Israel Iran War| ಅಣ್ವಸ್ತ್ರ ಒಪ್ಪಂದಕ್ಕೆ ವಿದಾಯ? ಅಮೆರಿಕ-ಇಸ್ರೇಲ್‌ಗೆ ತಿರುಗೇಟು ನೀಡಲು ಇರಾನ್‌ ಸಜ್ಜು?

ಇರಾನ್ ಮತ್ತು ಅಮೆರಿಕ-ಇಸ್ರೇಲ್ ನಡುವಿನ ಸಂಘರ್ಷ ತೀವ್ರಗೊಂಡಿರುವ ಈ ಸಂದರ್ಭದಲ್ಲಿ, ಇರಾನ್ ಅಂತರಾಷ್ಟ್ರೀಯ ಅಣ್ವಸ್ತ್ರ ಪ್ರಸರಣ ರಹಿತ ಒಪ್ಪಂದದಿಂದ (NPT) ಹೊರಬರಲು ಸಿದ್ಧತೆ ನಡೆಸುತ್ತಿದೆ ಎಂದು ಇಂಡಿಯಾ ಟುಡೇ ವರದಿ ಮಾಡಿದೆ. ಅಂತರಾಷ್ಟ್ರೀಯ ಮಟ್ಟದಲ್ಲಿ ನಡೆಯುತ್ತಿರುವ ಹಿಂಸಾಚಾರ ಮತ್ತು ಇರಾನ್ ವಿರೋಧಿ ನೀತಿಗಳೇ ಈ ನಿರ್ಧಾರಕ್ಕೆ ಕಾರಣ ಎಂದು ಇರಾನ್ ವಿದೇಶಾಂಗ ಸಚಿವಾಲಯ ತಿಳಿಸಿದೆ. ಇರಾನ್ ವಿದೇಶಾಂಗ ಸಚಿವಾಲಯದ ಈ ನಡೆ ಜಾಗತಿಕ ರಾಜಕೀಯದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.

ಅಮೆರಿಕ ಮತ್ತು ಇಸ್ರೇಲ್ ದಾಳಿ

ಕಳೆದ ಕೆಲವು ತಿಂಗಳುಗಳಿಂದ ಇರಾನ್ ಮತ್ತು ಅಮೆರಿಕ-ಇಸ್ರೇಲ್ ನಡುವೆ ಉದ್ವಿಗ್ನತೆ ತಾರಕಕ್ಕೇರಿದೆ. ಕಳೆದ ಜೂನ್‌ನಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್‌ನ ಮೂರು ಅತೀ ಪ್ರಮುಖ ಅಣ್ವಸ್ತ್ರ ಕೇಂದ್ರಗಳಾದ ಫೋರ್ಡೋ ಯುರೇನಿಯಂ ಪುಷ್ಟೀಕರಣ ಘಟಕ, ನಟಾಂಜ್ ಪರಮಾಣು ಕೇಂದ್ರ ಹಾಗೂ ಇಸ್ಫಹಾನ್ ಪರಮಾಣು ತಂತ್ರಜ್ಞಾನ ಕೇಂದ್ರಗಳ ಮೇಲೆ ಭೀಕರ ವಾಯುದಾಳಿ ನಡೆಸಿದ್ದವು. ಈ ದಾಳಿಗಳು ಈ ಪ್ರದೇಶದಲ್ಲಿ ಭಾರೀ ಸಂಚಲನ ಮೂಡಿಸಿವೆ.

ಈ ದಾಳಿಗಳ ಬೆನ್ನಲ್ಲೇ, ಸಂಘರ್ಷದ ಸಮಯದಲ್ಲಿ ಇರಾನ್ ಬಳಿ ಇರುವ ಯುರೇನಿಯಂ ಅನ್ನು ವಶಪಡಿಸಿಕೊಳ್ಳಲು ಅಮೆರಿಕ ರಹಸ್ಯ ಯೋಜನೆ ರೂಪಿಸಿದೆ ಎಂಬ ವರದಿಗಳು ಇರಾನ್‌ನ ಆಕ್ರೋಶಕ್ಕೆ ಕಾರಣವಾಗಿವೆ.

ಇರಾನ್ ವಿದೇಶಾಂಗ ಸಚಿವಾಲಯದ ಖಡಕ್ ಪ್ರಶ್ನೆ

ಸೋಮವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಇರಾನ್ ವಿದೇಶಾಂಗ ಸಚಿವಾಲಯದ ವಕ್ತಾರ ಇಸ್ಮಾಯಿಲ್ ಬಘಾಯಿ, ಅಂತರಾಷ್ಟ್ರೀಯ ಒಪ್ಪಂದಗಳ ಅಗತ್ಯತೆಯನ್ನೇ ಪ್ರಶ್ನಿಸಿದ್ದಾರೆ. "ಅಂತರಾಷ್ಟ್ರೀಯ ಮಟ್ಟದಲ್ಲಿ ದಬ್ಬಾಳಿಕೆ ನಡೆಸುವ ಶಕ್ತಿಗಳು ನಮಗೆ ಒಪ್ಪಂದದ ಹಕ್ಕುಗಳನ್ನು ನೀಡದಿದ್ದ ಮೇಲೆ ಮತ್ತು ನಮ್ಮ ಅಣ್ವಸ್ತ್ರ ಕೇಂದ್ರಗಳ ಮೇಲೆ ದಾಳಿ ನಡೆಸುತ್ತಿರುವಾಗ, ಇಂತಹ ಒಪ್ಪಂದದಲ್ಲಿ ಮುಂದುವರಿಯುವುದರಿಂದ ನಮಗೇನು ಲಾಭ?" ಎಂದು ಅವರು ಕೇಳಿದ್ದಾರೆ. ಆದಾಗ್ಯೂ, ಇರಾನ್ ಎಂದಿಗೂ ಅಣ್ವಸ್ತ್ರಗಳನ್ನು ತಯಾರಿಸುವ ಗುರಿ ಹೊಂದಿಲ್ಲ ಮತ್ತು ಮುಂದೆಯೂ ಆ ಕೆಲಸ ಮಾಡುವುದಿಲ್ಲ ಎಂದು ಅವರು ಪುನರುಚ್ಚರಿಸಿದ್ದಾರೆ.

ಒಪ್ಪಂದದಿಂದ ಹೊರಬಂದರೆ ಏನಾಗಲಿದೆ?

NPT ಎನ್ನುವುದು ದೇಶಗಳು ಅಣ್ವಸ್ತ್ರಗಳನ್ನು ಅಭಿವೃದ್ಧಿಪಡಿಸದಂತೆ ತಡೆಯುವ ಮತ್ತು ಅಂತರಾಷ್ಟ್ರೀಯ ಪರಮಾಣು ಶಕ್ತಿ ಸಂಸ್ಥೆಗೆ (IAEA) ತಪಾಸಣೆ ನಡೆಸಲು ಅವಕಾಶ ನೀಡುವ ಒಂದು ಅಂತರಾಷ್ಟ್ರೀಯ ಕಾನೂನು. ಇರಾನ್ ಇದರಿಂದ ಹೊರಬಂದರೆ ಏನಾಗಲಿದೆ?

• ತಪಾಸಣೆಗೆ ಬ್ರೇಕ್: ಇರಾನ್ ತನ್ನ ಅಣ್ವಸ್ತ್ರ ಕೇಂದ್ರಗಳಿಗೆ ಅಂತರಾಷ್ಟ್ರೀಯ ಪ್ರತಿನಿಧಿಗಳು ಭೇಟಿ ನೀಡುವುದನ್ನು ತಡೆಯಬಹುದು.

• ನಿಯಮಗಳ ಬಂಧನವಿಲ್ಲ: ಅಣ್ವಸ್ತ್ರ ಅಭಿವೃದ್ಧಿ ಅಥವಾ ಯುರೇನಿಯಂ ಪುಷ್ಟೀಕರಣದ ಮೇಲೆ ಯಾವುದೇ ಅಂತರಾಷ್ಟ್ರೀಯ ನಿಯಂತ್ರಣ ಇರುವುದಿಲ್ಲ.

• ಸಾರ್ವಭೌಮತ್ವದ ರಕ್ಷಣೆ: ತನ್ನ ಪರಮಾಣು ಯೋಜನೆಯನ್ನು ಸಂಪೂರ್ಣವಾಗಿ ಗುಪ್ತವಾಗಿರಿಸಲು ಇರಾನ್‌ಗೆ ಅವಕಾಶ ಸಿಗುತ್ತದೆ.

ಯುರೇನಿಯಂ ಸ್ಥಳಾಂತರದ ವರದಿ

12 ದಿನಗಳ ಕಾಲ ನಡೆದ ಯುದ್ಧದ ಸಂದರ್ಭದಲ್ಲಿ ಇರಾನ್ ತನ್ನ ಕೇಂದ್ರಗಳಿಂದ ಸುಮಾರು 400 ಕಿಲೋಗ್ರಾಂಗಳಷ್ಟು ಭಾಗಶಃ ಪುಷ್ಟೀಕರಿಸಿದ ಯುರೇನಿಯಂ ಅನ್ನು ಸುರಕ್ಷಿತವಾಗಿ ಬೇರೆಡೆಗೆ ಸ್ಥಳಾಂತರಿಸಿದೆ ಎಂದು ವರದಿಯಾಗಿದೆ. ಅಮೆರಿಕ ಮತ್ತು ಇಸ್ರೇಲ್ ಇರಾನ್ ಮೇಲೆ ಅಣ್ವಸ್ತ್ರ ತಯಾರಿಕೆಯ ಆರೋಪ ಮಾಡುತ್ತಿದ್ದರೂ, ಇರಾನ್ ಇದುವರೆಗೂ ಇದನ್ನು ಸಾಕ್ಷ್ಯ ಸಮೇತ ನಿರಾಕರಿಸುತ್ತಲೇ ಬಂದಿದೆ.