ಲಾಕ್ ಅಪ್ 2ರಲ್ಲಿ ರಾಮ್ ಕಪೂರ್ ವಿರುದ್ಧ ಕಂಗನಾ ಕಿಡಿ

ರಿಯಾಲಿಟಿ ಶೋ 'ಲಾಕ್ ಅಪ್' ಸೀಸನ್ 2 ಪ್ರಸ್ತುತ ಭಾರಿ ಸದ್ದು ಮಾಡುತ್ತಿದ್ದು, 'ಬಡೇ ಅಚ್ಚೇ ಲಗ್ತೇ ಹೈ' ಧಾರಾವಾಹಿ ಖ್ಯಾತಿಯ ನಟ ರಾಮ್ ಕಪೂರ್ ಅವರ ನಡವಳಿಕೆ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಇತ್ತೀಚಿನ ಸಂಚಿಕೆಯಲ್ಲಿ ನಟಿ ಕಂಗನಾ ರಣಾವತ್ ಅವರು 'ಜನತಾ ಕಿ ಆವಾಜ್' ಆಗಿ ಫರಾ ಖಾನ್ ಮತ್ತು ರಿತೇಶ್ ದೇಶ್‌ಮುಖ್ ಅವರೊಂದಿಗೆ ಶೋಗೆ ಅತಿಥಿಯಾಗಿ ಆಗಮಿಸಿದ್ದರು. ಈ ವೇಳೆ ಅವರು ರಾಮ್ ಕಪೂರ್ ಅವರ ನಡವಳಿಕೆಯನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದ್ದಾರೆ.

ಕಾರ್ಯಕ್ರಮದ ಪ್ರೋಮೋದಲ್ಲಿ ಕಂಗನಾ ಅವರು ರಾಮ್ ಕಪೂರ್ ಅವರನ್ನು ನೇರವಾಗಿ ಪ್ರಶ್ನಿಸಿ, ಒಂದು ವೇಳೆ ಈ ಜೈಲಿಗಿಂತ ನೀವೇ ದೊಡ್ಡವರು ಎಂದು ಭಾವಿಸಿದ್ದರೆ ಇಲ್ಲಿಗೆ ಏಕೆ ಬಂದಿರಿ ಮತ್ತು ನಿಮ್ಮ ಈ ಮೂರ್ಖತನವನ್ನು ತೋರಿಸಲು ಇಲ್ಲಿಗೆ ಬಂದಿದ್ದೀರಾ ಎಂದು ಕೇಳಿದ್ದಾರೆ. ಇದಕ್ಕೆ ಉತ್ತರಿಸಿದ ರಾಮ್ ಕಪೂರ್, ಸಮಯ ಬಂದಾಗ ನಾನು ನನ್ನ ಸತ್ಯವನ್ನು ಉಳಿದವರಿಗಿಂತ ಉತ್ತಮವಾಗಿ ಸಾಬೀತುಪಡಿಸುತ್ತೇನೆ ಎಂದು ತಮ್ಮನ್ನು ಸಮರ್ಥಿಸಿಕೊಳ್ಳಲು ಯತ್ನಿಸಿದರು. ಆದರೆ ಕಂಗನಾ ಅವರು, ನೀವು ಸುಧಾರಿಸಿಕೊಳ್ಳಲು ಬಯಸಿದರೆ ನಿಮ್ಮನ್ನು ಸಮರ್ಥಿಸಿಕೊಳ್ಳುವುದನ್ನು ನಿಲ್ಲಿಸಿ ಎಂದು ಮತ್ತೊಮ್ಮೆ ಎಚ್ಚರಿಸಿದ್ದಾರೆ.

ರಾಮ್ ಕಪೂರ್ ಅವರ ಈ ಉದ್ಧಟತನದ ವರ್ತನೆಯನ್ನು ಈ ಹಿಂದೆ ಶೋನ ಮುಖ್ಯ ನಿರೂಪಕಿ ಫರಾ ಖಾನ್ ಕೂಡ ಖಂಡಿಸಿದ್ದರು. ಫರಾ ಖಾನ್ ಅವರು ರಾಮ್ ಕಪೂರ್ ಅವರ ನಾಯಕತ್ವದ ಕೊರತೆಯನ್ನು ಪ್ರಶ್ನಿಸಿದಾಗ, ಅವರು ಕೋಪಗೊಂಡು ಕೈ ಎತ್ತಿ ಮಾತನಾಡಿದ್ದರು ಮತ್ತು ಇಷ್ಟವಿಲ್ಲದಿದ್ದರೆ ನನ್ನನ್ನು ಶೋನಿಂದ ಹೊರಹಾಕಿ, ನಾನು ಹೀಗೆಯೇ ಇರುವುದು ಎಂದು ವಾದಿಸಿದ್ದಾರೆ.

ಕಂಗನಾ ರಣಾವತ್ ಅವರ ಈ ಖಡಕ್ ನಿರ್ಧಾರ ಮತ್ತು ಪ್ರಶ್ನೆಗಳಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ನೆಟ್ಟಿಗರು ಭಾರಿ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ಕಂಗನಾ ರಣಾವತ್ ಅವರ ನಿರೂಪಣೆ ಮತ್ತು ಧೈರ್ಯವನ್ನು ಕೊಂಡಾಡಿರುವ ಅಭಿಮಾನಿಗಳು, ರಾಮ್ ಕಪೂರ್ ಅವರಿಗೆ ಸರಿಯಾದ ಪಾಠ ಕಲಿಸಲು ಕಂಗನಾ ಅವರೇ ಸೂಕ್ತ ಎಂದು ಕಮೆಂಟ್ ಮಾಡುತ್ತಿದ್ದಾರೆ. ಮುಂಬರುವ ಜುಲೈ 4 ರ 'ಜಡ್ಜ್‌ಮೆಂಟ್ ಡೇ' ಸಂಚಿಕೆಯಲ್ಲಿ ಕಂಗನಾ ಅವರು ಎಲ್ಲಾ ಸ್ಪರ್ಧಿಗಳ ಮೊದಲ ವಾರದ ಪ್ರದರ್ಶನವನ್ನು ಮೌಲ್ಯಮಾಪನ ಮಾಡಲಿದ್ದು, ಈ ಸೀಸನ್‌ನ ಮೊದಲ ಎಲಿಮಿನೇಷನ್ ಅನ್ನು ಕೂಡ ಪ್ರಕಟಿಸಲಿದ್ದಾರೆ.