Kyasanur Forest Disease | ಮಾರಕ ಮಂಗನಕಾಯಿಲೆ ಸೋಂಕು ನಿಯಂತ್ರಣಕ್ಕೆ ಎದುರಾಯ್ತು ಹೊಸ ಸವಾಲು!

ರಾಜ್ಯದ 16 ಜಿಲ್ಲೆಗಳು ಸೇರಿದಂತೆ ತಮಿಳುನಾಡು, ಕೇರಳ, ಗೋವಾ ಮತ್ತು ಮಹಾರಾಷ್ಟ್ರದಲ್ಲಿ ವ್ಯಾಪಿಸಿರುವ ಕ್ಯಾಸನೂರು ಫಾರೆಸ್ಟ್ ಡಿಸೀಸ್(ಕೆಎಫ್‌ಡಿ) ಅಥವಾ ಮಂಗನಕಾಯಿಲೆ ಈ ಬಾರಿಯೂ ಮಲೆನಾಡು ಭಾಗದಲ್ಲಿ ಆತಂಕ ಮೂಡಿಸಿದೆ.

ಈಗಾಗಲೇ ಶಿವಮೊಗ್ಗ, ಚಿಕ್ಕಮಗಳೂರು ಮತ್ತು ಉತ್ತರಕನ್ನಡ ಜಿಲ್ಲೆಗಳಲ್ಲಿ ಸೋಂಕು ದೃಢ(ಪಾಸಿಟಿವ್) ಪ್ರಕರಣಗಳು ಏರುಗತಿಯಲ್ಲಿವೆ. ಆದರೆ, ಕಳೆದ ಎರಡು ವರ್ಷಗಳಿಂದಲೇ ಸೋಂಕಿನ ಲಸಿಕೆ ಉತ್ಪಾದನೆ ನಿಂತುಹೋಗಿರುವ ಹಿನ್ನೆಲೆಯಲ್ಲಿ ಈ ಬಾರಿಯೂ ಲಸಿಕೆ ಇಲ್ಲದೆ ಕಾಡಂಚಿನ ಜನ ವೈರಾಣು ವಿರುದ್ಧ ಕೇವಲ ಮುಂಜಾಗ್ರತಾ ಕ್ರಮಗಳ ಅಸ್ತ್ರವನ್ನೇ ಬಳಸಬೇಕಿದೆ.

ಇಂತಹ ವ್ಯತಿರಿಕ್ತ ಪರಿಸ್ಥಿತಿಯ ನಡುವೆ ಕೆಎಫ್‌ಡಿ ಸೋಂಕು ಕಾರಕ ವೈರಾಣು-ಕೆಎಫ್ಡಿ ವಿ(ಕೆಎಫ್‌ಡಿ-ವೈರಸ್) ಕುರಿತು ಹೊಸ ಸಂಶೋಧನೆಯೊಂದು ಮತ್ತೊಂದು ಆತಂಕಕಾರಿ ಸಂಗತಿಯನ್ನು ಬಯಲುಮಾಡಿದೆ.

ಈವರೆಗೆ ಕೆಎಫ್ಡಿ ವೈರಾಣು ಮಂಗ, ಇಲಿ, ಹೆಗ್ಗಣಗಳಂತಹ ಪ್ರಾಣಿಗಳಿಂದ ಉಣುಗು(ticks)ಗಳಿಗೆ ಹರಡಿ, ಅವುಗಳ ಮೂಲಕ ಮನುಷ್ಯರಿಗೆ ಹರಡುತ್ತದೆ. ಉಣುಗುಗಳಲ್ಲಿ ಅದರ ಲಾರ್ವಾ ಮತ್ತು ನಿಂಫ್ ಹಂತದಲ್ಲಿ ಮಾತ್ರ ಇರುತ್ತದೆ ಎಂದು ಹಿಂದಿನ ಸಂಶೋಧನೆಗಳಿಂದ ತಿಳಿಯಲಾಗಿತ್ತು. ಹಾಗಾಗಿ ಉಣುಗುಗಳಲ್ಲಾಗಲೀ, ಮಂಗವೂ ಸೇರಿದಂತೆ ಪ್ರಾಣಿಗಳಲ್ಲಾಗಲೀ ವೈರಾಣು ಪೀಳಿಗೆಯಿಂದ ಪೀಳಿಗೆಗೆ ಹರಡುವುದಿಲ್ಲ ಎಂದೇ ಭಾವಿಸಲಾಗಿತ್ತು.

ಆದರೆ, ಇದೀಗ ಹೊಸ ಸಂಶೋಧನೆ ಆ ನಂಬಿಕೆಯನ್ನು ಬುಡಮೇಲು ಮಾಡಿದೆ. ವೈರಾಣು ಹರಡುವ ಪ್ರಮುಖ ಎರಡು ಬಗೆಯ ಉಣುಗುಗಳಲ್ಲಿ ಕೆಎಫ್‌ಡಿ ವೈರಾಣು ವಂಶವಾಹಿಯ ಮೂಲಕ ಪೀಳಿಗೆಯಿಂದ ಪೀಳಿಗೆಗೆ ವರ್ಗಾವಣೆಯಾಗುತ್ತದೆ ಎಂದು ಈ ಸಂಶೋಧನೆ ಹೇಳಿದೆ. ಹಾಗಾಗಿ ಕೆಎಫ್‌ಡಿ ಸೋಂಕು ನಿಯಂತ್ರಣ ಮತ್ತು ಮುಂಜಾಗ್ರತಾ ಕ್ರಮಗಳಲ್ಲಿ ಆಮೂಲಾಗ್ರ ಬದಲಾವಣೆ ಮಾಡಿಕೊಳ್ಳುವ ಅನಿವಾರ್ಯತೆ ಎದುರಾಗಿದೆ.

ಏನಿದು ಹೊಸ ಸಂಶೋಧನೆ?

ಭಾರತ ಮತ್ತು ಬ್ರಿಟನ್ ಸಹಯೋಗದಲ್ಲಿ ʼಮಂಕಿ ಫೀವರ್ ರಿಸ್ಕ್ ರೀಸರ್ಚ್ʼ ಎಂಬ ಹೆಸರಿನಲ್ಲಿ ನಡೆದಿರುವ ಈ ಸಂಶೋಧನೆಯಲ್ಲಿ ಭಾರತದ ಐಸಿಎಂಆರ್(ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರೀಸರ್ಚ್), ಐಸಿಎಆರ್, ಅಶೋಕ ಟ್ರಸ್ಟ್, ಬ್ರಿಟನ್ನ ಸೆಂಟರ್ ಫಾರ್ ಎಕಾಲಜಿ ಅಂಡ್ ಹೈಡ್ರೋಲಜಿ ಮತ್ತಿತರ ಸಂಸ್ಥೆಗಳ ವಿಜ್ಞಾನಿಗಳು ಭಾಗಿಯಾಗಿದ್ದಾರೆ. ʼಮಂಕಿ ಫೀವರ್ ರಿಸ್ಕ್ ಪ್ರಾಜೆಕ್ಟ್ʼ ಅನುದಾನದಲ್ಲಿ ನಡೆದಿರುವ ಈ ಸಂಶೋಧನೆಯನ್ನು ಕರ್ನಾಟಕ ಮತ್ತು ಕೇರಳದ ಕೆಎಫ್ಡಿ ಸೋಂಕುಪೀಡಿತ ಪ್ರದೇಶಗಳಲ್ಲಿ ಕೈಗೊಳ್ಳಲಾಗಿದೆ.

“1957ರಲ್ಲಿ ಮೊಟ್ಟಮೊದಲ ಬಾರಿಗೆ ಈ ಸೋಂಕು ಪತ್ತೆಯಾದ ಬಳಿಕ ಆರಂಭದ ದಶಕದಲ್ಲಿ ಕೆಎಫ್‌ಡಿ ವೈರಸ್ ಕುರಿತ ಸಂಶೋಧನೆಗಳು ನಡೆದಿದ್ದವು. ಆದರೆ, ಆ ಬಳಿಕ ಕಳೆದ ಐವತ್ತು ವರ್ಷಗಳಲ್ಲಿ ವೈರಸ್, ಸೋಂಕು ಮತ್ತು ಸೋಂಕು ವಾಹಕಗಳೂ, ಸೋಂಕು ನಿಯಂತ್ರಣ ಸೇರಿದಂತೆ ಬಹುತೇಕ ಯಾವುದೇ ಸಂಶೋಧನೆಗಳು ನಡೆದಿರಲಿಲ್ಲ. ಆ ಹಿನ್ನೆಲೆಯಲ್ಲಿ ವೈರಸ್ ಪ್ರಸರಣದ ಕುರಿತ ಈ ಮಹತ್ವದ ಸಂಶೋಧನೆ ಕೆಎಫ್ಡಿ ಕುರಿತ ಆರೋಗ್ಯ ಇಲಾಖೆ ಮತ್ತು ವೈದ್ಯಕೀಯ ಜಗತ್ತಿನ ಗ್ರಹಿಕೆ ಮತ್ತು ಸ್ಪಂದನೆಯ ಸ್ವರೂಪವನ್ನೇ ಬದಲಿಸುವ ಸಾಧ್ಯತೆ ಇದೆ” ಎನ್ನುತ್ತಾರೆ ಸಂಶೋಧನಾ ತಂಡದಲ್ಲಿ ಒಬ್ಬರಾಗಿರುವ ವಿಜ್ಞಾನಿ ದರ್ಶನ್ ನಾರಾಯಣ್.

ʼದ ಫೆಡರಲ್ ಕರ್ನಾಟಕʼದೊಂದಿಗೆ ಮಾತನಾಡಿದ ಅವರು, “ಬಹುತೇಕ ಅರೆ ಶತಮಾನದ ಬಳಿಕ ಕೆಎಫ್‌ಡಿ ಸೋಂಕಿಗೆ ಸಂಬಂಧಿಸಿದಂತೆ ನಡೆಸಿರುವ ಈ ಸಂಶೋಧನೆ ಕಳೆದ ಮೂರು ವರ್ಷಗಳ ಹಿಂದೆಯೇ ಆರಂಭವಾಗಿತ್ತು. ಸೋಂಕಿತ ಪ್ರದೇಶಗಳಿಂದ 16 ಸಾವಿರ ಉಣುಗು ಸಂಗ್ರಹಿಸಿ, ಅವುಗಳ ವಿವಿಧ ಹಂತಗಳನ್ನು ಅಧ್ಯಯನ ನಡೆಸಿ, ಅವುಗಳಲ್ಲಿ ವೈರಾಣುಗಳ ಜೀವನ ಕ್ರಮವನ್ನು ಕುರಿತು ಸಂಶೋಧನೆ ನಡೆಸಲಾಗಿದೆ. ʼಹೆಮಾಫಿಸಲಿಸ್ʼ ಮತ್ತು ʼರಿಪಿಸ್ಫಲಸ್ʼ ಎಂಬ ಎರಡು ಪ್ರಭೇದದ ಉಣುಗುಗಳಲ್ಲಿ ವೈರಾಣು ಪೀಳಿಗೆಯಿಂದ ಪೀಳಿಗೆಗೆ ವರ್ಗಾವಣೆಯಾಗುತ್ತದೆ ಎಂಬುದು ಈ ಸಂಶೋಧನೆಯಲ್ಲಿ ಕಂಡುಬಂದಿದೆ. ಈವರೆಗೆ ಉಣುಗು ಸೇರಿದಂತೆ ಯಾವುದೇ ಪ್ರಾಣಿಯಲ್ಲಿ ಈ ವೈರಾಣು ಸಂತತಿಯಿಂದ ಸಂತತಿಗೆ ವರ್ಗಾವಣೆಯಾಗುವುದಿಲ್ಲ ಎಂದೇ ನಂಬಲಾಗಿತ್ತು. ಆದರೆ, ಈ ಹೊಸ ಸಂಶೋಧನೆ ಆ ನಂಬಿಕೆಯನ್ನು ಬದಲಾಯಿಸಿದೆ. ಹಾಗಾಗಿ ಮುಂದಿನ ದಿನಗಳಲ್ಲಿ ಸೋಂಕು ನಿಯಂತ್ರಣ ಮತ್ತು ನಿರ್ವಹಣೆಯ ವಿಷಯದಲ್ಲಿ ನಮ್ಮ ಗ್ರಹಿಕೆ ಮತ್ತು ವಿಧಾನಗಳಲ್ಲಿ ಬದಲಾವಣೆಯಾಗಬೇಕಿದೆ” ಎಂದು ಅಭಿಪ್ರಾಯಪಟ್ಟರು.

ಸೋಂಕು ನಿಯಂತ್ರಣದ ಮೇಲೆ ಪರಿಣಾಮವೇನು?

ಈ ಸಂಶೋಧನೆಯಿಂದಾಗಿ ಆರೋಗ್ಯ ಇಲಾಖೆ ಹಾಗೂ ವೈದ್ಯಕೀಯ ವಲಯ ಕೆಎಫ್‌ಡಿ ಸೋಂಕು ನಿಯಂತ್ರಣ ಮತ್ತು ನಿರ್ವಹಣೆಯ ಕಾರ್ಯವಿಧಾನವನ್ನೇ ಬದಲಾಯಿಸಿಕೊಳ್ಳಬೇಕಿದೆ. ಯಾಕೆಂದರೆ, ಈವರೆಗೆ ಸೋಂಕು ನಿಯಂತ್ರಣದ ವಿಷಯದಲ್ಲಿ ಸೋಂಕು ಹರಡುವ ನಿರ್ದಿಷ್ಟ ಅವಧಿ(ಸಾಮಾನ್ಯವಾಗಿ ಅಕ್ಟೋಬರ್ನಿಂದ ಮೇ ಅಂತ್ಯದವರೆಗೆ)ಯಲ್ಲಿ ಉಣುಗುಗಳ ಕಡಿತಕ್ಕೆ ಒಳಗಾಗದಂತೆ ಎಚ್ಚರಿಕೆ ವಹಿಸುವ ಮುಂಜಾಗ್ರತಾ ಕ್ರಮಗಳಿಗೆ ಆದ್ಯತೆ ನೀಡಲಾಗುತ್ತಿತ್ತು. ಆದರೆ, ಇದೀಗ ಎರಡು ಪ್ರಭೇದದ ಉಣುಗುಗಳಲ್ಲಿ ತಾಯಿ ಉಣುಗುಗಳಿಂದ ಅದರ ಮರಿ ಉಣುಗುಗಳಿಗೆ ವೈರಸ್ ಪ್ರಸರಣವಾಗುತ್ತದೆ ಎಂಬುದು ದೃಢಪಟ್ಟಿರುವುದರಿಂದ, ನಿರ್ದಿಷ್ಟ ಅವಧಿಗೆ ಸಂಪರ್ಕಕ್ಕೆ ಬರದೇ ಇರುವ ಮುಂಜಾಗ್ರತಾ ಕ್ರಮದ ಬದಲಾಗಿ ಉಣುಗುಗಳನ್ನು ಸಂಪೂರ್ಣ ನಿರ್ಮೂಲನೆ ಮಾಡುವ ಸವಾಲು ಎದುರಾಗಿದೆ.

ಆದರೆ “ಮಲೆನಾಡಿನ ದಟ್ಟ ಅರಣ್ಯದಂಚಿನ ಜನವಸತಿ ಮತ್ತು ಜಾನುವಾರು ಸಾಕಣೆಯ ಕಾರಣದಿಂದಾಗಿ ಉಣುಗು ನಿರ್ಮೂಲನೆ ಎಂಬುದು ಕಾರ್ಯಸಾಧುವಲ್ಲ. ಅದರಲ್ಲೂ ಕೆಎಫ್‌ಡಿ ವಾಹಕ ಎಂದು ಗುರುತಿಸಿರುವ ಉಣುಗುಗಳು ಮನುಷ್ಯರು ಅಥವಾ ಪ್ರಾಣಿಗಳು ಕಾಡಿನೊಳಗೆ ಹೋಗದೆ ಇದ್ದರೂ ಕಾಡಿನ ಅಂಚಿನ ಮನೆಗಳಲ್ಲಿದ್ದರೂ, ರಸ್ತೆಗಳಲ್ಲಿ ಓಡಾಡಿದರೂ ಗಾಳಿಯಲ್ಲಿ ತೇಲಿಬಂದು ಅಂಟಿಕೊಳ್ಳುತ್ತವೆ. ಉಣುಗುಗಳು ಅವುಗಳ ಲಾರ್ವಾ ಮತ್ತು ನಿಂಫ್(ಪೊರೆ) ಹಂತದಲ್ಲಿ ಅತ್ಯಂತ ಹಗುರಾಗಿದ್ದು, ತೀರಾ ಸಣ್ಣ ಗಾತ್ರವನ್ನು ಹೊಂದಿರುತ್ತವೆ. ಹಾಗಾಗಿ ಅವು ಸಹಜ ಗಾಳಿಯಲ್ಲೂ ಧೂಳಿನ ಕಣಗಳಂತೆಯೇ ತೇಲಿ ಬರಬಲ್ಲವು. ಹಾಗಾಗಿ ಉಣುಗು ನಿರ್ಮೂಲನೆ ಅಥವಾ ಉಣುಗುಗಳು ಮನುಷ್ಯರ ಸಂಪರ್ಕಕ್ಕೆ ಬರದಂತೆ ತಡೆಯುವುದು ಸರಳವಲ್ಲ” ಎನ್ನುತ್ತಾರೆ ಶಿವಮೊಗ್ಗದ ʼಕೆಎಫ್‌ಡಿ ಜನಜಾಗೃತಿ ಒಕ್ಕೂಟʼದ ಸಂಚಾಲಕರಾದ ಹಿರಿಯ ವಕೀಲ ಕೆ ಪಿ ಶ್ರೀಪಾಲ್.

"ಹಾಗಾಗಿ ತುರ್ತಾಗಿ ಸರ್ಕಾರ ಮತ್ತು ಆರೋಗ್ಯ ಇಲಾಖೆ ಈ ಮಹತ್ವದ ಸಂಶೋಧನೆಯ ಹಿನ್ನೆಲೆಯಲ್ಲಿ ಕೆಎಫ್‌ಡಿ ನಿಯಂತ್ರಣ ಮತ್ತು ಮುಂಜಾಗ್ರತಾ ಕ್ರಮಗಳನ್ನು ಪರಿಷ್ಕರಿಸಬೇಕಾಗಿದೆ. ಮಲೆನಾಡಿನಲ್ಲಿ ದಿನದಿಂದ ದಿನಕ್ಕೆ, ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಿರುವ ಈ ಸೋಂಕು ಮುಂದಿನ ದಿನಗಳಲ್ಲಿ ಭಾರೀ ಸಾವು-ನೋವಿಗೆ ಕಾರಣವಾಗುವ ಆತಂಕ ಎದುರಾಗಿದೆ. ಜೊತೆಗೆ ಶಾಶ್ವತ ಲಸಿಕೆ ಮತ್ತು ವ್ಯಾಪಕ ನಿಯಂತ್ರಣ ಕ್ರಮಗಳ ಮೂಲಕ ಮಲೆನಾಡಿನ ಜನರಿಗೆ ಈ ಮಾರಕ ಸೋಂಕಿನಿಂದ ಬಿಡುಗಡೆ ನೀಡಬೇಕಿದೆ" ಎಂದು ಒಕ್ಕೂಟ ಒತ್ತಾಯಿಸುತ್ತದೆ ಎಂದು ಅವರು ಹೇಳಿದರು.

ಅದರಲ್ಲೂ ಸದ್ಯ ಕಳೆದ ಮೂರು ವರ್ಷಗಳಿಂದ ಕೆಎಫ್‌ಡಿ ಲಸಿಕೆಯನ್ನು ಕೂಡ ಅದು ಪರಿಣಾಮಕಾರಿಯಾಗಿಲ್ಲ ಎಂಬ ಕಾರಣದಿಂದ ನಿಲ್ಲಿಸಲಾಗಿದೆ. ಹಾಗಾಗಿ ಸೋಂಕು ನಿಯಂತ್ರಣಕ್ಕೆ ಈಗ ಸರ್ಕಾರ ಮತ್ತು ವ್ಯದ್ಯಕೀಯ ವಲಯದ ಎದುರು ಇರುವುದು ಮುಂಜಾಗ್ರತಾ ಕ್ರಮದ ಅಸ್ತ್ರವೊಂದೇ. ಹಾಗಿರುವಾಗ ವೈರಸ್ ವಾಹಕ ಉಣುಗುಗಳು ಪೀಳಿಗೆಯಿಂದ ಪೀಳಿಗೆಗೆ ವೈರಾಣುವನ್ನು ವರ್ಗಾಯಿಸುತ್ತವೆ ಎಂಬ ಈ ಸಂಶೋಧನೆ ಸೋಂಕು ನಿಯಂತ್ರಣ ಮತ್ತು ನಿರ್ವಹಣೆಯ ವಿಷಯದಲ್ಲಿ ದೊಡ್ಡ ಆತಂಕ ಎದುರಾಗಿರುವ ವಾಸ್ತವಾಂಶವನ್ನು ತೆರೆದಿಟ್ಟಿದೆ.