ಇರಾನ್-ಅಮೆರಿಕ ಕದನ ವಿರಾಮ: ಯುದ್ಧ ನಿಲ್ಲಿಸಿದ ಆ 90 ನಿಮಿಷಗಳ ರೋಚಕ ಕಥೆ
ಈ ಶಾಂತಿ ಘೋಷಣೆಯ ಬೆನ್ನಲ್ಲೇ ಜಾಗತಿಕ ಮಾರುಕಟ್ಟೆ ನಿರಾಳವಾಗಿದ್ದು, ಕಚ್ಚಾ ತೈಲ ಬೆಲೆ ಕೇವಲ ಅರ್ಧ ಗಂಟೆಯಲ್ಲಿ ಶೇ. 9ರಷ್ಟು ಕುಸಿತ ಕಂಡು ಬ್ಯಾರೆಲ್ಗೆ $96ಗೆ ತಲುಪಿತು.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೀಡಿದ್ದ ಭೀಕರ ದಾಳಿಯ ಗಡುವಿಗೆ ಕೇವಲ 90 ನಿಮಿಷಗಳಿರುವಾಗ ಇರಾನ್ ಮತ್ತು ಅಮೆರಿಕ ನಡುವೆ ಎರಡು ವಾರಗಳ ಕದನ ವಿರಾಮ ಘೋಷಣೆಯಾಗಿದೆ. ಈ ಮೂಲಕ ಜಗತ್ತನ್ನು ತುದಿಗಾಲಿನಲ್ಲಿ ನಿಲ್ಲಿಸಿದ್ದ ಭೀಕರ ಯುದ್ಧವೊಂದು ತಾತ್ಕಾಲಿಕವಾಗಿ ಶಮನಗೊಂಡಿದೆ.
ಅಂದು ಬೆಳಿಗ್ಗೆ ಟ್ರಂಪ್ ತಮ್ಮ 'ಟ್ರುತ್ ಸೋಶಿಯಲ್' (Truth Social) ಖಾತೆಯಲ್ಲಿ "ಇಂದು ರಾತ್ರಿ ಇಡೀ ನಾಗರಿಕತೆಯೇ ನಾಶವಾಗಲಿದೆ, ಮತ್ತೆಂದೂ ಮರಳಿ ಬಾರದಂತೆ ಅಳಿಸಿಹೋಗಲಿದೆ" ಎಂದು ಕಠಿಣ ಎಚ್ಚರಿಕೆ ನೀಡಿದ್ದರು. ಅಮೆರಿಕದ ಕಾಲಮಾನದ ಪ್ರಕಾರ ರಾತ್ರಿ 8 ಗಂಟೆಗೆ ಇರಾನ್ನ ಸೇತುವೆಗಳು, ವಿದ್ಯುತ್ ಸ್ಥಾವರಗಳು ಮತ್ತು ನೀರಿನ ಮೂಲಸೌಕರ್ಯಗಳ ಮೇಲೆ ದಾಳಿ ನಡೆಸಲು ಅಮೆರಿಕ ಗುರಿ ನಿಗದಿಪಡಿಸಿತ್ತು.
ಮಾನವ ಸರಪಳಿ ನಿರ್ಮಿಸಿದ ಇರಾನ್ ಜನತೆ
ಮತ್ತೊಂದೆಡೆ, ಅಮೆರಿಕದ ಬೆದರಿಕೆಗೆ ಜಗ್ಗದ ಇರಾನ್, ತನ್ನ ವಿದ್ಯುತ್ ಸ್ಥಾವರಗಳನ್ನು ರಕ್ಷಿಸಲು ಯುವಕರು ಮತ್ತು ಸಾರ್ವಜನಿಕರಿಗೆ 'ಮಾನವ ಸರಪಳಿ' ನಿರ್ಮಿಸುವಂತೆ ಕರೆ ನೀಡಿತ್ತು. ಫಾರ್ಸ್ ಪ್ರಾಂತ್ಯದ ಕಝೆರುನ್ ವಿದ್ಯುತ್ ಸ್ಥಾವರದ ಮುಂದೆ ಜನರು ಕೈ-ಕೈ ಹಿಡಿದು ನಿಂತು ತಮ್ಮ ಪ್ರಾಣವನ್ನು ಪಣಕ್ಕಿಟ್ಟ ದೃಶ್ಯಗಳು ಇರಾನ್ನ ಸರ್ಕಾರಿ ಮಾಧ್ಯಮಗಳಲ್ಲಿ ನೇರಪ್ರಸಾರಗೊಂಡವು. ಈ ನಡುವೆಯೂ ಇಸ್ರೇಲ್ ಮತ್ತು ಅಮೆರಿಕ ಪಡೆಗಳು ಇರಾನ್ನ ತೈಲ ಕೇಂದ್ರಗಳು ಮತ್ತು ರೈಲ್ವೆ ಜಾಲದ ಮೇಲೆ ದಾಳಿಗಳನ್ನು ಮುಂದುವರಿಸಿದ್ದವು.
ಪಾಕಿಸ್ತಾನದ ಮಧ್ಯಪ್ರವೇಶ ಮತ್ತು ಶಾಂತಿ ಸಂಧಾನ
ಈ ಬಿಕ್ಕಟ್ಟಿನ ಸಮಯದಲ್ಲಿ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಫ್ ಪ್ರಮುಖ ಪಾತ್ರ ವಹಿಸಿದರು. ಅವರು ಎಕ್ಸ್ (X) ಖಾತೆಯಲ್ಲಿ ಟ್ರಂಪ್ ಮತ್ತು ಇರಾನ್ ನಾಯಕರನ್ನು ಟ್ಯಾಗ್ ಮಾಡಿ, ಎರಡು ವಾರಗಳ ಕದನ ವಿರಾಮ ಘೋಷಿಸುವಂತೆ ಹಾಗೂ ಇದಕ್ಕೆ ಪ್ರತಿಯಾಗಿ ಇರಾನ್ ತನ್ನ 'ಹಾರ್ಮುಜ್ ಜಲಸಂಧಿ'ಯನ್ನು (Strait of Hormuz) ಸೌಹಾರ್ದತೆಯ ಸಂಕೇತವಾಗಿ ಮುಕ್ತಗೊಳಿಸುವಂತೆ ಪ್ರಸ್ತಾಪ ಮುಂದಿಟ್ಟರು. ತೆರೆಮರೆಯಲ್ಲಿ ಇರಾನ್ ಕೂಡ ತನ್ನ 10-ಅಂಶಗಳ ಬೇಡಿಕೆಯ ಪ್ರಸ್ತಾಪವನ್ನು ಮಧ್ಯವರ್ತಿಗಳ ಮೂಲಕ ರವಾನಿಸಿತ್ತು.
ಸಂಜೆ 6.32ರ ಆ ನಿರ್ಣಾಯಕ ಘೋಷಣೆ
ಗಡುವು ಮುಗಿಯಲು ಕೇವಲ 90 ನಿಮಿಷಗಳಿದ್ದಾಗ (ಸಂಜೆ ೬.32ಕ್ಕೆ), ಟ್ರಂಪ್ ಕದನ ವಿರಾಮವನ್ನು ಘೋಷಿಸುವ ಪೋಸ್ಟ್ ಪ್ರಕಟಿಸಿದರು. ಪಾಕ್ ಪ್ರಧಾನಿ ಶೆಹಬಾಜ್ ಷರೀಫ್ ಮತ್ತು ಸೇನಾ ಮುಖ್ಯಸ್ಥರೊಂದಿಗಿನ ಮಾತುಕತೆ ಹಾಗೂ ಹಾರ್ಮುಜ್ ಜಲಸಂಧಿಯನ್ನು ಸಂಪೂರ್ಣ ಮತ್ತು ಸುರಕ್ಷಿತವಾಗಿ ತೆರೆಯಲು ಇರಾನ್ ಒಪ್ಪಿದ ಹಿನ್ನೆಲೆಯಲ್ಲಿ, ದಾಳಿಯನ್ನು 14 ದಿನಗಳ ಮಟ್ಟಿಗೆ ತಡೆಹಿಡಿಯಲಾಗಿದೆ ಎಂದು ಅವರು ಸ್ಪಷ್ಟಪಡಿಸಿದರು.
ಇರಾನ್ ಪ್ರತಿಕ್ರಿಯೆ ಮತ್ತು ಮಾರುಕಟ್ಟೆ ಚೇತರಿಕೆ
ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಗ್ಚಿ ಕೂಡಲೇ ಪ್ರತಿಕ್ರಿಯಿಸಿ, ಅಮೆರಿಕ ದಾಳಿ ನಿಲ್ಲಿಸಿದರೆ ನಮ್ಮ ಸಶಸ್ತ್ರ ಪಡೆಗಳೂ ರಕ್ಷಣಾ ಕಾರ್ಯಾಚರಣೆ ನಿಲ್ಲಿಸಲಿವೆ ಎಂದರು. ಈ ಶಾಂತಿ ಘೋಷಣೆಯ ಬೆನ್ನಲ್ಲೇ ಜಾಗತಿಕ ಮಾರುಕಟ್ಟೆ ನಿರಾಳವಾಗಿದ್ದು, ಕಚ್ಚಾ ತೈಲ ಬೆಲೆ ಕೇವಲ ಅರ್ಧ ಗಂಟೆಯಲ್ಲಿ ಶೇ. 9ರಷ್ಟು ಕುಸಿತ ಕಂಡು ಬ್ಯಾರೆಲ್ಗೆ $96ಗೆ ತಲುಪಿತು.
ಸದ್ಯಕ್ಕೆ ಎರಡೂ ದೇಶಗಳ ನಿಯೋಗಗಳು ಏಪ್ರಿಲ್ 10ರಂದು ಇಸ್ಲಾಮಾಬಾದ್ನಲ್ಲಿ ಮುಂದಿನ ಸುತ್ತಿನ ಮಾತುಕತೆ ನಡೆಸಲಿವೆ. ವಿದ್ಯುತ್ ಸ್ಥಾವರಗಳ ಗೇಟ್ ಬಳಿ ಕಾವಲು ನಿಂತಿದ್ದ ಇರಾನ್ ಜನತೆ ನಿರಾಳರಾಗಿ ಮನೆಗಳತ್ತ ಹೆಜ್ಜೆ ಹಾಕುವುದರೊಂದಿಗೆ, ಸದ್ಯಕ್ಕೆ ಯುದ್ಧದ ಕಾರ್ಮೋಡಗಳು ಚದುರಿವೆ.
