ಕೆನಡಾದಲ್ಲಿ ಭೀಕರ ಗುಂಡಿನ ದಾಳಿ: ತಾಯಿ, ತಮ್ಮ ಸೇರಿದಂತೆ 9 ಜನರ ಹತ್ಯೆಗೈದ ತೃತೀಯ ಲಿಂಗಿ
ಕೆನಡಾದ ಬ್ರಿಟಿಷ್ ಕೊಲಂಬಿಯಾದಲ್ಲಿ 18 ವರ್ಷದ ಜೆಸ್ಸಿ ವ್ಯಾನ್ ರೂಟ್ಸೆಲರ್ ಎಂಬಾಕೆ ನಡೆಸಿದ ಗುಂಡಿನ ದಾಳಿಯಲ್ಲಿ ಒಂಬತ್ತು ಮಂದಿ ಸಾವನ್ನಪ್ಪಿದ್ದಾರೆ.
ಕೆನಡಾದ ಬ್ರಿಟಿಷ್ ಕೊಲಂಬಿಯಾದ ಟಂಬ್ಲರ್ ರಿಡ್ಜ್ ಎಂಬ ಸಮುದಾಯದಲ್ಲಿ ಮಂಗಳವಾರ ನಡೆದ ಭೀಕರ ಗುಂಡಿನ ದಾಳಿಯಲ್ಲಿ ಒಂಬತ್ತು ಮಂದಿ ಸಾವನ್ನಪ್ಪಿದ್ದಾರೆ. 18 ವರ್ಷದ ಟ್ರಾನ್ಸ್ವುಮನ್ ಜೆಸ್ಸಿ ವ್ಯಾನ್ ರೂಟ್ಸೆಲರ್ ಮೊದಲು ತನ್ನ ತಾಯಿ ಮತ್ತು ಸಾಕು ತಮ್ಮನನ್ನು ಹತ್ಯೆಗೈದು, ನಂತರ ತನ್ನ ಹಳೆಯ ಶಾಲೆಯ ಮೇಲೆ ದಾಳಿ ನಡೆಸಿ ಆರು ಮಂದಿಯನ್ನು ಕೊಂದಿದ್ದಾಳೆ. ಈ ಭೀಕರ ಕೃತ್ಯದ ನಂತರ ದಾಳಿಕೋರಳು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ.
ದಾಳಿಕೋರ ತೃತೀಯ ಲಿಂಗಿಯ ಹಿನ್ನೆಲೆ
ಜೆಸ್ಸಿ ವ್ಯಾನ್ ರೂಟ್ಸೆಲರ್ ಜೈವಿಕವಾಗಿ ಪುರುಷನಾಗಿ ಜನಿಸಿದ್ದು, ನಂತರ ತೃತೀಯ ಲಿಂಗಿಯಾಗಿ ಗುರುತಿಸಿಕೊಂಡಿದ್ದಳು. ಈಕೆ ಮಾನಸಿಕ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದಳು ಎಂದು ಪೊಲೀಸರು ತಿಳಿಸಿದ್ದಾರೆ. ಈಕೆಯ ಮನೆಯಲ್ಲಿ ಈ ಹಿಂದೆ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿತ್ತು, ಆದರೆ ನಂತರ ಅವುಗಳನ್ನು ಹಿಂತಿರುಗಿಸಲಾಗಿತ್ತು. ಪೊಲೀಸರು ಹಲವು ಬಾರಿ ಈಕೆಯ ಮನೆಗೆ ಭೇಟಿ ನೀಡಿ ಮಾನಸಿಕ ಆರೋಗ್ಯ ತಪಾಸಣೆ ನಡೆಸಿದ್ದರು.
ಘಟನೆಯ ವಿವರ
ಪೊಲೀಸ್ ಕಮಾಂಡರ್ ಡ್ವೇನ್ ಮ್ಯಾಕ್ಡೊನಾಲ್ಡ್ ನೀಡಿರುವ ಮಾಹಿತಿ ಪ್ರಕಾರ, ಜೆಸ್ಸಿ ಮೊದಲು ತನ್ನ 39 ವರ್ಷದ ತಾಯಿ ಮತ್ತು 11 ವರ್ಷದ ಸಾಕು ತಮ್ಮನನ್ನು ಮನೆಯಲ್ಲೇ ಗುಂಡಿಕ್ಕಿ ಕೊಂದಿದ್ದಾಳೆ. ಅಲ್ಲಿಂದ ಹತ್ತಿರದ ಪ್ರೌಢಶಾಲೆಗೆ ತೆರಳಿ ದಾಳಿ ನಡೆಸಿದ್ದಾಳೆ. ಅಲ್ಲಿ ಒಬ್ಬ ಮಹಿಳಾ ಶಿಕ್ಷಕಿ (39) ಮತ್ತು ಐವರು ವಿದ್ಯಾರ್ಥಿಗಳು (ಮೂವರು 12 ವರ್ಷದ ಹುಡುಗಿಯರು ಹಾಗೂ ಇಬ್ಬರು 12 ಮತ್ತು 13 ವರ್ಷದ ಹುಡುಗರು) ಸಾವನ್ನಪ್ಪಿದ್ದಾರೆ. ಈ ಶಾಲೆಯಲ್ಲಿ ಜೆಸ್ಸಿ ನಾಲ್ಕು ವರ್ಷಗಳ ಹಿಂದೆ ವ್ಯಾಸಂಗ ಮಾಡಿ ಅರ್ಧಕ್ಕೇ ಬಿಟ್ಟಿದ್ದಳು. ದಾಳಿಯಲ್ಲಿ ಒಟ್ಟು 24 ಮಂದಿ ಗಾಯಗೊಂಡಿದ್ದಾರೆ.
ದೇಶವೇ ಕಂಬನಿ
ಈ ಘಟನೆಯ ನಂತರ ಕೆನಡಾದ ಪ್ರಧಾನಿ ಮಾರ್ಕ್ ಕಾರ್ನೆ ಅವರು ಆಘಾತ ವ್ಯಕ್ತಪಡಿಸಿದ್ದಾರೆ. "ದೇಶವು ನಿಮ್ಮೊಂದಿಗೆ ಶೋಕಿಸುತ್ತದೆ ಮತ್ತು ಕೆನಡಾ ನಿಮ್ಮ ಬೆನ್ನಿಗೆ ನಿಲ್ಲುತ್ತದೆ" ಎಂದು ಅವರು ಟಂಬ್ಲರ್ ರಿಡ್ಜ್ ನಿವಾಸಿಗಳಿಗೆ ಭರವಸೆ ನೀಡಿದರು. ಗೌರವಾರ್ಥವಾಗಿ ಸರ್ಕಾರಿ ಕಟ್ಟಡಗಳ ಮೇಲೆ ರಾಷ್ಟ್ರಧ್ವಜವನ್ನು ಏಳು ದಿನಗಳ ಕಾಲ ಅರ್ಧಮಟ್ಟಕ್ಕೆ ಹಾರಿಸಲು ಆದೇಶಿಸಲಾಗಿದೆ.
ಕಠಿಣ ನಿಯಮಗಳ ನಡುವೆಯೂ ದುರಂತ
ಕೆನಡಾದಲ್ಲಿ ಶಸ್ತ್ರಾಸ್ತ್ರ ನಿಯಂತ್ರಣ ಕಾನೂನುಗಳು ಅತ್ಯಂತ ಕಠಿಣವಾಗಿದ್ದರೂ, ಇಂತಹ ಶಾಲಾ ಗುಂಡಿನ ದಾಳಿಗಳು ಅಲ್ಲಿ ವಿರಳ. ಈ ದಾಳಿಯು 2020 ರ ನಂತರ ಕೆನಡಾದಲ್ಲಿ ನಡೆದ ಅತ್ಯಂತ ಭೀಕರ ಸಾಮೂಹಿಕ ಹತ್ಯೆಯಾಗಿದೆ. ಘಟನೆಯ ನಂತರ ಶಾಲೆಯನ್ನು ವಾರದ ಉಳಿದ ದಿನಗಳವರೆಗೆ ಮುಚ್ಚಲಾಗಿದೆ ಮತ್ತು ಪ್ರಧಾನಿಯವರು ತಮ್ಮ ವಿದೇಶಿ ಪ್ರವಾಸಗಳನ್ನು ರದ್ದುಗೊಳಿಸಿದ್ದಾರೆ.
