'ನಮ್ಮ ಮೆಟ್ರೋ'ಗೆ ಹಳದಿ ಮಾರ್ಗದ ಬಲ: ಪ್ರಯಾಣಿಕರ ಸಂಖ್ಯೆ 10 ಲಕ್ಷ ದಾಟಿ ಐತಿಹಾಸಿಕ ದಾಖಲೆ

ಬಹುನಿರೀಕ್ಷಿತ ನಮ್ಮ ಮೆಟ್ರೋದ ಹಳದಿ ಮಾರ್ಗ (ಆರ್.ವಿ. ರಸ್ತೆಯಿಂದ ಬೊಮ್ಮಸಂದ್ರ) ಕಾರ್ಯಾಚರಣೆ ಆರಂಭವಾದ ನಂತರ, ಮೆಟ್ರೋ ಪ್ರಯಾಣಿಕರ ಸಂಖ್ಯೆಯಲ್ಲಿ ಸಾರ್ವಕಾಲಿಕ ದಾಖಲೆ ನಿರ್ಮಾಣವಾಗಿದೆ. ಸೋಮವಾರ ಒಂದೇ ದಿನ ಮೂರು ಮಾರ್ಗಗಳಲ್ಲಿ ಒಟ್ಟು 10.48 ಲಕ್ಷ ಜನರು ಸಂಚರಿಸಿದ್ದಾರೆ. ಇದು ಮೆಟ್ರೋ ಇತಿಹಾಸದಲ್ಲಿಯೇ ಮೊದಲ ಬಾರಿಗೆ 10 ಲಕ್ಷದ ಗಡಿ ದಾಟಿದ ದಿನವಾಗಿದೆ. ಈ ಮಹತ್ವದ ಬೆಳವಣಿಗೆಯ ಜೊತೆಗೆ, ಹೊಸ ಮಾರ್ಗಕ್ಕೆ ಪೂರಕವಾಗಿ ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ಅವರು ಫೀಡರ್ ಬಸ್ ಸೇವೆಗೂ ಚಾಲನೆ ನೀಡಿದ್ದಾರೆ.

ಹಳದಿ ಮಾರ್ಗದ ಸೇರ್ಪಡೆಯೊಂದಿಗೆ ಮೆಟ್ರೋ ಪ್ರಯಾಣಿಕರ ಸಂಖ್ಯೆಯಲ್ಲಿ ಗಣನೀಯ ಏರಿಕೆ ಕಂಡುಬಂದಿದೆ. ಈ ಹಿಂದೆ ಜೂನ್ 4 ರಂದು 9.66 ಲಕ್ಷ ಮಂದಿ ಪ್ರಯಾಣಿಸಿದ್ದು ಗರಿಷ್ಠವಾಗಿತ್ತು. ಸೋಮವಾರದಂದು, ನೇರಳೆ ಮಾರ್ಗದಲ್ಲಿ 4,51,816, ಹಸಿರು ಮಾರ್ಗದಲ್ಲಿ 2,91,677, ಮತ್ತು ಹೊಸ ಹಳದಿ ಮಾರ್ಗದಲ್ಲಿ 52,215 ಜನರು ಪ್ರಯಾಣಿಸಿದ್ದಾರೆ. ಇದರ ಜೊತೆಗೆ, 2,52,323 ಪ್ರಯಾಣಿಕರು ಒಂದು ಮಾರ್ಗದಿಂದ ಮತ್ತೊಂದು ಮಾರ್ಗಕ್ಕೆ ಬದಲಾಗುವ ಇಂಟರ್​ಚೇಂಜ್​ ನಿಲ್ದಾಣಗಳನ್ನು ಬಳಸಿಕೊಂಡಿದ್ದಾರೆ ಎಂದು ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್‌ಸಿಎಲ್) ಮಾಹಿತಿ ನೀಡಿದೆ.

ಟೋಕನ್​ಗಳ ವಿವರ

ಟಿಕೆಟ್ ಬಳಕೆಯ ವಿವರಗಳನ್ನು ಗಮನಿಸಿದಾಗ, ಸ್ಮಾರ್ಟ್ ಕಾರ್ಡ್ ಬಳಸಿ 5,03,837, ಟೋಕನ್ ಮೂಲಕ 3,03,165, ಕ್ಯೂಆರ್ ಕೋಡ್ ಬಳಸಿ 2,08,382 ಮತ್ತು ರಾಷ್ಟ್ರೀಯ ಸಾಮಾನ್ಯ ಮೊಬಿಲಿಟಿ ಕಾರ್ಡ್ (ಎನ್‌ಸಿಎಂಸಿ) ಮೂಲಕ 32,198 ಮಂದಿ ಸಂಚರಿಸಿದ್ದಾರೆ.

ಕೊನೆಯ ಮೈಲಿ ಸಂಪರ್ಕಕ್ಕೆ ಫೀಡರ್ ಬಸ್ ಸೇವೆ

ಹಳದಿ ಮಾರ್ಗದ ಮೆಟ್ರೋ ನಿಲ್ದಾಣಗಳಿಗೆ ಕೊನೆಯ ಮೈಲಿ ಸಂಪರ್ಕವನ್ನು ಸುಧಾರಿಸುವ ಉದ್ದೇಶದಿಂದ, ಬಿಎಂಟಿಸಿ ಫೀಡರ್ ಬಸ್ ಸೇವೆಗೆ ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ಅವರು ಮಂಗಳವಾರ ಚಾಲನೆ ನೀಡಿದರು. ಎಲೆಕ್ಟ್ರಾನಿಕ್ ಸಿಟಿ ವಿಪ್ರೊ ಗೇಟ್, ಕೊಡತಿ ವಿಪ್ರೊ ಗೇಟ್, ಬೊಮ್ಮಸಂದ್ರ ಮತ್ತು ಕೋನಪ್ಪನ ಅಗ್ರಹಾರದಂತಹ ಪ್ರಮುಖ ಸ್ಥಳಗಳಿಂದ ಈ ಬಸ್ ಸೇವೆಗಳು ಕಾರ್ಯನಿರ್ವಹಿಸಲಿವೆ. ಈಗಾಗಲೇ ಮೆಟ್ರೋದ ವಿವಿಧ ನಿಲ್ದಾಣಗಳಿಂದ ಪ್ರತಿದಿನ 1.20 ಲಕ್ಷಕ್ಕೂ ಹೆಚ್ಚು ಪ್ರಯಾಣಿಕರು ಫೀಡರ್ ಬಸ್ ಸೇವೆಯನ್ನು ಬಳಸುತ್ತಿದ್ದು, ಹೊಸ ಸೇರ್ಪಡೆಯು ಐಟಿ ಕಾರಿಡಾರ್‌ಗೆ ಪ್ರಯಾಣಿಸುವವರಿಗೆ ಮತ್ತಷ್ಟು ಅನುಕೂಲ ಕಲ್ಪಿಸಲಿದೆ ಎಂದು ನಿರೀಕ್ಷಿಸಲಾಗಿದೆ.