Ranya Rao: ಹವಾಲ ಮೂಲಕ ಚಿನ್ನ ಖರೀದಿಗೆ ಹಣ ವರ್ಗಾವಣೆ; ರನ್ಯಾ ತಪ್ಪೊಪ್ಪಿಗೆ

ಚಿನ್ನ ಕಳ್ಳಸಾಗಣೆ ಪ್ರಕರಣದಲ್ಲಿ ಬಂಧಿತರಾಗಿರುವ ನಟಿ ರನ್ಯಾ ರಾವ್, ಬಂಗಾರ ಖರೀದಿಗೆ ಹವಾಲಾ ಮಾರ್ಗಗಳ ಮೂಲಕ ದುಬೈಗೆ ಹಣ ವರ್ಗಾಯಿಸಲಾಗಿದೆ ಎಂದು ತಪ್ಪೊಪ್ಪಿಕೊಂಡಿದ್ದಾರೆ ಎಂಬುದಾಗಿ ಡಿಆರ್​ಐ ಪರ ವಕೀಲರು ಕೋರ್ಟ್​ಗೆ ತಿಳಿಸಿದ್ದಾರೆ. ರನ್ಯಾ ಜಾಮೀನು ಅರ್ಜಿಯ ವಿಚಾರಣೆ 64ನೇ ಸಿಸಿಎಚ್​ ಸೆಷನ್ಸ್ ಕೋರ್ಟ್​​ನಲ್ಲಿ ಮಂಗಳವಾರ (ಮಾರ್ಚ್​25) ನಡೆದಿದ್ದು, ತೀರ್ಪನ್ನು 27ಕ್ಕೆ ಕಾಯ್ದಿರಿಸಲಾಗಿದೆ.

ಡಿಆರ್​​ಐ ಪರ ವಕೀಲ ಮಧು ರಾವ್ ಕೋರ್ಟ್​ಗೆ ಮಾಹಿತಿ ನೀಡಿದ್ದು, ಆರೋಪಿ ರನ್ಯಾ ಅನಧಿಕೃತ ಮಾರ್ಗಗಳ ಮೂಲಕ ಹಣಕಾಸು ವ್ಯವಹಾರ ನಡೆಸಿದ್ದನ್ನು ಒಪ್ಪಿಕೊಂಡಿದ್ದಾರೆ ಎಂದು ವಾದಿಸಿದ್ದಾರೆ. ರನ್ಯಾ ರಾವ್ ಮಾರ್ಚ್ 3ರಂದು ಬೆಂಗಳೂರಿನ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ 14.2 ಕೆ.ಜಿ ಚಿನ್ನದೊಂದಿಗೆ ಬಂಧನಕ್ಕೆ ಒಳಗಾಗಿದ್ದು.

ಹವಾಲಾ ವ್ಯವಹಾರದ ಒಪ್ಪಿಗೆ

ದುಬೈನಿಂದ ಚಿನ್ನ ಖರೀದಿಸಲು ದುಬೈಗೆ ಅಕ್ರಮವಾಗಿ ಹಣ ರವಾನಿಸಲಾಗಿದ್ದು., ಅಲ್ಲಿ ಚಿನ್ನ ಖರೀದಿಸುವ ಒಂದು ದೊಡ್ಡ ಜಾಲವೇ ಇದರಲ್ಲಿ ಭಾಗಿಯಾಗಿದೆ ಎಂದು ಡಿಆರ್​ಐ ವಕೀಲರು ಕೋರ್ಟ್‌ಗೆ ತಿಳಿಸಿದ್ದಾರೆ. ಅವರ ತಪ್ಪೊಪ್ಪಿಗೆ ಪ್ರಕರಣದ ಗಂಭೀರತೆಯನ್ನು ಇನ್ನಷ್ಟು ಹೆಚ್ಚಿಸಿದ್ದು ಜಾಮೀನು ನೀಡಬಾರದು ಎಂದು ವಾದಿಸಿದ್ದಾರೆ.

ನ್ಯಾಯಾಂಗ ತನಿಖೆಗೆ ಆದೇಶ

ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ಅಧಿಕಾರಿಗಳು, ಈ ವಿಷಯದಲ್ಲಿ ಆರ್ಥಿಕ ಅಕ್ರಮಗಳ ವ್ಯಾಪ್ತಿ ಮತ್ತು ಕಾನೂನು ಉಲ್ಲಂಘನೆಗಳನ್ನು ಪರಿಶೀಲಿಸಲು ನ್ಯಾಯಾಂಗ ತನಿಖೆಗೆ ಮುಂದಾಗಿದೆ. ಈ ಸಂಬಂಧ ನೋಟಿಸ್ ಜಾರಿ ಮಾಡಲಾಗಿದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ತನಿಖೆಯ ಹಿನ್ನೆಲೆ

ರನ್ಯಾ ರಾವ್ ಅವರು ದುಬೈಗೆ ಆಗಾಗ್ಗೆ ಪ್ರಯಾಣಿಸುತ್ತಿದ್ದರು ಎಂಬ ಮಾಹಿತಿ ಸಿಕ್ಕಿದ ಹಿನ್ನೆಲೆಯಲ್ಲಿ ಡಿಆರ್​ಐ ಅಧಿಕಾರಿಗಳು ದಾಳಿ ಮಾಡಿ ಬಂಧಿಸಿದ್ದರು. ರನ್ಯಾ 2023ರಿಂದ 2025ರವರೆಗೆ 52 ಬಾರಿ ದುಬೈಗೆ ಭೇಟಿ ನೀಡಿದ್ದರು. ಅದರಲ್ಲಿ 45 ಒಂದೇ ದಿನದ ಪ್ರಯಾಣಗಳಾಗಿದ್ದವು. ಪದೇ ಪದೆ ಪ್ರಯಾಣ ಮಾಡುವುದರ ಹಿನ್ನೆಲೆಯಲ್ಲಿ ಡಿಆರ್​ಐ ಅಧಿಕಾರಿಗಳು ಅವರ ಮೇಲೆ ಕಣ್ಣಿಟ್ಟಿದ್ದರು. ಮಾರ್ಚ್ 3ರಂದು ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಅವರನ್ನು ತಡೆದಾಗ, ಜೀನ್ಸ್ ಪ್ಯಾಂಟ್​ನ ಪಾಕೆಟ್, ಶೂಗಳಲ್ಲಿ ಮತ್ತು ತೊಡೆಯ ಭಾಗದಲ್ಲಿ ಕ್ರೇಪ್ ಬ್ಯಾಂಡೇಜ್‌ ಕಟ್ಟಿ ಚಿನ್ನ ಸಾಗಿಸುತ್ತಿದ್ದದ್ದು ಪತ್ತೆಯಾಗಿತ್ತು. ಬಳಿಕ ಅವರ ಮನೆಯಲ್ಲಿ ಶೋಧ ನಡೆಸಿದಾಗ ರೂ. 2.06 ಕೋಟಿ ಮೌಲ್ಯದ ಚಿನ್ನಾಭರಣ ಮತ್ತು ರೂ. 2.67 ಕೋಟಿ ರೂಪಾಯಿ ಸಿಕ್ಕಿತ್ತು.

ಕಾನೂನು ಹೋರಾಟ

ರನ್ಯಾ ರಾವ್ ಅವರ ಜಾಮೀನು ಅರ್ಜಿಯನ್ನು ಈ ಹಿಂದೆ ಆರ್ಥಿಕ ಅಪರಾಧಗಳ ವಿಶೇಷ ನ್ಯಾಯಾಲಯವು ತಿರಸ್ಕರಿಸಿದೆ. ಡಿಆರ್​ಐ ವಕೀಲರು, ರನ್ಯಾ ಅವರು ದುಬೈ ವಾಸದ ಗುರುತಿನ ಚೀಟಿ ಹೊಂದಿರುವ ಕಾರಣ ಪರಾರಿಯಾಗುವ ಸಾಧ್ಯತೆ ಇದೆ ಎಂದು ವಾದಿಸಿದ್ದರು. ಈ ಪ್ರಕರಣದಲ್ಲಿ ರಾಷ್ಟ್ರೀಯ ಭದ್ರತೆಗೆ ಸಂಬಂಧಿಸಿದ ಅಂಶಗಳು ಮತ್ತು ಅಂತಾರಾಷ್ಟ್ರೀಯ ಸಂಪರ್ಕಗಳು ಇರುವುದರಿಂದ ಜಾಮೀನು ನೀಡಬಾರದು ಎಂದು ಪ್ರತಿಪಾದಿಸಿದ್ದರು.

ಉಳಿದವರಿಗೂ ಸಮಸ್ಯೆ

ಈ ಪ್ರಕರಣದಲ್ಲಿ ರನ್ಯಾ ರಾವ್ ಅವರ ಗಂಡ ಜತಿನ್ ಹುಕ್ಕೇರಿ ಮತ್ತು ಮಲತಂದೆ ಕೆ. ರಾಮಚಂದ್ರ ರಾವ್ (ಡಿಜಿಪಿ ಶ್ರೇಣಿಯ ಅಧಿಕಾರಿ) ಅವರನ್ನೂ ತನಿಖೆಗೆ ಒಳಪಡಿಸಲಾಗಿದೆ. ರಾಮಚಂದ್ರ ರಾವ್ ಅವರು ತಮ್ಮ ಮಲಮಗಳ ಚಟುವಟಿಕೆಗಳ ಬಗ್ಗೆ ಅರಿವಿರಲಿಲ್ಲ ಎಂದು ಹೇಳಿದ್ದರೂ, ಅವರ ಹುದ್ದೆಯ ಪ್ರಭಾವ ಬಳಸಿಕೊಂಡು ಪ್ರೋಟೋಕಾಲ್ ಸೌಲಭ್ಯಗಳನ್ನು ರನ್ಯಾ ಪಡೆದಿರುವುದು ಖಚಿತವಾಗಿದೆ. ಪ್ರಕರಣದಲ್ಲಿ ತರುಣ್ ರಾಜು ಎಂಬಾತ ಎರಡನೇ ಆರೋಪಿಯಾಗಿದ್ದಾನೆ.

ಮುಂದೇನು?

ಪ್ರಸ್ತುತ ಡಿಆರ್​ಐ, ಜಾರಿ ನಿರ್ದೇಶನಾಲಯ (ED), ಮತ್ತು ಕೇಂದ್ರೀಯ ತನಿಖಾ ದಳ (CBI) ಸೇರಿದಂತೆ ಮೂರು ಸಂಸ್ಥೆಗಳು ಈ ಪ್ರಕರಣವನ್ನು ತನಿಖೆ ಮಾಡುತ್ತಿವೆ. ಹವಾಲಾ ಜಾಲದ ಮೂಲವನ್ನು ಪತ್ತೆಹಚ್ಚುವುದು ಮತ್ತು ಈ ಸಂಘಟನೆಯ ಹಿಂದಿರುವ ಮಾಸ್ಟರ್‌ಮೈಂಡ್‌ಗಳನ್ನು ಬಂಧಿಸುವುದು ತನಿಖೆಯ ಪ್ರಮುಖ ಗುರಿಯಾಗಿದೆ. ಈ ಪ್ರಕರಣವು ಭಾರತದ ಆರ್ಥಿಕ ವ್ಯವಸ್ಥೆ ಮತ್ತು ರಾಷ್ಟ್ರೀಯ ಭದ್ರತೆಗೆ ಸಂಬಂಧಿಸಿದ ಗಂಭೀರ ವಿಷಯವಾಗಿ ಪರಿಗಣಿಸಲ್ಪಟ್ಟಿದೆ.