Bihar Election Results| ಬಿಹಾರ ಚುನಾವಣೆ: ನಿತೀಶ್ ಅಲೆಯಲ್ಲಿ ಬಿರುಗಾಳಿ ಎಬ್ಬಿಸಿದ ಎನ್ಡಿಎ; ಆರ್ಜೆಡಿಗೆ ಹಿನ್ನಡೆ - ನೆಲಕಚ್ಚಿದ ಕಾಂಗ್ರೆಸ್
ಬಿಜೆಪಿಗೆ ಹಂಚಿಕೆಯಾಗಿದ್ದ 101 ಸ್ಥಾನಗಳಲ್ಲಿ 90 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿ, ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ಇದು ಕಳೆದ ವರ್ಷದ ಲೋಕಸಭೆ ಚುನಾವಣೆಯಲ್ಲಿ ಕಂಡಿದ್ದ ಹಿನ್ನಡೆಗೆ ಪ್ರತಿಕಾರವಾಗಿದೆ ಎಂದು ವಿಶ್ಲೇಷಿಸಲಾಗಿದೆ.
ಬಿಜೆಪಿ ನೇತೃತ್ವದ ಎನ್ಡಿಎ ಮೈತ್ರಿಕೂಟ ಬಿಹಾರದಲ್ಲಿ ಭಾರಿ ಗೆಲುವು ದಾಖಲಿಸಲು ಸಜ್ಜಾಗಿದೆ. 243 ವಿಧಾನಸಭಾ ಸ್ಥಾನಗಳಲ್ಲಿ 200ಕ್ಕೂ ಹೆಚ್ಚು ಸ್ಥಾನಗಳಲ್ಲಿ ಭರ್ಜರಿ ಮುನ್ನಡೆ ಸಾಧಿಸಿದೆ. ಬಿಹಾರದ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಕೇಸರಿ ಪಕ್ಷವು ಅತ್ಯಧಿಕ ಸ್ಥಾನಗಳಲ್ಲಿ ಗೆಲುವು ದಾಖಲಿಸುವತ್ತ ಹೆಜ್ಜೆ ಇಟ್ಟಿದೆ.
ಚುನಾವಣೆ ಆಯೋಗದ ಮಾಹಿತಿ ಪ್ರಕಾರ, ಬಿಜೆಪಿಗೆ ಹಂಚಿಕೆಯಾಗಿದ್ದ 101 ಸ್ಥಾನಗಳಲ್ಲಿ 90 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿ, ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ಇದು ಕಳೆದ ವರ್ಷದ ಲೋಕಸಭೆ ಚುನಾವಣೆಯಲ್ಲಿ ಕಂಡಿದ್ದ ಹಿನ್ನಡೆಗೆ ಪ್ರತಿಕಾರವಾಗಿದೆ ಎಂದು ವಿಶ್ಲೇಷಿಸಲಾಗಿದೆ.
ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರಿಗೆ ಪ್ರಧಾನಮಂತ್ರಿ ನರೇಂದ್ರ ಮೋದಿ ನೀಡಿದ ಬೆಂಬಲ ಎನ್ಡಿಎಗೆ ಲಾಭ ತಂದುಕೊಟ್ಟಿದೆ. 2020ರಲ್ಲಿ ಕೇವಲ 43 ಸ್ಥಾನ ಜಯಿಸಿದ್ದ ಜೆಡಿಯು, ಈಗ 70ಕ್ಕೂ ಹೆಚ್ಚು ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿದೆ.
ಕೇಂದ್ರ ಸಚಿವ ಚಿರಾಗ್ ಪಾಸ್ವಾನ್ ನೇತೃತ್ವದ ಎಲ್ಜೆಪಿ (ಆರ್ವಿ) 29 ಸ್ಥಾನಗಳಲ್ಲಿ ಸ್ಪರ್ಧಿಸಿ 19 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿದೆ. ಆರ್ಜೆಡಿ ಹಾಗೂ ಕಾಂಗ್ರೆಸ್ ನೇತೃತ್ವದ ಮಹಾಘಟಬಂಧನ್ 35 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿದ್ದು, ಆರ್ಜೆಡಿ 26 ಕ್ಷೇತ್ರಗಳಲ್ಲಿ ಮುಂಚೂಣಿಯಲ್ಲಿದೆ.
ಮತಗಟ್ಟೆ ಸಮೀಕ್ಷೆಗಳು ಏನು ಹೇಳಿದ್ದವು?
ಬಹುತೇಕ ಎಲ್ಲಾ ಮತಗಟ್ಟೆ ಸಮೀಕ್ಷೆಗಳು ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟಕ್ಕೆ (ಎನ್ಡಿಎ) ಸುಲಭದ ಗೆಲುವನ್ನು ಭವಿಷ್ಯ ನುಡಿದಿದ್ದವು.
ಆದರೆ, 'ಆಕ್ಸಿಸ್ ಮೈ ಇಂಡಿಯಾ' ಸಮೀಕ್ಷೆಯು ಎನ್ಡಿಎಗೆ 121-141 ಸ್ಥಾನಗಳೊಂದಿಗೆ ಅಲ್ಪ ಬಹುಮತ ಸಿಗಲಿದೆ ಎಂದು ಹೇಳಿದರೆ, ಮಹಾಘಟಬಂಧನ್ಗೆ 98-118 ಸ್ಥಾನಗಳು ಸಿಗಬಹುದು ಎಂದು ಅಂದಾಜಿಸಿದೆ.
'ಟುಡೇಸ್ ಚಾಣಕ್ಯ' ಸಮೀಕ್ಷೆಯು ಬಿಜೆಪಿ ನೇತೃತ್ವದ ಎನ್ಡಿಎಗೆ 160 ಸ್ಥಾನಗಳ ಬೃಹತ್ ಗೆಲುವನ್ನು ಊಹಿಸಿದೆ.
ಎರಡೂ ಬಣಗಳಲ್ಲಿ ವಿಶ್ವಾಸದ ಮಾತು
ಮತಗಟ್ಟೆ ಸಮೀಕ್ಷೆಗಳ ಹೊರತಾಗಿಯೂ, ಎರಡೂ ಮೈತ್ರಿಕೂಟಗಳು ತಮ್ಮ ಗೆಲುವಿನ ಬಗ್ಗೆ ವಿಶ್ವಾಸ ವ್ಯಕ್ತಪಡಿಸಿವೆ. ಎನ್ಡಿಎ ನಾಯಕರು ಸಮೀಕ್ಷೆಗಳನ್ನು ಆಧರಿಸಿ ಈಗಾಗಲೇ ಸಂಭ್ರಮದಲ್ಲಿದ್ದರೆ, ಮಹಾಘಟಬಂಧನ್ ನಾಯಕರು ಈ ಸಮೀಕ್ಷೆಗಳನ್ನು ತಿರಸ್ಕರಿಸಿದ್ದಾರೆ. ಜನ ಸ್ವರಾಜ್ ಪಕ್ಷದ ಮುಖ್ಯಸ್ಥ ಪ್ರಶಾಂತ್ ಕಿಶೋರ್, "ಈ ಎಲ್ಲಾ ಸಮೀಕ್ಷೆಗಳು ನಕಲಿ. ಬಿಹಾರವು ಐತಿಹಾಸಿಕ ಬದಲಾವಣೆಯತ್ತ ಸಾಗುತ್ತಿದೆ" ಎಂದು ಹೇಳಿದ್ದರು.
Live Updates
- 14 Nov 2025 3:24 PM IST
ಬಿಹಾರದಲ್ಲಿ ಭರ್ಜರಿ ಗೆಲುವಿನ ನಂತರ, ಪಶ್ಚಿಮ ಬಂಗಾಳಕ್ಕೆ ಕಣ್ಣೆತ್ತಿದ ಬಿಜೆಪಿ
ಬಿಹಾರ ವಿಧಾನಸಭೆ ಚುನಾವಣೆಯಲ್ಲಿ ಎನ್ಡಿಎ ಭರ್ಜರಿ ಜಯ ಸಾಧಿಸುತ್ತಿದೆ. ಈ ಹಿನ್ನೆಲೆ 2026ರಲ್ಲಿ ಮತಚಲಾಯಿಸಬೇಕಿರುವ ಮಮತಾ ಬ್ಯಾನರ್ಜಿ ನೇತೃತ್ವದ ಪಶ್ಚಿಮ ಬಂಗಾಳವೇ ತಮ್ಮ ಮುಂದಿನ ರಾಜಕೀಯ ಗುರಿಯೆಂದು ಬಿಜೆಪಿ ಇಂದು ಸ್ಪಷ್ಟಪಡಿಸಿದೆ. ಎಣಿಕೆ ಹಂತದಲ್ಲೇ ರಾಷ್ಟ್ರೀಯ ಜನತಾಂತ್ರಿಕ ಮೈತ್ರಿ (ಎನ್ಡಿಎ) ಸ್ಪಷ್ಟ ಜಯದತ್ತ ಸಾಗುತ್ತಿರುವಂತೆ ಕಂಡಾಗ, ಬಿಜೆಪಿ ನಾಯಕ ಹಾಗೂ ಐಟಿ ಸೆಲ್ ಮುಖ್ಯಸ್ಥ ಅಮಿತ್ ಮಾಳವಿಯಾ ಅವರು ಈ ಗೆಲುವು ಎನ್ಡಿಎ ಸರ್ಕಾರದ ನವಿರಾದ ನಂಬಿಕೆಯ ಪ್ರತಿಬಿಂಬವಾಗಿದೆ ಮತ್ತು ಪಶ್ಚಿಮ ಬಂಗಾಳದ ಮೇಲೆ ನೇರ ಪರಿಣಾಮ ಬೀರುವ ಗೆಲುವು ಇದು ಎಂದು ಹೇಳಿದ್ದಾರೆ.
ಎನ್ಡಿಎ ಸರ್ಕಾರ ಮಾಡುತ್ತಿರುವ ಕೆಲಸಗಳ ಪ್ರಭಾವವೇ ಈ ಚುನಾವಣಾ ಫಲಿತಾಂಶ ತೋರಿಸಿದೆ. ವಿಶೇಷವಾಗಿ ಯುವ ಉದ್ಯೋಗ ಮತ್ತು ಮಹಿಳೆಯರ ಆರ್ಥಿಕ ಸಬಲೀಕರಣ ಕ್ಷೇತ್ರಗಳಲ್ಲಿ ಸರ್ಕಾರ ಕೈಗೊಂಡ ಕ್ರಮಗಳು ಒಳ್ಳೆಯ ಪ್ರತಿಫಲ ನೀಡಿವೆ. ನಿತೀಶ್ ಕುಮಾರ್ ಹಾಗೂ ಬಿಹಾರ ಬಿಜೆಪಿ ಘಟಕ ಯುವಕರಿಗೆ ಅವಕಾಶಗಳನ್ನು ನಿರ್ಮಿಸುವಲ್ಲಿ ಮತ್ತು ಮಹಿಳೆಯರಿಗೆ ಸ್ವಂತ ಉದ್ಯಮ ಪ್ರಾರಂಭಿಸಲು ನೆರವಾಗುವಲ್ಲಿ ಮಾಡಿದ ಕೆಲಸವೇ ಮತದಾರರ ಮನೋಭಾವವನ್ನು ರೂಪಿಸಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ಆದೇ ಸಂದರ್ಭದಲ್ಲಿ ಲಾಲು ಪ್ರಸಾದ್ ಯಾದವ್ ಅವರ “ವಿನಾಶಕಾರಿ 15 ವರ್ಷಗಳ” ಆಡಳಿತವನ್ನು ಅವರು ತೀವ್ರವಾಗಿ ವಿಮರ್ಶಿಸಿದರು. ಅದು ಬಿಹಾರದ ಪ್ರಗತಿಗೆ ತಡೆಯಾಯಿತು ಎಂದು ಆರೋಪಿಸಿ, ಈ ಬಾರಿ ಮತದಾರರು ಆ ಆಡಳಿತ ಶೈಲಿಯನ್ನೇ ತಿರಸ್ಕರಿಸಿ, ಅಭಿವೃದ್ಧಿಗೆ ಒತ್ತು ನೀಡುವ ಎನ್ಡಿಎ ಮಾದರಿಯನ್ನು ಆರಿಸಿಕೊಂಡಿದ್ದಾರೆ ಎಂದು ಹೇಳಿದರು.
- 14 Nov 2025 3:15 PM IST
ಬಿಹಾರದಲ್ಲಿ ಎನ್ಡಿಎ ಬಿರುಗಾಳಿ: 204 ಸ್ಥಾನಗಳಲ್ಲಿ ಮುನ್ನಡೆ, ನಿತೀಶ್ ಐದನೇ ಅವಧಿಯತ್ತ
ಬಿಹಾರ ಚುನಾವಣಾ ಲೆಕ್ಕಾಚಾರದ ಪ್ರಕಾರ, ಬಿಹಾರದಲ್ಲಿ ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಮೈತ್ರಿ (ಎನ್ಡಿಎ) ಭರ್ಜರಿ ಜಯದತ್ತ ಸಾಗುತ್ತಿದೆ. ರಾಜ್ಯದ 243 ವಿಧಾನಸಭಾ ಕ್ಷೇತ್ರಗಳಲ್ಲಿ 204 ಕಡೆಗಳಲ್ಲಿ ಎನ್ಡಿಎ ಮುನ್ನಡೆ ಸಾಧಿಸಿದೆ. ಮುಖ್ಯಮಂತ್ರಿಯಾಗಿ ಐದನೇ ಬಾರಿ ಅಧಿಕಾರಕ್ಕೆ ಬರಲು ನಿತೀಶ್ ಕುಮಾರ್ ಸಿದ್ಧರಾಗಿದ್ದು, ಬಿಹಾರದ ದೀರ್ಘಾವಧಿಯ ಮುಖ್ಯಮಂತ್ರಿಯಾಗಿ ತಮ್ಮ ಸ್ಥಾನವನ್ನು ಮತ್ತಷ್ಟು ಬಲಪಡಿಸುವಂತೆ ತೋರುತ್ತಿದೆ.
ಮಧ್ಯಾಹ್ನ 2:45ಕ್ಕೆ ಬಂದ ಮಾಹಿತಿಯ ಪ್ರಕಾರ, ಎನ್ಡಿಎ ಈಗಾಗಲೇ 2020ರ ಫಲಿತಾಂಶವನ್ನು ಮೀರಿಸಿದ್ದು, ಆಗ ಅವರು 122 ಸ್ಥಾನಗಳನ್ನು ಗೆದ್ದಿದ್ದರು. ಈ ಬಾರಿ ಮೈತ್ರಿ ಭಾರಿ ಮುನ್ನಡೆ ದಾಖಲಿಸಿದ್ದು, ಕೇವಲ 32 ಕ್ಷೇತ್ರಗಳಲ್ಲಿ ಮಾತ್ರ ಮುನ್ನಡೆ ಸಾಧಿಸಿದ್ದ ಮಹಾಘಟಬಂಧನ್ ಮೇಲೆ ಸ್ಪಷ್ಟ ಮೇಲುಗೈ ಸಾಧಿಸಿದೆ.
ಇದೇ ವೇಳೆ, ಪ್ರಶಾಂತ್ ಕಿಶೋರ್ ಅವರ ಜನ ಸುರಾಜ್ ಪಕ್ಷ ಮೊದಲ ಬಾರಿಗೆ ಚುನಾವಣೆಗೆ ಸ್ಪರ್ಧಿಸಿದರೂ ಯಾವುದೇ ಕ್ಷೇತ್ರದಲ್ಲಿ ಮುನ್ನಡೆ ಪಡೆಯಲು ವಿಫಲವಾಗಿದೆ. ಮತ ಎಣಿಕೆ ಮುಂದುವರಿಯುತ್ತಿದ್ದಂತೆ, ಬಿಹಾರದಲ್ಲಿ ಎನ್ಡಿಎ ಪ್ರಾಬಲ್ಯ ಸ್ಪಷ್ಟವಾಗಿ ಗೋಚರಿಸುತ್ತಿದೆ.
- 14 Nov 2025 3:11 PM IST
ಎನ್ಡಿಎ ಅಬ್ಬರದ ನಡುವೆ ಮುಖೇಶ್ ಸಹಾನಿಯ ವಿಐಪಿ ಪಕ್ಷಕ್ಕೆ ದೊಡ್ಡ ಹೊಡೆತ: 12ಕ್ಕೂ 12 ಸ್ಥಾನಗಳಲ್ಲಿ ಹಿನ್ನಡೆ
ವಿಐಪಿ ಮುಖ್ಯಸ್ಥ ಮುಖೇಶ್ ಸಹಾನಿ, ವಿರೋಧ ಪಕ್ಷಗಳ ಮಹಾಘಟಬಂಧನ್ದೊಂದಿಗೆ ಕಠಿಣ ಮಾತುಕತೆ ನಡೆಸಿ 12 ಸ್ಥಾನಗಳನ್ನು ಪಡೆದುಕೊಂಡಿದ್ದರು. ಡೆಪ್ಯುಟಿ ಮುಖ್ಯಮಂತ್ರಿ ಸ್ಥಾನವನ್ನೂ ಬೇಡಿಕೆಯಿಟ್ಟಿದ್ದ ಸಹಾನಿಗೆ ಈಗ ಸಂಪೂರ್ಣ ವಿರುದ್ದದ ಪರಿಸ್ಥಿತಿ ಎದುರಾಗಿದೆ. 2020ರಲ್ಲಿ ನಾಲ್ಕು ಸ್ಥಾನಗಳನ್ನು ಗೆದ್ದಿದ್ದ ವಿಐಪಿ, ಈ ಬಾರಿ ಎಲ್ಲ 12 ಕ್ಷೇತ್ರಗಳಲ್ಲೂ ಹಿನ್ನಡೆಯಲ್ಲಿದೆ. ಮಹಾಘಟಬಂಧನ್ ಕೇವಲ 38 ಸ್ಥಾನಗಳಲ್ಲಿ ಮುನ್ನಡೆ ಹೊಂದಿದ್ದರೆ, 243 ಸದಸ್ಯರ ವಿಧಾನಸಭೆಯಲ್ಲಿ ಎನ್ಡಿಎ 200ರ ಗಡಿ ದಾಟಿದೆ.
ಮುಖೇಶ್ ಸಹಾನಿ ಈ ಬಾರಿ ಚುನಾವಣೆಗೆ ತಾನೇ ಸ್ಪರ್ಧಿಸದೆ, ತಮ್ಮ ಸಹೋದರ ಸಂತೋಷ್ ಸಹಾನಿಯನ್ನು ಗೌರ ಬೌರಂ ಕ್ಷೇತ್ರದಿಂದ ಸ್ಪರ್ಧೆಗೆ ಇಳಿಸಿದ್ದರು. ಆದರೆ ಅಲ್ಲಿ ಬಿಜೆಪಿ ಅಭ್ಯರ್ಥಿ ಸುಜಿತ್ ಕುಮಾರ್ 7,000ಕ್ಕೂ ಹೆಚ್ಚು ಮತಗಳ ಅಂತರದಲ್ಲಿ ಮುನ್ನಡೆ ಸಾಧಿಸಿದ್ದು, ಸಂತೋಷ್ ಹಾಗೂ ಆರ್ಜೆಡಿಯ ಅಫ್ಜಲ್ ಅಲಿ ಇಬ್ಬರೂ ಬಹುತೇಕ ಹಿಂದಿದ್ದಾರೆ.
ಮಲ್ಲಾಹ, ಸಹಾನಿ ಮತ್ತು ನಿಶಾದ್ ಸಮುದಾಯಗಳಲ್ಲಿ ತನ್ನ ಪ್ರಭಾವವನ್ನು ಬಳಸಿಕೊಂಡು ಬಿಹಾರದ ರಾಜಕೀಯದಲ್ಲಿ ವೇಗವಾಗಿ ಏರಿಕೆ ಕಂಡಿದ್ದ ಮುಖೇಶ್ ಸಹಾನಿ, 2020ರಲ್ಲಿ ಮೊದಲ ಬಾರಿಗೆ ಚುನಾವಣೆಗೆ ನಿಂತು ನಾಲ್ಕು ಸ್ಥಾನಗಳನ್ನು ಗೆದ್ದಿದ್ದರು. ಆ ವೇಳೆ ವಿಐಪಿ ಆರು ಸ್ಥಾನಗಳಲ್ಲಿ ಎರಡನೇ ಸ್ಥಾನದಲ್ಲೂ ಬಂದಿತ್ತು, ಮೂರು ಕ್ಷೇತ್ರಗಳಲ್ಲಿ 7,000 ಮತಗಳಿಗಿಂತ ಕಡಿಮೆ ಅಂತರದಲ್ಲಿ ಸೋಲಿತ್ತು. ಪಕ್ಷದ ಒಟ್ಟು ಮತ ಶೇಕಡಾವಾರು 1.52 ಆಗಿತ್ತು.
ಈ ಬಾರಿ ಪ್ರಚಾರದ ಅವಧಿಯಲ್ಲಿ "ಸನ್ ಆಫ್ ಮಲ್ಲಾಹ್" ಎಂದು ತಾನೇ ಬ್ರಾಂಡ್ ಮಾಡಿಕೊಂಡಿದ್ದ ಸಹಾನಿ, ಮಹಾಘಟಬಂಧನ್ದೊಳಗಿನ ಉದ್ವಿಗ್ನತಾ ವರದಿಗಳ ನಡುವೆಯೇ ತನ್ನ ಪ್ರಭಾವ ಹೆಚ್ಚುತ್ತಿದೆ ಎಂಬ ವಿಶ್ವಾಸ ಹೊಂದಿದ್ದರು. ರಾಜಕೀಯ ಪ್ರವೇಶಕ್ಕೂ ಮುನ್ನ ಅವರು ಬಾಲಿವುಡ್ ಸೆಟ್ ಡಿಸೈನರ್ ಆಗಿ ಕೆಲಸ ಮಾಡುತ್ತಿದ್ದರು. ನಂತರ ಮುಕೇಶ್ ಸಿನೆವೋರ್ಲ್ಡ್ ಪ್ರೈವೇಟ್ ಲಿಮಿಟೆಡ್ ಸ್ಥಾಪಿಸಿ, ನಂತರ ಬಿಹಾರಕ್ಕೆ ಮರಳಿ ಸಮುದಾಯ ಅಭಿವೃದ್ಧಿಗೆ ಕೆಲಸ ಆರಂಭಿಸಿದರು. ಅವರ ಈ ಏರಿಕೆ ಪ್ರಧಾನಿ ನರೇಂದ್ರ ಮೋದಿಯ ಗಮನಸೆಳೆದಿದ್ದು, ಸಹಾನಿಯನ್ನು ಬಿಜೆಪಿ ಸೇರಿಸಿಕೊಂಡು ಸ್ಟಾರ್ ಪ್ರಚಾರಕರನ್ನಾಗಿಸಿದ್ದರು. ಬಳಿಕ 2018ರಲ್ಲಿ ವಿಐಪಿ ಪಕ್ಷವನ್ನು ಪ್ರಾರಂಭಿಸಿದರು.
- 14 Nov 2025 1:40 PM IST
ಎನ್ಡಿಎ 200 ಸ್ಥಾನಗಳಲ್ಲಿ ಮುನ್ನಡೆ, ಕೇವಲ 37 ಮಹಾಘಟಬಂಧನ
2025ರ ಬಿಹಾರ ವಿಧಾನಸಭೆ ಚುನಾವಣೆಯಲ್ಲಿ, ಒಟ್ಟು 243 ಸ್ಥಾನಗಳಲ್ಲಿ ಎನ್ಡಿಎ ಈಗ 200 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿದ್ದು, ಮಹಾಘಟಬಂಧನ ಕೇವಲ 37 ಸ್ಥಾನಗಳಲ್ಲಿ ಮಾತ್ರ ಮುನ್ನಡೆಯಲ್ಲಿದೆ.
14 Nov 2025 1:32 PM ISTಬಿಹಾರ ಚುನಾವಣಾ ಫಲಿತಾಂಶ| ತ್ವರಿತ ನಿರ್ಣಯ ಬೇಡ, ಫಲಿತಾಂಶದ ನಂತರ ವಿಮರ್ಶೆ ಅಗತ್ಯ; ಶಶಿ ತರೂರು
ಬಿಹಾರ ವಿಧಾನಸಭೆ ಚುನಾವಣೆಯಲ್ಲಿ NDA ಮುನ್ನಡೆಯನ್ನು ಕಾಯ್ದುಕೊಳ್ಳುತ್ತಿರುವ ನಡುವೆ, ಕಾಂಗ್ರೆಸ್ ಸಂಸದ ಶಶಿ ತರೂರ್ ತ್ವರಿತ ತೀರ್ಮಾನಗಳಿಗೆ ಎಚ್ಚರಿಕೆ ವಹಿಸುವಂತೆ ಹೇಳಿದ್ದಾರೆ. ಅಂತಿಮ ಫಲಿತಾಂಶಗಳು ಇನ್ನೂ ಅಧಿಕೃತವಾಗಿ ಪ್ರಕಟವಾಗಬೇಕಿದೆ ಎಂದು ಅವರು ಸೂಚಿಸಿದರು. ಇದೀಗ ಅವರು ಮುನ್ನಡೆಸುತ್ತಿದ್ದಾರೆ ಅಷ್ಟೇ. ದೊಡ್ಡ ಅಂತರದಿಂದ ಮುನ್ನಡೆ ಪಡೆದಿದ್ದಾರೆ. ಆದರೆ ಚುನಾವಣಾ ಆಯೋಗವೇ ಫಲಿತಾಂಶವನ್ನು ಚರ್ಚಿಸಿ ಘೋಷಿಸಬೇಕು ಅಲ್ಲಿಯವರೆಗೆ ಕಾಯೋಣ ಎಂದು ಅವರು ತಿಳಿಸಿದ್ದಾರೆ.
ಕಾಂಗ್ರೆಸ್ ಪಕ್ಷಕ್ಕೆ ಆತ್ಮಪರಿಶೀಲನೆ ಅಗತ್ಯವಿದೆ ಎಂದು ಒಪ್ಪಿಕೊಂಡ ಅವರು, ಮಿತ್ರಪಕ್ಷದ ಪಾತ್ರವನ್ನೂ ಗಮನಕ್ಕೆ ತಂದರು. ಪಕ್ಷವು ಕಾರಣಗಳನ್ನು ವಿವರವಾಗಿ ಅಧ್ಯಯನ ಮಾಡುವ ಜವಾಬ್ದಾರಿಯಿದೆ. ಆದರೆ ನಾವು ಮೈತ್ರಿಯ ಹಿರಿಯ ಪಾಲುದಾರರಾಗಿರಲಿಲ್ಲ. RJD ಕೂಡ ತನ್ನ ಪ್ರದರ್ಶನವನ್ನು ಗಮನವಾಗಿ ಪರಿಶೀಲಿಸಬೇಕು ಎಂದು ಅವರು ತಿಳಿಸಿರು.
ಒಟ್ಟು ಫಲಿತಾಂಶವನ್ನು ವಿಸ್ತೃತ ದೃಷ್ಟಿಯಿಂದ ನೋಡಬೇಕಾಗಿದೆ. ನಮ್ಮ ಸಂಪೂರ್ಣ ಪ್ರದರ್ಶನವನ್ನು ನೋಡಿಕೊಳ್ಳುವುದು ಬಹಳ ಮುಖ್ಯ. ಚುನಾವಣೆಗಳು ಅನೇಕ ಅಂಶಗಳ ಸಂಯೋಜನೆ ಎಂದು ಅವರು ತಿಳಿಸಿದರು.
ಮತದಾರರ ಮೇಲೆ ಕಲ್ಯಾಣ ಯೋಜನೆಗಳ ಪ್ರಭಾವದ ಕುರಿತು ಮಾತನಾಡಿದ ಅವರು, ಮಹಿಳಾ ಮತದಾರರಿಗೆ ಮಾದರಿ ಸಂಹಿತೆಯ ಮೊದಲು ಕೆಲವು ಪ್ರೋತ್ಸಾಹಗಳನ್ನು ನೀಡಲಾಗಿದೆ... ಇದು ಆರೋಗ್ಯಕರ ಪದ್ಧತಿ ಅಲ್ಲ ಎಂದು ನನಗೆ ಅನ್ನಿಸುತ್ತದೆ. ಇದೇ ರೀತಿಯ ಪ್ರವೃತ್ತಿಗಳು ಮಹಾರಾಷ್ಟ್ರ ಸೇರಿದಂತೆ ಇತರ ರಾಜ್ಯಗಳಲ್ಲೂ ಕಂಡುಬಂದಿವೆ ಎಂದು ಅವರು ತಿಳಿಸಿದರು.
- 14 Nov 2025 1:21 PM IST
ಬಿಹಾರ ಚುನಾವಣೆ| ಆರಂಭಿಕ ಮುನ್ನಡೆ - ಬಿಜೆಪಿ 90, ಜೆಡಿ(ಯು) 80 ಸ್ಥಾನಗಳಲ್ಲಿ ಮುನ್ನಡೆ
ಬಿಹಾರ ವಿಧಾನಸಭಾ ಚುನಾವಣೆಯ ಮತ ಎಣಿಕೆಯ ಆರಂಭಿಕ ಹಂತದಲ್ಲಿ ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟ (NDA) ಮೈತ್ರಿಕೂಟವು ಮುನ್ನಡೆ ಸಾಧಿಸಿದೆ. ಭಾರತೀಯ ಜನತಾ ಪಕ್ಷ (ಬಿಜೆಪಿ) 90 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿದ್ದರೆ, ಅದರ ಮಿತ್ರಪಕ್ಷವಾದ ಜನತಾ ದಳ (ಯುನೈಟೆಡ್) ಅಥವಾ ಜೆಡಿ(ಯು) 80 ಸ್ಥಾನಗಳಲ್ಲಿ ಮುನ್ನಡೆ ಕಾಯ್ದುಕೊಂಡಿದೆ. ವಿರೋಧ ಪಕ್ಷಗಳಾದ ರಾಷ್ಟ್ರೀಯ ಜನತಾ ದಳ (ಆರ್ಜೆಡಿ) 30 ಸ್ಥಾನಗಳಲ್ಲಿ ಮತ್ತು ಕಾಂಗ್ರೆಸ್ 4 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿವೆ.
- 14 Nov 2025 1:03 PM IST
ಕಾಂಗ್ರೆಸ್ ಪಕ್ಷಕ್ಕೆ ಸಂಘಟನೆಯ ಪುನರ್ ರಚನೆಯ ಅಗತ್ಯವಿದೆ: ದಿಗ್ವಿಜಯ ಸಿಂಗ್
ಬಿಹಾರ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್ ಪಕ್ಷವು ಕಳಪೆ ಪ್ರದರ್ಶನ ನೀಡಿದ ಹಿನ್ನೆಲೆಯಲ್ಲಿ, ಹಿರಿಯ ಕಾಂಗ್ರೆಸ್ ನಾಯಕ ದಿಗ್ವಿಜಯ ಸಿಂಗ್ ಅವರು ಪಕ್ಷದೊಳಗೆ ತುರ್ತು ಆತ್ಮಾವಲೋಕನ ಮಾಡಿಕೊಳ್ಳಬೇಕೆಂದು ಕರೆ ನೀಡಿದ್ದಾರೆ. ಇತ್ತೀಚಿನ ಮಾಹಿತಿಯ ಪ್ರಕಾರ, ಕಾಂಗ್ರೆಸ್ ಕೇವಲ ಆರು ಸ್ಥಾನಗಳನ್ನು ಗೆಲ್ಲುವ ನಿರೀಕ್ಷೆಯಿದೆ, ಇದು ಹಿಂದಿನ ಚುನಾವಣೆಯಲ್ಲಿ ಗೆದ್ದಿದ್ದ 19 ಸ್ಥಾನಗಳಿಗೆ ಹೋಲಿಸಿದರೆ ಅತ್ಯಂತ ಕಳಪೆ ಸಾಧನೆಯಾಗಿದೆ.
ಪಕ್ಷವು ತನ್ನ ತಳಮಟ್ಟದ ಜಾಲವನ್ನು ಬಲಪಡಿಸುವ ಅಗತ್ಯವನ್ನು ಒತ್ತಿ ಹೇಳಿರುವ ಅವರು, ಕಾಂಗ್ರೆಸ್ ತನ್ನ ಸಂಘಟನೆಗೆ ವಿಶೇಷ ಗಮನ ಹರಿಸಬೇಕಾಗಿದೆ. ಇಂದಿನ ಚುನಾವಣೆಯು ರ್ಯಾಲಿಗಳು ಮತ್ತು ಸಾರ್ವಜನಿಕ ಸಭೆಗಳ ಬಗ್ಗೆ ಅಲ್ಲ, ಬದಲಾಗಿ ಮತಗಟ್ಟೆಯಲ್ಲಿ ತೀವ್ರವಾದ ಸಾರ್ವಜನಿಕ ಸಂಪರ್ಕದ ಬಗ್ಗೆ ಎಂದು ಅವರು NDTV ಗೆ ತಿಳಿಸಿದ್ದಾರೆ.
ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ನೆಪದಲ್ಲಿ ಮತಗಳನ್ನು ಕದ್ದಿದ್ದಾರೆ ಎಂಬ ಪಕ್ಷದ ಆರೋಪವನ್ನು ಹಿರಿಯ ನಾಯಕರು ಬೆಂಬಲಿಸಿದರು. ಇದನ್ನು ಚುನಾವಣಾ ಆಯೋಗವು ನಿಯಮಿತ ಶುಚಿಗೊಳಿಸುವ ವ್ಯಾಯಾಮ ಎಂದು ಹೇಳಿಕೊಂಡಿದೆ.
ಹೆಸರುಗಳನ್ನು ತೆಗೆದುಹಾಕಲಾದ ಹೆಚ್ಚಿನ ಮತದಾರರು ಬಡವರು, ದಲಿತರು ಮತ್ತು ಅಲ್ಪಸಂಖ್ಯಾತ ಸಮುದಾಯಗಳಿಗೆ ಸೇರಿದವರು ಎಂದು ಸಿಂಗ್ ಆರೋಪಿಸಿದರು. ನಾನು ಅನುಮಾನಿಸಿದ್ದು ನಿಜವಾಗಿದೆ. 6.2 ಮಿಲಿಯನ್ ಮತಗಳನ್ನು ಕಡಿತಗೊಳಿಸಲಾಗಿದೆ, 2 ಮಿಲಿಯನ್ ಸೇರಿಸಲಾಗಿದೆ ಮತ್ತು 5 ಲಕ್ಷ SIR ಫಾರ್ಮ್ ಅನ್ನು ಭರ್ತಿ ಮಾಡದೆಯೇ ಚಲಾಯಿಸಲಾಗಿದೆಎಂದು ಅವರು ಆನ್ಲೈನ್ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಅವರು ವಿದ್ಯುನ್ಮಾನ ಮತ ಯಂತ್ರಗಳ (ಇವಿಎಂ) ವಿಶ್ವಾಸಾರ್ಹತೆಯ ಬಗ್ಗೆ ಮತ್ತಷ್ಟು ಅನುಮಾನಗಳನ್ನು ವ್ಯಕ್ತಪಡಿಸಿದರು. ಬಿಹಾರದಲ್ಲಿ 69 ಲಕ್ಷ ಮತದಾರರನ್ನು ತೆಗೆದುಹಾಕುವ ಎಸ್ಐಆರ್ ಪ್ರಕ್ರಿಯೆಯ ಮೂಲಕ ಬಿಜೆಪಿಗೆ ಚುನಾವಣಾ ಆಯೋಗವು ಸಹಾಯ ಮಾಡುತ್ತಿದೆ ಎಂದು ಕಾಂಗ್ರೆಸ್ ಆರೋಪಿಸಿದೆ, ಆದರೆ ಚುನಾವಣಾ ಆಯೋಗವು ಈ ಹೇಳಿಕೆಯನ್ನು ನಿರಾಕರಿಸಿದೆ.
- 14 Nov 2025 12:21 PM IST
ಬಿಹಾರ ವಿಧಾನಸಭಾ ಚುನಾವಣೆ ಫಲಿತಾಂಶ: ಎಲ್ಜೆಪಿ(ಆರ್ವಿ)ಗೆ ಭರ್ಜರಿ ಮುನ್ನಡೆ!
ಬಿಹಾರ ವಿಧಾನಸಭಾ ಚುನಾವಣೆಯ ಮತ ಎಣಿಕೆ ಮುಂದುವರೆದಿದ್ದು, ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟದ (ಎನ್ಡಿಎ) ಭಾಗವಾಗಿರುವ ಲೋಕ ಜನಶಕ್ತಿ ಪಕ್ಷ (ರಾಮ್ ವಿಲಾಸ್) ಭರ್ಜರಿ ಪ್ರದರ್ಶನ ನೀಡಿದೆ. ಚಿರಾಗ್ ಪಾಸ್ವಾನ್ ನೇತೃತ್ವದ ಈ ಪಕ್ಷವು ತಾನು ಸ್ಪರ್ಧಿಸಿದ 28 ಸ್ಥಾನಗಳ ಪೈಕಿ 21 ಸ್ಥಾನಗಳಲ್ಲಿ ಪ್ರಸ್ತುತ ಮುನ್ನಡೆ ಕಾಯ್ದುಕೊಂಡಿದೆ.
ಬಿಹಾರದಾದ್ಯಂತ ಎನ್ಡಿಎ ಮೈತ್ರಿಕೂಟವು ಪ್ರಬಲ ಮುನ್ನಡೆ ಸಾಧಿಸಿ, ಸ್ಪಷ್ಟ ಬಹುಮತದತ್ತ ಸಾಗುತ್ತಿರುವ ಹೊತ್ತಿನಲ್ಲಿ, ಎಲ್ಜೆಪಿ(ಆರ್ವಿ)ಯ ಈ ಸಾಧನೆ ಮೈತ್ರಿಕೂಟದ ಸ್ಥಾನಕ್ಕೆ ಮತ್ತಷ್ಟು ಬಲ ತುಂಬಿದೆ.
ಒಟ್ಟು 243 ಸ್ಥಾನಗಳಿರುವ ಬಿಹಾರ ವಿಧಾನಸಭೆಯಲ್ಲಿ ಎನ್ಡಿಎ ಸಾಮೂಹಿಕವಾಗಿ ಬಹುಮತದ ಗಡಿಯನ್ನು ದಾಟಿ ಮುನ್ನುಗ್ಗುತ್ತಿದ್ದು, ಎಲ್ಜೆಪಿ (ರಾಮ್ ವಿಲಾಸ್)ನ ಪ್ರದರ್ಶನವು ಮೈತ್ರಿಕೂಟದಲ್ಲಿ ಅದರ ಬೆಳೆಯುತ್ತಿರುವ ಪ್ರಭಾವವನ್ನು ಎತ್ತಿ ತೋರಿಸಿದೆ. ಪಕ್ಷದ ಈ ಉತ್ತಮ ಫಲಿತಾಂಶವು ಮುಂಬರುವ ದಿನಗಳಲ್ಲಿ ರಾಜ್ಯ ರಾಜಕೀಯದಲ್ಲಿ ಚಿರಾಗ್ ಪಾಸ್ವಾನ್ ಅವರ ಪ್ರಾಮುಖ್ಯತೆಯನ್ನು ಹೆಚ್ಚಿಸುವ ನಿರೀಕ್ಷೆಯಿದೆ.
- 14 Nov 2025 12:13 PM IST
ಎನ್ಡಿಎಗೆ ಭರ್ಜರಿ ಮುನ್ನಡೆ, ಮಹಾಘಟಬಂಧನ್ಗೆ ಹಿನ್ನಡೆ
ಬೆಳಿಗ್ಗೆ 11:55ರ ಹೊತ್ತಿಗೆ ಬಂದಿರುವ ಬಿಹಾರ ವಿಧಾನಸಭಾ ಚುನಾವಣೆಯ ವರದಿಗಳ ಪ್ರಕಾರ, ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟ (ಎನ್ಡಿಎ) ಸ್ಪಷ್ಟ ಬಹುಮತದೊಂದಿಗೆ ಭರ್ಜರಿ ಗೆಲುವಿನತ್ತ ಸಾಗುತ್ತಿದೆ. 243 ಸ್ಥಾನಗಳ ಪೈಕಿ ಎನ್ಡಿಎ 191 ಸ್ಥಾನಗಳಲ್ಲಿ ಮುನ್ನಡೆ ಕಾಯ್ದುಕೊಂಡಿದೆ. ಎನ್ಡಿಎ ಮೈತ್ರಿಕೂಟದಲ್ಲಿ ಭಾರತೀಯ ಜನತಾ ಪಕ್ಷ (ಬಿಜೆಪಿ) 84 ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸುವ ಮೂಲಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ಅದರ ಮಿತ್ರಪಕ್ಷ ಜನತಾ ದಳ (ಯುನೈಟೆಡ್) ಅಥವಾ ಜೆಡಿ(ಯು) 77 ಸ್ಥಾನಗಳಲ್ಲಿ ಮುನ್ನಡೆಯಲ್ಲಿದೆ. ಎನ್ಡಿಎಯ ಇತರ ಪ್ರಮುಖ ಪಾಲುದಾರ ಪಕ್ಷಗಳಾದ ಎಲ್ಜೆಪಿ (ರಾಮ್ ವಿಲಾಸ್) 22, ಎಚ್ಎಎಂ 5 ಮತ್ತು ಆರ್ಎಲ್ಎಂ 3 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿವೆ.
ಇತ್ತ ವಿರೋಧ ಪಕ್ಷ ಮಹಾಘಟಬಂಧನ್ ಹಿನ್ನಡೆ ಅನುಭವಿಸಿದ್ದು, ಕೇವಲ 36 ಸ್ಥಾನಗಳಲ್ಲಿ ಮಾತ್ರ ಮುನ್ನಡೆ ಸಾಧಿಸಿದೆ. ಈ ಮೈತ್ರಿಕೂಟದಲ್ಲಿ ಪ್ರಮುಖ ಪಾತ್ರ ವಹಿಸಿರುವ ಆರ್ಜೆಡಿ ಕೇವಲ 22 ಸ್ಥಾನಗಳಲ್ಲಿ ಮುನ್ನಡೆಯಲ್ಲಿದೆ. ಅದರ ಮಿತ್ರಪಕ್ಷಗಳಲ್ಲಿ ಸಿಪಿಐ-ಎಂಎಲ್ಎಲ್ 7, ಕಾಂಗ್ರೆಸ್ 5 ಮತ್ತು ಸಿಪಿಐ ಹಾಗೂ ವಿಐಪಿ ತಲಾ 1 ಸ್ಥಾನದಲ್ಲಿ ಮುನ್ನಡೆ ಕಂಡಿವೆ.
- 14 Nov 2025 12:08 PM IST
ತೇಜಸ್ವಿ 3,000 ಕ್ಕೂ ಹೆಚ್ಚು ಮತಗಳಿಂದ ಹಿನ್ನಡೆ
ಮಹಾ ಮೈತ್ರಿಕೂಟದ ಅಭ್ಯರ್ಥಿ ತೇಜಸ್ವಿ ಯಾದವ್, ಅಭ್ಯರ್ಥಿ ತೇಜಸ್ವಿ ಯಾದವ್ ತಮ್ಮ ಕುಟುಂಬದ ಭದ್ರಕೋಟೆ ರಘೋಪುರದಲ್ಲಿ ಹಿನ್ನೆಡೆ ಸಾಧಿಸಿದ್ದಾರೆ. ಆರ್ಜೆಡಿ ನಾಯಕರು ಬಿಜೆಪಿ ಅಭ್ಯರ್ಥಿ ಸತೀಶ್ ಕುಮಾರ್ ಅವರಿಗಿಂತ 3,000 ಕ್ಕೂ ಹೆಚ್ಚು ಮತಗಳಿಂದ ಹಿಂದೆ ಬಿದ್ದಿದ್ದಾರೆ. ಇದು ಬಿಹಾರದ ಅತ್ಯಂತ ಸೂಕ್ಷ್ಮವಾಗಿ ಗಮನಿಸಲ್ಪಟ್ಟ ಸ್ಪರ್ಧೆಗಳಲ್ಲಿ ಒಂದು ಗಮನಾರ್ಹ ಬೆಳವಣಿಗೆಯಾಗಿದೆ. ರಘೋಪುರವು ಬಹಳ ಹಿಂದಿನಿಂದಲೂ ಯಾದವ್ ಕುಟುಂಬದೊಂದಿಗೆ ಸಂಬಂಧ ಹೊಂದಿದೆ. ಈ ಹಿಂದೆ ಲಾಲು ಪ್ರಸಾದ್ ಯಾದವ್ ಮತ್ತು ರಾಬ್ರಿ ದೇವಿ ಇಬ್ಬರೂ ಈ ಸ್ಥಾನವನ್ನು ಪ್ರತಿನಿಧಿಸಿದ್ದರು. ತೇಜಸ್ವಿ ಯಾದವ್ ಅವರು 2015 ರಿಂದ ಈ ಕ್ಷೇತ್ರವನ್ನು ಉಳಿಸಿಕೊಂಡಿದ್ದಾರೆ, 2020 ರ ಚುನಾವಣೆಯಲ್ಲಿ 38,000 ಕ್ಕೂ ಹೆಚ್ಚು ಮತಗಳಿಂದ ಗೆದ್ದಿದ್ದರು. ಗೆಲುವಿನ ವಿಶ್ವಾಸದಲ್ಲಿದ್ದ ಅವರು ಈ ಹಿಂದೆ, ಇದು ಜನರ ವಿಜಯವಾಗಲಿದೆ. ಬದಲಾವಣೆ ಬರುತ್ತದೆ. ನಾವು ಸರ್ಕಾರ ರಚಿಸುತ್ತಿದ್ದೇವೆ ಎಂದು ತಿಳಿಸಿದ್ದರು.
