ರಾಜ್ಯ ಸರ್ಕಾರದ ಲಿಂಗತ್ವ ಅಲ್ಪಸಂಖ್ಯಾತರ ಸಮೀಕ್ಷೆ: ಹೈಕೋರ್ಟ್ ಮೆಟ್ಟಿಲೇರಿದ ಮಾನವೀಯ ಸಂಘಟನೆ
ರಾಜ್ಯ ಸರ್ಕಾರವು ಮಂಗಳಮುಖಿಯರು ಮತ್ತು ದೇವದಾಸಿ ಸಂತ್ರಸ್ತರು ಸೇರಿದಂತೆ ಲಿಂಗತ್ವ ಅಲ್ಪಸಂಖ್ಯಾತರು ಸರ್ಕಾರಿ ಆಸ್ಪತ್ರೆಗಳಲ್ಲಿ ನೋಂದಾಯಿಸಿಕೊಳ್ಳಬೇಕೆಂದು ಆದೇಶಿಸಿದೆ.
ಕರ್ನಾಟಕ ಸರ್ಕಾರವು ರಾಜ್ಯಾದ್ಯಂತ ಆರಂಭಿಸಿರುವ "ಲಿಂಗತ್ವ ಅಲ್ಪಸಂಖ್ಯಾತರ ಸಮೀಕ್ಷೆ"ಯನ್ನು ಪ್ರಶ್ನಿಸಿ, ಡಾ. ಅನಿತಾ ಪ್ರಸಾದ್ ನೇತೃತ್ವದ ಅನಿತಾ ಮಾನವೀಯ ಪ್ರತಿಷ್ಠಾನವು ಕರ್ನಾಟಕ ಹೈಕೋರ್ಟ್‌ನಲ್ಲಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿದೆ. ಈ ಸಮೀಕ್ಷೆಯು ಲಿಂಗತ್ವ ಅಲ್ಪಸಂಖ್ಯಾತರ ಘನತೆ, ಖಾಸಗಿತನ ಮತ್ತು ಮೂಲಭೂತ ಹಕ್ಕುಗಳನ್ನು ಉಲ್ಲಂಘಿಸುತ್ತಿದೆ ಎಂದು ಅರ್ಜಿಯಲ್ಲಿ ಆರೋಪಿಸಲಾಗಿದೆ.
ರಾಜ್ಯ ಸರ್ಕಾರವು ಮಂಗಳಮುಖಿಯರು ಮತ್ತು ದೇವದಾಸಿ ಸಂತ್ರಸ್ತರು ಸೇರಿದಂತೆ ಲಿಂಗತ್ವ ಅಲ್ಪಸಂಖ್ಯಾತರು ಸರ್ಕಾರಿ ಆಸ್ಪತ್ರೆಗಳಲ್ಲಿ ನೋಂದಾಯಿಸಿಕೊಳ್ಳಬೇಕೆಂದು ಆದೇಶಿಸಿದೆ. ಇದನ್ನು "ಸಾಮಾಜಿಕ-ಆರ್ಥಿಕ ಮತ್ತು ಶೈಕ್ಷಣಿಕ ಸಮೀಕ್ಷೆ" ಎಂದು ಹೇಳಲಾಗಿದ್ದರೂ, ವಾಸ್ತವದಲ್ಲಿ ಭಾಗವಹಿಸುವವರನ್ನು ಅವಮಾನಕಾರಿ ವೈದ್ಯಕೀಯ ಪರೀಕ್ಷೆಗಳಿಗೆ ಮತ್ತು ಅನಗತ್ಯ ಪ್ರಶ್ನೆಗಳಿಗೆ ಒಳಪಡಿಸಲಾಗುತ್ತಿದೆ ಎಂದು ಪ್ರತಿಷ್ಠಾನವು ಆಕ್ಷೇಪಿಸಿದೆ. ಈ ಕ್ರಮವು, ವ್ಯಕ್ತಿಯು ತನ್ನ ಲಿಂಗವನ್ನು ವೈದ್ಯಕೀಯ ಪರೀಕ್ಷೆಯಿಲ್ಲದೆ ಸ್ವಯಂ-ಘೋಷಿಸಿಕೊಳ್ಳುವ ಹಕ್ಕನ್ನು ಎತ್ತಿಹಿಡಿಯುವ ತೃತೀಯ ಲಿಂಗಿ ವ್ಯಕ್ತಿಗಳ (ಹಕ್ಕುಗಳ ರಕ್ಷಣೆ) ಕಾಯ್ದೆ, 2019 ರ ಸ್ಪಷ್ಟ ಉಲ್ಲಂಘನೆಯಾಗಿದೆ.
ಪ್ರತ್ಯೇಕ ಸಮೀಕ್ಷೆ ಅನಗತ್ಯ
ಕೇವಲ ಮಂಗಳಮುಖಿಯರ ಮೇಲೆ ಕೇಂದ್ರೀಕರಿಸಿ, ಟ್ರಾನ್ಸ್‌ಮೆನ್, ನಾನ್-ಬೈನರಿ ವ್ಯಕ್ತಿಗಳನ್ನು ಹೊರಗಿಟ್ಟಿರುವುದು ‘ನಾಲ್ಸಾ’ ತೀರ್ಪಿನಲ್ಲಿ ಮಾನ್ಯತೆ ಪಡೆದ ಲಿಂಗತ್ವ ವೈವಿಧ್ಯತೆಯ ಕಡೆಗಣನೆಯಾಗಿದೆ. ಕೇಂದ್ರ ಸರ್ಕಾರವು ಈಗಾಗಲೇ "ಟ್ರಾನ್ಸ್ಜೆಂಡರ್ ಗುರುತಿನ ಚೀಟಿ" ನೀಡುತ್ತಿರುವಾಗ, ರಾಜ್ಯ ಸರ್ಕಾರವು ಪ್ರತ್ಯೇಕ ಸಮೀಕ್ಷೆ ನಡೆಸುವುದು ಅನಗತ್ಯ. ಇದು ಕೇವಲ ಮತಬ್ಯಾಂಕ್ ರಾಜಕಾರಣದ ಭಾಗವಾಗಿದ್ದು, ನಕಲಿ ವ್ಯಕ್ತಿಗಳು ಸುಳ್ಳು ಗುರುತನ್ನು ಪಡೆದು ಕಲ್ಯಾಣ ಯೋಜನೆಗಳನ್ನು ದುರುಪಯೋಗಪಡಿಸಿಕೊಳ್ಳಲು ದಾರಿ ಮಾಡಿಕೊಡುತ್ತದೆ ಎಂದು ಅರ್ಜಿಯಲ್ಲಿ ಆತಂಕ ವ್ಯಕ್ತಪಡಿಸಲಾಗಿದೆ. ಆಸ್ಪತ್ರೆಗಳಲ್ಲಿ ಲಿಂಗವನ್ನು "ಸಾಬೀತುಪಡಿಸಲು" ಒತ್ತಾಯಿಸುವುದರಿಂದ, ಸಮುದಾಯವು ಮತ್ತೆ ಭಯ ಮತ್ತು ಸಾಮಾಜಿಕ ಬಹಿಷ್ಕಾರಕ್ಕೆ ಒಳಗಾಗಬೇಕಾಗುತ್ತದೆ ಎಂದು ಅರ್ಜಿಯಲ್ಲಿ ಹೇಳಲಾಗಿದೆ. .
ಈ ಬಗ್ಗೆ ಮಾತನಾಡಿದ ಡಾ. ಅನಿತಾ ಪ್ರಸಾದ್, "ನಮ್ಮ ವಿರೋಧ ಕಲ್ಯಾಣ ಯೋಜನೆಗಳಿಗಲ್ಲ, ಕಾನೂನುಬಾಹಿರ ಪ್ರಕ್ರಿಯೆಗಾಗಿದೆ. ಕಲ್ಯಾಣವು ಘನತೆಯ ಮೂಲಕ ಬರಬೇಕೇ ಹೊರತು, ಅವಮಾನದ ಮೂಲಕವಲ್ಲ. ಇಂತಹ ರಾಜಕೀಯ ಪ್ರೇರಿತ, ದೋಷಪೂರಿತ ಸಮೀಕ್ಷೆಗಳು ನಮ್ಮ ಪ್ರಜಾಪ್ರಭುತ್ವಕ್ಕೆ ಹಾನಿ ಮಾಡುತ್ತವೆ" ಎಂದು ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ್ದಾರೆ.
ಅರ್ಜಿಯಲ್ಲಿ, ಸಮೀಕ್ಷೆಯನ್ನು ತಕ್ಷಣವೇ ರದ್ದುಗೊಳಿಸಿ, ಸಂಗ್ರಹಿಸಿದ ಡೇಟಾವನ್ನು ನಾಶಪಡಿಸಬೇಕು ಮತ್ತು ಬಲವಂತದ ಪರೀಕ್ಷೆಗೆ ಒಳಗಾದವರಿಗೆ ಪರಿಹಾರ ನೀಡಬೇಕೆಂದು ಕೋರಲಾಗಿದೆ. ಅಲ್ಲದೆ, ಭವಿಷ್ಯದ ಕಲ್ಯಾಣ ಕ್ರಮಗಳು ಕಾನೂನುಬದ್ಧ ಮತ್ತು ಘನತೆಯಿಂದ ಕೂಡಿರಲು ನ್ಯಾಯಾಂಗದ ಮೇಲ್ವಿಚಾರಣೆಯಲ್ಲಿ ಮಾರ್ಗಸೂಚಿಗಳನ್ನು ರೂಪಿಸಬೇಕೆಂದು ಆಗ್ರಹಿಸಲಾಗಿದೆ.
