ಲ್ಯಾಟಿನ್ ಅಮೆರಿಕದಾದ್ಯಂತ ಭೀತಿ; ಕೊಲಂಬಿಯಾ, ಮೆಕ್ಸಿಕೋಗೆ ಟ್ರಂಪ್ ಬೆದರಿಕೆ

ವೆನೆಜುವೆಲಾದಲ್ಲಿ 'ಆಪರೇಷನ್ ಅಬ್ಸಲ್ಯೂಟ್ ರಿಸಾಲ್ವ್' ಯಶಸ್ವಿಯಾದ ಬೆನ್ನಲ್ಲೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಆಕ್ರಮಣಕಾರಿ ಧೋರಣೆ ಮತ್ತಷ್ಟು ತೀವ್ರಗೊಂಡಿದೆ. ಭಾನುವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕೊಲಂಬಿಯಾ, ಮೆಕ್ಸಿಕೋ ಮತ್ತು ಕ್ಯೂಬಾ ದೇಶಗಳ ನಾಯಕರಿಗೆ ಬಹಿರಂಗವಾಗಿಯೇ ಬೆದರಿಕೆ ಹಾಕಿದ್ದಾರೆ. ಈ ರಾಷ್ಟ್ರಗಳಲ್ಲಿ ನಡೆಯುತ್ತಿರುವ ಮಾದಕ ದ್ರವ್ಯ ಕಳ್ಳಸಾಗಣೆ ಮತ್ತು ರಾಜಕೀಯ ಅಸ್ಥಿರತೆಯನ್ನು ಅಮೆರಿಕ ಇನ್ನು ಮುಂದೆ ಸಹಿಸುವುದಿಲ್ಲ ಎಂದು ಅವರು ಹೇಳಿದ್ದಾರೆ.

ಅಮೆರಿಕದ ಈ ಮಿಲಿಟರಿ ಕಾರ್ಯಾಚರಣೆಯನ್ನು ಕಟುವಾಗಿ ಟೀಕಿಸಿದ್ದ ಕೊಲಂಬಿಯಾ ಅಧ್ಯಕ್ಷ ಗುಸ್ಟಾವೊ ಪೆಟ್ರೋ ಅವರಿಗೆ ಟ್ರಂಪ್ ಅತ್ಯಂತ ಒರಟಾದ ಭಾಷೆಯಲ್ಲಿ ಎಚ್ಚರಿಕೆ ನೀಡಿದ್ದಾರೆ. ಪೆಟ್ರೋ ಅವರು ಮಾದಕ ದ್ರವ್ಯ ಉತ್ಪಾದನೆಯಲ್ಲಿ ತೊಡಗಿದ್ದು, ಅದನ್ನು ಅಮೆರಿಕಕ್ಕೆ ಕಳುಹಿಸುತ್ತಿದ್ದಾರೆ ಎಂದು ಗಂಭೀರ ಆರೋಪ ಮಾಡಿರುವ ಟ್ರಂಪ್, ಪೆಟ್ರೋ ಅವರು ತಮ್ಮ 'ಜೀವದ ಬಗ್ಗೆ ಜಾಗರೂಕರಾಗಿರಲಿ' ಎಂದು ಬೆದರಿಕೆ ಹಾಕಿದ್ದಾರೆ. ಕೊಲಂಬಿಯಾ ಅಧ್ಯಕ್ಷರು ಈ ಹಿಂದೆ ವೆನೆಜುವೆಲಾ ಮೇಲಿನ ದಾಳಿಯನ್ನು ಸಾರ್ವಭೌಮತ್ವದ ಉಲ್ಲಂಘನೆ ಎಂದು ಕರೆದಿದ್ದರು, ಇದು ಟ್ರಂಪ್ ಅವರನ್ನು ಕೆರಳಿಸಿದೆ.

ಮೆಕ್ಸಿಕೋ ಆಡಳಿತದಲ್ಲಿ 'ಕಾರ್ಟೆಲ್'ಗಳ ಹಾವಳಿ

ಮೆಕ್ಸಿಕೋ ದೇಶದ ಕುರಿತು ಮಾತನಾಡಿರುವ ಟ್ರಂಪ್, ಅಲ್ಲಿನ ಸರ್ಕಾರವು ಮಾದಕ ದ್ರವ್ಯ ಮಾಫಿಯಾ ಅಥವಾ 'ಕಾರ್ಟೆಲ್'ಗಳ ಕೈಗೊಂಬೆಯಾಗಿದೆ ಎಂದು ಟೀಕಿಸಿದ್ದಾರೆ. ಮೆಕ್ಸಿಕೋ ಅಧ್ಯಕ್ಷೆ ಕ್ಲೌಡಿಯಾ ಶೀನ್‌ಬಾಮ್ ಅವರನ್ನು "ಒಳ್ಳೆಯ ಮಹಿಳೆ" ಎಂದು ಸಂಬೋಧಿಸಿದರೂ, ದೇಶವು ಅವರ ನಿಯಂತ್ರಣದಲ್ಲಿಲ್ಲ, ಬದಲಾಗಿ ಅಪರಾಧಿಗಳ ಗುಂಪುಗಳ ನಿಯಂತ್ರಣದಲ್ಲಿದೆ ಎಂದು ಹೇಳಿದ್ದಾರೆ. ಈ ಕಾರ್ಟೆಲ್‌ಗಳನ್ನು ಮಟ್ಟಹಾಕಲು ಅಮೆರಿಕದ ಸಹಾಯ ಪಡೆಯುವಂತೆ ನೀಡಿದ್ದ ಆಫರ್ ಅನ್ನು ಶೀನ್‌ಬಾಮ್ ನಿರಂತರವಾಗಿ ತಿರಸ್ಕರಿಸುತ್ತಿರುವುದಕ್ಕೆ ಟ್ರಂಪ್ ಅಸಮಾಧಾನ ವ್ಯಕ್ತಪಡಿಸಿದ್ದು, ಈ ವಿಷಯದಲ್ಲಿ ಅಮೆರಿಕ ಶೀಘ್ರವೇ ಏನಾದರೂ ಮಾಡಲಿದೆ ಎಂಬ ಸುಳಿವು ನೀಡಿದ್ದಾರೆ.

ಕ್ಯೂಬಾ ಮೇಲೂ ಅಮೆರಿಕದ ಹದ್ದಿನ ಕಣ್ಣು

ಮಡುರೊ ಅವರ ಆಪ್ತ ಮಿತ್ರ ರಾಷ್ಟ್ರವಾದ ಕ್ಯೂಬಾ ಕೂಡ ಈಗ ಅಮೆರಿಕದ ಗುರಿಯಾಗಿದೆ. ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೋ ಅವರು ಹವಾನಾದಲ್ಲಿರುವ ಕ್ಯೂಬಾ ಸರ್ಕಾರಕ್ಕೆ ಎಚ್ಚರಿಕೆ ನೀಡಿದ್ದು, ವೆನೆಜುವೆಲಾ ಬೆಳವಣಿಗೆಗಳ ನಂತರ ಕ್ಯೂಬಾ ಕೂಡ ಸ್ವಲ್ಪ ಮಟ್ಟಿಗೆ ಆತಂಕಪಡುವ ಅಗತ್ಯವಿದೆ ಎಂದು ಹೇಳಿದ್ದಾರೆ. ಟ್ರಂಪ್ ಕೂಡ ಕ್ಯೂಬಾವನ್ನು 'ವಿಫಲ ರಾಷ್ಟ್ರ' ಎಂದು ಕರೆದಿದ್ದು, ಅಲ್ಲಿನ ಕಮ್ಯುನಿಸ್ಟ್ ಆಡಳಿತದಿಂದ ಜನರನ್ನು ಮುಕ್ತಗೊಳಿಸಲು ಅಮೆರಿಕ ಸಹಾಯ ಮಾಡಲಿದೆ ಎಂದು ಹೇಳುವ ಮೂಲಕ ಅಲ್ಲಿಯೂ 'ಆಡಳಿತ ಬದಲಾವಣೆ'ಯ ಮುನ್ಸೂಚನೆ ನೀಡಿದ್ದಾರೆ.

ಲ್ಯಾಟಿನ್ ಅಮೆರಿಕದಲ್ಲಿ ಅಮೆರಿಕದ ಪಾರಮ್ಯ ಸ್ಥಾಪನೆ

ಈ ಎಲ್ಲ ಬೆಳವಣಿಗೆಗಳು ಲ್ಯಾಟಿನ್ ಅಮೆರಿಕ ಪ್ರಾಂತ್ಯದಲ್ಲಿ ಅಮೆರಿಕದ ಅಧಿಪತ್ಯವನ್ನು ಮರುಸ್ಥಾಪಿಸುವ ಟ್ರಂಪ್ ಅವರ ದೊಡ್ಡ ಯೋಜನೆಯ ಭಾಗವಾಗಿ ಕಂಡುಬರುತ್ತಿವೆ. ತಮ್ಮ ನೆರೆಹೊರೆಯ ರಾಷ್ಟ್ರಗಳು ಅಮೆರಿಕದ ಹಿತಾಸಕ್ತಿಗೆ ಪೂರಕವಾಗಿರಬೇಕು ಮತ್ತು ಅಲ್ಲಿನ ಇಂಧನ ಸಂಪನ್ಮೂಲಗಳ ಮೇಲೆ ಅಮೆರಿಕದ ಭದ್ರತೆ ಇರಬೇಕು ಎಂಬುದು ಟ್ರಂಪ್ ಉದ್ದೇಶವಾಗಿದೆ. "ನಮಗೆ ಉತ್ತಮ ನೆರೆಹೊರೆಯವರು ಬೇಕು, ಸ್ಥಿರತೆ ಬೇಕು ಮತ್ತು ಇಂಧನ ಭದ್ರತೆ ಬೇಕು," ಎಂದು ಟ್ರಂಪ್ ಹೇಳಿದ್ದಾರೆ. ಅಮೆರಿಕದ ಈ ಮಿಲಿಟರಿ ಆಕ್ರಮಣಕಾರಿ ಧೋರಣೆಯು ಇಡೀ ಲ್ಯಾಟಿನ್ ಅಮೆರಿಕದಲ್ಲಿ ಈಗ ಆತಂಕದ ಅಲೆಗಳನ್ನು ಸೃಷ್ಟಿಸಿದೆ.