ಸಾಂದರ್ಭಿಕ ಚಿತ್ರ
Work Hour Extension Part-1: ಕೆಲಸದ ಅವಧಿ 12 ಗಂಟೆಗೆ ಹೆಚ್ಚಿಸುವ ತೀರ್ಮಾನ; ಕಾರ್ಮಿಕರ ಅಸಮಾಧಾನ
ಅಂಗಡಿಗಳು ಮತ್ತು ವಾಣಿಜ್ಯ ಸಂಸ್ಥೆಗಳಲ್ಲಿ ಕಾರ್ಯ ನಿರ್ವಹಿಸುವ ನೌಕರರ ಕೆಲಸದ ಸಮಯವನ್ನು 12 ಗಂಟೆಗಳಿಗೆ ವಿಸ್ತರಿಸುವುದು. ಎಲ್ಲಾ ಉದ್ಯೋಗಿಗಳಿಗೆ ವಾರಾಂತ್ಯದ ಎರಡು ದಿನ ರಜೆ ನೀಡುವ ಕುರಿತ ಕಾನೂನಿಗೆ ತಿದ್ದುಪಡಿ ತರಲು ಸರ್ಕಾರ ಮುಂದಾಗಿದೆ.
ಖಾಸಗಿ ಕ್ಷೇತ್ರದಲ್ಲಿ ಕೆಲಸದ ಅವಧಿ ಹೆಚ್ಚಳ ಮಾಡುವ ಪ್ರಸ್ತಾಪ ರಾಜ್ಯದಲ್ಲಿ ಪರ-ವಿರೋಧದ ಚರ್ಚೆಗೆ ವೇದಿಕೆಯಾಗಿದೆ.
ʼಕರ್ನಾಟಕ ಅಂಗಡಿಗಳು ಮತ್ತು ವಾಣಿಜ್ಯ ಸಂಸ್ಥೆಗಳ ಕಾಯ್ದೆ-1961ʼ ಕ್ಕೆ ತಿದ್ದುಪಡಿಗೆ ಮುಂದಾಗಿರುವ ರಾಜ್ಯ ಸರ್ಕಾರ, ಕೆಲಸದ ಅವಧಿಯನ್ನು ಗರಿಷ್ಠ 12 ಗಂಟೆಗಳಿಗೆ ಹೆಚ್ಚಿಸಲು ಪ್ರಸ್ತಾವ ಮುಂದಿರಿಸಿದೆ.
ಈ ಹಿಂದೆ ಐಟಿ ದಿಗ್ಗಜರಾದ ಇನ್ಫೋಸಿಸ್‌ ಸಂಸ್ಥಾಪಕ ನಾರಾಯಣಮೂರ್ತಿ ಅವರು ವಾರಕ್ಕೆ 70 ಗಂಟೆಗಳ ಕೆಲಸ ಮಾಡಬೇಕೆಂದು ವಾದಿಸಿದರೆ, ಇನ್ನು ಒಂದು ಹೆಜ್ಜೆ ಮುಂದೆ ಹೋಗಿ ಎಲ್‌ ಅಂಡ್‌ ಟಿ ಅಧ್ಯಕ್ಷ ಎಸ್‌.ಎನ್‌. ಸುಬ್ರಹ್ಮಣ್ಯನ್‌ ಅವರು ವಾರಕ್ಕೆ 90 ಗಂಟೆ ಕೆಲಸ ಮಾಡಬೇಕು ಎಂದು ಹೇಳುವ ಮೂಲಕ ಕಾರ್ಮಿಕ ವಲಯದ ಕೆಂಗಣ್ಣಿಗೆ ಗುರಿಯಾಗಿದ್ದರು.
ಈಗ ರಾಜ್ಯ ಸರ್ಕಾರವೇ ಖಾಸಗಿ ಉದ್ಯಮಿಗಳ ಹೇಳಿಕೆಗೆ ಪೂರಕವಾಗಿ ದಿನಕ್ಕೆ 12 ಗಂಟೆಗಳ ಕೆಲಸದ ಅವಧಿ ವಿಸ್ತರಿಸಲು ಮುಂದಾಗಿರುವುದು ಇನ್ನಷ್ಟು ಆಕ್ರೋಶಕ್ಕೆ ಕಾರಣವಾಗಿದೆ. ಇನ್ನು ಕೆಲವರು ಕಾರ್ಮಿಕ ಕಾನೂನುಗಳನ್ನು ಸಮರ್ಥಿಸಿಕೊಳ್ಳುತ್ತಿದ್ದಾರೆ.
ಪ್ರಸ್ತುತ, ಕಾಯ್ದೆಯಡಿ 8-9 ಗಂಟೆಗಳ ಕೆಲಸದ ಅವಧಿ ಇದೆ. ಈಗ ತಿದ್ದುಪಡಿ ಕಾಯ್ದೆಯಡಿ ಕೆಲಸದ ಅವಧಿಯನ್ನು 10 ಗಂಟೆಗೆ ವಿಸ್ತರಿಸಲು ತೀರ್ಮಾನಿಸಿದೆ. ಓವರ್ ಟೈಮ್ ಸೇರಿ ದಿನಕ್ಕೆ 12 ಗಂಟೆಗಳ ಗರಿಷ್ಠ ಕೆಲಸಕ್ಕೂ ಅವಕಾಶ ನೀಡಿದೆ. ಆದರೆ, ಸರ್ಕಾರದ ಈ ನಿರ್ಧಾರವನ್ನು ಐಟಿ, ಬಿಪಿಒ ಮತ್ತು ಇತರ ವಲಯಗಳ ಕಾರ್ಮಿಕರ ವಿರೋಧಿಸುತ್ತಿದ್ದಾರೆ.
ಈಗಾಗಲೇ ಐಟಿ, ಚಿಲ್ಲರೆ ವ್ಯಾಪಾರ, ಹೋಟೆಲ್ ಗಳಲ್ಲಿ ಕಾರ್ಮಿಕರು ಹೆಚ್ಚುವರಿ ಸಮಯ ದುಡಿಸುತ್ತಿದ್ದು, ಖಾಸಗಿ ಕಂಪೆನಿಗಳ ಹುನ್ನಾರವನ್ನು ಕಾನೂನುಬದ್ಧಗೊಳಿಸಲು ಸರ್ಕಾರವೇ ಮುಂದಾಗಿದೆ ಎಂಬ ಆರೋಪಗಳೂ ಕೇಳಿ ಬರುತ್ತಿವೆ.
ಕೆಲಸದ ಅವಧಿಯನ್ನು 12 ಗಂಟೆಗೆ ವಿಸ್ತರಿಸಿದರೆ ಕಾರ್ಮಿಕರ ಮೇಲೆ ಒತ್ತಡ ಹೆಚ್ಚಲಿದೆ. ಅನಾರೋಗ್ಯ ಸಮಸ್ಯೆಗಳಿಗೆ ತುತ್ತಾಗುವ ಸಾಧ್ಯತೆ ಇದೆ. ಅಲ್ಲದೇ ಕಾರ್ಮಿಕರ ಕಾರ್ಯದಕ್ಷತೆ ಕೂಡ ಕುಸಿಯಲಿದೆ ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ.
ಪ್ರಸ್ತುತ, ತಿದ್ದುಪಡಿ ಕಾಯ್ದೆಯು ಗುಜರಾತ್, ಮಹಾರಾಷ್ಟ್ರ ಮತ್ತು ಉತ್ತರ ಪ್ರದೇಶದಲ್ಲಿ ಜಾರಿಯಲ್ಲಿದೆ. ಈಗ ಕರ್ನಾಟಕದಲ್ಲೂ ತಿದ್ದುಪಡಿ ಕಾಯ್ದೆ ಜಾರಿಯಾದರೆ ಅಂಗಡಿ ಹಾಗೂ ವಾಣಿಜ್ಯ ಸಂಸ್ಥೆಯಗಳ ಕಾಯ್ದೆಯಡಿ ಬರುವ ಖಾಸಗಿ ವಲಯದ ಕಾರ್ಮಿಕರು ದಿನಕ್ಕೆ 12 ಗಂಟೆ ದುಡಿಯುವುದು ಅನಿವಾರ್ಯವಾಗಲಿದೆ.
ಕೆಲಸದ ಅವಧಿಯನ್ನು ವಿಸ್ತರಿಸಿರುವ ಕುರಿತು ಖಾಸಗಿ ವಲಯದ ವಿವಿಧ ಕ್ಷೇತ್ರಗಳಿಂದ ತೀವ್ರ ಆಕ್ಷೇಪಣೆ ಕೇಳಿಬಂದಿರುವ ಹಿನ್ನೆಲೆಯಲ್ಲಿ 'ದ ಫೆಡರಲ್ ಕರ್ನಾಟಕ' ವಿವಿಧ ಕ್ಷೇತ್ರಗಳಲ್ಲಿ ಕಾರ್ಮಿಕರು ಅಭಿಪ್ರಾಯ, ಹೆಚ್ಚುವರಿ ಕೆಲಸದಿಂದ ಆಗುವ ಅನಾನುಕೂಲದ ಕುರಿತು ಇಂದಿನಿಂದ (ಜೂ.30) ಸರಣಿ ಲೇಖನ ಪ್ರಕಟಿಸುತ್ತಿದೆ.
ಏನಿದು ಕಾಯ್ದೆ?
ಖಾಸಗಿ ವಲಯದ ಕಾರ್ಮಿಕರ ಕೆಲಸ, ಬವಣೆಗಳಿಗಾಗಿ 'ಕರ್ನಾಟಕ ಅಂಗಡಿಗಳು ಮತ್ತು ವಾಣಿಜ್ಯ ಸಂಸ್ಥೆಗಳ ಕಾಯ್ದೆ1961- ಜಾರಿಗೆ ತರಲಾಗಿದೆ.
ಈ ಕಾಯ್ದೆಯು ಎಲ್ಲಾ ಅಂಗಡಿಗಳು, ವಾಣಿಜ್ಯ ಸಂಸ್ಥೆಗಳ ಪಾಳಿ ಸಮಯ, ರಜೆ, ಕೆಲಸದ ವಾತಾವರಣ ಇತ್ಯಾದಿ ಅಂಶಗಳನ್ನು ಒಳಗೊಂಡಿದೆ. ಕಾಯ್ದೆಯ ನಿಬಂಧನೆಗಳು ಮಾಲೀಕರು ಅಥವಾ ಅವರ ಕುಟುಂಬದ ಸದಸ್ಯರು, ಅವಲಂಬಿತರನ್ನು ಹೊರತುಪಡಿಸಿ ಮುಚ್ಚಿರುವ ಅಂಗಡಿ ಅಥವಾ ಸಂಸ್ಥೆಗೆ ಅನ್ವಯಿಸುವುದಿಲ್ಲ.
ಕೆಲಸದ ಅವಧಿ ವಿಸ್ತರಣೆ
ಪ್ರಸ್ತುತ ಕಾರ್ಖಾನೆಗಳ ಕಾಯ್ದೆ 1961ರ ಪ್ರಕಾರ, ಕಾರ್ಮಿಕರು ವಾರಕ್ಕೆ 48 ಗಂಟೆ ಕೆಲಸ ಮಾಡಬೇಕು ಎಂದು ಸೆಕ್ಷನ್ 51 ಹೇಳುತ್ತದೆ. ಕಾರ್ಮಿಕರ ದೈನಂದಿನ ಕೆಲಸದ ಅವಧಿ 9 ಗಂಟೆ ಮೀರುವಂತಿಲ್ಲ. ಒಟ್ಟು ಕೆಲಸದ ಸಮಯ (ಓವರ್ಟೈಮ್ ಸೇರಿ) ಒಂದು ದಿನಕ್ಕೆ ಗರಿಷ್ಠ 10 ಗಂಟೆ ಕೆಲಸ ಮಾಡಬೇಕು. ಆದರೆ, ಸ್ಟಾಕ್‌ ಟೇಕಿಂಗ್ ಅಥವಾ ಲೆಕ್ಕಪತ್ರ ತಯಾರಿಸುವ ದಿನಗಳಲ್ಲಿ ಮಾತ್ರ ಈ ಮಿತಿಯನ್ನು ಮೀರಿ ಕೆಲಸ ಮಾಡಬಹುದು.
ಆದರೆ, ಈಗ ಸರ್ಕಾರ ತಿದ್ದುಪಡಿ ಕಾಯ್ದೆಯಲ್ಲಿ ಕೆಲಸದ ಅವಧಿ 9 ಗಂಟೆಗಳಿಂದ 10ಗಂಟೆಗಳಿಗೆ ವಿಸ್ತರಿಸಿದೆ. ಓವರ್ ಟೈಮ್ ಸೇರಿ ಒಂದು ದಿನಕ್ಕೆ ಗರಿಷ್ಠ 12 ಗಂಟೆ ಕೆಲಸ ಮಾಡಲು ಅವಕಾಶ ಕಲ್ಪಿಸಲಾಗಿದೆ. ವಾರದಲ್ಲಿ ಎರಡು ದಿನ ಕಡ್ಡಾಯವಾಗಿ ರಜೆ ಕೊಡಬೇಕು. ಒಂದು ದಿನ ರಜೆ ನೀಡಿದರೆ ಮತ್ತೊಂದು ದಿನದ ವೇತನ ನಿಡಬೇಕು ಎಂದು ಕಾಯ್ದೆ ಹೇಳುತ್ತದೆ.
ಕೆಲಸದ ಅವಧಿಗೆ ವಿರೋಧವೇನು?
ಈ ಕಾಯ್ದೆಗೆ ಕಾರ್ಮಿಕ ವಲಯದಿಂದ ಭಾರೀ ವಿರೋಧ ವ್ಯಕ್ತವಾಗಿದೆ. ಈ ಕಾಯ್ದೆಯಡಿ ರಾಜ್ಯ ಸರ್ಕಾರವು ಕೆಲಸದ ಅವಧಿ ವಿಸ್ತರಣೆ ಮತ್ತು ಮಹಿಳೆಯರಿಗೆ ರಾತ್ರಿಪಾಳಿ ಕೆಲಸಕ್ಕೆ ಕಾರ್ಮಿಕರ ಒಪ್ಪಿಗೆ ಬೇಕು ಎಂಬ ಷರತ್ತು ಹಾಕಿತ್ತು. ಕಾರ್ಖಾನೆಗಳು ಬಲವಂತದಿಂದ ಕಾರ್ಮಿಕರ ಒಪ್ಪಿಗೆ ಪಡೆಯುತ್ತವೆ ಎಂದು ಸಿಐಟಿಯು ಆರೋಪಿಸಿದೆ.
ಬೃಹತ್ ತಯಾರಿಕಾ ಗುರಿ ನಿಗದಿಪಡಿಸಿ, ಅದು ಈಡೇರಲು ಕಾರ್ಮಿಕರನ್ನು 12 ಗಂಟೆ ದುಡಿಸಿಕೊಳ್ಳಲು ಅನುಮತಿ ನೀಡುವುದು ಕಾರ್ಮಿಕ ವಿರೋಧಿ ನೀತಿಯಾಗುತ್ತದೆ. ವಾರಕ್ಕೆ ಎರಡು ದಿನ ರಜೆ ನೀಡುತ್ತೇವೆ ಎನ್ನುವುದು ಸುಳ್ಳು ಮತ್ತು ಅಪ್ರಾಯೋಗಿಕ. ಕಾರ್ಖಾನೆ ಮಾಲೀಕರ ಲಾಬಿಗೆ ಮಣಿದು ರಾಜ್ಯ ಸರ್ಕಾರವು ನಿಯಮಗಳ ತಿದ್ದುಪಡಿಗೆ ಹೊರಟಿದೆ ಎಂದು ಸಿಐಟಿಯು ರಾಜ್ಯಾಧ್ಯಕ್ಷೆ ವರಲಕ್ಷ್ಮಿ ಅವರು ʼದ ಫೆಡರಲ್ ಕರ್ನಾಟಕʼಕ್ಕೆ ತಿಳಿಸಿದರು.
ಮಹಿಳೆಯರಿಗೆ ರಾತ್ರಿ ಪಾಳಿ ಕೆಲಸ
1961ರ ಕಾರ್ಖಾನೆಗಳ ಕಾಯ್ದೆಯಡಿ ಕಾರ್ಖಾನೆಗಳಲ್ಲಿ ಮಹಿಳೆಯರನ್ನು ರಾತ್ರಿ ಪಾಳಿಯ ಕೆಲಸಕ್ಕೆ ನಿಯೋಜನೆ ಮಾಡುವಂತಿಲ್ಲ. ಮಹಿಳೆಯರು ಬೆಳಿಗ್ಗೆ 6 ಗಂಟೆಯಿಂದ ರಾತ್ರಿ 7 ಗಂಟೆಯವರೆಗೆ ಮಾತ್ರ ಕೆಲಸ ಮಾಡಬೇಕು. ರಾತ್ರಿ ಪಾಳಿಯಲ್ಲಿ ಮಹಿಳೆಯರನ್ನು ಕೆಲಸಕ್ಕೆ ನಿಯೋಜಿಸುವಂತಿಲ್ಲ ಎಂದು ಕಾಯ್ದೆ ಹೇಳುತ್ತದೆ. ಆದರೆ, ರಾಜ್ಯ ಸರ್ಕಾರ 2023ರಲ್ಲಿ ಜಾರಿಗೆ ತಂದಿರುವ ತಿದ್ದುಪಡಿ ಕಾಯ್ದೆಯ 66ನೇ ಸೆಕ್ಷನ್‌ಗೆ ತಿದ್ದುಪಡಿ ತಂದು ಉಪ ಸೆಕ್ಷನ್‌ಗಳನ್ನು ಸೇರಿಸಿದೆ. ಮಹಿಳೆಯರ ಸುರಕ್ಷತೆಯನ್ನು ಖಾತ್ರಿಪಡಿಸುವ ನಿಟ್ಟಿನಲ್ಲಿ ವಿವಿಧ ಷರತ್ತುಗಳನ್ನು ಪಾಲಿಸಿದರೆ, ಮಹಿಳೆಯರನ್ನು ರಾತ್ರಿ ಪಾಳಿಗೂ ನೇಮಕ ಮಾಡಿಕೊಳ್ಳಬಹುದು ಎಂದು ಹೇಳಿದೆ.
ಈ ಕಾಯ್ದೆಯಡಿ ಬರುವ ಸಂಸ್ಥೆಗಳು ಯಾವುವು?
ಅಂಗಡಿಗಳು
ಬಟ್ಟೆ ಅಂಗಡಿಗಳು
ಏಸರಿಗೆಸ್, ಸೆಲೂನ್, ಹೊಟೇಲ್, ರೆಸ್ಟೋರೆಂಟ್
ಬೇಕರಿ, ಟೀ ಸ್ಟಾಲ್
ಗ್ರೋಸರಿ ಅಥವಾ ಜನೆರಲ್ ಸ್ಟೋರ್
ಮೆಡಿಕಲ್ ಶಾಪ್
ಗಾರ್ಮೆಂಟ್ಸ್‌
ಸೇವೆ ಆಧಾರಿತ ವಾಣಿಜ್ಯ ಸಂಸ್ಥೆಗಳು
ಐಟಿ ಕಂಪನಿಗಳು, ಬಿಪಿಒಗಳು, ಕಾನ್ಸ್‌ಲ್ಟೆನ್ಸಿ ಸಂಸ್ಥೆಗಳು
ಶಿಕ್ಷಣ ಸಂಸ್ಥೆಗಳ ಆಡಳಿತ ಕಚೇರಿಗಳು (ಶಿಕ್ಷಣದ ಬೋಧನೆಗೆ ನೇರವಾಗಿ ಸಂಬಂಧಿಸದವು)
ಆಸ್ಪತ್ರೆಗಳ ನೋಂದಣಿ ಕಚೇರಿ ಮತ್ತು ಲ್ಯಾಬ್ ಸೇವೆಗಳು (ಆದರೆ ವೈದ್ಯಕೀಯ ಸೇವೆ ನೀತಿಮಟ್ಟದಲ್ಲಿ ಹೊರಗಿಡಬಹುದು)
ಕಚೇರಿ ಅಥವಾ ಆಡಳಿತ ಕೇಂದ್ರಗಳು
ಖಾಸಗಿ ಬ್ಯಾಂಕ್‌ಗಳ ಶಾಖೆಗಳು
ವಿಮಾ ಕಂಪನಿಗಳ ಕಚೇರಿ
ಎಸ್ಟೇಟ್ ಏಜೆನ್ಸಿ, ಟಿಕೆಟ್ ಬುಕ್ಕಿಂಗ್ ಕಚೇರಿ
ಸಾಂಸ್ಥಿಕ ಮಾರುಕಟ್ಟೆ ಕೇಂದ್ರಗಳು
ಶಾಪಿಂಗ್ ಮಾಲ್
ಡಿಪಾರ್ಟ್‌ಮೆಂಟ್‌ ಸ್ಟೋರ್
ಇ-ಕಾಮರ್ಸ್ ಗೋದಾಮುಗಳು
ಈ ಕಾಯ್ದೆಯಡಿ ಬರುವ ಪ್ರತಿಯೊಂದು ಅಂಗಡಿ ಅಥವಾ ಸಂಸ್ಥೆ, ಪ್ರಾರಂಭವಾದ ದಿನಾಂಕದಿಂದ 30 ದಿನಗಳೊಳಗೆ ಕರ್ನಾಟಕ ಕಾರ್ಮಿಕ ಇಲಾಖೆ ಅಥವಾ ಸ್ಥಳೀಯ ಕಾರ್ಮಿಕ ಕಚೇರಿಯಲ್ಲಿ ನೋಂದಾಯಿಸಿಕೊಳ್ಳುವುದು ಕಡ್ಡಾಯವಾಗಿದೆ.
ಕಾಯ್ದೆಯ ಇತರೆ ನಿಬಂಧನೆಗಳೇನು?
Karnataka Shops and Commercial Establishments Act ಅಡಿ ಮಹಿಳೆಯರು ಹಾಗೂ ಮಕ್ಕಳ ಹಿತಕ್ಕಾಗಿ ಹಲವು ನಿಬಂಧನೆಗಳಿವೆ. ಉದ್ಯೋಗಸ್ಥಳದಲ್ಲಿ ಲಿಂಗ ಸಮಾನತೆ, ಮಕ್ಕಳ ಹಕ್ಕು ರಕ್ಷಣೆ ಹಾಗೂ ಮಾನವೀಯ ಕೆಲಸದ ಪರಿಸರ ಖಾತ್ರಿಪಡಿಸುವುದು ನಿಬಂಧನೆಗಳಲ್ಲಿದೆ.
ಮಹಿಳೆಯರ ಕೆಲಸದ ಸಮಯದ ನಿಯಂತ್ರಣ, ಮಕ್ಕಳ ಉದ್ಯೋಗಕ್ಕೆ ವಯೋಮಿತಿ, ಮಹಿಳೆಯರಿಗೆ ಹೆರಿಗೆ ರಜೆ, ಮಹಿಳಾ ಕಾರ್ಮಿಕರ ಮಕ್ಕಳಿಗೆ ಶಿಶುವಿಹಾರ ಸೌಲಭ್ಯ, ಲಿಂಗ ಆಧಾರಿತ ತಾರತಮ್ಯ ನಿಷೇಧ, ಅಪಾಯವಲ್ಲದ ಕೆಲಸಗಳಲ್ಲಿ ಮಕ್ಕಳ ನೇಮಕಾತಿ, ಉದ್ಯೋಗಿಗಳ ವಿವರಗಳ ದಾಖಲಾತಿ ಇತ್ಯಾದಿ ಅಂಶಗಳು ಒಳಗೊಂಡಿವೆ.
