ಭಾರತ-ಸೌದಿ ನಡುವೆ ಹಜ್ ಒಪ್ಪಂದಕ್ಕೆ ಅಂಕಿತ: 1.75 ಲಕ್ಷ ಭಾರತೀಯರಿಗೆ ಅವಕಾಶ
ಭಾರತದಿಂದ 1,75,025 ಮುಸ್ಲಿಂ ಯಾತ್ರಿಕರು ವಾರ್ಷಿಕ ಹಜ್ ಯಾತ್ರೆಯನ್ನು ಕೈಗೊಳ್ಳಲು ಸೌದಿ ಸರ್ಕಾರ ಅನುಮತಿ ನೀಡಿದೆ ಎಂದು ಜೆಡ್ಡಾದಲ್ಲಿರುವ ಭಾರತೀಯ ಕಾನ್ಸುಲೇಟ್ ಜನರಲ್ ಕಚೇರಿ ತಿಳಿಸಿದೆ.
ಭಾರತ ಮತ್ತು ಸೌದಿ ಅರೇಬಿಯಾ ಸಾಮ್ರಾಜ್ಯದ ನಡುವಿನ ರಾಜತಾಂತ್ರಿಕ ಹಾಗೂ ಧಾರ್ಮಿಕ ಬಾಂಧವ್ಯ ಮತ್ತಷ್ಟು ಗಟ್ಟಿಗೊಂಡಿದ್ದು, 2027ನೇ ಸಾಲಿನ ಪವಿತ್ರ ಹಜ್ ಯಾತ್ರೆಗೆ ಸಂಬಂಧಿಸಿದಂತೆ ಉಭಯ ದೇಶಗಳ ನಡುವೆ ಮಹತ್ವದ ದ್ವಿಪಕ್ಷೀಯ ಒಪ್ಪಂದ ಅಧಿಕೃತವಾಗಿ ಅಂಕಿತಗೊಂಡಿದೆ. ಈ ಐತಿಹಾಸಿಕ ಒಪ್ಪಂದದ ಅನ್ವಯ ಭಾರತದಿಂದ ಒಟ್ಟು 1,75,025 ಮುಸ್ಲಿಂ ಯಾತ್ರಿಕರು ವಾರ್ಷಿಕ ಹಜ್ ಯಾತ್ರೆಯನ್ನು ಕೈಗೊಳ್ಳಲು ಸೌದಿ ಸರ್ಕಾರ ಅಧಿಕೃತ ಅನುಮತಿ ನೀಡಿದೆ ಎಂದು ಜೆಡ್ಡಾದಲ್ಲಿರುವ ಭಾರತೀಯ ಕಾನ್ಸುಲೇಟ್ ಜನರಲ್ ಕಚೇರಿ ತಿಳಿಸಿದೆ.
ಸೌದಿ ಅರೇಬಿಯಾಕ್ಕೆ ನಾಲ್ಕು ದಿನಗಳ ಅಧಿಕೃತ ಪ್ರವಾಸ ಕೈಗೊಂಡಿರುವ ಕೇಂದ್ರ ಸರ್ಕಾರದ ಕೇಂದ್ರ ಅಲ್ಪಸಂಖ್ಯಾತ ವ್ಯವಹಾರಗಳು ಹಾಗೂ ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಅವರು, ಜೆಡ್ಡಾದಲ್ಲಿ ಸೌದಿ ಅರೇಬಿಯಾದ ಹಜ್ ಮತ್ತು ಉಮ್ರಾ ಸಚಿವ ಡಾ. ತೌಫಿಕ್ ಬಿನ್ ಫೌಜಾನ್ ಅಲ್-ರಬಿಯಾ ಅವರೊಂದಿಗೆ ಉನ್ನತ ಮಟ್ಟದ ದ್ವಿಪಕ್ಷೀಯ ಸಭೆ ನಡೆಸಿದ ಬಳಿಕ ಈ ಒಪ್ಪಂದಕ್ಕೆ ಸಹಿ ಹಾಕಿದರು. ಒಪ್ಪಂದಕ್ಕೆ ಸಹಿ ಹಾಕಿದ ನಂತರ ಭಾರತೀಯ ಕಾನ್ಸುಲೇಟ್ ಬಿಡುಗಡೆ ಮಾಡಿದ ಅಧಿಕೃತ ಪ್ರಕಟಣೆಯ ಪ್ರಕಾರ, ಉಭಯ ಸಚಿವರು ಹಜ್-2027ರ ಸಿದ್ಧತೆಗಳ ಕುರಿತು ವಿಸ್ತೃತ ಪರಾಮರ್ಶೆ ನಡೆಸಿದರು. ಭಾರತೀಯ ಯಾತ್ರಾರ್ಥಿಗಳಿಗೆ ಯಾವುದೇ ರೀತಿಯ ಅನನುಕೂಲವಾಗದಂತೆ ಸಾರಿಗೆ ಮತ್ತು ವಸತಿ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುವುದು, ಯಾತ್ರೆಯ ಅವಧಿಯಲ್ಲಿ ಸುರಕ್ಷತೆ, ವೈದ್ಯಕೀಯ ನೆರವು ಮತ್ತು ತಾಂತ್ರಿಕ ಸೌಲಭ್ಯಗಳನ್ನು ಒದಗಿಸುವುದು, ಸುಗಮ ಹಾಗೂ ಆರಾಮದಾಯಕ ಯಾತ್ರೆಯ ವಾತಾವರಣವನ್ನು ನಿರ್ಮಿಸುವ ನಿಟ್ಟಿನಲ್ಲಿ ಎರಡೂ ದೇಶಗಳ ನಡುವಿನ ಸಮನ್ವಯತೆಯನ್ನು ವೃದ್ಧಿಸುವ ಕುರಿತು ಸಭೆಯಲ್ಲಿ ಮಹತ್ವದ ಚರ್ಚೆಗಳು ನಡೆದವು. ಯಾತ್ರಾರ್ಥಿಗಳ ಕಲ್ಯಾಣಕ್ಕಾಗಿ ಸೌದಿ ನಾಯಕತ್ವವು ನಿರಂತರವಾಗಿ ಕೈಗೊಳ್ಳುತ್ತಿರುವ ಸುಧಾರಣಾ ಕ್ರಮಗಳನ್ನು ಸಚಿವ ಕಿರಣ್ ರಿಜಿಜು ಅವರು ಶ್ಲಾಘಿಸಿದರು.
ಭಾರತದ ಹಜ್ ಕೋಟಾ: ಒಂದು ದಶಕದ ಅಂಕಿ-ಅಂಶಗಳ ಅವಲೋಕನ
ಕೇಂದ್ರ ಅಲ್ಪಸಂಖ್ಯಾತ ವ್ಯವಹಾರಗಳ ಸಚಿವಾಲಯದ ಅಂಕಿ-ಅಂಶಗಳ ಪ್ರಕಾರ, ಕಳೆದ ಒಂದು ದಶಕದಲ್ಲಿ ಭಾರತಕ್ಕೆ ನಿಗದಿಪಡಿಸಲಾದ ಹಜ್ ಕೋಟಾದಲ್ಲಿ ಗಣನೀಯ ಏರಿಕೆ ಕಂಡುಬಂದಿದೆ. 2014 ರಲ್ಲಿ ಭಾರತಕ್ಕೆ ಲಭ್ಯವಿದ್ದ ಒಟ್ಟು ಕೋಟಾ ಕೇವಲ 1,36,020. 2025 ರಲ್ಲಿ ಈ ಸಂಖ್ಯೆಯನ್ನು ದಾಖಲೆಯ 1,75,025 ಕ್ಕೆ ಹೆಚ್ಚಿಸಲಾಯಿತು. 2026 ಮತ್ತು 2027ರಲ್ಲಿ ಪ್ರಸ್ತುತ ಹಾಗೂ ಮುಂದಿನ ವರ್ಷಗಳಿಗೂ ಇದೇ 1,75,025ರ ಗರಿಷ್ಠ ಕೋಟಾವನ್ನು ಸೌದಿ ಸರ್ಕಾರ ಯಥಾವತ್ತಾಗಿ ಮುಂದುವರಿಸಿದೆ. ಜನಸಂಖ್ಯೆಯ ಆಧಾರದ ಮೇಲೆ ಭಾರತಕ್ಕೆ ಲಭ್ಯವಾಗಿರುವ ಈ ಬೃಹತ್ ಕೋಟಾವು, ಭಾರತೀಯ ಮುಸ್ಲಿಮರಿಗೆ ಪವಿತ್ರ ಕರ್ತವ್ಯವನ್ನು ಪೂರೈಸಲು ಸೌದಿ ಅರೇಬಿಯಾ ನೀಡುತ್ತಿರುವ ವಿಶೇಷ ಮನ್ನಣೆಯನ್ನು ಬಿಂಬಿಸುತ್ತದೆ.
ಕೋಟಾ ವ್ಯವಸ್ಥೆ ಏಕೆ ಅನಿವಾರ್ಯ?
ಇಸ್ಲಾಂ ಧರ್ಮದ ಪಂಚ ಸ್ತಂಭಗಳಲ್ಲಿ (ಅರ್ಕಾನ್-ಎ-ಇಸ್ಲಾಂ) ಹಜ್ ಯಾತ್ರೆಯು ಐದನೆಯ ಮತ್ತು ಅತ್ಯಂತ ಪವಿತ್ರವಾದ ಆಚರಣೆಯಾಗಿದೆ. ದೈಹಿಕವಾಗಿ ಸದೃಢರಾಗಿರುವ ಹಾಗೂ ಆರ್ಥಿಕವಾಗಿ ಶಕ್ತರಾಗಿರುವ ಪ್ರತಿಯೊಬ್ಬ ವಯಸ್ಕ ಮುಸ್ಲಿಮರು ತಮ್ಮ ಜೀವಿತಾವಧಿಯಲ್ಲಿ ಒಮ್ಮೆಯಾದರೂ ಮೆಕ್ಕಾ ನಗರಕ್ಕೆ ತೆರಳಿ ಹಜ್ ಯಾತ್ರೆ ಕೈಗೊಳ್ಳುವುದು ಧಾರ್ಮಿಕ ನಿಯಮವಾಗಿದೆ. ಇಸ್ಲಾಮಿಕ್ ಕ್ಯಾಲೆಂಡರ್‌ನ ಕೊನೆಯ ತಿಂಗಳಾದ ‘ದುಲ್-ಹಿಜ್ಜಾ’ ಮಾಸದಲ್ಲಿ ಮೆಕ್ಕಾ, ಮಿನಾ, ಅರಾಫತ್ ಮತ್ತು ಮುಜ್ದಲಿಫಾ ಮುಂತಾದ ಪವಿತ್ರ ಸ್ಥಳಗಳಲ್ಲಿ 5 ರಿಂದ 6 ದಿನಗಳ ಕಾಲ ಕಠಿಣ ನಿಯಮಗಳೊಂದಿಗೆ ಈ ಧಾರ್ಮಿಕ ವಿಧಿವಿಧಾನಗಳು ನೆರವೇರುತ್ತವೆ. ಪ್ರಪಂಚದ ನಾನಾ ಭಾಗಗಳಿಂದ ಕೋಟ್ಯಂತರ ಜನರು ಏಕಕಾಲದಲ್ಲಿ ಮೆಕ್ಕಾಗೆ ಆಗಮಿಸುವುದರಿಂದ, ಪವಿತ್ರ ಸ್ಥಳಗಳಲ್ಲಿ ಸ್ಥಳಾವಕಾಶ ಹಾಗೂ ಮೂಲಸೌಕರ್ಯಗಳ ಮಿತಿ ಇರುತ್ತದೆ. ಕಾಲ್ತುಳಿತ, ಆರೋಗ್ಯ ತುರ್ತುಸ್ಥಿತಿ ಹಾಗೂ ಜನದಟ್ಟಣೆಯನ್ನು ನಿಯಂತ್ರಿಸುವ ಉದ್ದೇಶದಿಂದ ಸೌದಿ ಅರೇಬಿಯಾ ಸರ್ಕಾರವು ಜಾಗತಿಕ ಮಟ್ಟದಲ್ಲಿ ‘ಕೋಟಾ ವ್ಯವಸ್ಥೆ’ಯನ್ನು ಜಾರಿಗೆ ತಂದಿದೆ. ಪ್ರತಿ ದೇಶದಲ್ಲಿರುವ ಒಟ್ಟು ಮುಸ್ಲಿಂ ಜನಸಂಖ್ಯೆಯನ್ನು ಮಾನದಂಡವಾಗಿಟ್ಟುಕೊಂಡು, ಆಯಾ ದೇಶಗಳ ಸರ್ಕಾರಗಳ ಜೊತೆ ಸಮಾಲೋಚನೆ ನಡೆಸಿ ವಾರ್ಷಿಕ ಕೋಟಾವನ್ನು ನಿಗದಿಪಡಿಸಲಾಗುತ್ತದೆ.
ಜೆಡ್ಡಾದಲ್ಲಿ ಸಚಿವ ಕಿರಣ್ ರಿಜಿಜು ಬಿಡುವಿಲ್ಲದ ರಾಜತಾಂತ್ರಿಕ ಭೇಟಿ
ಕೇಂದ್ರ ಸಚಿವ ಕಿರಣ್ ರಿಜಿಜು ಅವರು ಜಂಟಿ ಕಾರ್ಯದರ್ಶಿ (ಹಜ್) ಮೊಹಮ್ಮದ್ ಅಫ್ಜಲ್ ಅವರನ್ನೊಳಗೊಂಡ ಉನ್ನತ ನಿಯೋಗದೊಂದಿಗೆ ನವೆಂಬರ್ 6 ರಿಂದ 9 ರವರೆಗೆ ಸೌದಿ ಅರೇಬಿಯಾದಲ್ಲಿ ಅಧಿಕೃತ ಪ್ರವಾಸ ಕೈಗೊಂಡಿದ್ದರು. ಈ ಭೇಟಿಯ ವೇಳೆ ಹಲವು ಮಹತ್ವದ ಕಾರ್ಯಕ್ರಮಗಳಲ್ಲಿ ಅವರು ಭಾಗವಹಿಸಿದರು. ಜೆಡ್ಡಾದಲ್ಲಿ ಆಯೋಜಿಸಲಾಗಿದ್ದ ಪ್ರತಿಷ್ಠಿತ 6ನೇ ಹಜ್ ಸಮ್ಮೇಳನ ಮತ್ತು ವಸ್ತುಪ್ರದರ್ಶನದ ಉದ್ಘಾಟನಾ ಸಮಾರಂಭದಲ್ಲಿ ರಿಜಿಜು ಪಾಲ್ಗೊಂಡರು. ಸೌದಿ ಸಚಿವ ಅಲ್-ರಬಿಯಾ ಅವರ ಅಧ್ಯಕ್ಷತೆಯಲ್ಲಿ ನಡೆದ ಸಚಿವರ ಮಟ್ಟದ ಜಾಗತಿಕ ಸಮ್ಮೇಳನದಲ್ಲಿ ಭಾರತವನ್ನು ಪ್ರತಿನಿಧಿಸಿ ಮಾತನಾಡಿದ ಅವರು, ಯಾತ್ರಿಕರ ನಿರ್ವಹಣೆಯಲ್ಲಿ ತಂತ್ರಜ್ಞಾನದ ಬಳಕೆ ಹಾಗೂ ಡಿಜಿಟಲ್ ಉಪಕ್ರಮಗಳ ಮಹತ್ವವನ್ನು ಪ್ರತಿಪಾದಿಸಿದರು. ಮೆಕ್ಕಾ ಪ್ರಾಂತದ ಉಪ ರಾಜ್ಯಪಾಲರಾದ ರಾಜಕುಮಾರ ಸೌದ್ ಬಿನ್ ಮಿಶಾಲ್ ಬಿನ್ ಅಬ್ದುಲ್ ಅಜೀಜ್ ಅಲ್ ಸೌದ್ ಅವರೊಂದಿಗೆ ಭಾರತೀಯ ನಿಯೋಗವು ಸೌಹಾರ್ದಯುತ ಮಾತುಕತೆ ನಡೆಸಿತು. ಈ ವೇಳೆ ಭಾರತೀಯ ಯಾತ್ರಿಕರಿಗೆ ಸೌದಿ ಆಡಳಿತ ನೀಡುತ್ತಿರುವ ಬೆಂಬಲಕ್ಕೆ ಧನ್ಯವಾದ ಅರ್ಪಿಸಲಾಯಿತು.
ತಯಾರಿ ಪರಿಶೀಲನಾ ಸಭೆ
ಹಜ್-2027ರ ಸಿದ್ಧತೆಗಳನ್ನು ಪರಿಶೀಲಿಸಲು ಸಚಿವರು ಜೆಡ್ಡಾದ ಭಾರತೀಯ ಕಾನ್ಸುಲೇಟ್ ಅಧಿಕಾರಿಗಳು, ಕೇಂದ್ರ ಅಲ್ಪಸಂಖ್ಯಾತ ಸಚಿವಾಲಯ ಹಾಗೂ ಭಾರತೀಯ ಹಜ್ ಸಮಿತಿಯ ಉನ್ನತ ಅಧಿಕಾರಿಗಳೊಂದಿಗೆ ಮಹತ್ವದ ಪರಾಮರ್ಶನಾ ಸಭೆ ನಡೆಸಿದರು. ಅರ್ಜಿ ಸಲ್ಲಿಕೆ, ಡಿಜಿಟಲ್ ಡ್ರಾ (ಕುರ್ಆ), ವಿಮಾನಯಾನ, ವೀಸಾ ಪ್ರಕ್ರಿಯೆ ಮತ್ತು ಮೆಕ್ಕಾ-ಮದೀನಾದಲ್ಲಿ ಯಾತ್ರಿಕರಿಗೆ ನೀಡಲಾಗುವ ವಸತಿ ಸೌಕರ್ಯಗಳ ಕುರಿತು ಅಧಿಕಾರಿಗಳಿಗೆ ಅಗತ್ಯ ಮಾರ್ಗದರ್ಶನ ನೀಡಿದರು. ತಮ್ಮ ರಾಜತಾಂತ್ರಿಕ ಭೇಟಿಯ ನಡುವೆಯೇ ಸಚಿವ ಕಿರಣ್ ರಿಜಿಜು ಅವರು ಭಾರತೀಯ ಸಮುದಾಯದೊಂದಿಗೂ ಬೆರೆತರು. ಜೆಡ್ಡಾದಲ್ಲಿರುವ ‘ಇಂಡಿಯಾ ಹೌಸ್’ನಲ್ಲಿ ಆಯೋಜಿಸಲಾಗಿದ್ದ ‘ನೂರ್-ಎ-ದೀಪಾವಳಿ’ ಸಾಂಸ್ಕೃತಿಕ ಉತ್ಸವದಲ್ಲಿ ಅವರು ಮುಖ್ಯ ಅತಿಥಿಯಾಗಿ ಪಾಲ್ಗೊಂಡಿದ್ದರು. ಪಶ್ಚಿಮ ಸೌದಿ ಅರೇಬಿಯಾದಲ್ಲಿ ನೆಲೆಸಿರುವ ಭಾರತೀಯ ಅನಿವಾಸಿ ಸಮುದಾಯದ ಮುಖಂಡರು, ಸೌದಿ ಗಣ್ಯರು ಹಾಗೂ ಸ್ನೇಹಿತರೊಂದಿಗೆ ದೀಪಾವಳಿ ಆಚರಿಸಿದ ರಿಜಿಜು, "ಭಾರತದ ಸಾಂಸ್ಕೃತಿಕ ಶ್ರೀಮಂತಿಕೆ ಮತ್ತು ಸೌಹಾರ್ದತೆಯು ವಿದೇಶಿ ನೆಲದಲ್ಲೂ ಭಾರತೀಯರನ್ನು ಒಗ್ಗೂಡಿಸಿದೆ. ಭಾರತ-ಸೌದಿ ಸ್ನೇಹಕ್ಕೆ ಇಲ್ಲಿರುವ ನಮ್ಮ ಅನಿವಾಸಿ ಭಾರತೀಯರೇ ಪ್ರಮುಖ ಸೇತುವೆ" ಎಂದು ಶ್ಲಾಘಿಸಿದರು.
