ತಮಿಳುನಾಡು ಮಹಿಳೆಯರಿಗೆ ಬಂಪರ್ ಕೊಡುಗೆ: ಖಾತೆಗೆ 5,000 ರೂ. ಜಮೆ ಮಾಡಿದ ಸಿಎಂ ಸ್ಟಾಲಿನ್!

ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಅವರು 'ಕಲೈಜ್ಞರ್ ಮಹಿಳಾ ಹಕ್ಕು ಯೋಜನೆ'ಯಡಿ ಫಲಾನುಭವಿ ಮಹಿಳೆಯರಿಗೆ ತಲಾ 5,000 ರೂಪಾಯಿ ವಿತರಿಸುವುದಾಗಿ ಶುಕ್ರವಾರ ಘೋಷಿಸಿದ್ದಾರೆ. ಮಹಿಳಾ ಕಲ್ಯಾಣಕ್ಕಾಗಿ ತಮ್ಮ ಸರ್ಕಾರ ಹೊಂದಿರುವ ಬದ್ಧತೆಯ ಭಾಗವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಈ ಕುರಿತು ಎಕ್ಸ್ (X) ಜಾಲತಾಣದಲ್ಲಿ ಪೋಸ್ಟ್ ಮಾಡಿರುವ ಅವರು, ಫೆಬ್ರವರಿ, ಮಾರ್ಚ್ ಮತ್ತು ಏಪ್ರಿಲ್ ತಿಂಗಳ ಪಾವತಿಗಳನ್ನು ಒಳಗೊಂಡಂತೆ ಈ ಮೊತ್ತವನ್ನು ನೀಡಲಾಗುತ್ತಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. ಇದರಲ್ಲಿ ತಿಂಗಳ ನಿಯಮಿತ ಹಂಚಿಕೆಯಾದ 3,000 ರೂಪಾಯಿ (ತಲಾ 1,000 ರೂ. ನಂತೆ 3 ತಿಂಗಳಿಗೆ) ಮತ್ತು 'ಬೇಸಿಗೆ ವಿಶೇಷ' ಬೋನಸ್ ಆಗಿ ಹೆಚ್ಚುವರಿ 2,000 ರೂಪಾಯಿ ಸೇರಿದೆ. ಈಗಾಗಲೇ 1.31 ಕೋಟಿ ಮಹಿಳೆಯರ ಖಾತೆಗೆ ಈ ಹಣ ಜಮೆಯಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಈ ಬಗ್ಗೆ ಎಕ್ಸ್‌ನಲ್ಲಿ ಪೋಸ್ಟ್‌ ಮಾಡಿರುವ ಸ್ಟಾಲಿನ್, "ತಮಿಳುನಾಡಿನ ಮಹಿಳೆಯರಿಗೆ ಈ ಸ್ಟಾಲಿನ್ ನೀಡಿದ ಭರವಸೆಯು ಅವರ ಹಕ್ಕಿನ ಹಂಚಿಕೆಯಾಗಿದೆ. ಯಾರು ಎಷ್ಟೇ ಅಡೆತಡೆಗಳನ್ನು ಒಡ್ಡಿದರೂ ನಾನು ಇದರಿಂದ ಹಿಂದೆ ಸರಿಯುವುದಿಲ್ಲ" ಎಂದು ಅವರು ಬರೆದಿದ್ದಾರೆ.

ಚುನಾವಣೆಗಳ ನೆಪವೊಡ್ಡಿ ಮೂರು ತಿಂಗಳ ಹಂಚಿಕೆಯನ್ನು ಸ್ಥಗಿತಗೊಳಿಸಲು ಕೆಲವರು ಪ್ರಯತ್ನಿಸುತ್ತಿದ್ದಾರೆ ಎಂದು ಆರೋಪಿಸಿದ ಅವರು, ನಮ್ಮ ದ್ರಾವಿಡ ಮಾಡೆಲ್ ಸರ್ಕಾರ ನೀಡಿದ ಭರವಸೆಯನ್ನು ಈಡೇರಿಸಿಯೇ ತೀರುತ್ತೇವೆ ಎಂದು ಹೇಳಿದ್ದಾರೆ. ಮುಂದಿನ ದಿನಗಳಲ್ಲಿ ಬರಲಿರುವ 'ದ್ರಾವಿಡ ಮಾಡೆಲ್ 2.0' ಯೋಜನೆಯಲ್ಲಿ ಮಾಸಿಕ ಹಂಚಿಕೆಯ ಮೊತ್ತವನ್ನು 1,000 ರೂಪಾಯಿಯಿಂದ 2,000 ರೂಪಾಯಿಗೆ ಹೆಚ್ಚಿಸಲಾಗುವುದು ಎಂದು ಡಿಎಂಕೆ ನಾಯಕ ಭರವಸೆ ನೀಡಿದ್ದಾರೆ.

ಈ ವರ್ಷದ ಅಂತ್ಯದಲ್ಲಿ ತಮಿಳುನಾಡು ವಿಧಾನಸಭೆ ಚುನಾವಣೆ ನಡೆಯಲಿದ್ದು, ಮಹಿಳೆಯರನ್ನು ಗುರಿಯಾಗಿಸಿಕೊಂಡು ಜಾರಿಗೊಳಿಸಲಾಗಿರುವ ಕಲ್ಯಾಣ ಯೋಜನೆಗಳನ್ನು ಸ್ಟಾಲಿನ್ ಸರ್ಕಾರ ತನ್ನ ಪ್ರಮುಖ ಪ್ರಚಾರದ ಅಸ್ತ್ರವನ್ನಾಗಿ ಮಾಡಿಕೊಂಡಿದೆ.