ಬಿಎಂಟಿಸಿ ಕಂಡಕ್ಟರ್ ಜಯಮ್ಮಗೆ 'ಕೆ-ಸೆಟ್' ಪಾಸ್​: ಕೆಲಸದ ನಡುವೆಯೂ ಓದಿ ಅಧ್ಯಾಪಕಿಯಾಗುವ ಅರ್ಹತೆ!

ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆಯ ಬಸ್ ನಿರ್ವಾಹಕಿಯಾಗಿ ಕಾರ್ಯನಿರ್ವಹಿಸುತ್ತಿರುವ ಜಯಮ್ಮ ಅವರು, ತಮ್ಮ ಬಿಡುವಿಲ್ಲದ ಕೆಲಸದ ಒತ್ತಡದ ನಡುವೆಯೂ ಸಾಧನೆ ಮಾಡಿದ್ದಾರೆ. ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ನವೆಂಬರ್ 21 ರಂದು ಪ್ರಕಟಿಸಿದ ಕೆ-ಸೆಟ್ 2025 ಫಲಿತಾಂಶದಲ್ಲಿ ಅವರು ಕನ್ನಡ ವಿಷಯದಲ್ಲಿ ತೇರ್ಗಡೆಯಾಗುವ ಮೂಲಕ ಸಹಾಯಕ ಪ್ರಾಧ್ಯಾಪಕರಾಗಲು ಅರ್ಹತೆ ಪಡೆದಿದ್ದಾರೆ.

ತಮ್ಮ ಯಶಸ್ಸಿನ ಗುಟ್ಟನ್ನು ಹಂಚಿಕೊಂಡಿರುವ ಜಯಮ್ಮ, "ನನ್ನದು ದಿನನಿತ್ಯದ ಬಸ್ ಡ್ಯೂಟಿ. ಬೆಳಿಗ್ಗೆಯಿಂದ ಸಂಜೆವರೆಗೂ ಕೆಲಸದ ಒತ್ತಡ ಇರುತ್ತದೆ. ಆದರೂ, ನನ್ನ ಗುರಿ ಮುಟ್ಟಲೇಬೇಕೆಂಬ ಛಲದಿಂದ ಪ್ರತಿದಿನ ಕೆಲಸ ಮುಗಿಸಿ ಬಂದ ನಂತರ ಬೆಳಗಿನ ಜಾವ 3 ರಿಂದ 4 ಗಂಟೆಗಳ ಕಾಲ ಓದುತ್ತಿದ್ದೆ," ಎಂದು ಹೇಳಿದ್ದಾರೆ. ಈ ಹಿಂದೆ ಎರಡು ಬಾರಿ ಕೆ-ಸೆಟ್ ಪರೀಕ್ಷೆ ಬರೆದಿದ್ದ ಅವರು, ಅಲ್ಪ ಅಂಕಗಳ ಅಂತರದಲ್ಲಿ ಪಾಸಾಗಲು ವಿಫಲರಾಗಿದ್ದರು. ಆದರೆ, ಸೋಲದೆ ಮೂರನೇ ಪ್ರಯತ್ನದಲ್ಲಿ ಗೆದ್ದು ಬೀಗಿದ್ದಾರೆ.

ಪಾರದರ್ಶಕ ವ್ಯವಸ್ಥೆಗೆ ಮೆಚ್ಚುಗೆ

ಕೆಇಎ ನಡೆಸಿದ ಪರೀಕ್ಷಾ ವ್ಯವಸ್ಥೆ ಮತ್ತು ಫಲಿತಾಂಶ ಪ್ರಕಟಣೆಯ ವೇಗವನ್ನು ಜಯಮ್ಮ ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. "ಪ್ರಶ್ನೆಪತ್ರಿಕೆಯ ಗುಣಮಟ್ಟ ಉತ್ತಮವಾಗಿತ್ತು ಮತ್ತು ಫಲಿತಾಂಶವೂ ತ್ವರಿತವಾಗಿ ಬಂತು. ಈ ಪಾರದರ್ಶಕ ವ್ಯವಸ್ಥೆಯಿಂದಲೇ ನನ್ನಂತಹ ಸಾಮಾನ್ಯ ನೌಕರರಿಗೂ ಇಂತಹ ಸಾಧನೆ ಮಾಡಲು ಸಾಧ್ಯವಾಯಿತು," ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಕೆಇಎಯಿಂದ ಅಭಿನಂದನೆ

ಜಯಮ್ಮ ಅವರ ಸಾಧನೆಯನ್ನು ಸ್ವತಃ ಕರ್ನಾಟಕ ಪರೀಕ್ಷಾ ಪ್ರಾಧಿಕಾರವೇ ಗುರುತಿಸಿ ಗೌರವಿಸಿದೆ. ಅವರ ಯಶೋಗಾಥೆಯ ವಿಡಿಯೋವನ್ನು ಹಂಚಿಕೊಂಡಿರುವ ಕೆಇಎ, "ಜಯಮ್ಮ ಅವರ ಸಾಧನೆ ಪರೀಕ್ಷಾ ವ್ಯವಸ್ಥೆಯ ಪಾರದರ್ಶಕತೆಗೆ ಸಾಕ್ಷಿ. ಸಾಮಾನ್ಯ ಹಿನ್ನೆಲೆಯ ಅಭ್ಯರ್ಥಿಗಳಿಗೂ ಇಲ್ಲಿ ಸಮಾನ ಅವಕಾಶಗಳಿವೆ ಎಂಬುದಕ್ಕೆ ಇದೇ ನಿದರ್ಶನ," ಎಂದು ತಿಳಿಸಿದೆ. ಈ ಬಾರಿಯ ಕೆ-ಸೆಟ್‌ನಲ್ಲಿ 33 ವಿಷಯಗಳಲ್ಲಿ ಒಟ್ಟು 8,383 ಅಭ್ಯರ್ಥಿಗಳು ಅರ್ಹತೆ ಪಡೆದಿದ್ದಾರೆ.

ಜಿಬಿಎ ಮಾರ್ಷಲ್‌ ಉತ್ತೀರ್ಣ

ಗ್ರೇಟರ್ ಬೆಂಗಳೂರು ಮಹಾನಗರ ಪಾಲಿಕೆಯ ತ್ಯಾಜ್ಯ ವಿಲೇವಾರಿ ಘಟಕದಲ್ಲಿ ಮಾರ್ಷಲ್ ಆಗಿ ಕಾರ್ಯನಿರ್ವಹಿಸುವ ಅರವಿಂದ ಅವರು ಕೆ-ಸೆಟ್‌ ಪರೀಕ್ಷೆ ಉತ್ತೀರ್ಣರಾಗಿದ್ದು, 'ನಮ್ಮಂತಹ ಬಡವರು ಕೂಡ ಕೆ-ಸೆಟ್ ಪರೀಕ್ಷೆಯಲ್ಲಿ ಅರ್ಹತೆ ಪಡೆದಿದ್ದರೆ ಅದಕ್ಕೆ ಕೆಇಎ ಅಳವಡಿಸಿಕೊಂಡಿರುವ ಪಾರದರ್ಶಕ ವ್ಯವಸ್ಥೆ ಕೂಡ ಕಾರಣ. ಕಷ್ಟಪಟ್ಟು ಓದಿದರೆ ಫಲ ಸಿಕ್ಕೇ ಸಿಗುತ್ತದೆ ಎನ್ನುವುದಕ್ಕೆ ನಾವೇ ನಿದರ್ಶನ. ಉಪನ್ಯಾಸಕರಾಗಬೇಕೆನ್ನುವ ಕನಸು ನನಸಾಗುವ ಕಾಲ ಬಂದಿದೆ' ಎಂದು ಕೆಇಎ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದರು.