Today's live news Mar 12th:ಅಮೆರಿಕದ ತುರ್ತು ತೈಲ ಸಂಗ್ರಹ ಬಳಸಲು ಡೊನಾಲ್ಡ್ ಟ್ರಂಪ್ ನಿರ್ಧಾರ
ರಾಜ್ಯ, ಭಾರತ ಮತ್ತು ಜಗತ್ತಿನಾದ್ಯಂತ ನಡೆಯುತ್ತಿರುವ ಅತ್ಯಂತ ಪ್ರಮುಖ ಸುದ್ದಿಗಳ ಸಂಕ್ಷಿಪ್ತ ನೋಟ ಇಲ್ಲಿದೆ.
ಇಂದು ಗುರುವಾರ ಮಾರ್ಚ್ 12, 2026. ಭಾರತದ ರಾಜಕೀಯ, ಆರ್ಥಿಕ ಮತ್ತು ಸಾಂಸ್ಕೃತಿಕ ವಲಯಗಳಲ್ಲಿ ಮಹತ್ವದ ಬೆಳವಣಿಗೆಗಳು ನಡೆಯುತ್ತಿವೆ. ಇಂದಿನ ಪಮುಖ ಮತ್ತು ಟ್ರೆಂಡಿಂಗ್ ಸುದ್ದಿಗಳ ಸಮಗ್ರ ನೋಟ ಇಲ್ಲಿದೆ.
Live Updates
- 12 March 2026 8:18 AM IST
ಪೆಶಾವರ್ನಲ್ಲಿರುವ ರಾಯಭಾರಿ ಕಚೇರಿ ಕಾಯಂ ಬಂದ್
ಅಫ್ಘಾನ್ ಗಡಿಯ ಅತ್ಯಂತ ಸಮೀಪದಲ್ಲಿದ್ದ ಪಾಕಿಸ್ತಾನದ ಪೆಶಾವರ್ನಲ್ಲಿರುವ ತನ್ನ ರಾಯಭಾರಿ ಕಚೇರಿಯನ್ನು ಕಾಯಂ ಆಗಿ ಮುಚ್ಚುವುದಾಗಿ ಅಮೆರಿಕದ ವಿದೇಶಾಂಗ ಇಲಾಖೆ ಘೋಷಿಸಿದೆ. 2001ರಲ್ಲಿ ಅಫ್ಘಾನಿಸ್ತಾನದ ಮೇಲೆ ಅಮೆರಿಕ ಆಕ್ರಮಣ ಮಾಡಿದ ಸಂದರ್ಭದಲ್ಲಿ ಹಾಗೂ ಅದರ ನಂತರದ ಕಾರ್ಯಾಚರಣೆಗಳಲ್ಲಿ ಈ ಕಚೇರಿಯು ಅಮೆರಿಕದ ಪ್ರಮುಖ ಕಾರ್ಯಾಚರಣೆ ಮತ್ತು ಲಾಜಿಸ್ಟಿಕ್ಸ್ ಕೇಂದ್ರವಾಗಿ ಕಾರ್ಯನಿರ್ವಹಿಸಿತ್ತು.
- 12 March 2026 8:15 AM IST
ಲೆಬನಾನ್ನಲ್ಲಿ ಸಾವಿನ ಸಂಖ್ಯೆ 600 ದಾಟಿದರೂ ನಿಲ್ಲದ ಯುದ್ಧ
ಕಳೆದ ವಾರದಿಂದ ಆರಂಭವಾದ ಇಸ್ರೇಲ್ ಮತ್ತು ಇರಾನ್ ಬೆಂಬಲಿತ ಹಿಜ್ಬೊಲ್ಲಾ ನಡುವಿನ ಭೀಕರ ಸಂಘರ್ಷವು ಲೆಬನಾನ್ನಲ್ಲಿ ಸ್ಮಶಾನ ಮೌನಕ್ಕೆ ಕಾರಣವಾಗಿದೆ. ಲೆಬನಾನ್ ಆರೋಗ್ಯ ಸಚಿವಾಲಯದ ಮಾಹಿತಿ ಪ್ರಕಾರ, ಇಸ್ರೇಲ್ ನಡೆಸಿದ ವೈಮಾನಿಕ ದಾಳಿಯಲ್ಲಿ ಈವರೆಗೆ 634 ಜನರು ಬಲಿಯಾಗಿದ್ದಾರೆ. ಈ ಪೈಕಿ 91 ಮಕ್ಕಳು ಮತ್ತು 47 ಮಹಿಳೆಯರು ಸೇರಿರುವುದು ಪರಿಸ್ಥಿತಿಯ ಭೀಕರತೆಯನ್ನು ಸಾರುತ್ತಿದೆ. ಅಂದರೆ, ಸಾವನ್ನಪ್ಪಿದ ಪ್ರತಿ ಏಳು ಜನರಲ್ಲಿ ಒಬ್ಬರು ಮಕ್ಕಳಾಗಿದ್ದಾರೆ. ದಾಳಿಯಲ್ಲಿ 1,500ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ.
- 12 March 2026 8:13 AM IST
ಅಮೆರಿಕದ ತುರ್ತು ತೈಲ ಸಂಗ್ರಹ ಬಳಸಲು ಡೊನಾಲ್ಡ್ ಟ್ರಂಪ್ ನಿರ್ಧಾರ
ಇರಾನ್ ಯುದ್ಧದ ಹಿನ್ನೆಲೆಯಲ್ಲಿ ಏರಿಕೆಯಾಗಿರುವ ಪೆಟ್ರೋಲ್ ಮತ್ತು ಡೀಸೆಲ್ ದರಗಳನ್ನು ತಗ್ಗಿಸಲು ಅಮೆರಿಕದ 'ಸ್ಟ್ರಾಟೆಜಿಕ್ ಪೆಟ್ರೋಲಿಯಂ ರಿಸರ್ವ್'ನಿಂದ (ಆಪತ್ಕಾಲದ ತೈಲ ಸಂಗ್ರಹ) ತೈಲವನ್ನು ಬಿಡುಗಡೆ ಮಾಡುವುದಾಗಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ್ದಾರೆ. ಸಿಸಿನ್ನಾಟಿಯ WKRC ಲೋಕಲ್ 12 ಗೆ ನೀಡಿದ ಸಂದರ್ಶನದಲ್ಲಿ ಈ ವಿಷಯ ತಿಳಿಸಿದ ಅವರು, ಸದ್ಯಕ್ಕೆ ಸಂಗ್ರಹದಿಂದ ಸ್ವಲ್ಪ ತೈಲವನ್ನು ಬಳಸುವುದರಿಂದ ಬೆಲೆಗಳು ಇಳಿಕೆಯಾಗಲಿವೆ ಮತ್ತು ನಂತರ ಆ ಸಂಗ್ರಹವನ್ನು ಮತ್ತೆ ಭರ್ತಿ ಮಾಡಲಾಗುವುದು ಎಂದು ಹೇಳಿದ್ದಾರೆ. ಆದರೆ ಎಷ್ಟು ಪ್ರಮಾಣದ ತೈಲವನ್ನು ಬಿಡುಗಡೆ ಮಾಡಲಾಗುವುದು ಎಂಬ ಬಗ್ಗೆ ಅವರು ಸ್ಪಷ್ಟನೆ ನೀಡಿಲ್ಲ. ವಿಶೇಷವೆಂದರೆ, ಈ ಹಿಂದೆ ಜೋ ಬೈಡನ್ ಅವರ ಆಡಳಿತವು ತೈಲ ದರ ಇಳಿಸಲು ಇದೇ ರೀತಿ ರಾಷ್ಟ್ರೀಯ ತೈಲ ಸಂಗ್ರಹವನ್ನು ಬಳಸಿದ್ದಾಗ ಟ್ರಂಪ್ ಅದನ್ನು ತೀವ್ರವಾಗಿ ಟೀಕಿಸಿದ್ದರು.
