ಬೆಂಗಳೂರು ಏರ್​ಪೋರ್ಟ್​ ಮೂಲಕ ದೇಶದ ಮೂಲೆ ಮೂಲೆಗೆ ಹಾರುತ್ತಿದೆ ಕರುನಾಡ ‘ಕೊತ್ತಂಬರಿ ಸೊಪ್ಪು’

ದೇಶದ ಐಟಿ ರಾಜಧಾನಿ ಎಂದು ಗುರುತಿಸಿಕೊಂಡಿರುವ ಬೆಂಗಳೂರು, ಇದೀಗ ಕೃಷಿ ಉತ್ಪನ್ನಗಳ ಸಾಗಣೆಯಲ್ಲೂ ಪ್ರಮುಖ ಕೇಂದ್ರವಾಗಿ ಹೊರಹೊಮ್ಮಿದೆ. ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ (ಕೆಐಎ) ಮೂಲಕ ಉತ್ತರ ಮತ್ತು ಪೂರ್ವ ಭಾರತಕ್ಕೆ ರವಾನೆಯಾಗುವ ಕೊತ್ತಂಬರಿ ಸೊಪ್ಪಿನ ಪ್ರಮಾಣದಲ್ಲಿ ದಾಖಲೆಯ ಏರಿಕೆ ಕಂಡುಬಂದಿದೆ.

ವಿಮಾನ ನಿಲ್ದಾಣದ ಅಧಿಕಾರಿಗಳು ಬಿಡುಗಡೆ ಮಾಡಿರುವ ಅಂಕಿ-ಅಂಶಗಳ ಪ್ರಕಾರ, 2025ರ ಜೂನ್ ನಿಂದ ನವೆಂಬರ್ ತಿಂಗಳವರೆಗಿನ ಅವಧಿಯಲ್ಲಿ ಬರೋಬ್ಬರಿ 5,904 ಮೆಟ್ರಿಕ್ ಟನ್ ಕೊತ್ತಂಬರಿ ಸೊಪ್ಪನ್ನು ವಿಮಾನಗಳ ಮೂಲಕ ಸಾಗಿಸಲಾಗಿದೆ. ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಈ ಪ್ರಮಾಣದಲ್ಲಿ ಶೇ. 13ರಷ್ಟು ಏರಿಕೆ ದಾಖಲಾಗಿದೆ.

ಯಾವ ನಗರಗಳಿಗೆ ಅತಿ ಹೆಚ್ಚು ಪೂರೈಕೆ?

ಬೆಂಗಳೂರು ಮತ್ತು ಸುತ್ತಮುತ್ತಲಿನ ಜಿಲ್ಲೆಗಳಲ್ಲಿ ಬೆಳೆಯಲಾಗುವ ಕೊತ್ತಂಬರಿ ಸೊಪ್ಪಿಗೆ ಕೋಲ್ಕತ್ತಾದಲ್ಲಿ ಅತಿ ಹೆಚ್ಚು ಬೇಡಿಕೆಯಿದೆ. ವಿಮಾನ ನಿಲ್ದಾಣದಿಂದ ಸಾಗಣೆಯಾದ ಒಟ್ಟು ಕೊತ್ತಂಬರಿಯಲ್ಲಿ ಸಿಂಹಪಾಲು ಕೋಲ್ಕತ್ತಾಗೆ ರವಾನೆಯಾಗಿದೆ. ಇದರ ನಂತರದ ಸ್ಥಾನಗಳಲ್ಲಿ ದೆಹಲಿ, ಬಾಗ್ಡೋಗ್ರಾ, ರಾಂಚಿ ಮತ್ತು ಪಾಟ್ನಾ ನಗರಗಳಿವೆ. ಉತ್ತರ ಮತ್ತು ಪೂರ್ವ ಭಾರತದ ರಾಜ್ಯಗಳಲ್ಲಿ ಕರ್ನಾಟಕದ ಕೊತ್ತಂಬರಿ ಸೊಪ್ಪಿನ ಗುಣಮಟ್ಟ ಮತ್ತು ರುಚಿಗೆ ಗ್ರಾಹಕರಿಂದ ಮೆಚ್ಚುಗೆ ವ್ಯಕ್ತವಾಗಿದೆ.

ಹೊಸದಾಗಿ 5 ನಗರಗಳ ಸೇರ್ಪಡೆ

ಈ ಬಾರಿ ಕೊತ್ತಂಬರಿ ಸಾಗಣೆಯ ಜಾಲವನ್ನು ಮತ್ತಷ್ಟು ವಿಸ್ತರಿಸಲಾಗಿದ್ದು, ಹೊಸದಾಗಿ ಅಗರ್ತಲಾ, ಆಗ್ರಾ, ನಾಗಪುರ, ಅಮೃತಸರ ಮತ್ತು ಪೋರ್ಟ್ ಬ್ಲೇರ್ ಸೇರಿದಂತೆ 5 ಹೊಸ ನಗರಗಳಿಗೆ ವಿಮಾನದ ಮೂಲಕ ಪೂರೈಕೆ ಆರಂಭಿಸಲಾಗಿದೆ. ಇದರೊಂದಿಗೆ ಬೆಂಗಳೂರು ವಿಮಾನ ನಿಲ್ದಾಣದಿಂದ ದೇಶದ ಒಟ್ಟು 22 ನಗರಗಳಿಗೆ ಕೊತ್ತಂಬರಿ ಸೊಪ್ಪು ನೇರವಾಗಿ ತಲುಪುತ್ತಿದೆ.

ರೈತರಿಗೆ ವರದಾನವಾದ ಕೋಲ್ಡ್ ಚೈನ್ ವ್ಯವಸ್ಥೆ

ಕೊತ್ತಂಬರಿ ಸೊಪ್ಪು ಬೇಗನೆ ಬಾಡಿ ಹೋಗುವ ಮತ್ತು ಕೊಳೆಯುವ ಕೃಷಿ ಉತ್ಪನ್ನವಾಗಿದೆ. ಇದನ್ನು ರಸ್ತೆ ಅಥವಾ ರೈಲು ಮಾರ್ಗದಲ್ಲಿ ದೂರದ ಊರುಗಳಿಗೆ ಕಳುಹಿಸುವುದು ಸವಾಲಿನ ಕೆಲಸ. ಆದರೆ, ಕೆಂಪೇಗೌಡ ವಿಮಾನ ನಿಲ್ದಾಣದಲ್ಲಿರುವ ಅತ್ಯಾಧುನಿಕ ಶೀತಲಗೃಹ ಸೌಲಭ್ಯ ಮತ್ತು ತ್ವರಿತ ಕಾರ್ಗೋ ಸೇವೆಯಿಂದಾಗಿ, ರೈತರು ಬೆಳೆದ ಬೆಳೆ ಕೆಲವೇ ಗಂಟೆಗಳಲ್ಲಿ ದೇಶದ ಆಯಕಟ್ಟಿನ ಮಾರುಕಟ್ಟೆಗಳನ್ನು ತಲುಪುತ್ತಿದೆ. ಇದು ರೈತರಿಗೆ ಉತ್ತಮ ಬೆಲೆ ಸಿಗಲು ಮತ್ತು ಬೆಳೆ ಹಾಳಾಗುವುದನ್ನು ತಪ್ಪಿಸಲು ನೆರವಾಗುತ್ತಿದೆ.

ಎಲ್ಲಿಂದ ಬರುತ್ತವೆ ಸೊಪ್ಪುಗಳು

ಕೊತ್ತಂಬರಿ ಸೊಪ್ಪಿನ ಪ್ರಮುಖ ಉತ್ಪಾದನಾ ಕೇಂದ್ರಗಳಲ್ಲಿ ಒಂದಾದ ಬೆಂಗಳೂರು ಮತ್ತು ಸುತ್ತಮುತ್ತಲಿನ ಗ್ರಾಮಾಂತರ ಪ್ರದೇಶಗಳಲ್ಲಿ ರೈತರು ಬೆಳೆದ ಕೊತ್ತಂಬರಿ, ನಗರದಲ್ಲಿನ ಹೋಲ್ಸೇಲ್ ಮಾರುಕಟ್ಟೆಗಳ ಮೂಲಕ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಹರಿದು ಬರುತ್ತಿದೆ. ಇಲ್ಲಿ ಸ್ಥಾಪಿತವಾಗಿರುವ ಶೀತಲ ಸರಕು ನಿರ್ವಹಣಾ ಸೌಲಭ್ಯ (ಪೆರಿಷೆಬಲ್ ಕಾರ್ಗೋ ವ್ಯವಸ್ಥೆ)ಗಳ ನೆರವಿನಿಂದ, ಈ ಸೊಪ್ಪು ಉತ್ತರ ಮತ್ತು ಪೂರ್ವ ಭಾರತದ ನಗರಗಳಿಗೆ ವೇಗವಾಗಿ ರವಾನೆಯಾಗುತ್ತಿದ್ದು, ದೇಶದ ಪ್ರಮುಖ ಮಾರುಕಟ್ಟೆಗಳಿಗೆ ತಾನ್‌ ತಾಜಾತನ ಕಳೆದುಕೊಳ್ಳದೇ ತಲುಪುತ್ತಿದೆ. ಈ ಮಾರ್ಗದ ಮೂಲಕ ರೈತರಿಗೆ ಉತ್ತಮ ಬೆಲೆ ದೊರಕುವ ಜೊತೆಗೆ, ಬೆಂಗಳೂರು ವಿಮಾನ ನಿಲ್ದಾಣವು ಕೃಷಿ ಉತ್ಪನ್ನಗಳ ಸಾಗಣೆಯ ಪ್ರಮುಖ ಕೇಂದ್ರವಾಗಿ ತನ್ನ ಸ್ಥಾನವನ್ನು ಮತ್ತಷ್ಟು ಬಲಪಡಿಸಿಕೊಂಡಿದೆ.

ಬೆಂಗಳೂರು ವಿಮಾನ ನಿಲ್ದಾಣದ ಸಾಮರ್ಥ್ಯ

ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವು ಕೇವಲ ಸರಕು ಸಾಗಣೆಯಲ್ಲಷ್ಟೇ ಅಲ್ಲ, ಪ್ರಯಾಣಿಕರ ದಟ್ಟಣೆಯ ನಿರ್ವಹಣೆಯಲ್ಲೂ ದಕ್ಷಿಣ ಭಾರತದ ಪ್ರಮುಖ ಹೆಬ್ಬಾಗಿಲಾಗಿದೆ.

ಪ್ರಸ್ತುತ ಅಂಕಿಅಂಶಗಳ ಪ್ರಕಾರ, ಬೆಂಗಳೂರು ವಿಮಾನ ನಿಲ್ದಾಣವು ವಾರ್ಷಿಕವಾಗಿ ಸರಾಸರಿ 3.7 ಕೋಟಿಗೂ ಅಧಿಕ (37 Million) ಪ್ರಯಾಣಿಕರನ್ನು ನಿರ್ವಹಿಸುತ್ತಿದೆ. ಅಂದರೆ, ದಿನವೊಂದಕ್ಕೆ ಸುಮಾರು 1 ಲಕ್ಷಕ್ಕೂ ಹೆಚ್ಚು ಪ್ರಯಾಣಿಕರು ಇಲ್ಲಿಂದ ಪ್ರಯಾಣಿಸುತ್ತಾರೆ.

ಇತ್ತೀಚೆಗೆ ಕಾರ್ಯಾಚರಣೆ ನಡೆಸುತ್ತಿರುವ ಅತ್ಯಾಧುನಿಕ ಟರ್ಮಿನಲ್-2 (T2) ಅಥವಾ ‘ಗಾರ್ಡನ್ ಟರ್ಮಿನಲ್’ ಆರಂಭವಾದ ನಂತರ, ವಿಮಾನ ನಿಲ್ದಾಣದ ಒಟ್ಟು ಪ್ರಯಾಣಿಕ ನಿರ್ವಹಣಾ ಸಾಮರ್ಥ್ಯವು ವಾರ್ಷಿಕವಾಗಿ 5 ರಿಂದ 6 ಕೋಟಿಗೂ (50-60 MPPA) ಹೆಚ್ಚಾಗಿದೆ. ಟರ್ಮಿನಲ್-2 ಒಂದೇ ವಾರ್ಷಿಕ 2.5 ಕೋಟಿ ಪ್ರಯಾಣಿಕರನ್ನು ನಿಭಾಯಿಸುವ ಶಕ್ತಿ ಹೊಂದಿದೆ.

ಸರಕು ಸಾಗಣೆಯಲ್ಲಿ ಬೆಂಗಳೂರು ವಿಮಾನ ನಿಲ್ದಾಣವು ದೇಶದಲ್ಲೇ ಮುಂಚೂಣಿಯಲ್ಲಿದ್ದು, ವಾರ್ಷಿಕವಾಗಿ 4 ಲಕ್ಷ ಮೆಟ್ರಿಕ್ ಟನ್‌ಗೂ ಹೆಚ್ಚು ಸರಕು ನಿರ್ವಹಣೆ ಮಾಡುವ ಸಾಮರ್ಥ್ಯ ಹೊಂದಿದೆ. ವಿಶೇಷವಾಗಿ ಕೃಷಿ ಮತ್ತು ಔಷಧೀಯ ಉತ್ಪನ್ನಗಳ ರಫ್ತಿನಲ್ಲಿ ದಕ್ಷಿಣ ಭಾರತದ ಅತಿದೊಡ್ಡ ಹಬ್ ಆಗಿ ಗುರುತಿಸಿಕೊಂಡಿದೆ.