ಭಾರತ - ಪಾಕಿಸ್ತಾನದ ನಾಗರಿಕರ ಮನಸ್ಥಿತಿ ಬಿಚ್ಚಿಟ್ಟ ಪ್ಯೂ ರಿಸರ್ಚ್ ಸಮೀಕ್ಷೆ..!

ಅಂತಾರಾಷ್ಟ್ರೀಯ ರಾಜಕೀಯ ಮತ್ತು ಭದ್ರತಾ ವಲಯದಲ್ಲಿ ಭಾರತ ಮತ್ತು ಪಾಕಿಸ್ತಾನದ ನಡುವಿನ ಸಂಬಂಧ ಯಾವಾಗಲೂ ಸೂಕ್ಷ್ಮ ಹಾಗೂ ಉದ್ವಿಗ್ನತೆಯಿಂದ ಕೂಡಿದೆ. ಇದೀಗ ಅಮೆರಿಕದ ಪ್ರತಿಷ್ಠಿತ ಥಿಂಕ್ ಟ್ಯಾಂಕ್ 'ಪ್ಯೂ ರಿಸರ್ಚ್' ನಡೆಸಿದ ಹೊಸ ಸಮೀಕ್ಷೆಯು ಎರಡೂ ದೇಶಗಳ ನಾಗರಿಕರ ಮನಸ್ಥಿತಿಯನ್ನು ತೆರೆದಿಟ್ಟಿದೆ. ದಶಕಗಳಿಂದಲೂ ಮುಂದುವರಿದಿರುವ ಪರಸ್ಪರ ಅಪನಂಬಿಕೆ ಮತ್ತು ದ್ವೇಷದ ಭಾವನೆಗಳು ಇಂದಿಗೂ ಎಷ್ಟು ಆಳವಾಗಿ ಬೇರೂರಿವೆ ಎಂಬುದನ್ನು ಈ ಸಮೀಕ್ಷೆ ಸಾಬೀತುಪಡಿಸಿದೆ.

ಪ್ಯೂ ರಿಸರ್ಚ್ ಸಮೀಕ್ಷೆಯ ಪ್ರಕಾರ, ಭಾರತ ಮತ್ತು ಪಾಕಿಸ್ತಾನದ ಹೆಚ್ಚಿನ ನಾಗರಿಕರು ಪರಸ್ಪರರನ್ನು ತಮ್ಮ ದೇಶದ 'ಅತಿದೊಡ್ಡ ಭದ್ರತಾ ಬೆದರಿಕೆ' ಎಂದು ಪರಿಗಣಿಸಿದ್ದಾರೆ. ಸಮೀಕ್ಷೆಯಲ್ಲಿ ಪಾಲ್ಗೊಂಡ ಶೇ. 54ರಷ್ಟು ಭಾರತೀಯರು ಪಾಕಿಸ್ತಾನವನ್ನು ದೇಶದ ಅತಿದೊಡ್ಡ ಭೌಗೋಳಿಕ-ರಾಜಕೀಯ ಬೆದರಿಕೆ ಎಂದು ಬಣ್ಣಿಸಿದ್ದಾರೆ. ನಂತರದ ಸ್ಥಾನದಲ್ಲಿ ಚೀನಾ (ಶೇ. 21) ಇದೆ. ಪಾಕಿಸ್ತಾನದಲ್ಲಿ ಶೇ. 43ರಷ್ಟು ಮಂದಿ ಭಾರತವನ್ನು ತಮ್ಮ ಅತಿದೊಡ್ಡ ಶತ್ರು ಎಂದು ಗುರುತಿಸಿದ್ದಾರೆ. ಇದೇ ವೇಳೆ ಇಸ್ರೇಲ್ ಮತ್ತು ಚೀನಾವನ್ನು ಕ್ರಮವಾಗಿ ಶೇ. 24ರಷ್ಟು ಪಾಕಿಸ್ತಾನಿಗಳು ಬೆದರಿಕೆ ಎಂದು ಪರಿಗಣಿಸಿದ್ದಾರೆ. ಈ ಅಂಕಿಅಂಶಗಳು ಎರಡೂ ದೇಶಗಳ ಜನರ ನಡುವಿನ ಭಾವನಾತ್ಮಕ ಅಂತರ ಮತ್ತು ರಾಜಕೀಯ ನಂಬಿಕೆಯ ಕೊರತೆಯನ್ನು ಪ್ರತಿಬಿಂಬಿಸುತ್ತವೆ.

ಬದಲಾದ ಸಮೀಕರಣ

ಮಿತ್ರರಾಷ್ಟ್ರಗಳ ವಿಷಯದಲ್ಲಿ ಎರಡೂ ದೇಶಗಳು ವಿಭಿನ್ನ ನಿಲುವುಗಳನ್ನು ಹೊಂದಿವೆ. ಪಾಕಿಸ್ತಾನದ ವಿಷಯದಲ್ಲಿ ಚೀನಾ ಅಪ್ರತಿಮ ಮಿತ್ರನಾಗಿ ಕಾಣುತ್ತಿದೆ. ಸುಮಾರು ಶೇ. 75ರಷ್ಟು ಪಾಕಿಸ್ತಾನಿಗಳು ಚೀನಾವನ್ನು ತಮ್ಮ ಅತ್ಯಂತ ಮಹತ್ವದ ಮಿತ್ರ ಎಂದು ನಂಬಿದ್ದಾರೆ. ಉಳಿದಂತೆ ಶೇ. 12ರಷ್ಟು ಮಂದಿ ಸೌದಿ ಅರೇಬಿಯಾವನ್ನು ಬೆಂಬಲಿಸುತ್ತಾರೆ. ಅಮೆರಿಕದ ಜೊತೆ ಉತ್ತಮ ಬಾಂಧವ್ಯವನ್ನು ಪಾಕಿಸ್ತಾನದ ಉನ್ನತ ನಾಯಕತ್ವ ಪ್ರದರ್ಶಿಸಲು ಪ್ರಯತ್ನಿಸಿದರೂ, ಪಾಕಿಸ್ತಾನದ ಕೇವಲ ಶೇ. 15ರಷ್ಟು ಮಂದಿ ಮಾತ್ರ ಅಮೆರಿಕದ ಬಗ್ಗೆ ಸಕಾರಾತ್ಮಕ ಅಭಿಪ್ರಾಯ ಹೊಂದಿದ್ದಾರೆ. ಭಾರತೀಯರ ಪಾಲಿಗೆ ರಷ್ಯಾ ದೀರ್ಘಕಾಲದ ಮಿತ್ರನಾಗಿ ಉಳಿದಿದೆ. ಶೇ. 36ರಷ್ಟು ಭಾರತೀಯರು ರಷ್ಯಾವನ್ನು ಅಗ್ರ ಮಿತ್ರ ಎಂದು ಪರಿಗಣಿಸಿದರೆ, ಶೇ. 16ರಷ್ಟು ಮಂದಿ ಅಮೆರಿಕವನ್ನು ಮಿತ್ರ ರಾಷ್ಟ್ರ ಎಂದು ಗುರುತಿಸಿದ್ದಾರೆ. ಗಮನಾರ್ಹ ಸಂಗತಿಯೆಂದರೆ, ಸುಮಾರು ಮೂರನೇ ಒಂದು ಭಾಗದಷ್ಟು ಭಾರತೀಯರು ಈ ಪ್ರಶ್ನೆಗೆ ಉತ್ತರಿಸಲು ಆಸಕ್ತಿ ತೋರಿಲ್ಲ.

ನಾಯಕರ ಜನಪ್ರಿಯತೆ: ಪುಟಿನ್ ಮತ್ತು ಜಿನ್‌ಪಿಂಗ್

ಜಾಗತಿಕ ನಾಯಕರ ಬಗ್ಗೆ ಈ ದೇಶಗಳ ಜನರ ವಿಶ್ವಾಸಾರ್ಹತೆ ಕೌತುಕದ ವಿಷಯವಾಗಿದೆ. ಪಾಕಿಸ್ತಾನದಲ್ಲಿ ಚೀನಾದ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್ ಅವರ ಮೇಲೆ ಶೇ. 83ರಷ್ಟು ಜನರು ಅಪಾರ ವಿಶ್ವಾಸ ಹೊಂದಿದ್ದಾರೆ. ಇದಕ್ಕೆ ವ್ಯತಿರಿಕ್ತವಾಗಿ, ಅಮೆರಿಕದ ಡೊನಾಲ್ಡ್ ಟ್ರಂಪ್ ಅವರ ಮೇಲೆ ಕೇವಲ ಶೇ. 12ರಷ್ಟು ವಿಶ್ವಾಸವಿದೆ. ಭಾರತದಲ್ಲಿ ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರ ಮೇಲೆ ಶೇ. 51ರಷ್ಟು ಮಂದಿ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಆದರೆ, ಚೀನಾದ ಕ್ಸಿ ಜಿನ್‌ಪಿಂಗ್ ಬಗ್ಗೆ ಭಾರತೀಯರ ವಿಶ್ವಾಸ ಕೇವಲ ಶೇ. 25ರಷ್ಟಿದೆ. ಅಮೆರಿಕದ ಟ್ರಂಪ್ ಬಗ್ಗೆ ಶೇ. 39ರಷ್ಟು ಭಾರತೀಯರು ವಿಶ್ವಾಸ ಹೊಂದಿದ್ದಾರೆ.

ಸಮೀಕ್ಷೆಯು ಶ್ರೀಲಂಕಾ ಮತ್ತು ಬಾಂಗ್ಲಾದೇಶದ ಜನರ ಅಭಿಪ್ರಾಯಗಳನ್ನೂ ದಾಖಲಿಸಿದೆ. ಶ್ರೀಲಂಕಾದ ಜನರ ದೃಷ್ಟಿಯಲ್ಲಿ ಭಾರತ ಅತ್ಯಂತ ಸ್ನೇಹಪರ ರಾಷ್ಟ್ರವಾಗಿದೆ. ಶೇ. 79ರಷ್ಟು ಶ್ರೀಲಂಕನ್ನರು ಭಾರತದ ಬಗ್ಗೆ ಸಕಾರಾತ್ಮಕ ಅಭಿಪ್ರಾಯ ಹೊಂದಿದ್ದರೆ, ಶೇ. 63ರಷ್ಟು ಮಂದಿ ಭಾರತವನ್ನು ತಮ್ಮ ಪ್ರಮುಖ ಮಿತ್ರ ಎಂದು ಹೆಸರಿಸಿದ್ದಾರೆ.

ಬಾಂಗ್ಲಾದೇಶದಲ್ಲಿ ಶೇ. 42ರಷ್ಟು ಮಂದಿ ಮಾತ್ರ ಭಾರತವನ್ನು ಸಕಾರಾತ್ಮಕವಾಗಿ ನೋಡುತ್ತಾರೆ. ಪಾಕಿಸ್ತಾನದಲ್ಲಿ ಕೇವಲ ಶೇ. 7ರಷ್ಟು ಮಂದಿ ಮಾತ್ರ ಭಾರತದ ಬಗ್ಗೆ ಸಕಾರಾತ್ಮಕ ದೃಷ್ಟಿಕೋನ ಹೊಂದಿದ್ದಾರೆ ಎಂಬುದು ವಿಪರ್ಯಾಸ.

ಅಮೆರಿಕದ ದೃಷ್ಟಿಕೋನದಲ್ಲಿ ಭಾರತ

ಅಮೆರಿಕದ ನಾಗರಿಕರಲ್ಲಿ ಭಾರತದ ಬಗ್ಗೆ ಇರುವ ಅಭಿಪ್ರಾಯ ಮಿಶ್ರಿತವಾಗಿದೆ. ಸಮೀಕ್ಷೆಯ ಪ್ರಕಾರ, ಶೇ. 45ರಷ್ಟು ಅಮೆರಿಕನ್ನರು ಭಾರತವನ್ನು ಸಕಾರಾತ್ಮಕವಾಗಿ ಕಂಡರೆ, ಶೇ. 50ರಷ್ಟು ಮಂದಿ ನಕಾರಾತ್ಮಕ ಅಭಿಪ್ರಾಯ ಹೊಂದಿದ್ದಾರೆ. ಅಮೆರಿಕದ ರಾಜಕೀಯ ಧ್ರುವೀಕರಣ ಇಲ್ಲಿಯೂ ಎದ್ದು ಕಾಣುತ್ತದೆ. ಡೆಮೋಕ್ರಾಟ್ ಬೆಂಬಲಿಗರಲ್ಲಿ ಭಾರತದ ಬಗ್ಗೆ ಹೆಚ್ಚು ಸಕಾರಾತ್ಮಕ ಭಾವನೆ (ಶೇ. 50) ಇದ್ದರೆ, ರಿಪಬ್ಲಿಕನ್ ಬೆಂಬಲಿಗರಲ್ಲಿ ಇದು ಶೇ. 42ರಷ್ಟಿದೆ. ಭಾರತದ ಜಾಗತಿಕ ಪ್ರಭಾವದ ಕುರಿತು ಶೇ. 54ರಷ್ಟು ಅಮೆರಿಕನ್ನರು "ಭಾರತದ ಪ್ರಭಾವದಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ" ಎಂದು ಅಭಿಪ್ರಾಯಪಟ್ಟರೆ, ಶೇ. 30ರಷ್ಟು ಮಂದಿ ಭಾರತದ ಪ್ರಭಾವ ಹೆಚ್ಚುತ್ತಿದೆ ಎಂದು ನಂಬಿದ್ದಾರೆ.