ವಿಶ್ವದ ಅತಿದೊಡ್ಡ ತೈಲ ಒಪ್ಪಂದ- ವೆನೆಜುವೆಲಾ ಜೊತೆ ಅಮೆರಿಕದ 100 ವರ್ಷದ ಡೀಲ್

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ವೆನೆಜುವೆಲಾದ ಜೊತೆಗೆ ಐತಿಹಾಸಿಕ ತೈಲ ಒಪ್ಪಂದಕ್ಕೆ ಸಹಿ ಹಾಕಿರುವುದಾಗಿ ಘೋಷಿಸಿದ್ದಾರೆ. ಈ ಒಪ್ಪಂದ ಜಾರಿಗೆ ಬಂದರೆ ದಕ್ಷಿಣ ಅಮೆರಿಕದ ವೆನೆಜುವೆಲಾದ ಅಪಾರ ತೈಲ ನಿಕ್ಷೇಪಗಳಿಗೆ ಅಮೆರಿಕ ಪ್ರವೇಶ ಪಡೆಯಲಿದೆ. ಇದನ್ನು ‘ವಿಶ್ವ ಇತಿಹಾಸದ ಅತಿದೊಡ್ಡ ತೈಲ ಒಪ್ಪಂದ’ ಎಂದು ಟ್ರಂಪ್ ಬಣ್ಣಿಸಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಒಪ್ಪಂದದ ಕುರಿತು ಮಾಹಿತಿ ನೀಡಿದ ಟ್ರಂಪ್, ವಿದೇಶಾಂಗ ಸಚಿವ ಮಾರ್ಕೊ ರೂಬಿಯೊ, ರಕ್ಷಣಾ ಸಚಿವ ಪೀಟ್ ಹೆಗ್ಸೆತ್ ಹಾಗೂ ವೆನೆಜುವೆಲಾದ ಹಂಗಾಮಿ ಅಧ್ಯಕ್ಷೆ ಡೆಲ್ಸಿ ರೊಡ್ರಿಗಸ್ ಅವರ ನೇತೃತ್ವದಲ್ಲಿ ಈ ಒಪ್ಪಂದಕ್ಕೆ ಮಾತುಕತೆ ನಡೆದಿದೆ ಎಂದು ತಿಳಿಸಿದ್ದಾರೆ.

ವೆನೆಜುವೆಲಾ ಸರ್ಕಾರ ಬಿಡುಗಡೆ ಮಾಡಿದ ಹೇಳಿಕೆಯ ಪ್ರಕಾರ, ಒಪ್ಪಂದದಡಿ ಸಾಬೀತಾಗಿರುವ ಸುಮಾರು 65 ಶತಕೋಟಿ ಬ್ಯಾರೆಲ್‌ಗಳ ತೈಲ ಸಾಮರ್ಥ್ಯ ಹೊಂದಿರುವ 17 ತೈಲ ಕ್ಷೇತ್ರಗಳನ್ನು ಅಭಿವೃದ್ಧಿಪಡಿಸಲು ಯೋಜಿಸಲಾಗಿದೆ. ಈ ಯೋಜನೆಯಿಂದ ವೆನೆಜುವೆಲಾದ ತೈಲ ಉದ್ಯಮಕ್ಕೆ ಸುಮಾರು 100 ಶತಕೋಟಿ ಡಾಲರ್ ಹೂಡಿಕೆ ಹರಿದುಬರುವ ಸಾಧ್ಯತೆ ಇದ್ದು, ಸರ್ಕಾರಕ್ಕೆ 209 ಶತಕೋಟಿ ಡಾಲರ್‌ಗಿಂತ ಹೆಚ್ಚು ತೆರಿಗೆ ಆದಾಯ ಸಿಗಬಹುದು ಎಂದು ಅಂದಾಜಿಸಲಾಗಿದೆ.

ಹಂಗಾಮಿ ಅಧ್ಯಕ್ಷೆ ಡೆಲ್ಸಿ ರೊಡ್ರಿಗಸ್ ಅವರು ಟೆಲಿಗ್ರಾಂನಲ್ಲಿ ಪ್ರತಿಕ್ರಿಯಿಸಿ, ಈ ಒಪ್ಪಂದವು ದೇಶದ ಆರ್ಥಿಕ ಪುನರುಜ್ಜೀವನದ ಮೇಲೆ ಮಹತ್ವದ ಪರಿಣಾಮ ಬೀರುತ್ತದೆ ಎಂದು ಹೇಳಿದ್ದಾರೆ.

100ವರ್ಷಗಳ ಒಪ್ಪಂದ

ಒಪ್ಪಂದದ ಪ್ರಮುಖ ಅಂಶವಾಗಿ, ವೆನೆಜುವೆಲಾದಲ್ಲಿ ಅಮೆರಿಕವು ಖಾಸಗಿ ಸಂಸ್ಥೆಯೊಂದರ ಸಹಭಾಗಿತ್ವದಲ್ಲಿ ಹೊಸ ಖಾಸಗಿ ಕಂಪನಿಯನ್ನು ಸ್ಥಾಪಿಸಿ ತೈಲ ನಿಕ್ಷೇಪಗಳ ಅಭಿವೃದ್ಧಿ ಕೈಗೊಳ್ಳಲಿದೆ ಎಂದು ಅಮೆರಿಕದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಹೆಸರು ಬಹಿರಂಗಪಡಿಸದ ಖಾಸಗಿ ಕಂಪನಿಗೆ ತೈಲ ಕ್ಷೇತ್ರಗಳನ್ನು ಅಭಿವೃದ್ಧಿಪಡಿಸಲು 100 ವರ್ಷಗಳ ಹಕ್ಕು ನೀಡಲಾಗಿದೆ ಎನ್ನಲಾಗಿದೆ.

ಈ ಹೊಸ ಕಂಪನಿಯ ಒಟ್ಟು ಉತ್ಪಾದನೆಯಲ್ಲಿ ಅಮೆರಿಕಕ್ಕೆ ಪರಿಣಾಮಕಾರಿಯಾಗಿ 55 ಶೇಕಡಾ ಪಾಲು ದೊರೆಯಲಿದ್ದು, ಕಂಪನಿಯಲ್ಲಿ ಮಾಲೀಕತ್ವದ ಹಕ್ಕಿನ ಜೊತೆಗೆ ಉತ್ಪಾದನಾ ವೆಚ್ಚದ ದರದಲ್ಲಿ ತೈಲ ಖರೀದಿಸುವ ಅವಕಾಶವೂ ಇರಲಿದೆ. ತೈಲ ನಿಕ್ಷೇಪಗಳ ಪ್ರಮಾಣದ ದೃಷ್ಟಿಯಿಂದ ಈ ಕಂಪನಿ ಸೌದಿ ಅರಾಮ್ಕೊ ನಂತರದ ಅತಿದೊಡ್ಡ ಕಾರ್ಪೊರೇಟ್ ತೈಲ ನಿಕ್ಷೇಪ ಹೊಂದಿರುವ ಸಂಸ್ಥೆಯಾಗುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ.

ಇಂಧನ ಬೆಲೆ ಇಳಿಕೆಗೆ ತಕ್ಷಣದ ಪರಿಹಾರವಿಲ್ಲ

ಅಮೆರಿಕದಲ್ಲಿ ಹೆಚ್ಚುತ್ತಿರುವ ಪೆಟ್ರೋಲ್ ಬೆಲೆಗಳ ನಡುವೆಯೇ ಈ ಒಪ್ಪಂದ ಘೋಷಣೆಯಾಗಿದೆ. ಇರಾನ್ ಯುದ್ಧ ಆರು ತಿಂಗಳು ಪೂರೈಸಿದ ಹಿನ್ನೆಲೆ ಹಾಗೂ ಹೋರ್ಮುಜ್ ಜಲಸಂಧಿ ಮೂಲಕ ತೈಲ ಸಾಗಣೆ ಕುಂಠಿತವಾಗಿರುವುದು ಜಾಗತಿಕ ತೈಲ ಮಾರುಕಟ್ಟೆಯ ಮೇಲೆ ಪರಿಣಾಮ ಬೀರಿದೆ.

ಅಮೆರಿಕದ ಸ್ಟ್ರಾಟೆಜಿಕ್ ಪೆಟ್ರೋಲಿಯಂ ರಿಸರ್ವ್‌ನಲ್ಲಿರುವ ತೈಲ ಸಂಗ್ರಹವೂ ಆಗಸ್ಟ್ ಆರಂಭದಲ್ಲಿ 300 ಮಿಲಿಯನ್ ಬ್ಯಾರೆಲ್‌ಗಿಂತ ಕೆಳಗೆ ಇಳಿದಿತ್ತು ಎಂದು ವರದಿಯಾಗಿದೆ. ಆದಾಗ್ಯೂ, ಈ ಹೊಸ ಒಪ್ಪಂದದಿಂದ ಅಮೆರಿಕದಲ್ಲಿ ಪೆಟ್ರೋಲ್ ಬೆಲೆ ತಕ್ಷಣವೇ ಗಣನೀಯವಾಗಿ ಇಳಿಯಲಿದೆ ಎಂದು ನಿರೀಕ್ಷಿಸುವುದು ಕಷ್ಟ ಎಂದು ತಜ್ಞರು ಎಚ್ಚರಿಸಿದ್ದಾರೆ.

ವೆನೆಜುವೆಲಾದ ಹಳೆಯ ಹಾಗೂ ಹದಗೆಟ್ಟಿರುವ ತೈಲ ಮೂಲಸೌಕರ್ಯವನ್ನು ದುರಸ್ತಿ ಮಾಡಿ ಉತ್ಪಾದನೆಯನ್ನು ಹೆಚ್ಚಿಸಲು ಹಲವು ವರ್ಷಗಳು ಹಾಗೂ ಶತಕೋಟಿ ಡಾಲರ್ ಹೂಡಿಕೆ ಅಗತ್ಯವಾಗಲಿದೆ. ರಾಜಕೀಯ ಅನಿಶ್ಚಿತತೆ ಕೂಡ ಅಮೆರಿಕದ ಪ್ರಮುಖ ತೈಲ ಕಂಪನಿಗಳು ವೆನೆಜುವೆಲಾಗೆ ಮರಳಲು ಹಿಂಜರಿಯುವಂತೆ ಮಾಡಬಹುದು.

ಅಮೆರಿಕದ ತೈಲ ಸಂಗ್ರಹಕ್ಕೆ ಬಳಕೆ

ಹೊಸ ಕಂಪನಿಯಿಂದ ಅಮೆರಿಕ ಖರೀದಿಸುವ ತೈಲವನ್ನು ದೇಶದ ಸ್ಟ್ರಾಟೆಜಿಕ್ ಪೆಟ್ರೋಲಿಯಂ ರಿಸರ್ವ್ ತುಂಬಿಸಲು ಹಾಗೂ ಸೇನಾ ಅಗತ್ಯಗಳಿಗೆ ಬಳಸಲಾಗುವುದು ಎಂದು ಅಮೆರಿಕದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ವೆನೆಜುವೆಲಾ ವಿಶ್ವದಲ್ಲೇ ಅತಿದೊಡ್ಡ ತೈಲ ನಿಕ್ಷೇಪ ಹೊಂದಿರುವ ರಾಷ್ಟ್ರಗಳಲ್ಲಿ ಒಂದಾಗಿದೆ. ದೇಶದಲ್ಲಿ ಸುಮಾರು 303 ಶತಕೋಟಿ ಬ್ಯಾರೆಲ್ ಕಚ್ಚಾ ತೈಲ ನಿಕ್ಷೇಪ ಇದೆ ಎಂದು ಅಂದಾಜಿಸಲಾಗಿದೆ. ಇದು ಜಾಗತಿಕ ತೈಲ ನಿಕ್ಷೇಪದ ಸುಮಾರು 17 ಶೇಕಡಾ ಪಾಲಾಗಿದೆ. ಆದರೆ ಮೂಲಸೌಕರ್ಯದ ಹದಗೆಟ್ಟ ಸ್ಥಿತಿಯಿಂದ ವೆನೆಜುವೆಲಾ ಪ್ರಸ್ತುತ ವಿಶ್ವದ ಒಟ್ಟು ತೈಲ ಉತ್ಪಾದನೆಯಲ್ಲಿ ಕೇವಲ ಶೇ.1ರಷ್ಟು ಮಾತ್ರ ಉತ್ಪಾದಿಸುತ್ತಿದೆ.