ದುಬೈನಿಂದ ಮಂಗಳೂರಿಗೆ ಭೇಟಿ ನೀಡಿದ್ದ ವ್ಯಕ್ತಿಗೆ ಮಂಕಿಪಾಕ್ಸ್ ದೃಢ

ದುಬೈಗೆ ಮಂಗಳೂರಿಗೆ ಆಗಮಿಸಿದ 40 ವರ್ಷದ ವ್ಯಕ್ತಿಯಲ್ಲಿ ಮಂಕಿಪಾಕ್ಸ್ ಸೋಂಕು ಪತ್ತೆ ಆಗಿದೆ. ಇದು ಕರ್ನಾಟಕದಲ್ಲಿ ಪತ್ತೆಯಾದ ಮೊದಲ ಮಂಕಿಪಾಕ್ಸ್ ಪ್ರಕರಣವಾಗಿದೆ. ಪುಣೆಯ ಎನ್‌ಐವಿ ಲ್ಯಾಬ್‌ನಲ್ಲಿ ಸೋಂಕು ದೃಢಪಟ್ಟಿದ್ದು, ಕಳೆದ 14 ವರ್ಷಗಳಿಂದ ದುಬೈನಲ್ಲಿ ವಾಸವಿದ್ದ ಸೋಂಕಿತ, ಇತ್ತೀಚೆಗೆ ಅಂದರೆ ಜನವರಿ 17ರಂದು ಮಂಗಳೂರಿಗೆ ಭೇಟಿ ನೀಡಿದ್ದರು.

ವ್ಯಕ್ತಿಯಲ್ಲಿ ಜ್ವರ, ಗುಳ್ಳೆ ಕಾಣಿಸಿಕೊಂಡಿತ್ತು. ತಕ್ಷಣ ಅವರನ್ನು ಅವರ ಸಂಬಂಧಿಕರಿಂದ ಪ್ರತ್ಯೇಕಿಸಿ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗಿದೆ. ವ್ಯಕ್ತಿಯ ಸ್ಯಾಂಪಲ್​ನ್ನು ಬೆಂಗಳೂರು ಮೆಡಿಕಲ್ ಕಾಲೇಜು ಹಾಗೂ ಪುಣೆಯ ಎನ್‌ಐವಿ ಲ್ಯಾಬ್‌ಗೆ ರವಾನಿಸಲಾಗಿತ್ತು. ಇದೀಗ ಎನ್‌ಐವಿ ಲ್ಯಾಬ್‌ ರಿಪೋರ್ಟ್‌ನಲ್ಲಿ ಮಂಕಿಪಾಕ್ಸ್‌ ಸೋಂಕು ದೃಢ ಪಟ್ಟಿದೆ.

ಸೋಂಕಿತನ ಆರೋಗ್ಯ ಸ್ಥಿರವಾಗಿದ್ದು, ಸದ್ಯದಲ್ಲೇ ಆಸ್ಪತ್ರೆಯಿಂದ ಡಿಸ್ಚಾರ್ಜ್‌ ಆಗಲಿದ್ದಾರೆ. ಇನ್ನು ಏರ್‌ಪೋರ್ಟ್‌ನಲ್ಲಿ ಸೋಂಕಿತ ಪತಿಯನ್ನು ನೋಡಲು ಬಂದಿದ್ದ ಪತ್ನಿಯನ್ನು ಐಸೋಲೇಷನ್‌ನಲ್ಲಿರಲು ಸೂಚನೆ ನೀಡಲಾಗಿದೆ.

ಕಳೆದ ವರ್ಷ ಕೆಲವು ಆಫ್ರಿಕನ್ ದೇಶಗಳಲ್ಲಿ ಮಂಕಿಪಾಕ್ಸ್ ಪ್ರಕರಣಗಳು ಹೆಚ್ಚಾಗಿದ್ದವು. ನಂತರ ಪಾಕಿಸ್ತಾನ ಮತ್ತು ಥಾಯ್ಲೆಂಡ್ ಸೇರಿದಂತೆ ಇತರ ದೇಶಗಳಲ್ಲಿ ಪ್ರಕರಣಗಳು ವರದಿಯಾಗಲು ಪ್ರಾರಂಭಿಸಿದಾಗ ಮಂಕಿಪಾಕ್ಸ್ ಬಗ್ಗೆ ಜಾಗತಿಕ ಮಟ್ಟದಲ್ಲಿ ವ್ಯಾಪಕ ಆತಂಕ ಸೃಷ್ಟಿಯಾಗಿತ್ತು. ವಿಶ್ವ ಆರೋಗ್ಯ ಸಂಸ್ಥೆಯು ಮಂಕಿಪಾಕ್ಸ್ ಅನ್ನು 2024 ರ ಆಗಸ್ಟ್‌ನಲ್ಲಿ 'ಅಂತರಾಷ್ಟ್ರೀಯ ಸಾರ್ವಜನಿಕ ಆರೋಗ್ಯ ತುರ್ತುಸ್ಥಿತಿ' ಎಂದು ಘೋಷಿಸಿತ್ತು.

ಮಂಕಿಪಾಕ್ಸ್ ಅಥವಾ ಎಂಪಾಕ್ಸ್ ಎಂದರೇನು?

ಮಂಕಿಪಾಕ್ಸ್‌ ಸರಳವಾಗಿ ಎಂಪಾಕ್ಸ್ ಎಂದು ಕರೆಯಲ್ಪಡುತ್ತದೆ. ಇದು ಅಪರೂಪದ ವೈರಲ್ ಕಾಯಿಲೆಯಾಗಿದ್ದು, ಸಿಡುಬಿನಂತೆಯೇ ಇರುತ್ತದೆ. ಸಿಡುಬನ್ನು ಉಂಟುಮಾಡುವ ಸಿಡುಬು ವೈರಸ್ ಅನ್ನು ಒಳಗೊಂಡಿರುವ ಅದೇ ಕುಟುಂಬದ ಭಾಗವಾಗಿದೆ. ಆದರೆ ಇದು ಸಿಡುಬಿನಂತೆ ಅಪಾಯಕಾರಿಯಾಗಿಲ್ಲ.

ಮಂಕಿಪಾಕ್ಸ್ ಮತ್ತು ಸಿಡುಬಿನ ನಡುವಿನ ವ್ಯತ್ಯಾಸವೇನು?

ಮಂಕಿಪಾಕ್ಸ್ ಮತ್ತು ಸಿಡುಬು ಎರಡೂ ಒಂದೇ ವೈರಸ್‌ನಿಂದ ಉಂಟಾಗಿದ್ದರೂ, ಅವು ವಿಭಿನ್ನ ರೋಗಗಳಾಗಿವೆ. ಸಿಡುಬು ಹೆಚ್ಚು ಗಂಭೀರವಾದ ಕಾಯಿಲೆಯಾಗಿದ್ದು, ಇದನ್ನು 1980 ರಲ್ಲಿ ವಿಶ್ವಾದ್ಯಂತ ನಿರ್ಮೂಲನೆ ಮಾಡಲಾಯಿತು. ಮತ್ತೊಂದೆಡೆ, ಮಂಕಿಪಾಕ್ಸ್ ಕಡಿಮೆ ಗಂಭೀರವಾಗಿದೆ ಆದರೆ ತೀವ್ರವಾದ ಅನಾರೋಗ್ಯವನ್ನು ಉಂಟುಮಾಡುತ್ತದೆ.

ಮಂಕಿಪಾಕ್ಸ್ ಅಥವಾ ಎಂಪಾಕ್ಸ್ ಹೇಗೆ ಹರಡುತ್ತದೆ?

ಮಂಕಿಪಾಕ್ಸ್ ಪ್ರಾಥಮಿಕವಾಗಿ ಸೋಂಕಿತ ವ್ಯಕ್ತಿಯೊಂದಿಗೆ ನಿಕಟ ಸಂಪರ್ಕ, ಅವರ ದದ್ದುಗಳು, ದೇಹದ ದ್ರವಗಳು ಅಥವಾ ಉಸಿರಾಟದ ಹನಿಗಳ ಮೂಲಕ ಹರಡುತ್ತದೆ. ಎಂಪೋಕ್ಸ್ ವೈರಸ್ ವ್ಯಕ್ತಿಯಿಂದ ವ್ಯಕ್ತಿಗೆ ಈ ರೀತಿಯಲ್ಲಿ ಹರಡಬಹುದು.

* ಎಂಪೋಕ್ಸ್ ರೋಗಿಯ ದೇಹದ ಸ್ರವಿಸುವಿಕೆ, ದದ್ದಿನಿಂದ ಹರಡಬಹುದು.

* ಸೋಂಕಿತ ವ್ಯಕ್ತಿಯಿಂದ ಬರುವ ಉಸಿರಾಟದ ಹನಿಗಳಿಂದಲೂ ಹರಡಬಹುದು.

* ಸೋಂಕಿತ ವ್ಯಕ್ತಿಯ ದೇಹದ ದ್ರವಗಳು ಅಥವಾ ದದ್ದುಗಳ ಸಂಪರ್ಕಕ್ಕೆ ಬಂದ ಬಟ್ಟೆ, ಹಾಸಿಗೆ, ಕಂಬಳಿಗಳು ಅಥವಾ ಇತರ ವಸ್ತುಗಳಿಂದನೂ ಹರಡಬಹುದು.

* ಸೋಂಕಿತ ಗರ್ಭಿಣಿ ಮಹಿಳೆಯಿಂದ ಆಕೆಯ ಮಗುವಿಗೆ ಎಂಪೋಕ್ಸ್ ವೈರಸ್ ಹರಡಬಹುದು.

* ಪ್ರಾಣಿಗಳು ಎಂಪೋಕ್ಸ್ ವೈರಸ್ ಅನ್ನು ಮನುಷ್ಯರಿಗೆ ಹರಡಬಹುದು.

ಮಂಕಿಪಾಕ್ಸ್​ನ ಲಕ್ಷಣಗಳಿವು

* ಊದಿಕೊಂಡ ದುಗ್ಧರಸ ಗ್ರಂಥಿಗಳು

* ಜ್ವರ

* ಚಳಿಯ ಅನುಭವ

* ಸ್ನಾಯು ನೋವು

* ತಲೆನೋವು

* ಸುಸ್ತು

ಮಂಕಿಪಾಕ್ಸ್ ಅಥವಾ ಎಂಪಾಕ್ಸ್ ನ ಪರಿಣಾಮಗಳೇನು?

ಮಂಕಿಪಾಕ್ಸ್‌ ಸೋಂಕು ತಲುಗಿದ ವ್ಯಕ್ತಿ ಯಾವುದೇ ತೊಂದರೆಯಿಲ್ಲದೆ ಚೇತರಿಸಿಕೊಂಡರೂ, ಕೆಲವೊಂದು ಪರಿಣಾಮಗಳನ್ನು ಅನುಭವಿಸುತ್ತಾರೆ. ಕೆಲ ವ್ಯಕ್ತಿಗಳು ಈ ಪರಿಣಾಮಗಳನ್ನು ಅನುಭವಿಸಬಹುದು.

* ಎನ್ಸೆಫಾಲಿಟಿಸ್ (ಮೆದುಳಿನ ಉರಿಯೂತ)

* ನ್ಯುಮೋನಿಯಾ (ಶ್ವಾಸಕೋಶದ ಸೋಂಕು)

* ಸೆಪ್ಸಿಸ್

* ಕಾರ್ನಿಯಲ್ ಸೋಂಕು (ದೃಷ್ಟಿ ನಷ್ಟಕ್ಕೆ ಕಾರಣವಾಗುವ ಕಾರ್ನಿಯಲ್ ಸೋಂಕು)

* ದೃಷ್ಟಿ ನಷ್ಟ (ತೀವ್ರತರವಾದ ಪ್ರಕರಣಗಳಲ್ಲಿ)

* ಮಯೋಕಾರ್ಡಿಟಿಸ್ (ಹೃದಯ ಸ್ನಾಯುವಿನ ಉರಿಯೂತ)

* ಪೆರಿಕಾರ್ಡಿಟಿಸ್ (ಹೃದಯದ ಸುತ್ತಲಿನ ಒಳಪದರದ ಉರಿಯೂತ)

ಅಪಾಯಕಾರಿ ಅಂಶಗಳು ಮತ್ತು ತಡೆಗಟ್ಟುವಿಕೆ

ಮಂಕಿಪಾಕ್ಸ್‌ ಸೋಂಕಿತರ ಸಂಪರ್ಕ ಹೊಂದಿರುವ ವ್ಯಕ್ತಿಗಳಿಗೆ ಸುಲಭವಾಗಿ ಹರಡಬಲ್ಲದು. ಆದರೆ ಈ ಸೋಂಕು ಕೆಲವರಿಗೆ ಅಪಾಯವನ್ನು ತಂದೊಡ್ಡಬಹುದು. ಕಡಿಮೆ ರೋಗನಿರೋಧಕ ಶಕ್ತಿ ಹೊಂದಿರುವವರಿಗೆ, ಗರ್ಭಿಣಿಯರು ಮತ್ತು ನವಜಾತ ಶಿಶುಗಳಿಗೆ ಈ ಸೊಂಕು ಅಪಾಯಕಾರಿಯಾಗಿದೆ. ಮಂಕಿಪಾಕ್ಸ್ ಹರಡುವುದನ್ನು ತಡೆಗಟ್ಟಲು, ಸ್ವಚ್ಛತೆಯನ್ನು ಕಾಪಾಡಿಕೊಳ್ಳುವುದು, ಸೋಂಕಿತ ವ್ಯಕ್ತಿಗಳೊಂದಿಗೆ ಸಂಪರ್ಕವನ್ನು ಮಾಡದಿರುವುದು ಹಾಗೂ ಸಿಡುಬಿನ ವಿರುದ್ಧ ಲಸಿಕೆ ಹಾಕುವುದರಿಂದ ಮಂಕಿಪಾಕ್ಸ್ ಸೋಂಕು ತಡೆಗಟ್ಟಬಹುದು.

ಮಂಕಿಪಾಕ್ಸ್ ಅಥವಾ ಎಂಪಾಕ್ಸ್ ರೋಗವನ್ನು ಪತ್ತೆಹಚ್ಚುವುದು ಹೇಗೆ?

ಮಂಕಿಪಾಕ್ಸ್ ವೈರಸ್ ಪತ್ತೆಹಚ್ಚಲು ಹಲವಾರು ಪರೀಕ್ಷೆಗಳು ಲಭ್ಯವಿದೆ.

* ಪಿಸಿಆರ್ (ಪಾಲಿಮರೇಸ್ ಚೈನ್ ರಿಯಾಕ್ಷನ್): ಈ ಪರೀಕ್ಷೆಯು ವೈರಸ್‌ನ ಆನುವಂಶಿಕ ವಸ್ತುವನ್ನು ಪತ್ತೆ ಮಾಡುತ್ತದೆ.

* ರಕ್ತ ಪರೀಕ್ಷೆಗಳು

* ಇಮೇಜಿಂಗ್ ಪರೀಕ್ಷೆಗಳು: ಕೆಲವು ಸಂದರ್ಭಗಳಲ್ಲಿ, ಚರ್ಮದ ಗಾಯಗಳನ್ನು ಪರೀಕ್ಷಿಸಲು ಇಮೇಜಿಂಗ್ ಪರೀಕ್ಷೆಗಳನ್ನು ಬಳಸಬಹುದು.

ಮಂಕಿಪಾಕ್ಸ್ ಅಥವಾ ಎಂಪಾಕ್ಸ್ ಹರಡುವುದನ್ನು ತಡೆಯುವುದು ಹೇಗೆ?

* ಎಂಪೋಕ್ಸ್ ತರಹದ ದದ್ದು ಇರುವ ಜನರೊಂದಿಗೆ ನಿಕಟ ಸಂಪರ್ಕವನ್ನು ತಪ್ಪಿಸಿ.

* ಸೋಂಕಿತ ವ್ಯಕ್ತಿ ಬಳಸಿದ ಕಂಬಳಿ, ಹಾಸಿಗೆ ಮತ್ತು ಬಟ್ಟೆಗಳಂತಹ ವಸ್ತುಗಳನ್ನು ಮುಟ್ಟುವುದನ್ನು ತಪ್ಪಿಸಿ.

* ಎಂಪೋಕ್ಸ್ ಬಾಧಿತ ವ್ಯಕ್ತಿಗಳನ್ನು ಆರೋಗ್ಯವಂತ ಜನರಿಂದ ಪ್ರತ್ಯೇಕವಾಗಿ ಇರಿಸಿ.

* ಸೋಂಕಿತ ವ್ಯಕ್ತಿಗಳ ಸಂಪರ್ಕಕ್ಕೆ ಬಂದ ಬಳಿಕ ನಿಮ್ಮ ಕೈಗಳನ್ನು ಸೋಪ್ ಮತ್ತು ನೀರಿನಿಂದ ಚೆನ್ನಾಗಿ ತೊಳೆಯಿರಿ.

* ಸೋಂಕಿಗೆ ಒಳಗಾಗಬಹುದಾದ ಪ್ರಾಣಿಗಳಿಂದ ದೂರವಿರಿ.

* ಎಂಪಾಕ್ಸ್ ವಿರುದ್ಧ ಲಸಿಕೆ ಹಾಕಿಸಿ.

ಮಂಕಿಪಾಕ್ಸ್​ಗೆ ಇಲ್ಲಿಯವರೆಗೆ ಯಾವುದೇ ಲಸಿಕೆ ಅಥವಾ ಶಿಫಾರಸು ಮಾಡಿದ ಔಷಧವಿಲ್ಲ. ರೋಗಿಗೆ ಆತನ ರೋಗಲಕ್ಷಣಗಳ ಆಧಾರದ ಮೇಲೆ ಮಾತ್ರ ಚಿಕಿತ್ಸೆ ನೀಡಲಾಗುತ್ತದೆ. ಆಂಟಿವೈರಲ್ ಔಷಧಿಗಳನ್ನು ನೀಡುವ ಮೂಲಕ ವೈದ್ಯರು ರೋಗಿಯ ರೋಗವನ್ನು ನಿಯಂತ್ರಿಸುತ್ತಾರೆ.