ಸಾಮಾಜಿಕ ಜಾಲತಾಣಗಳ ವೈರಲ್ ಟ್ರೆಂಡ್ಗೆ ಪ್ರತಿಯಾಗಿ ತಮ್ಮದೇ ಆದ ಕಾಲ್ಪನಿಕ ‘ಖರಗೋಷ್ ಜನತಾ ಪಾರ್ಟಿ’ ಘೋಷಿಸಿದ ಪ್ರಸಿದ್ಧ ಯೂಟ್ಯೂಬರ್ ಎಲ್ವಿಶ್ ಯಾದವ್.
ಕಾಕ್ರೋಚ್ ಪಾರ್ಟಿಗೆ ಎಲ್ವಿಶ್ ‘ಖರಗೋಷ್ ಪಾರ್ಟಿ’ ಟಾಂಗ್
ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ‘ಕಾಕ್ರೋಚ್ ಜನತಾ ಪಾರ್ಟಿ’ ಟ್ರೆಂಡ್ಗೆ ಕೌಂಟರ್ ನೀಡಲು ಯೂಟ್ಯೂಬರ್ ಎಲ್ವಿಶ್ ಯಾದವ್ ಉಚಿತ ಕ್ಯಾರೆಟ್ ಭರವಸೆಯೊಂದಿಗೆ ‘ಖರಗೋಷ್ ಜನತಾ ಪಾರ್ಟಿ’ ಆರಂಭಿಸಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ಇತ್ತೀಚೆಗೆ ಭಾರಿ ಸದ್ದು ಮಾಡುತ್ತಿರುವ ‘ಕಾಕ್ರೋಚ್ ಜನತಾ ಪಾರ್ಟಿ’ (CJP) ಆಂದೋಲನಕ್ಕೆ ಪ್ರತಿಯಾಗಿ, ಪ್ರಸಿದ್ಧ ಯೂಟ್ಯೂಬರ್ ಹಾಗೂ ಬಿಗ್ ಬಾಸ್ ಒಟಿಟಿ ವಿಜೇತ ಎಲ್ವಿಶ್ ಯಾದವ್ ಈಗ ಹೊಸದೊಂದು ಕಾಲ್ಪನಿಕ ಪಕ್ಷವನ್ನು ಘೋಷಿಸಿದ್ದಾರೆ. ಮೊಲದ ಥೀಮ್ ಆಧಾರಿತ ಈ ಪಕ್ಷಕ್ಕೆ ‘ಖರಗೋಷ್ ಜನತಾ ಪಾರ್ಟಿ’ (KJP) ಎಂದು ಹೆಸರಿಡಲಾಗಿದ್ದು, ಇದು ಇಂಟರ್ನೆಟ್ ಲೋಕದಲ್ಲಿ ಭಾರಿ ಹಾಸ್ಯ ಮತ್ತು ಚರ್ಚೆಗೆ ಕಾರಣವಾಗಿದೆ.
ಜೂನ್ 10 ರಂದು ಈ ಹೊಸ ಪಕ್ಷದ ಪ್ರಣಾಳಿಕೆ ಮತ್ತು ಪೋಸ್ಟರ್ಗಳನ್ನು ಬಿಡುಗಡೆ ಮಾಡಿದ ಎಲ್ವಿಶ್ ಯಾದವ್, ತಾವೇ ಈ ಪಕ್ಷದ ಸಂಸ್ಥಾಪಕ ಮತ್ತು ಪ್ರಧಾನ ಮಂತ್ರಿ ಎಂದು ತಮಾಷೆಯಾಗಿ ಘೋಷಿಸಿಕೊಂಡಿದ್ದಾರೆ. ತೀಕ್ಷ್ಣ ಬುದ್ಧಿ, ಉದ್ದನೆಯ ಕಿವಿಗಳು ಮತ್ತು ಕ್ಯಾರೆಟ್ ಶಕ್ತಿಯಿಂದ ಅಭಿವೃದ್ಧಿ ಎಂಬ ಘೋಷವಾಕ್ಯ ಹೊಂದಿರುವ ಈ ಪಕ್ಷವು, ಪ್ರತಿಯೊಬ್ಬರಿಗೂ ಉಚಿತ ಕ್ಯಾರೆಟ್ ನೀಡುವುದು ತಮ್ಮ ಮೂಲಭೂತ ಹಕ್ಕು ಎಂದು ವ್ಯಂಗ್ಯವಾಡಿದೆ. ಅಷ್ಟೇ ಅಲ್ಲದೆ, ದೆಹಲಿಯ ಜಂತರ್ ಮಂತರ್ ಬಳಿ ಬರುವ ತಮ್ಮ ಬೆಂಬಲಿಗರಿಗೆ ಉಚಿತವಾಗಿ ಕ್ಯಾರೆಟ್ ಹಂಚಲಾಗುವುದು ಎಂದು ಟ್ವೀಟ್ ಮಾಡುವ ಮೂಲಕ ಎಲ್ವಿಶ್ ಯಾದವ್ ಹಾಸ್ಯದ ಅಲೆಯನ್ನು ಎಬ್ಬಿಸಿದ್ದಾರೆ.
ದೇಶದಲ್ಲಿ ಇತ್ತೀಚೆಗೆ ನಡೆದ ನೀಟ್ (NEET) ಪತ್ರಿಕೆ ಸೋರಿಕೆ ಮತ್ತು ಸಿಬಿಎಸ್ಇ ವಿವಾದಗಳಂತಹ ಗಂಭೀರ ವಿಷಯಗಳ ಬಗ್ಗೆ ಸರ್ಕಾರದ ಗಮನ ಸೆಳೆಯಲು ಯುವಕರು ‘ಕಾಕ್ರೋಚ್ ಜನತಾ ಪಾರ್ಟಿ’ ಹೆಸರಿನಲ್ಲಿ ಡಿಜಿಟಲ್ ಪ್ರತಿಭಟನೆ ಆರಂಭಿಸಿದ್ದರು. ಆದರೆ, ಈಗ ಎಲ್ವಿಶ್ ಯಾದವ್ ಆರಂಭಿಸಿರುವ ‘ಖರಗೋಷ್ ಜನತಾ ಪಾರ್ಟಿ’ ಸಾಮಾಜಿಕ ಮಾಧ್ಯಮಗಳಲ್ಲಿ ಇವೆರಡರ ನಡುವೆ ದೊಡ್ಡ ಮೀಮ್ ಯುದ್ಧಕ್ಕೆ ನಾಂದಿ ಹಾಡಿದೆ. ಒಂದು ಕಡೆ ನೆಟ್ಟಿಗರು ಇದನ್ನು ಕೇವಲ ಮನರಂಜನೆ ಎಂದು ಆನಂದಿಸುತ್ತಿದ್ದರೆ, ಇನ್ನೊಂದು ಕಡೆ ವಿದ್ಯಾರ್ಥಿಗಳ ಗಂಭೀರ ಸಮಸ್ಯೆಗಳನ್ನು ಇಂತಹ ಮೀಮ್ಗಳ ಮೂಲಕ ಹಗುರವಾಗಿ ತೆಗೆದುಕೊಳ್ಳಲಾಗುತ್ತಿದೆ ಎಂಬ ಟೀಕೆಗಳೂ ಕೇಳಿಬರುತ್ತಿವೆ.
