ಇರಾನ್ನ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಘ್ಚಿ
ಅಮೆರಿಕ ಜತೆ ಶಾಂತಿ ಮಾತುಕತೆ ಸ್ಥಗಿತ ಎಂಬ ವರದಿ ತಳ್ಳಿಹಾಕಿದ ಇರಾನ್
ಪಾಕಿಸ್ತಾನ ವಿದೇಶಾಂಗ ಇಲಾಖೆಯ ವಕ್ತಾರ ತಾಹಿರ್ ಅಂದ್ರಾಬಿ, ಅನಾಮಧೇಯ ಅಧಿಕೃತ ಮೂಲಗಳನ್ನು ಉಲ್ಲೇಖಿಸಿ ಹರಿದಾಡುತ್ತಿರುವ ಮಾಹಿತಿ ಆಧಾರರಹಿತ ಹಾಗೂ ಕಲ್ಪಿತ ಎಂದು ಹೇಳಿದ್ದಾರೆ.
ಪಾಕಿಸ್ತಾನದ ಮಧ್ಯಸ್ಥಿಕೆಯಲ್ಲಿ ಅಮೆರಿಕ ಜತೆ ಆರಂಭಿಕ ಶಾಂತಿ ಮಾತುಕತೆಗಳು ಸ್ಥಗಿತಗೊಂಡಿವೆ ಎಂಬ ಮಾಧ್ಯಮ ವರದಿಗಳನ್ನು ಇರಾನ್ ಶನಿವಾರ ತಳ್ಳಿಹಾಕಿದೆ. ಪಾಕಿಸ್ತಾನ ಸಂವಾದಕ್ಕೆ ಬರಲು ನಾವು ಎಂದಿಗೂ ಹಿಂಜರಿದಿಲ್ಲ ಎಂದು ಸ್ಪಷ್ಟಪಡಿಸಿರುವ ತೆಹ್ರಾನ್, ಯುದ್ಧಕ್ಕೆ ಶಾಶ್ವತ ಮತ್ತು ನಿರ್ಣಾಯಕ ಅಂತ್ಯ ತರಬಲ್ಲ ಷರತ್ತುಗಳೇ ತನ್ನ ಮೊದಲ ಆದ್ಯತೆ ಎಂದು ಹೇಳಿದೆ.
ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಘ್ಚಿ, ಅಮೆರಿಕದ ಕೆಲವು ಮಾಧ್ಯಮಗಳು ಇರಾನ್ನ ನಿಲುವನ್ನು ತಪ್ಪಾಗಿ ಬಿಂಬಿಸುತ್ತಿವೆ ಎಂದು ಆರೋಪಿಸಿದ್ದಾರೆ. ಪಾಕಿಸ್ತಾನ ಕೈಗೊಂಡಿರುವ ಶಾಂತಿ ಪ್ರಯತ್ನಗಳಿಗೆ ಕೃತಜ್ಞತೆ ಸಲ್ಲಿಸಿರುವ ಅವರು, ಇಸ್ಲಾಮಾಬಾದ್ ಸಂವಾದದ ವಿರುದ್ಧ ಇರಾನ್ ನಿಂತಿಲ್ಲ. ಆದರೆ ನಡೆಯುತ್ತಿರುವ ಯುದ್ಧಕ್ಕೆ ಕಾನೂನುಬದ್ಧ ಹಾಗೂ ಶಾಶ್ವತ ಅಂತ್ಯ ತರಬಲ್ಲ ಅಂಶಗಳ ಬಗ್ಗೆ ಸ್ಪಷ್ಟತೆ ಬೇಕು ಎಂದು ಹೇಳಿದ್ದಾರೆ.
ಈ ನಡುವೆ, ಅಮೆರಿಕದ ಮಾಧ್ಯಮಗಳಷ್ಟೇ ಅಲ್ಲದೆ ಪಾಕಿಸ್ತಾನದ ಪ್ರಮುಖ ಮಾಧ್ಯಮಗಳಲ್ಲಿಯೂ ಮಾತುಕತೆಗಳ ವೇಗ ನಿಧಾನಗೊಂಡಿದೆ ಎಂಬ ವರದಿಗಳು ಪ್ರಕಟವಾಗಿದ್ದವು. ಇದಕ್ಕೆ ಪ್ರತಿಕ್ರಿಯಿಸಿದ ಪಾಕಿಸ್ತಾನವೂ, ತನ್ನ ರಾಜತಾಂತ್ರಿಕ ಪ್ರಯತ್ನಗಳಿಗೆ ಅಡೆತಡೆ ಎದುರಾಗಿದೆ ಎಂಬ ಸುದ್ದಿಗಳನ್ನು ತಳ್ಳಿಹಾಕಿದೆ.
ಪಾಕಿಸ್ತಾನ ವಿದೇಶಾಂಗ ಇಲಾಖೆಯ ವಕ್ತಾರ ತಾಹಿರ್ ಅಂದ್ರಾಬಿ, ಅನಾಮಧೇಯ ಅಧಿಕೃತ ಮೂಲಗಳನ್ನು ಉಲ್ಲೇಖಿಸಿ ಹರಿದಾಡುತ್ತಿರುವ ಮಾಹಿತಿ ಆಧಾರರಹಿತ ಹಾಗೂ ಕಲ್ಪಿತ ಎಂದು ಹೇಳಿದ್ದಾರೆ. ಈ ಸೂಕ್ಷ್ಮ ಪರಿಸ್ಥಿತಿಯಲ್ಲಿ ಊಹಾಪೋಹಗಳಿಗೆ ಅವಕಾಶ ನೀಡದೆ, ಅಧಿಕೃತ ಪ್ರಕಟಣೆಗಳನ್ನೇ ನಂಬುವಂತೆ ಅವರು ಮಾಧ್ಯಮಗಳಿಗೆ ಮನವಿ ಮಾಡಿದ್ದಾರೆ.
ಪ್ರಾದೇಶಿಕ ಉದ್ವಿಗ್ನತೆ ಮುಂದುವರಿದಿರುವ ಸಂದರ್ಭದಲ್ಲೂ ವಾಷಿಂಗ್ಟನ್ ಮತ್ತು ತೆಹ್ರಾನ್ ನಡುವೆ ಸಂದೇಶ ವಿನಿಮಯ ನಡೆದಿರುವ ಸೂಚನೆಗಳು ಲಭ್ಯವಿದ್ದರೂ, ಇರಾನ್ನಿಂದ ಸ್ಪಷ್ಟ ಸಕಾರಾತ್ಮಕ ಪ್ರತಿಕ್ರಿಯೆ ಸಿಗದ ಕಾರಣ ಪ್ರಗತಿ ನಿಧಾನವಾಗಿದೆ ಎಂಬ ವರದಿಗಳು ಮೊದಲು ಬಂದಿದ್ದವು. ಆದರೆ, ತಾನು ಸಂವಾದವನ್ನು ತಳ್ಳಿಹಾಕಿಲ್ಲ ಎಂಬುದನ್ನು ಈಗ ಇರಾನ್ ಮತ್ತೊಮ್ಮೆ ಒತ್ತಿ ಹೇಳಿದೆ.
