ಎಐ ಸಮ್ಮಿಟ್|ಅಮೆರಿಕ ನೇತೃತ್ವದ 'ಪ್ಯಾಕ್ಸ್ ಸಿಲಿಕಾ' ಒಕ್ಕೂಟಕ್ಕೆ ಭಾರತ ಸೇರ್ಪಡೆ
ಅಮೆರಿಕ ನೇತೃತ್ವದ ಪ್ಯಾಕ್ಸ್ ಸಿಲಿಕಾ ಒಕ್ಕೂಟಕ್ಕೆ ಭಾರತ ಅಧಿಕೃತವಾಗಿ ಸೇರ್ಪಡೆಗೊಂಡಿದೆ. ಕೃತಕ ಬುದ್ಧಿಮತ್ತೆ ಮತ್ತು ಸೆಮಿಕಂಡಕ್ಟರ್ ಪೂರೈಕೆ ಸರಪಳಿ ಬಲಪಡಿಸುವುದು ಇದರ ಮುಖ್ಯ ಉದ್ದೇಶ.
ಭಾರತವು ಶುಕ್ರವಾರ ಅಧಿಕೃತವಾಗಿ ಅಮೆರಿಕ ನೇತೃತ್ವದ 'ಪ್ಯಾಕ್ಸ್ ಸಿಲಿಕಾ' (Pax Silica) ಒಕ್ಕೂಟಕ್ಕೆ ಸೇರ್ಪಡೆಗೊಂಡಿದೆ. ಕೃತಕ ಬುದ್ಧಿಮತ್ತೆ (AI) ಮತ್ತು ನಿರ್ಣಾಯಕ ಖನಿಜಗಳ ಪೂರೈಕೆ ಸರಪಳಿಯನ್ನು ಬಲಪಡಿಸುವ ಉದ್ದೇಶದೊಂದಿಗೆ ಅಮೆರಿಕ ಆರಂಭಿಸಿರುವ ಆಯಕಟ್ಟಿನ ಒಕ್ಕೂಟ 'ಪ್ಯಾಕ್ಸ್ ಸಿಲಿಕಾ'ಗೆ ಭಾರತ ಶುಕ್ರವಾರ ಔಪಚಾರಿಕವಾಗಿ ಪ್ರವೇಶಿಸಿದೆ.
ಐತಿಹಾಸಿಕ ಒಪ್ಪಂದಕ್ಕೆ ಸಹಿ
ನವದೆಹಲಿಯಲ್ಲಿ ನಡೆದ 'AI ಇಂಪ್ಯಾಕ್ಟ್ ಸಮ್ಮಿಟ್' ಕಾರ್ಯಕ್ರಮದಲ್ಲಿ ಈ ಐತಿಹಾಸಿಕ ಒಪ್ಪಂದಕ್ಕೆ ಸಹಿ ಹಾಕಲಾಯಿತು. ಕೇಂದ್ರ ಸಚಿವ ಅಶ್ವಿನಿ ವೈಷ್ಣವ್ ಅವರು ಭಾರತದ ಪರವಾಗಿ ಪಾಲ್ಗೊಂಡಿದ್ದರು. ಭಾರತಕ್ಕೆ ಅಮೆರಿಕದ ರಾಯಭಾರಿಯಾಗಿರುವ ಸರ್ಜಿಯೋ ಗೋರ್ ಮತ್ತು ಅಮೆರಿಕದ ಆರ್ಥಿಕ ವ್ಯವಹಾರಗಳ ಅಂಡರ್ ಸೆಕ್ರೆಟರಿ ಜೇಕಬ್ ಹೆಲ್ಬರ್ಗ್ ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.
ಏನಿದು 'ಪ್ಯಾಕ್ಸ್ ಸಿಲಿಕಾ'?
'ಪ್ಯಾಕ್ಸ್ ಸಿಲಿಕಾ' ಎಂಬುದು ಕೃತಕ ಬುದ್ಧಿಮತ್ತೆ (AI), ಅರೆವಾಹಕಗಳು (Semiconductors) ಮತ್ತು ಅತ್ಯಗತ್ಯ ಖನಿಜಗಳ ಪೂರೈಕೆ ಸರಪಳಿಯನ್ನು ಸುರಕ್ಷಿತಗೊಳಿಸಲು ರೂಪಿಸಲಾದ ರಾಷ್ಟ್ರಗಳ ಒಕ್ಕೂಟವಾಗಿದೆ. ಇದನ್ನು ಕಳೆದ ವರ್ಷ ಡಿಸೆಂಬರ್ 12 ರಂದು ವಾಷಿಂಗ್ಟನ್ನಲ್ಲಿ ನಡೆದ ಶೃಂಗಸಭೆಯಲ್ಲಿ ಅಧಿಕೃತವಾಗಿ ಘೋಷಿಸಲಾಯಿತು. "ಮುಂದಿನ ಭವಿಷ್ಯವು ಹೊಸತನ್ನು ನಿರ್ಮಿಸುವವರಿಗೆ ಸೇರಿದ್ದು" ಎಂಬ ಘೋಷಣೆಯೊಂದಿಗೆ ಈ ಒಕ್ಕೂಟ ಕಾರ್ಯನಿರ್ವಹಿಸಲಿದೆ.
#WATCH | Delhi: Ashwini Vaishnaw, Union Minister for Electronics & Information Technology, says, "...The world trusts India...We have a large talent pool, and we have conducted our foreign policy in a way which creates their trust. As part of that, today, the Pax Silica was… pic.twitter.com/CqOhZ49LAM
— ANI (@ANI) February 20, 2026
ಒಕ್ಕೂಟದಲ್ಲಿರುವ ಇತರ ಸದಸ್ಯ ರಾಷ್ಟ್ರಗಳು
ಭಾರತದ ಜೊತೆಗೆ ಆಸ್ಟ್ರೇಲಿಯಾ, ಜಪಾನ್, ಸಿಂಗಾಪುರ, ದಕ್ಷಿಣ ಕೊರಿಯಾ, ಯುನೈಟೆಡ್ ಕಿಂಗ್ಡಮ್ (UK), ಇಸ್ರೇಲ್, ಗ್ರೀಸ್, ಕತಾರ್ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) ಹೀಗೆ ಪ್ರಭಾವಿ ರಾಷ್ಟ್ರಗಳು ಪ್ಯಾಕ್ಸ್ ಸಿಲಿಕಾದ ಸದಸ್ಯರಾಗಿವೆ.
ಭಾರತಕ್ಕೆ ಆಗುವ ಲಾಭಗಳೇನು?
ಭಾರತವು 'ಪ್ಯಾಕ್ಸ್ ಸಿಲಿಕಾ' ಒಕ್ಕೂಟಕ್ಕೆ ಸೇರ್ಪಡೆಯಾಗಿರುವುದರಿಂದ ದೇಶದ ಆರ್ಥಿಕ ಮತ್ತು ತಾಂತ್ರಿಕ ವಲಯದಲ್ಲಿ ಮಹತ್ವದ ಬದಲಾವಣೆಗಳು ಉಂಟಾಗಲಿವೆ. ಈ ಒಪ್ಪಂದದ ಅಡಿಯಲ್ಲಿ ಕಚ್ಚಾ ವಸ್ತುಗಳ ಪೂರೈಕೆಯಿಂದ ಹಿಡಿದು ಸುಧಾರಿತ ಹಾರ್ಡ್ವೇರ್ ಮತ್ತು ಕೃತಕ ಬುದ್ಧಿಮತ್ತೆ (AI) ಮೂಲಸೌಕರ್ಯಗಳವರೆಗೆ ಉನ್ನತ ಮಟ್ಟದ ತಾಂತ್ರಿಕ ಸಹಕಾರವು ಭಾರತಕ್ಕೆ ಲಭ್ಯವಾಗಲಿದೆ. ವಿಶೇಷವಾಗಿ AI ಕ್ಷೇತ್ರದಲ್ಲಿ ಜಾಗತಿಕ ಹೂಡಿಕೆಯನ್ನು ಆಕರ್ಷಿಸಲು ಮತ್ತು ಅತ್ಯಾಧುನಿಕ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳಲು ಈ ವೇದಿಕೆಯು ಭದ್ರ ಬುನಾದಿ ಒದಗಿಸಲಿದೆ.
ಭಾರತದ 'ಸೆಮಿಕಂಡಕ್ಟರ್ ಮಿಷನ್'ಗೆ ಆನೆಬಲ
ಭಾರತವು ಈಗಾಗಲೇ ತನ್ನದೇ ಆದ 'ಇಂಡಿಯಾ ಸೆಮಿಕಂಡಕ್ಟರ್ ಮಿಷನ್' (ISM) ಅಡಿಯಲ್ಲಿ ಚಿಪ್ ತಯಾರಿಕೆಗೆ ಶತಕೋಟಿ ಡಾಲರ್ ಹೂಡಿಕೆ ಮಾಡುತ್ತಿದೆ. ಪ್ಯಾಕ್ಸ್ ಸಿಲಿಕಾ ಸೇರ್ಪಡೆಯಿಂದಾಗಿ ಜಪಾನ್ ಮತ್ತು ದಕ್ಷಿಣ ಕೊರಿಯಾದಂತಹ ತಾಂತ್ರಿಕ ದೈತ್ಯ ರಾಷ್ಟ್ರಗಳೊಂದಿಗೆ ಭಾರತಕ್ಕೆ ನೇರ ಸಂಪರ್ಕ ಸಿಗಲಿದೆ. ಇದು ಭಾರತದಲ್ಲಿ 'ಚಿಪ್ ಫ್ಯಾಬ್ರಿಕೇಶನ್' ಘಟಕಗಳ ಸ್ಥಾಪನೆಗೆ ವೇಗ ನೀಡಲಿದೆ.
ಗಾಜಾ ಬೋರ್ಡ್ ಆಫ್ ಪೀಸ್ ಮತ್ತು ಪ್ಯಾಕ್ಸ್ ಸಿಲಿಕಾ
ಗಮನಾರ್ಹ ವಿಷಯವೆಂದರೆ, ಇತ್ತೀಚೆಗೆ ನಡೆದ ಅಮೆರಿಕ ನೇತೃತ್ವದ 'ಗಾಜಾ ಬೋರ್ಡ್ ಆಫ್ ಪೀಸ್' (Gaza Board of Peace) ಸಭೆಯಲ್ಲಿ ಭಾರತವು ವೀಕ್ಷಕ ರಾಷ್ಟ್ರವಾಗಿ ಭಾಗವಹಿಸಿತ್ತು. ಇದರ ಬೆನ್ನಲ್ಲೇ ಪ್ಯಾಕ್ಸ್ ಸಿಲಿಕಾ ಸೇರಿರುವುದು ಅಮೆರಿಕ ಮತ್ತು ಭಾರತದ ನಡುವಿನ ಬಾಂಧವ್ಯವು ಕೇವಲ ಸೇನಾ ಸಂಬಂಧಕ್ಕೆ ಸೀಮಿತವಾಗಿಲ್ಲ, ಬದಲಿಗೆ ಆರ್ಥಿಕ ಮತ್ತು ತಾಂತ್ರಿಕವಾಗಿ ಹೊಸ ಹಂತಕ್ಕೆ ಏರುತ್ತಿದೆ ಎಂಬುದಕ್ಕೆ ಸಾಕ್ಷಿಯಾಗಿದೆ.
