Keralam Assembly Election| ಬಿಜೆಪಿಗೆ 3 ಸೀಟು ಸಿಕ್ಕರೂ ಹೆಚ್ಚದ ಮತ ಹಂಚಿಕೆ; ಕಾಂಗ್ರೆಸ್ ಮತ್ತು ಮುಸ್ಲಿಂ ಲೀಗ್‌ಗೆ ಭರ್ಜರಿ ಲಾಭ!

ಕೇರಳ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ ಈ ಬಾರಿ ಮೂರು ಸ್ಥಾನಗಳನ್ನು ಗೆಲ್ಲುವ ಮೂಲಕ ಖಾತೆ ತೆರೆದಿದ್ದರೂ, ಪಕ್ಷದ ಒಟ್ಟಾರೆ ಮತ ಹಂಚಿಕೆಯಲ್ಲಿ ನಿರೀಕ್ಷಿತ ಪ್ರಗತಿ ಕಂಡುಬಂದಿಲ್ಲ. 2021ರ ಚುನಾವಣೆಗೆ ಹೋಲಿಸಿದರೆ ಈ ಬಾರಿ ಬಿಜೆಪಿಯ ಮತ ಪ್ರಮಾಣದಲ್ಲಿ ಯಾವುದೇ ಗಣನೀಯ ಏರಿಕೆ ದಾಖಲಾಗಿಲ್ಲ. ಚುನಾವಣಾ ಆಯೋಗದ ಅಂಕಿ-ಅಂಶಗಳ ಪ್ರಕಾರ ವಿವಿಧ ಪಕ್ಷಗಳ ಮತ ಹಂಚಿಕೆಯ ಸಂಪೂರ್ಣ ವಿವರ ಇಲ್ಲಿದೆ:

ಬಿಜೆಪಿಯ ಗುರಿ ಮತ್ತು ವಾಸ್ತವ

ರಾಜ್ಯದಲ್ಲಿ ಪ್ರಬಲ ರಾಜಕೀಯ ಶಕ್ತಿಯಾಗಿ ಹೊರಹೊಮ್ಮಲು ಬಿಜೆಪಿ ಈ ಬಾರಿ ಶೇ. 20ರಷ್ಟು ಮತ ಹಂಚಿಕೆಯ ಗುರಿ ಹೊಂದಿತ್ತು. ಆದರೆ, ಸೋಮವಾರದ ವರದಿಯಂತೆ ಬಿಜೆಪಿ ಶೇ. 11.42 ರಷ್ಟು ಮತಗಳನ್ನು (24,66,178 ಮತಗಳು) ಪಡೆದಿದೆ. 2021ರಲ್ಲಿ ಬಿಜೆಪಿ ಶೇ. 11.30 ರಷ್ಟು (23,54,468 ಮತಗಳು) ಮತಗಳನ್ನು ಪಡೆದಿತ್ತು. ಅಂದರೆ ಕಳೆದ ಐದು ವರ್ಷಗಳಲ್ಲಿ ಮತ ಹಂಚಿಕೆಯಲ್ಲಿ ಕೇವಲ ಶೇ. 0.12 ರಷ್ಟು ಮಾತ್ರ ಏರಿಕೆಯಾಗಿದೆ.

ವಿಶೇಷವೆಂದರೆ, 2024ರ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ಶೇ. 16.68 ರಷ್ಟು ಮತ್ತು 2025ರ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಶೇ. 14.6 ರಷ್ಟು ಮತಗಳನ್ನು ಪಡೆದಿತ್ತು. ಈ ಅಂಕಿ-ಅಂಶಗಳಿಗೆ ಹೋಲಿಸಿದರೆ ವಿಧಾನಸಭೆಯಲ್ಲಿ ಬಿಜೆಪಿಗೆ ಹಿನ್ನಡೆಯಾದಂತಿದೆ.

ಕಾಂಗ್ರೆಸ್ ಮತ್ತು ಯುಡಿಎಫ್ ಅಬ್ಬರ

ಪ್ರತಿಪಕ್ಷ ಕಾಂಗ್ರೆಸ್ ಈ ಚುನಾವಣೆಯಲ್ಲಿ ತನ್ನ ಮತ ಹಂಚಿಕೆಯನ್ನು ಶೇ. 25.12ರಿಂದ (52,33,429 ಮತಗಳು) ಶೇ. 28.79ಕ್ಕೆ (62,17,918 ಮತಗಳು) ಹೆಚ್ಚಿಸಿಕೊಳ್ಳುವ ಮೂಲಕ ಗಣನೀಯ ಸಾಧನೆ ಮಾಡಿದೆ. ಇದೇ ವೇಳೆ ಇಂಡಿಯನ್ ಯೂನಿಯನ್ ಮುಸ್ಲಿಂ ಲೀಗ್ (IUML) ಕೂಡ ಭರ್ಜರಿ ಲಾಭ ಮಾಡಿಕೊಂಡಿದ್ದು, ತನ್ನ ಮತ ಹಂಚಿಕೆಯನ್ನು ಶೇ. 8.27ರಿಂದ ಶೇ. 11.01ಕ್ಕೆ (23,78,053 ಮತಗಳು) ಏರಿಸಿಕೊಳ್ಳುವ ಮೂಲಕ ಕೇರಳದ ನಾಲ್ಕನೇ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ.

ಎಲ್‌ಡಿಎಫ್‌ಗೆ ಭಾರೀ ಕುಸಿತ

ಆಡಳಿತಾರೂಢ ಸಿಪಿಐ(ಎಂ) ನೇತೃತ್ವದ ಎಲ್‌ಡಿಎಫ್ ಮೈತ್ರಿಕೂಟಕ್ಕೆ ಮತ ಹಂಚಿಕೆಯಲ್ಲಿ ದೊಡ್ಡ ಹೊಡೆತ ಬಿದ್ದಿದೆ. 2021ರಲ್ಲಿ ಶೇ. 25.38 ರಷ್ಟಿದ್ದ ಸಿಪಿಐ(ಎಂ) ಮತ ಪ್ರಮಾಣ, ಈ ಬಾರಿ ಶೇ. 21.77 ಕ್ಕೆ ಇಳಿಕೆಯಾಗಿದೆ. ಸುಮಾರು 6 ಲಕ್ಷಕ್ಕೂ ಅಧಿಕ ಮತಗಳನ್ನು ಪಕ್ಷ ಕಳೆದುಕೊಂಡಿದೆ. ಸಿಪಿಐ ಮತ ಪ್ರಮಾಣ ಶೇ. 7.58 ರಿಂದ ಶೇ. 6.64 ಕ್ಕೆ ಕುಸಿದಿದೆ. ಕೇರಳ ಕಾಂಗ್ರೆಸ್ (ಎಂ) ಶೇ. 3.28 ರಿಂದ ಶೇ. 2.60 ಕ್ಕೆ ಇಳಿಕೆ ಕಂಡಿದೆ.

ಕೇರಳದಲ್ಲಿ ಯುಡಿಎಫ್ (UDF) ಮೈತ್ರಿಕೂಟವು ತನ್ನ ಜನಪ್ರಿಯತೆಯನ್ನು ಮರಳಿ ಪಡೆದಿದ್ದರೆ, ಎಲ್‌ಡಿಎಫ್ (LDF) ಆಡಳಿತ ವಿರೋಧಿ ಅಲೆಯಿಂದಾಗಿ ಮತಗಳನ್ನು ಕಳೆದುಕೊಂಡಿದೆ. ಬಿಜೆಪಿ ಸ್ಥಾನಗಳನ್ನು ಗೆದ್ದರೂ 'ಮೂರನೇ ಅತಿ ದೊಡ್ಡ ಪಕ್ಷʼವಾಗಿ ಬೆಳೆಯಲು ಬೇಕಾದ ಮತ ಹಂಚಿಕೆಯನ್ನು ಪಡೆಯುವಲ್ಲಿ ವಿಫಲವಾಗಿದೆ.