ರಾಜಸ್ಥಾನದ ಜೈಪುರದಲ್ಲಿ ರಷ್ಯಾದ ಕಲಾವಿದೆಯೊಬ್ಬರು ನಡೆಸಿದ ವಿಭಿನ್ನ ಫೋಟೋಶೂಟ್ ಈಗ ಭಾರೀ ವಿವಾದಕ್ಕೆ ಕಾರಣವಾಗಿದೆ.
Viral News|ಗುಲಾಬಿ ಬಣ್ಣದ ಆನೆಯ ಮೇಲೆ ಕುಳಿತು ವಿದೇಶಿ ಯುವತಿಯ ಅಶ್ಲೀಲ ಫೋಟೋಶೂಟ್
ಘಟನೆಯ ಬೆನ್ನಲ್ಲೇ ಮತ್ತೊಂದು ಆಘಾತಕಾರಿ ಸುದ್ದಿ ಹೊರಬಿದ್ದಿದ್ದು, ಫೋಟೋಶೂಟ್ನಲ್ಲಿ ಭಾಗಿಯಾಗಿದ್ದ ಸುಮಾರು 70 ವರ್ಷದ ಚಂಚಲ್ ಕಳೆದ ತಿಂಗಳು ಮೃತಪಟ್ಟಿದೆ.
ರಾಜಸ್ಥಾನದ ಜೈಪುರದಲ್ಲಿ ರಷ್ಯಾದ ಕಲಾವಿದೆಯೊಬ್ಬರು ನಡೆಸಿದ ಅಶ್ಲೀಲ ಫೋಟೋಶೂಟ್ ಈಗ ಭಾರೀ ವಿವಾದಕ್ಕೆ ಕಾರಣವಾಗಿದೆ. ಆನೆಯೊಂದಕ್ಕೆ ಸಂಪೂರ್ಣವಾಗಿ ಗಾಢ ಗುಲಾಬಿ ಬಣ್ಣವನ್ನು ಹಚ್ಚಿ ಚಿತ್ರೀಕರಿಸಲಾದ ಫೋಟೋಗಳು ಮತ್ತು ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದು, ಪ್ರಾಣಿ ಪ್ರೇಮಿಗಳು ಹಾಗೂ ಸಾರ್ವಜನಿಕರಿಂದ ತೀವ್ರ ಆಕ್ಷೇಪ ವ್ಯಕ್ತವಾಗಿದೆ. ಈ ಘಟನೆಯು ಪ್ರಾಣಿಗಳ ಮೇಲಿನ ದೌರ್ಜನ್ಯ ಮತ್ತು ಕಲಾತ್ಮಕ ಚಟುವಟಿಕೆಗಳಲ್ಲಿ ಪ್ರಾಣಿಗಳ ಬಳಕೆಯ ಕುರಿತು ದೊಡ್ಡ ಮಟ್ಟದ ಚರ್ಚೆಯನ್ನು ಹುಟ್ಟುಹಾಕಿದೆ.
ಪ್ರಯಾಣಿಕ ಕಲಾ ಛಾಯಾಗ್ರಾಹಕಿ ಜೂಲಿಯಾ ಬುರುಲೆವಾ ಅವರು 2025ರ ನವೆಂಬರ್ನಲ್ಲಿ ಜೈಪುರದ ಕೈಬಿಟ್ಟ ಗಣೇಶ ದೇವಾಲಯವೊಂದರಲ್ಲಿ ಈ ಫೋಟೋಶೂಟ್ ನಡೆಸಿದ್ದರು. ಜೈಪುರದ ಐತಿಹಾಸಿಕ 'ಪಿಂಕ್ ಸಿಟಿ' ವೈಭವದಿಂದ ಪ್ರೇರಿತರಾಗಿ ಆನೆ ಮತ್ತು ಮಾಡೆಲ್ ಯಶಸ್ವಿ ಅವರಿಗೆ ಗುಲಾಬಿ ಬಣ್ಣ ಬಳಿದು ಈ ಚಿತ್ರೀಕರಣ ಮಾಡಲಾಗಿತ್ತು. ರಾಜಸ್ಥಾನದ ಸಂಸ್ಕೃತಿಯಲ್ಲಿ ಆನೆಗಳು ಪ್ರಮುಖ ಸ್ಥಾನ ಪಡೆದಿರುವುದರಿಂದ ತಮ್ಮ ಕಲ್ಪನೆಗೆ ಆನೆಯನ್ನು ಬಳಸಿಕೊಂಡಿದ್ದಾಗಿ ಜೂಲಿಯಾ ತಿಳಿಸಿದ್ದಾರೆ. ಆದರೆ, ಈ ವಿಡಿಯೋಗಳು ಇತ್ತೀಚೆಗೆ ವೈರಲ್ ಆದ ಬೆನ್ನಲ್ಲೇ ಆನೆಗೆ ಹಾನಿಕಾರಕ ಬಣ್ಣ ಹಚ್ಚಲಾಗಿದೆ ಎಂಬ ಟೀಕೆಗಳು ಕೇಳಿಬಂದಿವೆ.
ವಿವಾದಕ್ಕೀಡಾದ ಈ ಆನೆಯ ಹೆಸರು ಚಂಚಲ್ ಎಂದು ಗುರುತಿಸಲಾಗಿದ್ದು, ಇದು ಹಾಥಿ ಗಾಂವ್ (ಆನೆ ಗ್ರಾಮ) ಪ್ರದೇಶಕ್ಕೆ ಸೇರಿದ್ದಾಗಿತ್ತು. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಹಾಥಿ ಗಾಂವ್ ಸಮಿತಿಯ ಅಧ್ಯಕ್ಷ ಬಲ್ಲು ಖಾನ್, ಆನೆಗೆ ಹೋಳಿ ಹಬ್ಬದಲ್ಲಿ ಬಳಸುವ ನೈಸರ್ಗಿಕ 'ಗುಲಾಲ್' ಪುಡಿಯನ್ನು ಮಾತ್ರ ಹಚ್ಚಲಾಗಿತ್ತು ಮತ್ತು ಚಿತ್ರೀಕರಣ ಮುಗಿದ ಕೇವಲ 30 ನಿಮಿಷಗಳಲ್ಲೇ ಬಣ್ಣವನ್ನು ತೊಳೆದು ಸ್ವಚ್ಛಗೊಳಿಸಲಾಗಿತ್ತು ಎಂದು ಸ್ಪಷ್ಟಪಡಿಸಿದ್ದಾರೆ.
ಸಾವಿಗೀಡಾದ ಆನೆ
ಘಟನೆಯ ಬೆನ್ನಲ್ಲೇ ಮತ್ತೊಂದು ಆಘಾತಕಾರಿ ಸುದ್ದಿ ಹೊರಬಿದ್ದಿದ್ದು, ಫೋಟೋಶೂಟ್ನಲ್ಲಿ ಭಾಗಿಯಾಗಿದ್ದ ಸುಮಾರು 70 ವರ್ಷದ ಚಂಚಲ್ ಕಳೆದ ತಿಂಗಳು ಮೃತಪಟ್ಟಿದೆ. ಆನೆಯ ಸಾವು ಮತ್ತು ಫೋಟೋಶೂಟ್ ವಿವಾದಕ್ಕೂ ನೇರ ಸಂಬಂಧವಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ವಯೋಸಹಜ ಕಾರಣಗಳಿಂದಾಗಿ ಆನೆ ಮೃತಪಟ್ಟಿದೆ ಎಂದು ಪ್ರಾಥಮಿಕ ವರದಿಗಳು ಹೇಳಿವೆಯಾದರೂ, ವಿಡಿಯೋ ವೈರಲ್ ಆದ ಸಮಯದಲ್ಲಿಯೇ ಆನೆಯ ಸಾವಿನ ಸುದ್ದಿ ಬಂದಿರುವುದು ಸಾರ್ವಜನಿಕರ ಆಕ್ರೋಶವನ್ನು ಮತ್ತಷ್ಟು ಹೆಚ್ಚಿಸಿದೆ. ವಾಣಿಜ್ಯ ಮತ್ತು ಕಲಾತ್ಮಕ ಉದ್ದೇಶಗಳಿಗಾಗಿ ಪ್ರಾಣಿಗಳನ್ನು ಬಳಸುವಾಗ ಕಟ್ಟುನಿಟ್ಟಿನ ನಿಯಮಗಳನ್ನು ಪಾಲಿಸಬೇಕು ಎಂದು ನೆಟ್ಟಿಗರು ಆಗ್ರಹಿಸುತ್ತಿದ್ದಾರೆ.
ಸದ್ಯ ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ರಾಜಸ್ಥಾನದ ಅರಣ್ಯ ಇಲಾಖೆಯು ತನಿಖೆಗೆ ಆದೇಶಿಸಿದೆ. ವನ್ಯಜೀವಿ ಸಂರಕ್ಷಣಾ ಕಾಯ್ದೆಯ ಯಾವುದೇ ನಿಯಮಗಳನ್ನು ಇಲ್ಲಿ ಉಲ್ಲಂಘಿಸಲಾಗಿದೆಯೇ ಎಂಬ ಬಗ್ಗೆ ತನಿಖೆ ನಡೆಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಒಂದು ವೇಳೆ ಪ್ರಾಣಿಯ ಸುರಕ್ಷತೆಯಲ್ಲಿ ನಿರ್ಲಕ್ಷ್ಯ ಅಥವಾ ಕಾನೂನು ಉಲ್ಲಂಘನೆ ಕಂಡುಬಂದಲ್ಲಿ ಫೋಟೋಶೂಟ್ ಆಯೋಜಕರು ಮತ್ತು ಆನೆಯ ಮಾಲೀಕರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಇಲಾಖೆ ಎಚ್ಚರಿಸಿದೆ.
