ಮೂರು ಗಡಿನಾಡ ಲೋಕಸಭಾ ಕ್ಷೇತ್ರಗಳನ್ನು ಕಾಡುತ್ತಿರುವ ಗಡಿ ಸಮಸ್ಯೆಯ ʼಗುಮ್ಮʼ

ಸದ್ಯದ ರಾಜಕೀಯ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ನೋಡಿದರೆ ದಶಕಗಳ ಕಾಲದ ಕರ್ನಾಟಕ-ಮಹಾರಾಷ್ಟ್ರ ಗಡಿ ವಿವಾದ ಮತ್ತು ಮಹಾರಾಷ್ಟ್ರ ಏಕೀಕರಣ ಸಮಿತಿಯ ಪಾತ್ರ ಮೇ ಏಳರಂದು ನಡೆಯಲಿರುವ ಲೋಕಸಭಾ ಚುನಾವಣೆಯಲ್ಲಿ ಮುಂಬೈ ಕರ್ನಾಟಕ ಭಾಗದ ಉತ್ತರ ಕನ್ನಡ, ಬೆಳಗಾವಿ ಹಾಗೂ ಚಿಕ್ಕೋಡಿ ಕ್ಷೇತ್ರಗಳ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಕಂಡು ಬರುತ್ತಿದೆ.

ಜನವರಿ 2024 ರಲ್ಲಿ, ಲೋಕಸಭೆಗೆ ಚುನಾವಣೆಯ ಘೋಷಣೆಗೆ ಮುಂಚೆಯೇ, ಸಂಸದ ಮತ್ತು ಮಹಾರಾಷ್ಟ್ರದ ಗಡಿ ವಿವಾದ ಸಮಿತಿಯ ಅಧ್ಯಕ್ಷ ಧೈರ್ಯಶೀಲ ಮಾನೆ ಅವರು ಬೆಳಗಾವಿಯಲ್ಲಿ ಹೇಳಿದ್ದು ಹೀಗೆ; “ಕೆಲವು ಕಾನೂನು ಸಮಸ್ಯೆಗಳು ಮಹಾರಾಷ್ಟ್ರ ಮತ್ತು ಕರ್ನಾಟಕ ನಡುವಿನ ಗಡಿ ವಿವಾದದ ಪರಿಹಾರವನ್ನು ವಿಳಂಬಗೊಳಿಸುತ್ತಿವೆ. ವಿವಾದವನ್ನು ಪರಿಹರಿಸಲು ಮಹಾರಾಷ್ಟ್ರ ಸರ್ಕಾರವು ಕೆಲವು ಕಾನೂನುಗಳಿಗೆ ಕೆಲವು ತಿದ್ದುಪಡಿಗಳನ್ನು ಶೀಘ್ರದಲ್ಲೇ ತರಲಿದೆ. ಕೆಲವು ಸ್ಥಳೀಯ ನಾಯಕರು ಮಾಡಿದ ಕೆಲವು ತಪ್ಪುಗಳು ಹಲವಾರು ದಶಕಗಳಿಂದ ಸುಪ್ರೀಂ ಕೋರ್ಟ್‌ನಲ್ಲಿ ಪ್ರಕರಣ ತೀರ್ಮಾನವಾಗದೆ ಉಳಿಯಲು ಕಾರಣವಾಗಿದೆ.

ಈ ರೀತಿಯ ಹೇಳಿಕೆ ನೀಡುವ ಮೂಲಕ ಧೈರ್ಯಶೀಲ್ ಅವರು ಕರ್ನಾಟಕ ಮತ್ತು ಮಹಾರಾಷ್ಟ್ರದ ಬೆಳಗಾವಿಯ ದಶಕಗಳ ಗಡಿ ವಿವಾದವನ್ನು ಚುನಾವಣೆ ಕಣದ ಮುನ್ನೆಲೆಗೆ ತಂದಿದ್ದಾರೆ.

ಗಡಿ ವಿವಾದ ಕೆಣಕಿದ ಮಹಾರಾಷ್ಟ್ರ

ಲೋಕಸಭೆ ಚುನಾವಣೆಯಲ್ಲಿ ಕರ್ನಾಟಕ-ಮಹಾರಾಷ್ಟ್ರ ಗಡಿ ವಿವಾದವು ಸಮಸ್ಯೆಯಾಗುವಂತೆ ಕಾಣದಿದ್ದರೂ, ಮೂರು ಪ್ರಮುಖ ಲೋಕಸಭಾ ಕ್ಷೇತ್ರಗಳನ್ನು ಒಳಗೊಂಡಿರುವ ಮುಂಬೈ ಕರ್ನಾಟಕ ಪ್ರದೇಶದಲ್ಲಿ ಸಮಸ್ಯೆಯ ಒಳಹರಿವಿನ ಪಾತ್ರವನ್ನು ವಹಿಸುತ್ತದೆ; ಬೆಳಗಾವಿ ಮತ್ತು ಚಿಕ್ಕೋಡಿ. ಉತ್ತರ ಕನ್ನಡ ಕ್ಷೇತ್ರವು ಗಡಿ ವಿವಾದದ ಪರಿಣಾಮ ಮತ್ತು ಮಹಾರಾಷ್ಟ್ರ ಏಕೀಕರಣ ಸಮಿತಿ (ಎಂಇಎಸ್) ಪಾತ್ರವನ್ನು ನಿರ್ಲಕ್ಷಿಸಲು ಸಾಧ್ಯವಿಲ್ಲ ಎನ್ನಿಸುತ್ತಿದೆ.

2023 ರ ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಠೇವಣಿ ಕಳೆದುಕೊಂಡು ಅವಮಾನ ಅನುಭವಿಸಿದ ಎಂಇಎಸ್ ಮತ್ತೆ ಚುನಾವಣೆಯಲ್ಲಿ ತನ್ನ ಅದೃಷ್ಟ ಪರೀಕ್ಷಿಸಲು ಲೋಕಸಭೆ ಚುನಾವಣೆಯಲ್ಲಿ ಸ್ಪರ್ಧಿಸುತ್ತಿದೆ. ಬೆಳಗಾವಿ ಲೋಕಸಭಾ ಕ್ಷೇತ್ರದಿಂದ ಎಂಇಎಸ್‌ನ ಮಹಾದೇವ ಪಾಟೀಲ ಸೇರಿದಂತೆ 13 ಜನ ಪಕ್ಷೇತರ ಅಭ್ಯರ್ಥಿಗಳು ಸ್ಪರ್ಧಿಸಿದ್ದಾರೆ. ನಿರಂಜನ್ ದೇಸಾಯಿ ಅವರು ಉತ್ತರ ಕನ್ನಡ ಕ್ಷೇತ್ರದಲ್ಲಿ ಎಂಇಎಸ್ ಪ್ರತಿನಿಧಿಸುವ ಸ್ವತಂತ್ರ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದಾರೆ.

ಎಂಇಎಸ್ ಬೆಳಗಾವಿ ಮತ್ತು ಉತ್ತರ ಕನ್ನಡದಲ್ಲಿ ಪಾತ್ರವನ್ನು ವಹಿಸುವ ನಿರೀಕ್ಷೆಯಿದೆ ಮತ್ತು ಪ್ರಬಲವಾದ ಮರಾಠ ಸಮುದಾಯದ ಮತಗಳು ಯಾವ ರೀತಿಯಲ್ಲಿ ಯಾವ ಕಡೆ ವಾಲುತ್ತವೆ ಎಂಬದು ಇನ್ನೂ ನಿಗೂಢವಾಗಿ ಉಳಿದಿದೆ.

ಸಾಂಪ್ರದಾಯಿಕವಾಗಿ ಗಡಿಯಲ್ಲಿನ ಮರಾಠಿ ಮತದಾರರು ಬಿಜೆಪಿ ಬೆಂಬಲಿಗರು ಮತ್ತು ಎಂಇಎಸ್‌ಗೆ ಹೋಗುವ ಪ್ರತಿಯೊಂದು ಮತವೂ ಬಿಜೆಪಿಯ ಭವಿಷ್ಯದ ಮೇಲೆ ನೇರವಾಗಿ ಪರಿಣಾಮ ಬೀರುತ್ತದೆ. ಈ ಬಾರಿ ಇದರಿಂದಾಗಿ ಕಾಂಗ್ರೆಸ್ ಗೆ ಸಹಕಾರಿಯಾಗುತ್ತದೆ.

ಎಂದು ಹಿರಿಯ ಕಾಂಗ್ರೆಸ್ ನಾಯಕಿ ಮತ್ತು ಉತ್ತರ ಕನ್ನಡ ಕ್ಷೇತ್ರದ ಅಭ್ಯರ್ಥಿ ಅಂಜಲಿ ನಿಂಬಾಳ್ಕರ್ ಅವರ ನಿಕಟವರ್ತಿ ವಾದಿಸುತ್ತಾರೆ.

2021 ರಲ್ಲಿ ಬೆಳಗಾವಿ ಲೋಕಸಭಾ ಕ್ಷೇತ್ರಕ್ಕೆ ನಡೆದ ಕೊನೆಯ ಉಪಚುನಾವಣೆಯಲ್ಲಿ, ಎಂಇಎಸ್ ಅಭ್ಯರ್ಥಿ ಶುಭಂ ಶೆಲ್ಕೆ 1.16-ಲಕ್ಷ ಮತಗಳನ್ನು ಗಳಿಸಿದರು ಮತ್ತು ಇದು ನೇರವಾಗಿ ಬಿಜೆಪಿ ಅಭ್ಯರ್ಥಿ ಮಂಗಳಾ ಅಂಗಡಿ (ಹಾಲಿ ಸಂಸದೆ) ಅವರ ಚುನಾವಣಾ ಗೆಲುವಿನ ಮೇಲೆ ಪರಿಣಾಮ ಬೀರಿತು, ಅವರು ಕಾಂಗ್ರೆಸ್‌ನ ಸತೀಶ್ ಜಾರಕಿಹೊಳಿ ವಿರುದ್ಧ ಸುಮಾರು 4000 ಮತಗಳಿಂದ ಗೆಲುವು ಸಾಧಿಸಿದರೆನ್ನುವುದು ಇಲ್ಲಿ ಮುಖ್ಯ.

ಬಿಜೆಪಿ ಭವಿಷ್ಯದ ಮೇಲೆ ಪರಿಣಾಮ ಬೀರಲು ಎಂಇಎಸ್

ಬೆಳಗಾವಿಯ ಮರಾಠಿ ಪತ್ರಕರ್ತರ ಪ್ರಕಾರ, ಎಂಇಎಸ್ ಬೆಳಗಾವಿಯಲ್ಲಿ ಬಿಜೆಪಿ ಅಭ್ಯರ್ಥಿ ಜಗದೀಶ್ ಶೆಟ್ಟರ್ ಅವರ ಅವಕಾಶಕ್ಕೆ ಧಕ್ಕೆ ತರಬಹುದು. ಮುಂಬೈ-ಕರ್ನಾಟಕ ಪ್ರದೇಶದ ಅಡಿಯಲ್ಲಿ ಬರುವ ಕೆಲವು ವಿಧಾನಸಭಾ ಕ್ಷೇತ್ರಗಳಲ್ಲಿ, ಎಂಇಎಸ್ ಅಭ್ಯರ್ಥಿಗಳು ಸಾಕಷ್ಟು ಮತಗಳನ್ನು ಗಳಿಸುವ ಸಾಧ್ಯತೆ ಇದೆ. ಇದು ಅಂತಿಮವಾಗಿ ಬಿಜೆಪಿ ಮೇಲೆ ಪರಿಣಾಮ ಬೀರುತ್ತದೆ.

ಹಿರಿಯ ಪತ್ರಕರ್ತ, ಋಷಿಕೇಶ್ ಬಹದ್ದೂರ್ ದೇಸಾಯಿ ಅವರು, ಈ ಲೋಕಸಭಾ ಚುನಾವಣೆಯಲ್ಲಿ ಎಂಇಎಸ್‌ ಪಾತ್ರದ ಬಗ್ಗೆ ತಮ್ಮದೇ ಆದ ಅಭಿಪ್ರಾಯ ಹೇಳುತ್ತಾರೆ. ಅವರ ಪ್ರಕಾರ, ಈ ಬಾರಿಯ ಸಂಸತ್ ಚುನಾವಣೆಯಲ್ಲಿ ಎಂಇಎಸ್ ಇತರ ಪಕ್ಷಗಳ ವಿರುದ್ಧ ಹೋರಾಟದಲ್ಲಿ ಕೆಲವು ಸಮಸ್ಯೆಗಳನ್ನು ಎದುರಿಸುತ್ತಿದೆ. ಶಿವಾಜಿ ಸುಂತಾಕರ್ ನೇತೃತ್ವದ ಎಂಇಎಸ್‌ನ ಒಂದು ಬಣ ಇತ್ತೀಚೆಗೆ ಬೆಳಗಾವಿಯಲ್ಲಿ ಬಿಜೆಪಿಗೆ ಬೆಂಬಲ ಘೋಷಿಸಿದೆ. ಸುಂಟಕರ್‌, ಬೆಳಗಾವಿಯ ಎಂಇಎಸ್‌ ಅಧಿಕೃತ ಅಭ್ಯರ್ಥಿ ಮಹಾದೇವ ಪಾಟೀಲ ಅವರೊಂದಿಗೆ ಬೆರೆಯಲು ನಿರಾಕರಿಸಿದ್ದಾರೆ. ಲೋಕಸಭೆ ಚುನಾವಣೆಯಲ್ಲಿ ಬಿಜೆಪಿ ಅಭ್ಯರ್ಥಿಯನ್ನು ಬೆಂಬಲಿಸಿದರೆ ಮರಾಠಿ ಮಾತನಾಡುವ ಪ್ರದೇಶಗಳನ್ನು ಮಹಾರಾಷ್ಟ್ರದೊಂದಿಗೆ ವಿಲೀನಗೊಳಿಸುವ ಎಂಇಎಸ್ ಪಕ್ಷದ ಅಂತಿಮ ಉದ್ದೇಶ ಸುಲಭವಾಗಿ ಈಡೇರುತ್ತದೆ ಎಂದು ಸುಂತಾಕರ್ ಭಾವಿಸಿದ್ದಾರೆ. ಎಂಇಎಸ್ ಹೊಂದಿಕೊಂಡಿರುವ ಸಿದ್ಧಾಂತಗಳಲ್ಲಿ ಹಿಂದುತ್ವವೂ ಸೇರಿದೆ ಎಂದು ಸುಂತಾಕರ್ ಭಾವಿಸಿದ್ದಾರೆ” ಎಂದು ರಿಷಿಕೇಶ್ ಅಭಿಪ್ರಾಯಪಟ್ಟಿದ್ದಾರೆ.

ಆದರೆ, ಸುಂತಾಕರ್ ಅವರ ನಿಲುವಿಗೆ ಮಣಿಯದ ಮಹಾದೇವ ಪಾಟೀಲ ಅವರು ಘೋಷಣೆಗಳಿರುವ ಕರಪತ್ರಗಳನ್ನು ಹಂಚುತ್ತಿದ್ದಾರೆ; "ಹರ್ ಹರ್ ಮಹಾದೇವ್, ಹರ್ ಹರ್ ಮಹಾದೇವ್". ರಾಜಕೀಯ ಅಡೆತಡೆಗಳು ಮತ್ತು ಭಿನ್ನಾಭಿಪ್ರಾಯಗಳ ಬಗ್ಗೆ ಚಿಂತಿಸದೆ ಎಂಇಎಸ್ ಮರಾಠಿ ಪರವಾಗಿ ಹೋರಾಟ ನಡೆಸಲಿದೆ ಎಂದು ಸಾರ್ವಜನಿಕವಾಗಿ ಘೋಷಿಸಿದರು.

ಆಡಳಿತಾರೂಢ ಕಾಂಗ್ರೆಸ್ ಬಗ್ಗೆ ಕನ್ನಡಪರ ಸಂಘಟನೆಗಳು ವಿವರಣೆ ಕೇಳುತ್ತಿವೆ

ಅದೇನೇ ಇದ್ದರೂ, ಒಂದು ವಿಷಯ ಖಚಿತ. ಸ್ಥಳೀಯ ಸಂಸ್ಥೆಗಳಿಂದ ಹಿಡಿದು ಸಂಸತ್ತಿನ ಚುನಾವಣೆಗಳು ಸೇರಿದಂತೆ ಪ್ರತಿಯೊಂದು ಸಂಭವನೀಯ ಚುನಾವಣೆಯಲ್ಲೂ ಗಡಿ ವಿವಾದವನ್ನು ಜೀವಂತವಾಗಿಡಲು ಎಂಇಎಸ್ ಎಲ್ಲ ಪ್ರಯತ್ನ ಮಾಡುತ್ತಿದೆ. ಗಡಿ ಸಮಸ್ಯೆ ಇತ್ಯರ್ಥಕ್ಕೆ ರಾಜಕೀಯ ಪಕ್ಷಗಳ ಮೇಲೆ ಒತ್ತಡ ಹೇರುವ ಆಂದೋಲನ ನಡೆಸಲು ಎಂಇಎಸ್ ಮುಂದಾಗಿದೆ. ಇದೇ ವೇಳೆ ಬೆಳಗಾವಿ ಜಿಲ್ಲಾ ಕನ್ನಡ ಸಂಘಟನೆಗಳ ಕ್ರಿಯಾ ಸಮಿತಿ ಅಧ್ಯಕ್ಷ ಅಶೋಕ ಚಂದರಗಿ, ಗಡಿ ಸಮಸ್ಯೆ ಬಗೆಹರಿಸುವ ಬಗ್ಗೆ ಕಾಂಗ್ರೆಸ್ ಸರ್ಕಾರದ ನಿಲುವು ಹಾಗೂ ಲೋಕಸಭೆ ಚುನಾವಣೆಯಲ್ಲಿ ಸ್ಪರ್ಧಿಸುವ ಅಭ್ಯರ್ಥಿಗಳ ನಿಲುವು ಏನು ಎಂಬುದನ್ನು ವಿವರಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಆದರೆ ವಿಪರ್ಯಾಸವೆಂದರೆ, ಗಡಿ ವಿವಾದ ಸಾರ್ವಜನಿಕ ಚರ್ಚೆಯ ಮುಂಚೂಣಿಗೆ ಬರುವುದು ಚುನಾವಣೆಯ ಸಂದರ್ಭದಲ್ಲಿ ಮಾತ್ರ. ಈ ಬಾರಿಯ ಬಿಸಿಲಿನ ಬೇಗೆಯಂತೆ ಈ ವಿವಾದ ಈಗ ತಾರಕಕ್ಕೇರುತ್ತಿದೆ. ಒಂದು ರೀತಿಯಲ್ಲಿ ಈ ಗಡಿ ವಿವಾದ ಇತ್ತ ಕನ್ನಡಿಗರ ಅತ್ತ, ಮರಾಠಿಗರ ಅಸ್ಮಿತೆಯ ಪ್ರಶ್ನೆಯಾಗಿದೆ. ಅಷ್ಟೇ ಅಲ್ಲ ಅಸ್ತಿತ್ವದ ಪ್ರಶ್ನೆ ಕೂಡ ಆಗಿದೆ. ಮರಾಠಿ ಭಾಷಿಗರ ಒಲವು ಗಳಿಸಲು ಗಡಿಯಲ್ಲಿನ ೮೬೫ ಗ್ರಾಮಗಳನ್ನು ಮಹಾರಾಷ್ಟ್ರಕ್ಕೆ ಸೇರಿಸಬೇಕೆನ್ನುವ ಏಕೈಕ ಉದ್ದೇಶದಿಂದ ಎಂಇಎಸ್‌ ಈ ಬಾರಿ ತನ್ನ ಅಭ್ಯರ್ಥಿಗಳನ್ನು ಕಣಕ್ಕೆ ಇಳಿಸಿದೆ. ಬೆಳಗಾವಿ, ಬೀದರ್‌, ಭಾಲ್ಕಿ, ಖಾನಾಪುರ, ನಿಪ್ಪಾಣಿ, ಕಾರವಾರ ಸೇರಿದಂತೆ ಸಂಯುಕ್ತ ಮಹಾರಾಷ್ಟ್ರ ಆಗಬೇಕೆನ್ನುವುದು ಎಂಇಎಸ್‌ ನ ಇರಾದೆ. ಆದರೆ, ೨೦೧೩ರ ವಿಧಾನ ಸಭೆಯಲ್ಲಿ ೨ ಸ್ಥಾನಗಳನ್ನು ಗೆದ್ದಿದ್ದು ಹೊರತುಪಡಿಸಿದರೆ, ನಂತರದ ಚುನಾವಣೆಗಳಲ್ಲಿ, ಒಂದೇ ಒಂದು ಸ್ಥಾನವನ್ನೂ, ಎಂಇಎಸ್‌ ಗಳಿಸಿಲ್ಲ.

ಗಡಿಯಲ್ಲಿ ವಿಮೆಯ ಪ್ರಭಾವ

ಬೆಳಗಾವಿಯಲ್ಲಿ ಮರಾಠಿಗರನ್ನು ಸೆಳೆಯುವುದು ಅಲ್ಲದೆ, ಗಡಿ ಪ್ರದೇಶದಲ್ಲಿ ತನ್ನ ಪ್ರಭಾವ ಉಳಿಸಿಕೊಳ್ಳಲು, ಮಹಾರಾಷ್ಟ್ರ ಸರ್ಕಾರವು ಬೆಳಗಾವಿಯಿಂದ ಕೇವಲ ೧.೫ ಕಿ ಮಿ ದೂರದಲ್ಲಿರುವ ಶಿನೋಳಿ ಗ್ರಾಮದಲ್ಲಿ ವಿಶೇಷ ಕಛೇರಿ ತೆಗೆದು, ಅಧಿಕಾರಿಗಳನ್ನು ನಿಯೋಜಿಸಿದೆ. ʻಮಹಾತ್ಮ ಜ್ಯೋತಿ ಫುಲೆ ಜನಾರೋಗ್ಯ ವಿಮೆ ಯೋಜನೆ ಮೂಲಕ ಗಡಿ ಗ್ರಾಮ, ಪಟ್ಟಣದ ನಿವಾಸಿಗಳನ್ನು ಸೆಳೆದುಕೊಳ್ಳಲು, ಬೆಳಗಾವಿ ನಗರದಲ್ಲಿಯೇ ಕೆಲವು ಕೇಂದ್ರಗಳನ್ನು ತೆರೆದು ಮಹಾರಾಷ್ಟ್ರ ಸರ್ಕಾರ ವಿವಾದ ಸೃಷ್ಟಿಸಿತ್ತು. ಆದರೆ, ಕನ್ನಡಿಗರ ಹೋರಾಟದಿಂದ ಆ ಐದು ಕೇಂದ್ರಗಳನ್ನು ಮುಚ್ಚುವುದು ಮಹಾರಾಷ್ಟ್ರ ಸರ್ಕಾರಕ್ಕೆ ಅನಿವಾರ್ಯವಾಯಿತು.

ಹಾಗೆಯೇ ಕರ್ನಾಟಕಕ್ಕೆ ಹೊಂದಿಕೊಂಡಂತಿರುವ ಮಹಾರಾಷ್ಟ್ರದ ಸಾಂಗಲಿ ಜಿಲ್ಲೆಯ ಜತ್ತ ತಾಲ್ಲೂಕಿನ ಪೂರ್ವ ಮತ್ತು ಉತ್ತರ ಭಾಗದ ೪೨ ಗ್ರಾಮಗಳನ್ನು ಕರ್ನಾಟಕಕ್ಕೆ ಸೇರಿಸಿಕೊಳ್ಳಬೇಕು ಎಂದು ಆಗ್ರಹಿಸಿ ಜತ್ತ ತಾಲ್ಲೂಕಿನ ಜನರು ಕೆಲವು ತಿಂಗಳ ಹಿಂದೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಒತ್ತಾಯಿಸಿ ಮನವಿ ಸಲ್ಲಿಸಿದ್ದರು. ಇದೂ ಕೂಡ ಮಹಾರಾಷ್ಟ್ರದ, ಹಾಗೂ ಮರಾಠಿಗಳ ಕಣ್ಣು ಕೆಂಪಾಗಿಸಿತ್ತು.

ಹೀಗೆ ಆರು ದಶಕಗಳಿಂದ ನೆರೆ ರಾಜ್ಯಗಳಾದ ಕರ್ನಾಟಕ ಮತ್ತು ಮಹಾರಾಷ್ಟ್ರ ನಡುವಿನ ಗಡಿ ವಿವಾದ ಸರ್ವ ಒಪ್ಪಿಗೆಯ ಅಂತ್ಯ ಕಾಣುವವರೆಗೂ, ಎಂಇಎಸ್‌ ನಂಥ ಸಂಸ್ಥೆಗಳು ಈ ಭಾವುಕ ಸಂಗತಿಯನ್ನು ಚುನಾವಣಾ ಅಸ್ತ್ರವಾಗಿಸಿಕೊಳ್ಳುವುದಂತೂ ನಿಜ.