ಜೆನ್ಸನ್ ಹುವಾಂಗ್‌ಗೆ ಎಲಾನ್ ಮಸ್ಕ್ ಬೆಂಬಲ; NVIDIA ಸಿಇಒಗೆ ಕೆಲಸ ನೀಡಲು ಸಿದ್ಧ ಎಂದ ಟೆಸ್ಲಾ ಮಾಲೀಕ

ಎನ್‌ವಿಡಿಯಾ (NVIDIA) ಸಿಇಒ ಜೆನ್ಸನ್ ಹುವಾಂಗ್ ಅವರ ಸುತ್ತ ವಿವಾದಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಿವೆ. ಚೀನಾ ಗೂಢಚಾರಿಣಿ ಎನ್ನಲಾದ ಆಲಿಸ್ ಹುವಾಂಗ್ ಜೊತೆಗಿನ ವಿವಾಹೇತರ ಸಂಬಂಧವನ್ನು ಒಪ್ಪಿಕೊಂಡ ಬೆನ್ನಲ್ಲೇ, ಕಂಪನಿಯ ಮತ್ತೊಬ್ಬ ಹಿರಿಯ ಅಧಿಕಾರಿಯೊಂದಿಗೂ ಸಂಬಂಧ ಹೊಂದಿದ್ದರು ಎಂಬ ವರದಿ ಹೊರಬಿದ್ದಿದೆ. ಈ ಬೆಳವಣಿಗೆಗಳ ನಡುವೆ ಎನ್‌ವಿಡಿಯಾ ಆಡಳಿತ ಮಂಡಳಿ ಅವರನ್ನು ಸಿಇಒ ಸ್ಥಾನದಿಂದ ಕೆಳಗಿಳಿಸುವ ಬಗ್ಗೆ ಚಿಂತನೆ ನಡೆಸುತ್ತಿದೆ ಎನ್ನಲಾಗಿದೆ. ಇಂತಹ ಸಂಕಷ್ಟದ ಸಮಯದಲ್ಲಿ ಉದ್ಯಮಿ ಎಲಾನ್ ಮಸ್ಕ್ ಅವರು ಜೆನ್ಸನ್ ಹುವಾಂಗ್ ಬೆಂಬಲಕ್ಕೆ ನಿಂತಿದ್ದಾರೆ.

ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಬಳಕೆದಾರರೊಬ್ಬರು, ಎನ್‌ವಿಡಿಯಾದಲ್ಲಿ ಹುದ್ದೆ ಕಳೆದುಕೊಳ್ಳುವ ಸಾಧ್ಯತೆ ಎದುರಿಸುತ್ತಿರುವ ಜೆನ್ಸನ್ ಹುವಾಂಗ್ ಅವರನ್ನು ಎಲಾನ್ ಮಸ್ಕ್ ತಮ್ಮ ಕಂಪನಿಗೆ ನೇಮಿಸಿಕೊಳ್ಳಬೇಕು ಎಂದು ಸಲಹೆ ನೀಡಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ ಮಸ್ಕ್, “ಅದು ನನಗೆ ಗೌರವದ ವಿಷಯವಾಗಿರುತ್ತದೆ” ಎಂದು ಹೇಳಿದ್ದಾರೆ. ಈ ಪ್ರತಿಕ್ರಿಯೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದಿದೆ.

ಈ ಹಿಂದೆಯೂ ಹುವಾಂಗ್ ಪರ ನಿಂತಿದ್ದ ಮಸ್ಕ್

ಜೆನ್ಸನ್ ಹುವಾಂಗ್ ವಿವಾಹೇತರ ಸಂಬಂಧದ ಬಗ್ಗೆ ಎನ್‌ವಿಡಿಯಾ ಉದ್ಯೋಗಿಗಳಿಗೆ ಆಂತರಿಕ ಸಂದೇಶ ಕಳುಹಿಸಿ ತಪ್ಪೊಪ್ಪಿಕೊಂಡಾಗಲೂ ಎಲಾನ್ ಮಸ್ಕ್ ಅವರಿಗೆ ಬೆಂಬಲ ಸೂಚಿಸಿದ್ದರು. ಹುವಾಂಗ್ ಅವರ ನಡೆ ತಪ್ಪಾಗಿದ್ದರೂ ದುರುದ್ದೇಶದಿಂದ ಕೂಡಿರಲಿಲ್ಲ ಎಂಬ ಅಭಿಪ್ರಾಯವಿದ್ದ ಪೋಸ್ಟ್‌ಗೆ ಮಸ್ಕ್ ಸಮ್ಮತಿ ಸೂಚಿಸಿದ್ದರು. ಅಲ್ಲದೆ, ಹುವಾಂಗ್ ಅವರನ್ನು ಅಮೆರಿಕದ ಕೃತಕ ಬುದ್ಧಿಮತ್ತೆ ಕ್ಷೇತ್ರದ ನಾಯಕತ್ವಕ್ಕೆ ಪ್ರಮುಖ ಉದ್ಯಮಿ ಎಂದು ಬಣ್ಣಿಸಲಾಗಿತ್ತು.

ಮಸ್ಕ್ ಮತ್ತು ಹುವಾಂಗ್ ನಡುವೆ ಹಲವು ವರ್ಷಗಳ ವೃತ್ತಿಪರ ನಂಟಿದೆ. 2016ರಲ್ಲಿ ಮಸ್ಕ್ ಓಪನ್‌ಎಐ ಜೊತೆ ಕಾರ್ಯನಿರ್ವಹಿಸುತ್ತಿದ್ದಾಗ, ಎನ್‌ವಿಡಿಯಾದ ಡಿಜಿಎಕ್ಸ್‌-1 (DGX-1) ಕೃತಕ ಬುದ್ಧಿಮತ್ತೆ ಸೂಪರ್‌ಕಂಪ್ಯೂಟರ್ ಖರೀದಿಸಿದ್ದರು. ಮೊದಲ ಘಟಕವನ್ನು ಜೆನ್ಸನ್ ಹುವಾಂಗ್ ಅವರೇ ಸ್ಯಾನ್ ಫ್ರಾನ್ಸಿಸ್ಕೋದ ಓಪನ್‌ಎಐ ಕಚೇರಿಗೆ ಖುದ್ದಾಗಿ ತಲುಪಿಸಿದ್ದರು.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕೂಡ ಈ ಹಿಂದೆ ಹುವಾಂಗ್ ಪರ ಮಾತನಾಡಿದ್ದರು. ಅವರನ್ನು ಗೌರವಾನ್ವಿತ ವ್ಯಕ್ತಿ ಎಂದು ಕರೆದಿದ್ದ ಟ್ರಂಪ್, ಅಮೆರಿಕಕ್ಕಾಗಿ ಅವರು ಅದ್ಭುತ ಕೆಲಸ ಮಾಡಿದ್ದಾರೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದರು.

ಜೆನ್ಸನ್ ಹುವಾಂಗ್‌ಗೆ ಎನ್‌ವಿಡಿಯಾದಿಂದ ಗೇಟ್‌ಪಾಸ್‌?

ಜೆನ್ಸನ್ ಹುವಾಂಗ್ ಅವರ ಸಂಕಷ್ಟಕ್ಕೆ ಮತ್ತೊಂದು ಕಾರಣವಾಗಿರುವುದು ಎನ್‌ವಿಡಿಯಾದ ಆರೋಗ್ಯ ವಿಭಾಗದ ಉಪಾಧ್ಯಕ್ಷೆ ಕಿಂಬರ್ಲಿ ಪೊವೆಲ್ ಅವರೊಂದಿಗಿನ ಸಂಬಂಧದ ಆರೋಪ. ನ್ಯೂಯಾರ್ಕ್ ಟೈಮ್ಸ್ ವರದಿಯ ಪ್ರಕಾರ, ಈ ವರ್ಷದ ಮಾರ್ಚ್‌ನಲ್ಲಿ ಸ್ಯಾನ್ ಜೋಸ್‌ನ ಹೋಟೆಲ್‌ನಲ್ಲಿ ನಡೆದ ಸಮಾವೇಶದ ಸಂದರ್ಭದಲ್ಲಿ ಇಬ್ಬರೂ ಆತ್ಮೀಯವಾಗಿ ವರ್ತಿಸುತ್ತಿದ್ದ ದೃಶ್ಯಗಳು ಚಿತ್ರೀಕರಣಗೊಂಡಿದ್ದವು ಎನ್ನಲಾಗಿದೆ. ಈ ವಿಡಿಯೋ ದಾಖಲಿಸಿದ್ದ ವ್ಯಕ್ತಿಗೆ ಗೌಪ್ಯತಾ ಒಪ್ಪಂದಕ್ಕೆ ಸಹಿ ಹಾಕುವಂತೆ ಪ್ರಸ್ತಾಪಿಸಲಾಗಿತ್ತು ಎಂದೂ ವರದಿ ತಿಳಿಸಿದೆ.

ಈ ಬೆಳವಣಿಗೆಯಿಂದ ಪತ್ನಿ ಲೋರಿ ಹುವಾಂಗ್ ಅವರೊಂದಿಗೆ ದಾಂಪತ್ಯ ಜೀವನ ನಡೆಸುತ್ತಿರುವ ಜೆನ್ಸನ್ ವಿರುದ್ಧ ಇಬ್ಬರು ಮಹಿಳೆಯರೊಂದಿಗಿನ ವಿವಾಹೇತರ ಸಂಬಂಧದ ಆರೋಪ ಕೇಳಿಬಂದಂತಾಗಿದೆ.

ಇನ್ನೊಂದೆಡೆ, ಎನ್‌ವಿಡಿಯಾ ಆಡಳಿತ ಮಂಡಳಿ ಹುವಾಂಗ್ ಅವರನ್ನು ಸಿಇಒ ಸ್ಥಾನದಿಂದ ಕೆಳಗಿಳಿಸುವ ಬಗ್ಗೆ ಗಂಭೀರವಾಗಿ ಚಿಂತಿಸುತ್ತಿದೆ ಎಂದು ವರದಿಯಾಗಿದೆ. ಕಂಪನಿಯ ಷೇರುಗಳ ಮೌಲ್ಯ ಕುಸಿಯುತ್ತಿರುವ ಹಿನ್ನೆಲೆಯಲ್ಲಿ ಉತ್ತರಾಧಿಕಾರಿಯನ್ನು ಗುರುತಿಸಲು ಹೊರಗಿನ ಸಂಸ್ಥೆಯೊಂದರ ನೆರವನ್ನೂ ಪಡೆಯುತ್ತಿದೆ ಎಂದು ಬ್ಲೂಮ್‌ಬರ್ಗ್ ವರದಿ ಮಾಡಿದೆ. ಪೂರ್ಣಾವಧಿಯ ಸಿಇಒ ನೇಮಕವಾಗುವವರೆಗೆ ಹಂಗಾಮಿ ಮುಖ್ಯಸ್ಥರನ್ನು ನೇಮಿಸುವ ಸಾಧ್ಯತೆಯೂ ಇದೆ ಎನ್ನಲಾಗಿದೆ.

ಈ ಹೊಸ ಬೆಳವಣಿಗೆಗಳ ಬಗ್ಗೆ ಜೆನ್ಸನ್ ಹುವಾಂಗ್ ಇದುವರೆಗೆ ಯಾವುದೇ ಸಾರ್ವಜನಿಕ ಪ್ರತಿಕ್ರಿಯೆ ನೀಡಿಲ್ಲ. ಈ ಹಿಂದೆ ಉದ್ಯೋಗಿಗಳಿಗೆ ಕಳುಹಿಸಿದ್ದ ಸಂದೇಶದಲ್ಲಿ ತಮ್ಮ ಪತ್ನಿಗೆ ದ್ರೋಹ ಬಗೆದಿರುವುದನ್ನು ಒಪ್ಪಿಕೊಂಡಿದ್ದರು. ತಮ್ಮ ನಡೆ ಪತ್ನಿ ಮತ್ತು ಮಕ್ಕಳಿಗೆ ನೋವುಂಟು ಮಾಡಿದೆ. ಇದಕ್ಕೆ ಯಾವುದೇ ಸಮರ್ಥನೆ ಇಲ್ಲ, ತಾವು ತೀವ್ರವಾಗಿ ವಿಷಾದಿಸುತ್ತಿರುವುದಾಗಿ ಹೇಳಿದ್ದರು.

ಗೂಢಚರ್ಯೆ ಆರೋಪದ ಬಗ್ಗೆ ತನಿಖೆ

ಚೀನಾ ಮೂಲದ ಆಲಿಸ್ ಹುವಾಂಗ್ ಜೊತೆಗಿನ ಸಂಬಂಧದ ಹಿಂದೆ ವಿದೇಶಿ ಗುಪ್ತಚರ ಕಾರ್ಯಾಚರಣೆ ಇದೆಯೇ ಮತ್ತು ಇದರಿಂದ ಅಮೆರಿಕದ ರಾಷ್ಟ್ರೀಯ ಭದ್ರತೆಗೆ ಅಪಾಯ ಉಂಟಾಗಿದೆಯೇ ಎಂಬ ಬಗ್ಗೆ ಎನ್‌ವಿಡಿಯಾ ತನಿಖೆ ನಡೆಸುತ್ತಿದೆ. ಇದೇ ವೇಳೆ, ಅಮೆರಿಕದ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ನ ಹಿರಿಯ ರಿಪಬ್ಲಿಕನ್ ಸದಸ್ಯರು ಈ ಪ್ರಕರಣದ ಕುರಿತು ಜೆನ್ಸನ್ ಹುವಾಂಗ್ ಅವರಿಂದ ಮಾಹಿತಿ ಪಡೆಯಲು ಮುಂದಾಗಿದ್ದಾರೆ.

ಆದರೆ, ಗೂಢಚರ್ಯೆ ಆರೋಪಗಳನ್ನು ಚೀನಾ ತಳ್ಳಿಹಾಕಿದ್ದು, ಅವು ಆಧಾರರಹಿತ ಊಹಾಪೋಹಗಳು ಎಂದು ಹೇಳಿದೆ. ಒಟ್ಟಿನಲ್ಲಿ, ವಿಶ್ವದ ಅತ್ಯಂತ ಪ್ರಭಾವಿ ತಂತ್ರಜ್ಞಾನ ಕಂಪನಿಗಳಲ್ಲಿ ಒಂದಾದ ಎನ್‌ವಿಡಿಯಾದ ನಾಯಕತ್ವದ ಬಗ್ಗೆ ಅನಿಶ್ಚಿತತೆ ಎದುರಾಗಿದೆ. ಒಂದು ಕಡೆ ಆಡಳಿತ ಮಂಡಳಿಯ ತನಿಖೆ, ಮತ್ತೊಂದೆಡೆ ವೈಯಕ್ತಿಕ ಸಂಬಂಧಗಳ ಕುರಿತ ವಿವಾದ. ಇವೆಲ್ಲದರ ನಡುವೆ ಎಲಾನ್ ಮಸ್ಕ್ ನೀಡಿರುವ ಬೆಂಬಲ ಜೆನ್ಸನ್ ಹುವಾಂಗ್ ಅವರ ಮುಂದಿನ ನಡೆಗಳ ಬಗ್ಗೆ ಕುತೂಹಲ ಹೆಚ್ಚಿಸಿದೆ.