Israel-Iran conflict | ಇರಾನ್ ಪರಮಾಣು ಕೇಂದ್ರಗಳ ಮೇಲೆ ಅಮೆರಿಕ ದಾಳಿ; ಮಧ್ಯಪ್ರಾಚ್ಯದಲ್ಲಿ 'ಅಪಾಯಕಾರಿ ತಿರುವು' ಎಂದ ಯುಎನ್ ಮುಖ್ಯಸ್ಥ

ಅಮೆರಿಕವು ಇರಾನ್‌ನ ಪರಮಾಣು ಸೌಲಭ್ಯಗಳ ಮೇಲೆ ನಡೆಸಿದ ಬಾಂಬ್ ದಾಳಿಯು ಮಧ್ಯಪ್ರಾಚ್ಯದಲ್ಲಿ "ಅಪಾಯಕಾರಿ ತಿರುವು" ಪಡೆಯಲು ಕಾರಣವಾಗಿದೆ ಎಂದು ವಿಶ್ವಸಂಸ್ಥೆಯ ಮುಖ್ಯ ಕಾರ್ಯದರ್ಶಿ ಆಂಟೋನಿಯೊ ಗುಟೆರೆಸ್ ಹೇಳಿದ್ದಾರೆ.

ಮಧ್ಯಪ್ರಾಚ್ಯ ಪ್ರದೇಶದಲ್ಲಿ ಉದ್ವಿಗ್ನತೆ ಅಪಾಯಕಾರಿಯಾಗಿ ಏರಿಕೆಯಾಗುತ್ತಿರುವ ಸಂದರ್ಭದಲ್ಲಿ ಯುಎನ್ ಭದ್ರತಾ ಮಂಡಳಿಯ ತುರ್ತು ಸಭೆಯಲ್ಲಿ ಅವರು ಈ ಹೇಳಿಕೆ ನೀಡಿದ್ದಾರೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇರಾನ್‌ನ ಮೂರು ಪರಮಾಣು ಕೇಂದ್ರಗಳಾದ ಫೊರ್ಡೊ, ನತಾಂಜ್ ಮತ್ತು ಇಸ್ಫಹಾನ್‌ಗಳ ಮೇಲೆ ಅಮೆರಿಕ ಬಾಂಬ್ ದಾಳಿ ನಡೆಸಿರುವುದಾಗಿ ಘೋಷಿಸಿದ ನಂತರ, 15 ರಾಷ್ಟ್ರಗಳ ಭದ್ರತಾ ಮಂಡಳಿಯು ಭಾನುವಾರ ತುರ್ತು ಸಭೆ ಸೇರಿತ್ತು.

"ಅಮೆರಿಕದ ಇರಾನ್‌ನ ಪರಮಾಣು ಸೌಲಭ್ಯಗಳ ಮೇಲಿನ ಬಾಂಬ್ ದಾಳಿಯು ಈಗಾಗಲೇ ತತ್ತರಿಸಿರುವ ಪ್ರದೇಶದಲ್ಲಿ ಅಪಾಯಕಾರಿ ತಿರುವನ್ನು ಸೂಚಿಸುತ್ತದೆ. ಈ ಸಂಕಷ್ಟದ ಆರಂಭದಿಂದಲೂ, ಮಧ್ಯಪ್ರಾಚ್ಯದಲ್ಲಿ ಯಾವುದೇ ಸೈನಿಕ ಉದ್ವಿಗ್ನತೆಯನ್ನು ನಾನು ಪದೇಪದೇ ಖಂಡಿಸಿದ್ದೇನೆ," ಎಂದು ಕಾರ್ಯದರ್ಶಿ ಜನರಲ್ ಗುಟೆರೆಸ್ ಯುಎನ್ ಭದ್ರತಾ ಮಂಡಳಿಗೆ ತಿಳಿಸಿದರು.

ಗುಟೆರೆಸ್ ಅವರು, ಈ ಪ್ರದೇಶದ ಜನರು ಮತ್ತೊಂದು ವಿನಾಶದ ಚಕ್ರವನ್ನು ಸಹಿಸಲಾರರು ಎಂದು ಎಚ್ಚರಿಸಿದರು. "ಆದರೂ, ಈಗ ನಾವು ಪ್ರತೀಕಾರದಿಂದ ಪ್ರತೀಕಾರದ ಕಂದಕಕ್ಕೆ ಜಾರುವ ಅಪಾಯದಲ್ಲಿದ್ದೇವೆ. ಅಂತರರಾಷ್ಟ್ರೀಯ ಸಮುದಾಯವು ತಕ್ಷಣವೇ ಮತ್ತು ನಿರ್ಣಾಯಕವಾಗಿ ಕಾರ್ಯನಿರ್ವಹಿಸಿ, ಯುದ್ಧವನ್ನು ನಿಲ್ಲಿಸಿ, ಇರಾನ್‌ನ ಪರಮಾಣು ಕಾರ್ಯಕ್ರಮದ ಬಗ್ಗೆ ಗಂಭೀರ ಮತ್ತು ನಿರಂತರ ಮಾತುಕತೆಗಳಿಗೆ ಮರಳಬೇಕು," ಎಂದು ಯುಎನ್ ಮುಖ್ಯಸ್ಥ ತೀವ್ರವಾಗಿ ಒತ್ತಾಯಿಸಿದರು.

ಇರಾನ್ ಅಂತರರಾಷ್ಟ್ರೀಯ ಶಾಂತಿ ಮತ್ತು ಭದ್ರತೆಯ ಮೂಲಾಧಾರವಾದ ಪರಮಾಣು ಅಪಗಮನ ತಡೆ ಒಪ್ಪಂದವನ್ನು (ನಾನ್-ಪ್ರೊಲಿಫರೇಷನ್ ಟ್ರೀಟಿ) ಸಂಪೂರ್ಣವಾಗಿ ಗೌರವಿಸಬೇಕು ಎಂದೂ ಗುಟೆರೆಸ್ ಸ್ಪಷ್ಟಪಡಿಸಿದ್ದಾರೆ.