ಇರಾನ್‌ಗೆ ನ್ಯೂಕ್ಲಿಯರ್ ರಿಯಾಕ್ಟರ್ ವಿನ್ಯಾಸ ಮಾರಾಟಕ್ಕೆ ಯತ್ನ: ನಕಲಿ ವಿಜ್ಞಾನಿ, ಆತನ ಸಹೋದರನ ಬಂಧನ

ದೇಶದ ಭದ್ರತೆಗೆ ಕನ್ನ ಹಾಕುವಂತಹ ಆಘಾತಕಾರಿ ಘಟನೆಯೊಂದು ಬೆಳಕಿಗೆ ಬಂದಿದ್ದು, ಭಾಭಾ ಪರಮಾಣು ಸಂಶೋಧನಾ ಕೇಂದ್ರದ (BARC) ವಿಜ್ಞಾನಿ ಎಂದು ಸುಳ್ಳು ಹೇಳಿಕೊಂಡು, ಇರಾನ್ ಕಂಪನಿಗಳಿಗೆ ಪರಮಾಣು ರಿಯಾಕ್ಟರ್ ವಿನ್ಯಾಸವನ್ನು ಮಾರಾಟ ಮಾಡಲು ಯತ್ನಿಸುತ್ತಿದ್ದ ವ್ಯಕ್ತಿಯನ್ನು ಮುಂಬೈ ಪೊಲೀಸರು ಬಂಧಿಸಿದ್ದಾರೆ.

ಈ ಪ್ರಕರಣದಲ್ಲಿ, ಜಾರ್ಖಂಡ್‌ನ ಜಮ್ಶೆಡ್‌ಪುರ ನಿವಾಸಿ ಅಖ್ತರ್ ಹುಸೇನಿ ಕಿತಾಬುದ್ದೀನ್ ಅಹ್ಮದ್ (60) ಮತ್ತು ಆತನ ಸಹೋದರ ಆದಿಲ್ ಹುಸೇನಿ (59) ಅವರನ್ನು ಬಂಧಿಸಲಾಗಿದೆ. ಇಬ್ಬರೂ ಸೇರಿ "ವೈಜ್ಞಾನಿಕ ಸಹಯೋಗ" ಮತ್ತು "ಸಂಶೋಧನಾ ಪಾಲುದಾರಿಕೆ"ಯ ಹೆಸರಿನಲ್ಲಿ ದೇಶದ ಸೂಕ್ಷ್ಮ ಮಾಹಿತಿಯನ್ನು ಮಾರಾಟ ಮಾಡಲು ಸಂಚು ರೂಪಿಸಿದ್ದರು.

ಲಿಥಿಯಂ-6 ರಿಯಾಕ್ಟರ್ ವಿನ್ಯಾಸ ಮಾರಾಟಕ್ಕೆ ಸಂಚು

ಬಂಧಿತ ಸಹೋದರರು, "ಲಿಥಿಯಂ-6 ಫ್ಯೂಷನ್ ರಿಯಾಕ್ಟರ್"ನ ನಕಲಿ ವಿನ್ಯಾಸವನ್ನು ಇರಾನ್ ಕಂಪನಿಗಳಿಗೆ ಮಾರಾಟ ಮಾಡಲು ಯತ್ನಿಸುತ್ತಿದ್ದರು ಎಂದು ತನಿಖಾ ಮೂಲಗಳು ತಿಳಿಸಿವೆ. ಪೊಲೀಸರ ಕಣ್ತಪ್ಪಿಸಲು ಇವರು ವಿಪಿಎನ್ (VPN) ಮತ್ತು ಎನ್‌ಕ್ರಿಪ್ಟೆಡ್ ನೆಟ್‌ವರ್ಕ್‌ಗಳನ್ನು ಬಳಸುತ್ತಿದ್ದರು. ಈ ಸಂಬಂಧ, ಇಬ್ಬರೂ ಈ ವರ್ಷದ ಮಾರ್ಚ್-ಏಪ್ರಿಲ್ ತಿಂಗಳಿನಲ್ಲಿ ಇರಾನ್‌ನ ರಾಜಧಾನಿ ಟೆಹ್ರಾನ್‌ಗೆ ಭೇಟಿ ನೀಡಿದ್ದರು. ಅಲ್ಲದೆ, ಭಾರತ ಮತ್ತು ದುಬೈನಲ್ಲಿರುವ ಇರಾನ್ ರಾಯಭಾರಿ ಕಚೇರಿಗಳಿಗೂ ಹಲವು ಬಾರಿ ಭೇಟಿ ನೀಡಿದ್ದರು. ಮುಂಬೈನಲ್ಲಿರುವ ಇರಾನ್‌ನ ರಾಜತಾಂತ್ರಿಕರೊಬ್ಬರಿಗೂ ನಕಲಿ ಬಾರ್ಕ್​​ ಗುರುತಿನ ಚೀಟಿ ಮತ್ತು ರಿಯಾಕ್ಟರ್ ನೀಲನಕ್ಷೆಗಳನ್ನು ತೋರಿಸಿ ವಂಚಿಸಿದ್ದಾರೆ ಎಂದು ವರದಿಯಾಗಿದೆ.

ತಜ್ಞರನ್ನೂ ಗೊಂದಲಕ್ಕೀಡು ಮಾಡಿದ ನಕಲಿ ವಿಜ್ಞಾನ

ಇರಾನಿಯನ್ ಕಂಪನಿಗಳ ಮುಂದೆ, "ನಾವು ಲಿಥಿಯಂ-6 ಆಧಾರಿತ ಫ್ಯೂಷನ್ ರಿಯಾಕ್ಟರ್ ಮೂಲಮಾದರಿಯನ್ನು ಅಭಿವೃದ್ಧಿಪಡಿಸಿದ್ದು, ಇದು ಪ್ಲಾಸ್ಮಾ ತಾಪಮಾನವನ್ನು ನಿಯಂತ್ರಿಸಬಲ್ಲದು," ಎಂದು ಆರೋಪಿಗಳು ಹೇಳಿಕೊಂಡಿದ್ದರು. ಆದರೆ, ತನಿಖೆಗೆ ಸಹಾಯ ಮಾಡಿದ ನಿಜವಾದ ವಿಜ್ಞಾನಿಗಳು, "ಆರೋಪಿಗಳು ಉಲ್ಲೇಖಿಸಿದ ಮೂಲಮಾದರಿಯು ಕೇವಲ ಒಂದು ಸೈದ್ಧಾಂತಿಕ ಪರಿಕಲ್ಪನೆಯಾಗಿದ್ದು, ಅದು ಕಾರ್ಯನಿರ್ವಹಿಸುತ್ತದೆ ಎಂಬುದಕ್ಕೆ ಯಾವುದೇ ವೈಜ್ಞಾನಿಕ ಪುರಾವೆಗಳಿಲ್ಲ," ಎಂದು ಸ್ಪಷ್ಟಪಡಿಸಿದ್ದಾರೆ. ತನಿಖಾಧಿಕಾರಿಗಳನ್ನು ಗೊಂದಲಕ್ಕೀಡು ಮಾಡಲು ಆರೋಪಿಗಳು ನ್ಯೂಕ್ಲಿಯರ್ ರಿಯಾಕ್ಟರ್ ಭೌತಶಾಸ್ತ್ರ, ಐಸೊಟೋಪ್ ರಸಾಯನಶಾಸ್ತ್ರದಂತಹ ಸಂಕೀರ್ಣ ವೈಜ್ಞಾನಿಕ ಪದಗಳನ್ನು ಬಳಸುತ್ತಿದ್ದರು.

ಬಂಧನ ಮತ್ತು ವಶಪಡಿಸಿಕೊಂಡ ವಸ್ತುಗಳು

ಮುಂಬೈ ಪೊಲೀಸರು ಅಖ್ತರ್‌ನನ್ನು ಬಂಧಿಸಿದರೆ, ಆತನ ಸಹೋದರ ಆದಿಲ್‌ನನ್ನು ದೆಹಲಿ ಪೊಲೀಸರು ಬಂಧಿಸಿದ್ದಾರೆ. ಅಖ್ತರ್‌ನಿಂದ ಪರಮಾಣು ಶಸ್ತ್ರಾಸ್ತ್ರಗಳಿಗೆ ಸಂಬಂಧಿಸಿದ 10ಕ್ಕೂ ಹೆಚ್ಚು ನಕ್ಷೆಗಳು, ಡೇಟಾ, ಮತ್ತು ನಕಲಿ ಗುರುತಿನ ಚೀಟಿ ಸೇರಿದಂತೆ, ಪಾಸ್‌ಪೋರ್ಟ್, ಆಧಾರ್, ಪ್ಯಾನ್ ಕಾರ್ಡ್‌ಗಳಂತಹ ಹಲವು ನಕಲಿ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಒಂದು ಐಡಿಯಲ್ಲಿ ಆತನ ಹೆಸರು 'ಅಲಿ ರಝಾ ಹುಸೇನ್' ಎಂದಿದ್ದರೆ, ಇನ್ನೊಂದರಲ್ಲಿ 'ಅಲೆಕ್ಸಾಂಡರ್ ಪಾಮರ್' ಎಂದಿತ್ತು.

1995ರಿಂದಲೇ ಈ ಸಹೋದರರು ವಿದೇಶಿ ನಿಧಿಗಳನ್ನು ಪಡೆಯುತ್ತಿದ್ದು, 2000ನೇ ಇಸವಿಯ ನಂತರ ಅದು ಕೋಟಿಗಟ್ಟಲೆಗೆ ಏರಿಕೆಯಾಗಿತ್ತು. BARC ಮತ್ತು ಇತರ ಪರಮಾಣು ಸೌಲಭ್ಯಗಳಿಗೆ ಸಂಬಂಧಿಸಿದ ಗೌಪ್ಯ ನೀಲನಕ್ಷೆಗಳನ್ನು ನೀಡಿದ್ದಕ್ಕಾಗಿ ಈ ಹಣವನ್ನು ಪಡೆದಿರಬಹುದು ಎಂದು ಶಂಕಿಸಲಾಗಿದೆ.