ಬೆಂಗಳೂರಿನಲ್ಲಿ ಪಿ.ಜಿ. ವಸತಿಗಳಿಗಳ ಅನಿರೀಕ್ಷಿತ ಕೊರತೆ: ಯಾಕೆ ಈ ಸಮಸ್ಯೆ?

ಬೆಂಗಳೂರು ನಗರದಲ್ಲಿ ಅನಿರೀಕ್ಷಿತ ವಸತಿ ಕೊರತೆ ಎದುರಾಗಿದೆ. ಆದರೆ ಇದು ಗೇಟೆಡ್‌ ಸೊಸೈಟಿ ಕಟ್ಟಡಗಳು ಅಥವಾ ಇತರ ವಸತಿ ಕಟ್ಟಡಗಳಲ್ಲಿನ ಕೊರತೆಯಲ್ಲ. ಬದಲಾಗಿ, ನಗರದ ಬೃಹತ್ ವಲಸೆ ಕಾರ್ಮಿಕರಿಗೆ ದೀರ್ಘಕಾಲದಿಂದ ಕೈಗೆಟುಕುವ ದರದಲ್ಲಿ ವಸತಿ ಕಲ್ಪಿಸುತ್ತಿದ್ದ ಪೇಯಿಂಗ್ ಗೆಸ್ಟ್​​ಗಳ ಬರ.

ಸರ್ಕಾರಿ ನಿಯಮಗಳು, ಹೆಚ್ಚುತ್ತಿರುವ ನಿರ್ವಹಣಾ ವೆಚ್ಚಗಳು, ಕಡಿಮೆಯಾಗುತ್ತಿರುವ ಬೇಡಿಕೆ ಮತ್ತು ಅನಧಿಕೃತ ನೂರಾರು ಪಿ.ಜಿ. ವಸತಿಗಳನ್ನು ಮುಚ್ಚಲು ಒತ್ತಾಯಿಸುತ್ತಿರುವುದರಿಂದ ವಿದ್ಯಾರ್ಥಿಗಳು ಮತ್ತು ಯುವ ವೃತ್ತಿಪರರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (BBMP) ಕಾಯ್ದೆ 2020ರ ಸೆಕ್ಷನ್ 305 ರ ಅಡಿಯಲ್ಲಿ, ಪಿ.ಜಿ. ನಿರ್ವಾಹಕರಿಗೆ ಕಟ್ಟುನಿಟ್ಟಾದ ನಿಯಮಗಳನ್ನು ವಿಧಿಸಲಾಗಿದೆ. ಈ ನಿಯಮಗಳಲ್ಲಿ ಕಟ್ಟಡಗಳು ರಸ್ತೆ ಅಗಲದ ಅವಶ್ಯಕತೆಗಳನ್ನು ಪೂರೈಸಬೇಕು, ಸಾಮಾನ್ಯ ಪ್ರದೇಶಗಳಲ್ಲಿ ಕಡ್ಡಾಯವಾಗಿ ಸಿಸಿಟಿವಿ ಅಳವಡಿಸಬೇಕು, ಅಗ್ನಿ ಸುರಕ್ಷತಾ ಅನುಮತಿಗಳನ್ನು ಹೊಂದಿರಬೇಕು ಮತ್ತು ಪ್ರತಿ ನಿವಾಸಿಗೆ ಕನಿಷ್ಠ 70 ಚದರ ಅಡಿ ಸ್ಥಳಾವಕಾಶ ಒದಗಿಸಬೇಕು ಎಂಬ ಅಂಶಗಳು ಸೇರಿವೆ.

ಪಿ.ಜಿ. ವಸತಿಗಳು 40 ಅಡಿಗಿಂತ ಹೆಚ್ಚು ಅಗಲವಿರುವ ರಸ್ತೆಗಳಲ್ಲಿ ಮಾತ್ರ ಕಾನೂನುಬದ್ಧವಾಗಿ ಕಾರ್ಯನಿರ್ವಹಿಸಬಹುದು. ಆಹಾರವನ್ನು ಪೂರೈಸುವ ಪಿ.ಜಿ.ಗಳಿಗೆ ನೋಂದಣಿ ಕಡ್ಡಾಯಗೊಳಿಸಲಾಗಿದೆ. ಈ ಕ್ರಮಗಳನ್ನು ಜಾರಿಗೊಳಿಸಲಾಗದ ಪಿ.ಜಿ.ಗಳನ್ನು ಮುಚ್ಚಲಾಗುತ್ತಿದೆ. ಕಳೆದ ಕೆಲವು ವಾರಗಳಲ್ಲಿ, ಮಹದೇವಪುರ ವಲಯವೊಂದರಲ್ಲಿಯೇ 100ಕ್ಕೂ ಹೆಚ್ಚು ಪಿ.ಜಿ.ಗಳ ಅಡುಗೆಮನೆಗಳನ್ನು ಮುಚ್ಚಲಾಗಿದೆ.

ಹೆಚ್ಚುತ್ತಿರುವ ನಿರ್ವಹಣಾ ವೆಚ್ಚಗಳು ಮತ್ತು ಕಡಿಮೆಯಾಗುತ್ತಿರುವ ಬೇಡಿಕೆ

ಪಿ.ಜಿ. ಮಾಲೀಕರು ತೆರಿಗೆಗಳು, ನೀರಿನ ಶುಲ್ಕಗಳು ಮತ್ತು ವಾಣಿಜ್ಯ ವಿದ್ಯುತ್ ಬಿಲ್‌ಗಳಂತಹ ಹೆಚ್ಚುತ್ತಿರುವ ನಿರ್ವಹಣಾ ವೆಚ್ಚಗಳನ್ನು ಎದುರಿಸುತ್ತಿದ್ದಾರೆ. ಹೆಚ್ಚಿನ ನಿವಾಸಿಗಳು, ವಿಶೇಷವಾಗಿ ವಿದ್ಯಾರ್ಥಿಗಳು ಮತ್ತು ಆರಂಭಿಕ ವೃತ್ತಿ ಜೀವನ ಆರಂಭಿಸಿರುವ ಉದ್ಯೋಗಿಗಳು ಕಡಿಮೆ ಬಾಡಿಗೆಯಲ್ಲಿ ಪಿ.ಜಿ.ಗಳನ್ನು ಹುಡುಕುವುದರಿಂದ, ಬಾಡಿಗೆಗಳನ್ನು ಏರಿಕೆ ಮಾಡಲು ಪಿ.ಜಿ. ಮಾಲೀಕರಿಗೆ ಸಾಧ್ಯವಾಗುತ್ತಿಲ್ಲ. ಆಸ್ತಿ ವಿಶ್ಲೇಷಣಾ ಕಂಪನಿ ಜ್ಯಾಪ್ಕಿ ಪ್ರಕಾರ, ಅನೇಕ ಪಿ.ಜಿ. ಮಾಲೀಕರು ಇದರ ಪರಿಣಾಮವಾಗಿ ಶೇಕಡಾ 20 ರಿಂದ 30 ರಷ್ಟು ಆರ್ಥಿಕ ನಷ್ಟವನ್ನು ಅನುಭವಿಸಿದ್ದಾರೆ.

ಮತ್ತೊಂದೆಡೆ, ಐಟಿ ವಲಯದಲ್ಲಿನ ವ್ಯಾಪಕ ಉದ್ಯೋಗ ಕಡಿತದಿಂದಾಗಿ, ಒಂದು ಕಾಲದಲ್ಲಿ ಬಹುಬೇಡಿಕೆಯಲ್ಲಿದ್ದ ಪಿ.ಜಿ.ಗಳ ಬೇಡಿಕೆ ಪ್ರಸ್ತುತ ಕಡಿಮೆಯಾಗುತ್ತಿದೆ. ಐಟಿ ಉದ್ಯೋಗಿಗಳು ಬೆಂಗಳೂರಿನಿಂದ ಸ್ಥಳಾಂತರಗೊಂಡಿದ್ದು, ಕಳೆದ ವರ್ಷ ವೈಟ್‌ಫೀಲ್ಡ್ ಮತ್ತು ಮಾರತಹಳ್ಳಿಯಲ್ಲಿ ಹಲವಾರು ಪಿ.ಜಿ. ಮಾಲೀಕರು ತಮ್ಮ ಬಾಡಿಗೆದಾರರಲ್ಲಿ ಶೇಕಡಾ 25 ರಷ್ಟು ಜನರನ್ನು ಕಳೆದುಕೊಂಡಿದ್ದಾರೆ ಎಂದು ವರದಿ ಮಾಡಿದ್ದಾರೆ. ಪಿ.ಜಿ. ವಸತಿಗಳ ತ್ವರಿತ ಕಣ್ಮರೆಯಿಂದಾಗಿ, ಅನೇಕ ಯುವ ವೃತ್ತಿಪರರು ಮತ್ತು ವಿದ್ಯಾರ್ಥಿಗಳು ಹೆಚ್ಚು ದುಬಾರಿ ಬಾಡಿಗೆ ಅಪಾರ್ಟ್‌ಮೆಂಟ್‌ಗಳಿಗೆ ಸ್ಥಳಾಂತರಗೊಳ್ಳಲು ಅಥವಾ ಶೇರಿಂಗ್‌ ಅಪಾರ್ಟ್‌ಮೆಂಟ್‌ಗಳನ್ನು ಹುಡುಕುತ್ತಿದ್ದಾರೆ.

ಕಡಿಮೆ ಅನುಸರಣೆ ಮಟ್ಟಗಳು

ಬೆಂಗಳೂರಿನಲ್ಲಿರುವ ಸುಮಾರು 12,000 ಪಿ.ಜಿ. ವಸತಿಗಳಲ್ಲಿ ಕೇವಲ 2,500 ಮಾತ್ರ ಅಧಿಕೃತವಾಗಿ ಬಿಬಿಎಂಪಿಯಲ್ಲಿ ನೋಂದಾಯಿಸಲಾಗಿದೆ. ಇದರರ್ಥ ಬಹುಪಾಲು ಪಿ.ಜಿ. ವಸತಿಗಳು ಅನಿರೀಕ್ಷಿತ ತಪಾಸಣೆ ಮತ್ತು ಮುಚ್ಚುವ ಅಪಾಯ ಎದುರಿಸುತ್ತವೆ. ವಿಶೇಷವಾಗಿ ಹಳೆಯ ಕಟ್ಟಡಗಳಲ್ಲಿ, ಸಣ್ಣ-ಬಜೆಟ್ ಸೇವೆಗಳನ್ನು ನೀಡುವ ಪಿ.ಜಿ.ಗಳಿಗೆ ಹೊಸ ಮಾನದಂಡಗಳನ್ನು ಅನುಸರಿಸುವುದು ಅತ್ಯಂತ ಕಷ್ಟಕರವಾಗಿದೆ ಎಂದು ಪಿ.ಜಿ. ನಿರ್ವಾಹಕರು ಹೇಳುತ್ತಾರೆ.