ಫೆಬ್ರವರಿಯಿಂದ ಮೆಟ್ರೋ ಇನ್ನಷ್ಟು ದುಬಾರಿ: ದರದಲ್ಲಿ ಶೇ. 5ರಷ್ಟು ಏರಿಕೆಗೆ ಬಿಎಂಆರ್ಸಿಎಲ್ ಸಿದ್ಧತೆ
ಸತತ ದರ ಏರಿಕೆಯು ಮೆಟ್ರೋ ಉದ್ದೇಶಕ್ಕೇ ಕೊಡಲಿ ಪೆಟ್ಟು ನೀಡುವ ಅಪಾಯವಿದೆ. ವರದಿಗಳ ಪ್ರಕಾರ, 2025ರ ಭಾರಿ ದರ ಏರಿಕೆಯ ನಂತರ ಮೆಟ್ರೋ ಪ್ರಯಾಣಿಕರ ಸಂಖ್ಯೆಯಲ್ಲಿ ಸುಮಾರು ಶೇ. 13ರಷ್ಟು ಕುಸಿತ ಕಂಡುಬಂದಿತ್ತು
ಸಿಲಿಕಾನ್ ಸಿಟಿಯ ಜನಜೀವನದ ಅವಿಭಾಜ್ಯ ಅಂಗವಾಗಿರುವ 'ನಮ್ಮ ಮೆಟ್ರೋ'ದ ಪ್ರಯಾಣಿಕರಿಗೆ ಮತ್ತೊಂದು ಆರ್ಥಿಕ ಹೊರೆ ಎದುರಾಗಲಿದೆ. ಫೆಬ್ರವರಿ 2026ರಿಂದ ಜಾರಿಗೆ ಬರುವಂತೆ ಮೆಟ್ರೋ ಪ್ರಯಾಣ ದರದಲ್ಲಿ ಶೇ. 5ರಷ್ಟು ಹೆಚ್ಚಳ ಮಾಡಲು ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (BMRCL) ಗಂಭೀರ ಸಿದ್ಧತೆ ನಡೆಸಿದೆ ಎಂಬುದಾಗಿ ವರದಿಯಾಗಿದೆ.
ದರ ನಿಗದಿ ಸಮಿತಿಯ (FFC) ಶಿಫಾರಸಿನಂತೆ ಇನ್ನು ಮುಂದೆ ಪ್ರತಿ ವರ್ಷ ದರ ಪರಿಷ್ಕರಣೆ ಮಾಡುವ ನಿರ್ಧಾರಕ್ಕೆ ಬಿಎಂಆರ್ಸಿಎಲ್ ಮುಂದಾಗಿದ್ದು, ಇದು ಲಕ್ಷಾಂತರ ದೈನಂದಿನ ಪ್ರಯಾಣಿಕರ ಅಸಮಾಧಾನಕ್ಕೆ ಕಾರಣವಾಗಲಿದೆ. ಕಳೆದ ವರ್ಷ ದರ ಪರಿಷ್ಕರಣ ಸಮಿತಿಯು ವರದಿ ನೀಡಿತ್ತು. ಅದರ ಅನ್ವಯ ಪ್ರತಿ ವರ್ಷ ಶೇ.5ರಷ್ಟು ದರ ಹೆಚ್ಚಳ ಮಾಡಬೇಕಾಗಿದೆ. ಆದರೆ, ಹೆಚ್ಚಳ ಮಾಡುವುದು, ಬಿಡುವುದು ಮೆಟ್ರೋದ ಉನ್ನತ ಅಧಿಕಾರಿಗಳು ತೀರ್ಮಾನಿಸಲಿದ್ದಾರೆ ಎಂಬುದಾಗಿ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಮಾಡಿದೆ.
ಸಂಸ್ಥೆಯು ಲಾಭದಾಯಕದ ದಾರಿಯಲ್ಲಿ ಸಾಗಬೇಕಾದರೆ ದರ ಏರಿಕೆ ಅನಿವಾರ್ಯ. ಈಗಾಗಲೇ ಟ್ರಾಫಿಕ್ ಕಿರಿಕಿರಿಯಿಂದ ತಪ್ಪಿಸಿಕೊಳ್ಳಲು ಮೆಟ್ರೋ ಅವಲಂಬಿಸಿರುವ ಮಧ್ಯಮ ವರ್ಗದ ಜನರಿಗೆ ಈ ವಾರ್ಷಿಕ ಏರಿಕೆಯ ಪ್ರಸ್ತಾವನೆ "ಬೆಂಕಿಯಿಂದ ಬಾಣಲೆಗೆ ಬಿದ್ದಂತಾಗಿದೆ.
ದರ ಪರಿಷ್ಕರಣೆಯ ಹಿಂದಿನ ತರ್ಕ ಏನು?
ಮೆಟ್ರೋ ಕಾರ್ಯಾಚರಣೆ ಮತ್ತು ಅದರ ನಿರ್ವಹಣಾ ವೆಚ್ಚಗಳು ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿವೆ ಎಂಬುದು ಬಿಎಂಆರ್ಸಿಎಲ್ ನೀಡುತ್ತಿರುವ ಪ್ರಮುಖ ಸಮರ್ಥನೆ. ವಿದ್ಯುತ್ ದರಗಳಲ್ಲಿನ ಏರಿಕೆ, ಸಿಬ್ಬಂದಿ ವೇತನ ಮತ್ತು ಅಂತಾರಾಷ್ಟ್ರೀಯ ಸಂಸ್ಥೆಗಳಿಂದ ಪಡೆದಿರುವ ಬೃಹತ್ ಸಾಲದ ಮರುಪಾವತಿಯ ಹೊರೆಯು ನಿಗಮದ ಮೇಲೆ ಒತ್ತಡ ಹೇರುತ್ತಿದೆ. ದರ ನಿಗದಿ ಸಮಿತಿಯು ಈ ಎಲ್ಲಾ ಆರ್ಥಿಕ ಆಯಾಮಗಳನ್ನು ಪರಿಶೀಲಿಸಿ, ಸಂಸ್ಥೆಯ ಸುಸ್ಥಿರತೆಗಾಗಿ ಪ್ರತಿ ವರ್ಷ ಶೇ. 5ರವರೆಗೆ ದರ ಏರಿಕೆ ಮಾಡುವುದು ಅನಿವಾರ್ಯ ಎಂದು ಶಿಫಾರಸು ಮಾಡಿದೆ. ಇದರ ನೇರ ಪರಿಣಾಮ ಸ್ಮಾರ್ಟ್ ಕಾರ್ಡ್ ಹಾಗೂ ಕ್ಯೂಆರ್ ಕೋಡ್ ಟಿಕೆಟ್ ಬಳಸುವ ಪ್ರಯಾಣಿಕರ ಮೇಲೂ ಬೀರಲಿದ್ದು, ರಿಯಾಯಿತಿ ದರಗಳಲ್ಲೂ ಬದಲಾವಣೆಯಾಗುವ ಸಾಧ್ಯತೆಯಿದೆ.
2025ರ ಭಾರಿ ಏರಿಕೆಯ ಕಹಿ ನೆನಪು
ಪ್ರಸ್ತುತ ಪ್ರಸ್ತಾವಿತ ಶೇ. 5ರಷ್ಟು ಏರಿಕೆಯು ಸಣ್ಣ ಪ್ರಮಾಣದಂತೆ ಕಂಡರೂ, ಕಳೆದ ವರ್ಷದ ದರ ಏರಿಕೆಯ ಹಿನ್ನೆಲೆಯಲ್ಲಿ ಇದು ಪ್ರಯಾಣಿಕರಿಗೆ ದೊಡ್ಡ ಹೊರೆಯಾಗಿ ಪರಿಣಮಿಸಿದೆ. 2025ರ ಫೆಬ್ರವರಿಯಲ್ಲಿ ಮೆಟ್ರೋ ದರದಲ್ಲಿ ಬರೋಬ್ಬರಿ ಶೇ. 71ರಷ್ಟು ಭಾರಿ ಹೆಚ್ಚಳ ಮಾಡಲಾಗಿತ್ತು. ಆ ಸಂದರ್ಭದಲ್ಲಿ ಕನಿಷ್ಠ ದರ 10 ರೂ.ನಿಂದ ಗರಿಷ್ಠ ದರ 90 ರೂ.ವರೆಗೆ ಏರಿಕೆಯಾಗಿದ್ದು, ನಮ್ಮ ಮೆಟ್ರೋ ದೇಶದ ಅತ್ಯಂತ ದುಬಾರಿ ಮೆಟ್ರೋ ಸೇವೆಗಳಲ್ಲಿ ಒಂದೆಂಬ ಹಣೆಪಟ್ಟಿ ಹೊತ್ತುಕೊಂಡಿತ್ತು. ಆ ಭಾರಿ ಏರಿಕೆಯ ಬಿಸಿ ಇನ್ನು ಆರುವ ಮುನ್ನವೇ ಈಗ ಮತ್ತೆ ಶೇ. 5ರಷ್ಟು ವಾರ್ಷಿಕ ಏರಿಕೆಯ ಪ್ರಸ್ತಾಪವು ಸಾಮಾನ್ಯ ಜನರ ಆಕ್ರೋಶವನ್ನು ಕೆರಳಿಸಿದೆ.
ಸಾರ್ವಜನಿಕರ ಆಕ್ರೋಶ
ದರ ಏರಿಕೆಯ ಈ ಸರಣಿ ನಿರ್ಧಾರಗಳು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿವೆ. ಬೆಂಗಳೂರಿನ ಪ್ರಯಾಣಿಕರ "ಅತಿಯಾದ ಸಹನಾ ಶಕ್ತಿ"ಯನ್ನು ಅನೇಕರು ವ್ಯಂಗ್ಯವಾಗಿ ಟೀಕಿಸುತ್ತಿದ್ದು, ಮೆಟ್ರೋ ನಿಗಮವು ಜನರ ಅಸಹಾಯಕತೆಯನ್ನು ಬಂಡವಾಳ ಮಾಡಿಕೊಳ್ಳುತ್ತಿದೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ಸಾಮಾಜಿಕ ಜಾಲತಾಣಗಳಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಸಂಸದ ತೇಜಸ್ವಿ ಸೂರ್ಯ ಅವರಂತಹ ನಾಯಕರನ್ನು ಟ್ಯಾಗ್ ಮಾಡಲಾಗುತ್ತಿದ್ದು, ಸಾರ್ವಜನಿಕ ಸಾರಿಗೆಯನ್ನು ಬಡವರಿಗೆ ಮತ್ತು ಮಧ್ಯಮ ವರ್ಗದವರಿಗೆ ಕೈಗೆಟುಕುವಂತೆ ಮಾಡುವಲ್ಲಿ ರಾಜಕೀಯ ಇಚ್ಛಾಶಕ್ತಿಯ ಕೊರತೆಯಿದೆ ಎಂದು ನಾಗರಿಕರು ದೂರಿದ್ದಾರೆ. ಆನ್ಲೈನ್ ಪ್ರತಿಭಟನೆಗಳನ್ನು ಮೀರಿ ಬೀದಿಗೆ ಇಳಿದು ಹೋರಾಟ ಮಾಡುವ ಅವಶ್ಯಕತೆಯಿದೆ ಎಂಬ ಅಭಿಪ್ರಾಯಗಳು ಸಾರ್ವಜನಿಕ ವಲಯದಲ್ಲಿ ವ್ಯಕ್ತವಾಗುತ್ತಿವೆ.
ಕುಸಿಯುತ್ತಿರುವ ಪ್ರಯಾಣಿಕರ ಸಂಖ್ಯೆ?
ಸತತ ದರ ಏರಿಕೆಯು ಮೆಟ್ರೋ ಉದ್ದೇಶಕ್ಕೇ ಕೊಡಲಿ ಪೆಟ್ಟು ನೀಡುವ ಅಪಾಯವಿದೆ. ವರದಿಗಳ ಪ್ರಕಾರ, 2025ರ ಭಾರಿ ದರ ಏರಿಕೆಯ ನಂತರ ಮೆಟ್ರೋ ಪ್ರಯಾಣಿಕರ ಸಂಖ್ಯೆಯಲ್ಲಿ ಸುಮಾರು ಶೇ. 13ರಷ್ಟು ಕುಸಿತ ಕಂಡುಬಂದಿತ್ತು. ಈಗ ಮತ್ತೆ ದರ ಏರಿಕೆಯಾದರೆ, ಜನರು ಸಾರ್ವಜನಿಕ ಸಾರಿಗೆಯನ್ನು ಬಿಟ್ಟು ಮತ್ತೆ ಖಾಸಗಿ ವಾಹನಗಳ ಮೊರೆ ಹೋಗಬಹುದು ಎಂಬ ಆತಂಕ ಸಾರಿಗೆ ತಜ್ಞರಲ್ಲಿದೆ.
