ಬಾಂಗ್ಲಾದೇಶ| ಇಸ್ಲಾಮಿಕ್ ಪಕ್ಷಗಳ ಮಹಾಮೈತ್ರಿಕೂಟ ರಚನೆ ಸಾಧ್ಯತೆ, ಭಾರತಕ್ಕೆ ಹೊಸ ಆತಂಕ

ಕಳೆದ ತಿಂಗಳು ಶೇಖ್ ಹಸೀನಾ ಅವರ ರಾಜೀನಾಮೆ ಮತ್ತು ಅವರು ದೇಶದಿಂದ ನಿರ್ಗಮಿಸಿದ ನಂತರ ಬಾಂಗ್ಲಾದೇಶದ ರಾಜಕೀಯ ವಲಯಗಳಲ್ಲಿ ಸೃಷ್ಟಿಯಾದ ಬೆಳವಣಿಗೆಯ ಮಂಥನವು ಅವರ ರಾಜಕೀಯ ವಿರೋಧಿಗಳಿಗೆ ತಮ್ಮ ಪಕ್ಷಗಳನ್ನು ಮರುಸಂಘಟಿಸಲು ಮತ್ತು ಸುಧಾರಿಸಲು ಕಾರಣವಾಗಿದೆ.

ಬದಲಾದ ಪರಿಸ್ಥಿತಿಯಲ್ಲಿ ಮತ್ತು ನಂತರದ ಪ್ರಕ್ರಿಯೆಯು ಅವರಲ್ಲಿ ಅನೇಕರು ಹೊಸ ಜೊತೆಗಾರರನ್ನು ಹುಡುಕಿಕೊಳ್ಳಲು ಮತ್ತು ಬಾಂಗ್ಲಾದೇಶದಲ್ಲಿ ಚುನಾವಣೆಗಳು ನಡೆದಾಗ ತಮ್ಮ ಬಲವನ್ನು ಹೆಚ್ಚಿಸಿಕೊಳ್ಳಲು ಮತ್ತು ತಮ್ಮ ತಯಾರಿಕೆಗೆ ಸಮಾನ ಮನಸ್ಕ ಪಕ್ಷಗಳೊಂದಿಗೆ ಹೊಂದಾಣಿಕೆ ಮಾಡಲು ಕಾರಣವಾಗಿದೆ.

ಒಂದೇ ಬ್ಯಾನರ್ ಅಡಿಯಲ್ಲಿ: ಕಟ್ಟುನಿಟ್ಟಾದ ಷರಿಯಾ ಸಂಹಿತೆ ಮತ್ತು ಇತರ ಇಸ್ಲಾಮಿಕ್ ಕಾನೂನುಗಳ ಅಡಿಯಲ್ಲಿ 'ನ್ಯಾಯ ಮತ್ತು ಸಮಾನ' ಮುಸ್ಲಿಂ ಸಮಾಜವನ್ನು ಜಾರಿಗೆ ತರಲು ಏಕೀಕೃತ ರಾಜಕೀಯ ಶಕ್ತಿಯಾಗಿ ಹೊರಹೊಮ್ಮುವ ಪ್ರಯತ್ನದಲ್ಲಿ ಬಾಂಗ್ಲಾದೇಶದ ಪ್ರಮುಖ ಇಸ್ಲಾಮಿಸ್ಟ್ ಪಕ್ಷಗಳ ಇತ್ತೀಚಿನ ಸಭೆಯು ಈ ನಿಟ್ಟಿನಲ್ಲಿ ಅತ್ಯಂತ ಮಹತ್ವದ ಬೆಳವಣಿಗೆಯಾಗಿದೆ.

ದೇಶದಲ್ಲಿ ಸರ್ಕಾರಿ ಉದ್ಯೋಗಗಳಿಗೆ ಮೀಸಲಾತಿಯ ವಿರೋಧಾಭಾಸಗಳಿಂದ ನೇಮಕಾತಿ ನೀತಿಯ ಮೇಲೆ ವಿದ್ಯಾರ್ಥಿ ಪ್ರತಿಭಟನೆಯು ಆಡಳಿತಾರೂಢ ಅವಾಮಿ ಲೀಗ್ ಸರ್ಕಾರ ಮತ್ತು ಅದರ 15 ವರ್ಷಗಳ "ದುರಾಡಳಿತ" ವಿರುದ್ಧ ಜನರ ದಂಗೆಯಾಗಿ, ಅದು ಹಿಂಸಾತ್ಮಕವಾಗಿ ಮಾರ್ಪಟ್ಟ ನಂತರ ಹಸೀನಾ ರಾಜೀನಾಮೆ ನೀಡಿ ಅವರು ದೇಶವನ್ನು ತೊರೆಯಬೇಕಾದಂಥ ಪರಿಸ್ಥಿತಿ ನಿರ್ಮಾಣವಾಯಿತು. ಈಗ ರಾಜಕೀಯ ರಂಗದಿಂದ ಹಸೀನಾ ಹೊರಗುಳಿದಿದ್ದು, ಇತರ ಪಾಲುದಾರ ಪಕ್ಷಗಳ ನಾಯಕರು ತಮ್ಮ ಕಾರ್ಯಸೂಚಿಗೆ ಅನುಗುಣವಾಗಿ ಬಾಂಗ್ಲಾದೇಶವನ್ನು ಪುನರ್‌ ರೂಪಿಸಲು ಸಿದ್ಧರಾಗಿದ್ದಾರೆ.

ಅತಿಮುಖ್ಯ ಉಪಕ್ರಮ: ಬಾಂಗ್ಲಾದೇಶದ ಎರಡು ದೊಡ್ಡ ಇಸ್ಲಾಮಿ ಸಂಘಟನೆಗಳಾದ ಬಾಂಗ್ಲಾದೇಶ ಜಮಾತ್-ಎ-ಇಸ್ಲಾಮಿ ಮತ್ತು ಇಸ್ಲಾಮಿ ಆಂದೋಲನ್ ಬಾಂಗ್ಲಾದೇಶದಿಂದ ಯುನೈಟೆಡ್ ಇಸ್ಲಾಮಿಕ್ ಫ್ರಂಟ್ ಅನ್ನು ರಚಿಸುವ ಮುಖ್ಯ ಅತಿಮುಖ್ಯ ಉಪಕ್ರಮವನ್ನು ತೆಗೆದುಕೊಳ್ಳಲಾಗಿದೆ.

ಈ ಎರಡು ಪಕ್ಷಗಳು ಕಳೆದ ವಾರದಲ್ಲಿ ಹಲವಾರು ಸಭೆಗಳನ್ನು ನಡೆಸಿವೆ ಮತ್ತು ಉದ್ದೇಶಿತ ಯುನೈಟೆಡ್ ಫ್ರಂಟ್ ಅನ್ನು ರಚಿಸುವ ಉದ್ದೇಶದಿಂದ ಬಾಂಗ್ಲಾದೇಶದಲ್ಲಿ ಇತರ ಇಸ್ಲಾಮಿಸ್ಟ್ ಪಕ್ಷಗಳೊಂದಿಗೆ ಮಾತುಕತೆಗಳನ್ನು ನಡೆಸಿವೆ.

ಆಗಸ್ಟ್ 20 ರಂದು ಜಮಾತ್-ಎ-ಇಸ್ಲಾಮಿಯ ಅಮೀರ್ ಡಾ. ಶಫೀಕುರ್ ರೆಹಮಾನ್ ಅವರು ಇತರ ಆರು ಮುಖ್ಯವಾಹಿನಿಯ ಇಸ್ಲಾಮಿಸ್ಟ್ ಪಕ್ಷಗಳನ್ನು ಒಂದೇ ವೇದಿಕೆಯಡಿಯಲ್ಲಿ ತರಲು ಸಭೆಯ ಅಧ್ಯಕ್ಷತೆ ವಹಿಸಿದ್ದರು ಎಂದು ಬಂಗಾಳಿ ರಾಷ್ಟ್ರೀಯ ದಿನಪತ್ರಿಕೆ ಕಲೇರ್ ಕೊಂತೋ ವರದಿಮಾಡಿದೆ.

ಯುನೈಟೆಡ್ ಫ್ರಂಟ್‌ಗಾಗಿ ಚರ್ಚೆಯಲ್ಲಿರುವ ಇತರ ಪಕ್ಷಗಳೆಂದರೆ, ಖಿಲಾಫತ್ ಆಂದೋಳನ್, ಬಾಂಗ್ಲಾದೇಶ ಖಿಲಾಫತ್ ಮಜ್ಲಿಸ್, ಜಮಾತ್-ಎ-ಉಲೇಮಾ-ಇಸ್ಲಾಂ ಬಾಂಗ್ಲಾದೇಶ ಮತ್ತು ಖಿಲಾಫತ್ ಮಜ್ಲಿಸ್. ಎಲ್ಲಾ ಸಮಾನ ಮನಸ್ಕ ಪಕ್ಷಗಳನ್ನು ಒಂದೇ ವೇದಿಕೆ ಅಡಿಯಲ್ಲಿ ತರುವ ಪ್ರಯತ್ನದಲ್ಲಿ ಸೇರಲು ಹಲವಾರು ಇತರ ಸಣ್ಣ ಇಸ್ಲಾಮಿಸ್ಟ್ ಪಕ್ಷಗಳ ಸಹಾಯವನ್ನು ಕೂಡ ಕೇಳಲಾಗುತ್ತಿದೆ .

ಹಸೀನಾ ಆಳ್ವಿಕೆಯಲ್ಲಿ ಆದ ಹಿನ್ನಡೆ: ಹಿಂದೆ, ಬಾಂಗ್ಲಾದೇಶದ ಎರಡೂ ಪ್ರಮುಖ ಪಕ್ಷಗಳಾದ ಅವಾಮಿ ಲೀಗ್ ಮತ್ತು ಅದರ ಪ್ರತಿಸ್ಪರ್ಧಿ, ಬಾಂಗ್ಲಾದೇಶ ನ್ಯಾಶನಲಿಸ್ಟ್ ಪಾರ್ಟಿ (ಬಿಎನ್‌ಪಿ) ಜಮಾತ್-ಎ-ಇಸ್ಲಾಮಿ ಮತ್ತು ಇತರ ಇಸ್ಲಾಮಿಸ್ಟ್ ಪಕ್ಷಗಳನ್ನು ತಮ್ಮ ಸರ್ಕಾರಗಳಲ್ಲಿ ಸಮ್ಮಿಶ್ರ ಪಾಲುದಾರರಾಗಿ ಸೇರಿಸಿದ್ದವು.

ಆದರೆ ಇಸ್ಲಾಮಿಸ್ಟ್‌ಗಳ ಬಗೆಗಿನ ಹಸೀನಾ ಅವರ ವರ್ತನೆ BNP ಗಿಂತ ಕಠಿಣವಾಗಿತ್ತು ಹಾಗೂ ಇದು ಹಿಂದಿನ ಎಲ್ಲಾ ಪ್ರಮುಖ ಪ್ರತಿಭಟನೆಗಳ ಸಮಯದಲ್ಲಿ ಜಮಾತ್‌ಗೆ ಬೀದಿ ಕಾಳಗ ನಡೆಸಲು ಸಾಂಪ್ರದಾಯಿಕ ಶಕ್ತಿಯಾಗಿ ಅನುಕೂಲ ಕಲ್ಪಿಸಿತ್ತು.

ಬಾಂಗ್ಲಾದೇಶದ ಸ್ಥಾಪಕ ಪಿತಾಮಹ ಮುಜಿಬುರ್ ರೆಹಮಾನ್‌ನಿಂದ ನಿಷೇಧಕ್ಕೊಳಗಾದ ಜಮಾತ್ ಅನ್ನು 1975 ರಲ್ಲಿ ಮಿಲಿಟರಿ ದಂಗೆಯಲ್ಲಿ ಮುಜೀಬ್ ಹತ್ಯೆಯ ಹಿನ್ನೆಲೆಯಲ್ಲಿ ಅಧಿಕಾರಕ್ಕೆ ಬಂದ BNP ಸಂಸ್ಥಾಪಕ ಜಿಯಾವುರ್ ರೆಹಮಾನ್ ಮತ್ತೆ ರಾಜಕೀಯ ಮುಖ್ಯವಾಹಿನಿಗೆ ತಂದರು. ಅವರು ಜಮಾತ್‌ ಮೇಲಿನ ನಿಷೇಧವನ್ನು ತೆಗೆದುಹಾಕಿದ್ದರು. 1981 ರಲ್ಲಿ ಜಿಯಾವುರ್ ರೆಹಮಾನ್ ಸಹ ಹತ್ಯೆಗೀಡಾದರು ಮತ್ತು ಅವರ ವಿಧವೆ ಖಲೀದಾ ಜಿಯಾ ಅವರು ತಮ್ಮ ಮಗ ತಾರಿಕ್ ರೆಹಮಾನ್ ಅವರೊಂದಿಗೆ ಪಕ್ಷದ ಮುಖ್ಯಸ್ಥರಾಗಿದ್ದರು.

ಹಸೀನಾ ಕೆಲವು ಇಸ್ಲಾಮಿಸ್ಟ್ ಪಕ್ಷಗಳೊಂದಿಗೆ ಮೈತ್ರಿಯನ್ನು ಮುಂದುವರೆಸಿದರೂ, ಜಮಾತ್ ಮತ್ತು ಇತರ ಪ್ರಮುಖ ಗುಂಪುಗಳು ಪ್ರಚಂಡ ಒತ್ತಡಕ್ಕೆ ಒಳಗಾಗಿದ್ದವು ಮತ್ತು ಆಕೆಯ ಆಳ್ವಿಕೆಯಲ್ಲಿ ಬಾಂಗ್ಲಾದೇಶದ ಸಂಪೂರ್ಣವಾಗಿ ಹಿನ್ನಡೆ ಅನುಭವಿಸಿದ್ದವು.

ಪುನರಾಗಮನದ ಯತ್ನ: ಈಗ ಹಸೀನಾ ಅವರ ನಿರ್ಗಮನದೊಂದಿಗೆ, ಅವರೆಲ್ಲರೂ ದೇಶದ ರಾಜಕೀಯ ಕೇಂದ್ರಬಿಂದುವಿಗೆ ಮರಳಲು ನಿರ್ಧರಿಸಿದ್ದಾರೆ. ಆದರೆ ಹಿಂದಿನದಕ್ಕಿಂತ ಭಿನ್ನವಾಗಿ, ಬಾಂಗ್ಲಾದೇಶದ ಭವಿಷ್ಯದ ಮತ್ತು ಸಾಮಾನ್ಯ ರಾಜಕೀಯ ಮತ್ತು ಸಾಮಾಜಿಕ ಕಾರ್ಯಸೂಚಿಯ ಬಗ್ಗೆ ಇದೇ ರೀತಿಯ ದೃಷ್ಟಿಕೋನವನ್ನು ಹಂಚಿಕೊಳ್ಳುವ ಎಲ್ಲಾ ಇಸ್ಲಾಮಿಸ್ಟ್ ಪಕ್ಷಗಳು ಈಗ BNP ಅಥವಾ Awami League ಗಿಂತ ಹೆಚ್ಚಾಗಿ ಪರಸ್ಪರ ಹೊಂದಾಣಿಕೆ ಮಾಡಿಕೊಳ್ಳಲು ಯೋಚಿಸುತ್ತಿರುವುದು ಸ್ಪಷ್ಟವಾಗುತ್ತಿದೆ.

ಆದಾಗ್ಯೂ, ದೇಶದಲ್ಲಿ ಹಸೀನಾ ವಿರೋಧಿ ಭಾವನೆಗಳು ಇನ್ನೂ ಪ್ರಬಲವಾಗಿರುವುದರಿಂದ, ಪ್ರಮುಖ ಇಸ್ಲಾಮಿಸ್ಟ್ ಪಕ್ಷಗಳು ಹಿಂದಿನ ಚುನಾವಣೆಗಳಲ್ಲಿ ಅವಾಮಿ ಲೀಗ್‌ನೊಂದಿಗೆ ಮೈತ್ರಿ ಮಾಡಿಕೊಂಡವರನ್ನು ಕೈಬಿಡಲು ನಿರ್ಧರಿಸಿವೆ.

44 ಕ್ಕೂ ಹೆಚ್ಚು ರಾಜಕೀಯ ಪಕ್ಷಗಳನ್ನು ಬಾಂಗ್ಲಾದೇಶ ಚುನಾವಣಾ ಆಯೋಗವು ಗುರುತಿಸಿದೆ, ಅದರಲ್ಲಿ 11 ಇಸ್ಲಾಮಿಸ್ಟ್ ಪಕ್ಷಗಳು ಮತ್ತು ಸಂಘಟನೆಗಳಿವೆ. ಆದರೆ ಒಟ್ಟಾರೆಯಾಗಿ ದೇಶದಲ್ಲಿ ವಿವಿಧ ಸಾಂಸ್ಥಿಕ ಸಾಮರ್ಥ್ಯಗಳ ಸುಮಾರು 70 ಇಸ್ಲಾಮಿಸ್ಟ್ ಪಕ್ಷಗಳಿವೆ.

ಇಸ್ಲಾಮಿಕ್ ರಾಜ್ಯಕ್ಕಾಗಿ ಮಹಾ ಮೈತ್ರಿ: ಕಳೆದ 50 ವರ್ಷಗಳಲ್ಲಿ ರಾಜಕೀಯ ಮತ್ತು ಸೈದ್ಧಾಂತಿಕ ಭಿನ್ನಾಭಿಪ್ರಾಯಗಳಿಂದ ಈ ರಾಜಕೀಯ ಪಕ್ಷಗಳು ಒಂದಾಗಲು ಸಾಧ್ಯವಾಗಲಿಲ್ಲ. ಆದರೆ ಈಗ ದೊಡ್ಡ ಇಸ್ಲಾಮಿಸ್ಟ್ ಪಕ್ಷಗಳ ನಡುವಿನ ಪ್ರಯತ್ನವು ತಮ್ಮ ಭಿನ್ನಾಭಿಪ್ರಾಯಗಳನ್ನು ಪರಿಹರಿಸುವುದು ಮತ್ತು ಬಾಂಗ್ಲಾದೇಶದಲ್ಲಿ ಇಸ್ಲಾಮಿಕ್ ರಾಜ್ಯವನ್ನು ರಚಿಸಲು ಸಮಾನ ಮನಸ್ಕ ಪಕ್ಷಗಳ ಮಹಾಮೈತ್ರಿಕೂಟವನ್ನು ರಚಿಸುವುದು ಈ ಮಹಾಘಟಬಂಧನ್‌ ನ ಉದ್ದೇಶ.

ಇಸ್ಲಾಮಿ ಆಂದೋಳನ್ ಪಕ್ಷದ ಪ್ರಧಾನ ಕಾರ್ಯದರ್ಶಿ ಯೂನಸ್ ಅಹ್ಮದ್ ಅವರು ಕಲರ್ ಕೊಂತೋಗೆ "ನಮ್ಮ ಅನೈಕ್ಯತೆಯ ಕಾರಣದಿಂದಾಗಿ ಕಳೆದ 15 ವರ್ಷಗಳಿಂದ ಹಾಗೂ "ಫ್ಯಾಸಿಸ್ಟ್ ಆಡಳಿತ" ದಿಂದಾಗಿ ದಮನಕಾರಿ ಆಡಳಿತದ ಚಿತ್ರಹಿಂಸೆಯನ್ನು ಅನುಭವಿಸಿದ್ದಾರೆ ಎಂದು ಹೇಳಿದರು.

“ಇಸ್ಲಾಮಿಕ್ ರಾಜ್ಯವನ್ನು ರಚಿಸಲು, ನಮ್ಮ ಭಿನ್ನಾಭಿಪ್ರಾಯಗಳನ್ನು ಕೊನೆಗೊಳಿಸಲು ಮಾತುಕತೆಗಳಲ್ಲಿ ಸೇರಲು ನಾವು ಎಲ್ಲರನ್ನು ಆಹ್ವಾನಿಸಿದ್ದೇವೆ. ನಿಜವಾದ ಇಸ್ಲಾಮಿಕ್ ರಾಜಕೀಯ ರಚನೆಯನ್ನು ರಚಿಸುವುದು ನಮ್ಮ ಏಕೈಕ ಗುರಿಯಾಗಿದೆ ಎಂದು ಅಹ್ಮದ್ ಸ್ಪಷ್ಟಪಡಿಸಿದ್ದಾರೆ.

ಭಾರತಕ್ಕೆ ಸವಾಲು: ಇಸ್ಲಾಮಿಸ್ಟ್ ಪಕ್ಷಗಳ ನಡುವಿನ ಪ್ರಸ್ತುತ ಮಾತುಕತೆಗಳು ಮುಂಬರುವ ದಿನಗಳಲ್ಲಿ ಹೇಗೆ ಪ್ರಗತಿ ಸಾಧಿಸುತ್ತವೆ ಎಂಬುದು ಸ್ಪಷ್ಟವಾಗಿಲ್ಲ. ಕ್ಷುಲ್ಲಕ ಪೈಪೋಟಿ ಮತ್ತು ಸೈದ್ಧಾಂತಿಕ ಭಿನ್ನಾಭಿಪ್ರಾಯಗಳು ಅವರನ್ನು ಇಲ್ಲಿಯವರೆಗೆ ದೂರವಿಟ್ಟಿದ್ದವು ಮತ್ತು ಈ ಹಿಂದೆ ಏಕತೆಯ ಮಾತುಕತೆಗಳ ಹೊರತಾಗಿಯೂ ಅವರು ಒಟ್ಟಿಗೆ ಬರಲು ಸಾಧ್ಯವಾಗಿರಲಿಲ್ಲ.

ಆದಾಗ್ಯೂ, ಕಳೆದ 15 ವರ್ಷಗಳಲ್ಲಿ ಅವರು ರಾಜಕೀಯದಲ್ಲಿ ನಿರ್ಲಕ್ಷಕ್ಕೊಳಗಾಗಿದ್ದರು ಮತ್ತು ಹಸೀನಾ ಸರ್ಕಾರದ ತೀವ್ರ ಒತ್ತಡದಲ್ಲಿದ್ದರು. ಈ ಬೆಳವಣಿಗೆಯಿಂದಾಗಿ ಅವರ ಭವಿಷ್ಯದ ಕಾರ್ಯತಂತ್ರವನ್ನು ವಿರಾಮಗೊಳಿಸಲು ಮತ್ತು ಮರು-ಆಲೋಚಿಸಲು ಅವರಿಗೆ ಸಮಯವನ್ನು ದೊರಕಿದಂತಾಗಿದೆ.

ಇದು ಭವಿಷ್ಯದಲ್ಲಿ ಎಲ್ಲಾ ಇಸ್ಲಾಮಿಸ್ಟ್ ಪಕ್ಷಗಳ ನಡುವಿನ ಮಹಾಮೈತ್ರಿಗೆ ಕಾರಣವಾಗಬಹುದೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ ಆದರೆ ಪ್ರಸ್ತುತ ಸಂಘಟಿತ ಪ್ರಯತ್ನವು ಖಂಡಿತವಾಗಿಯೂ ಹೊಸ ದೆಹಲಿಯ ನೀತಿ ಯೋಜಕರಿಗೆ ಹೊಸ ಸವಾಲುಗಳನ್ನು ಎಸೆದಿವೆ.

ಅಸ್ಥಿರ ವಾತಾವರಣ: ಹಸೀನಾ ಅವರ ನಿರ್ಗಮನ ಮತ್ತು ಬಾಂಗ್ಲಾದೇಶದಲ್ಲಿ ಧಾರ್ಮಿಕ ಅಲ್ಪಸಂಖ್ಯಾತರ ಮೇಲಿನ ದಾಳಿಯ ಘಟನೆಗಳು ಭಾರತದಲ್ಲಿ ಗಂಭೀರ ಕಳವಳವನ್ನು ಉಂಟುಮಾಡಿದವು ಮತ್ತು ಸಾಮಾಜಿಕ ಮಾಧ್ಯಮದಲ್ಲಿ ಕೆಲವು ಬಲವಾದ ಬಾಂಗ್ಲಾದೇಶಿ ವಿರೋಧಿ ಕಾಮೆಂಟ್‌ಗಳಿಗೆ ಕಾರಣವಾಯಿತು. ಇದು ಕಳೆದ ವಾರಗಳಲ್ಲಿ ಉಭಯ ದೇಶಗಳ ನಡುವೆ ಚಾಲ್ತಿಯಲ್ಲಿದ್ದ ಅನಿಶ್ಚಿತತೆಯ ವಾತಾವರಣವನ್ನು ಹೆಚ್ಚಿಸಿದೆ.

ಭಾರತದ ಬಾಂಗ್ಲಾದೇಶಿ ವಿರೋಧಿ ಹೇಳಿಕೆಗಳು ಮತ್ತು ಭಾರತದಲ್ಲಿ ಮುಸ್ಲಿಮರ ದಾಳಿಯ ಘಟನೆಗಳು ನೆರೆಯ ಬಾಂಗ್ಲಾ ದೇಶದ ಜನರ ಮನಸ್ಸಿನಲ್ಲಿ ದೊಡ್ಡ ಪರಿಣಾಮವನ್ನೇ ಸೃಷ್ಟಿಸಿದ್ದವು. ಆದರೆ ಹಸೀನಾ ಅವರ ಚತುರ ನಿರ್ವಹಣೆ ಮತ್ತು ಆಡಳಿತದ ಮೇಲಿನ ಸಂಪೂರ್ಣ ನಿಯಂತ್ರಣವು ಅಂತಹ ಯಾವುದೇ ಟೀಕೆಗಳಿಗೆ ಅಡ್ಡಿಯಾಗದಂತೆ ಮತ್ತು ಭಾರತ-ಬಾಂಗ್ಲಾದೇಶದ ಸಂಬಂಧಗಳ ಪ್ರಗತಿಗೆ ಅಡ್ಡಿಯಾಗದಂತೆ ನೋಡಿಕೊಂಡಿದ್ದವು.

ಈಗ, ಬಾಂಗ್ಲಾದೇಶದಲ್ಲಿ ಬದಲಾದ ರಾಜಕೀಯ ವಾತಾವರಣದಲ್ಲಿ, ಭಾರತದಲ್ಲಿ ಅಂತಹ ಯಾವುದೇ ಘಟನೆಯು, ನೆರೆಯ ದೇಶದಲ್ಲಿ ದೊಡ್ಡ ಪರಿಣಾಮವನ್ನು ಬೀರುವುದು ಮಾತ್ರವಲ್ಲದೆ ದೀರ್ಘಕಾಲೀನ ಪ್ರತಿಭಟನೆಗೆ ದಾರಿಮಾಡಿಕೊಡುತ್ತದೆ. ಇದು ವಿಶೇಷವಾಗಿ, ಹಿಂದಿನದಕ್ಕಿಂತ ದೊಡ್ಡ ಪರಿಣಾಮ ಉಂಟಾಗುವಂತೆ ಮಾಡುವುದು ಇಸ್ಲಾಮಿಸ್ಟ್‌ಗಳ ಯೋಜನೆಗಳಾಗಿವೆ.

ಬಾಂಗ್ಲಾದೇಶದಲ್ಲಿ ಹೆಚ್ಚು ದೊಡ್ಡ ಪರಿಣಾಮ ಬೀರುವ ಮತ್ತು ದ್ವಿಪಕ್ಷೀಯ ಸಂಬಂಧಗಳನ್ನು ಮತ್ತೆ ಸರಿಹಾದಿಗೆ ತರಲು ಉಭಯ ದೇಶಗಳ ಪ್ರಯತ್ನವನ್ನು ನಿಧಾನಗೊಳಿಸುವ ಭಾರತದ ಬೆಳವಣಿಗೆಗಳ ಬಗ್ಗೆ ಭಾರತದ ರಾಜತಾಂತ್ರಿಕರು ಜಾಗರೂಕರಾಗಿರಬೇಕು.