮಿ ಅವರು ಪ್ರಬಲವಾಗಿ ವಾದ ಮಂಡಿಸಿದ್ದರು. ಈ ಹಿನ್ನೆಲೆಯಲ್ಲಿ ಪಕ್ಷವು ಅವರ ವೃತ್ತಿಪರ ದಕ್ಷತೆ ಮತ್ತು ಸಂವಿಧಾನದ ಮೇಲಿನ ಹಿಡಿತವನ್ನು ಗುರುತಿಸಿ ಈ ಮಹತ್ವದ ಜವಾಬ್ದಾರಿ ನೀಡಿದೆ ಎಂದು ರಾಜಕೀಯ ವಲಯದಲ್ಲಿ ಚರ್ಚೆಯಾಗುತ್ತಿದೆ.