ಯಶ್ ಬರ್ತ್‌ಡೇಗೆ ಮುನ್ನವೇ 'ಟಾಕ್ಸಿಕ್' ಬಿಗ್ ಅಪ್‌ಡೇಟ್: ಅಖಾಡಕ್ಕೆ 'ರೆಬೆಕಾ' ಎಂಟ್ರಿ

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ, ಗೀತು ಮೋಹನ್ ದಾಸ್ ನಿರ್ದೇಶನದ 'ಟಾಕ್ಸಿಕ್' (Toxic: A Fairy Tale for Grown-ups) ಚಿತ್ರವು ಸ್ಯಾಂಡಲ್‌ವುಡ್ ಮಾತ್ರವಲ್ಲದೆ, ಇಡೀ ವಿಶ್ವ ಸಿನಿಮಾ ರಂಗದಲ್ಲೇ ಭಾರಿ ಕುತೂಹಲ ಮೂಡಿಸಿದೆ. ಚಿತ್ರದ ಬಿಡುಗಡೆಗೆ ಇನ್ನು ಕೆಲವೇ ತಿಂಗಳು ಬಾಕಿ ಇರುವಾಗ, ಚಿತ್ರತಂಡವು ಒಂದೊಂದೇ ಪ್ರಮುಖ ಪಾತ್ರಗಳ ಪರಿಚಯ ಮಾಡುತ್ತಿದೆ. ಆ ಕುರಿತಾದ ಪೂರ್ಣ ವಿವರ ಇಲ್ಲಿದೆ

ತಾರಾ ಸುತಾರಿಯಾ ಪಾತ್ರದ ಸೀಕ್ರೆಟ್ ರಿವೀಲ್

ಇಲ್ಲಿಯವರೆಗೆ ಚಿತ್ರದ ನಾಯಕಿಯರಾದ ನಯನತಾರಾ, ಕಿಯಾರಾ ಅಡ್ವಾಣಿ ಮತ್ತು ಹುಮಾ ಖುರೇಷಿ ಅವರ ಪೋಸ್ಟರ್‌ಗಳು ಸದ್ದು ಮಾಡಿದ್ದವು. ಇದೀಗ ಬಾಲಿವುಡ್ ಬೆಡಗಿ ತಾರಾ ಸುತಾರಿಯಾ ಅವರ ಸರದಿ. ಸ್ವತಃ ಯಶ್ ಅವರೇ ತಾರಾ ಅವರ ಪಾತ್ರವನ್ನು ಪರಿಚಯಿಸಿದ್ದು, ಚಿತ್ರದಲ್ಲಿ ಅವರ ಹೆಸರು 'ರೆಬೆಕಾ'.

ಪೋಸ್ಟರ್‌ನಲ್ಲಿ ತಾರಾ ಪಕ್ಕಾ ಇಂಗ್ಲಿಷ್ ಸಿನಿಮಾದ ನಟಿಯಂತೆ ಕಾಣುತ್ತಿದ್ದಾರೆ. ಕೈಯಲ್ಲಿ ಅತ್ಯಾಧುನಿಕ ಗನ್ ಹಿಡಿದು, ಅಟ್ಯಾಕಿಂಗ್ ಮೋಡ್‌ನಲ್ಲಿ ಕಾಣಿಸಿಕೊಂಡಿರುವ ಅವರು ಚಿತ್ರದಲ್ಲಿ ಒಬ್ಬ ಸೀಕ್ರೆಟ್ ಏಜೆಂಟ್ ಇರಬಹುದು ಎಂಬ ಬಲವಾದ ಶಂಕೆ ಮೂಡಿದೆ.

ತಾರಾ ಸುತಾರಿಯಾ ಪೋಸ್ಟರ್‌

ಮಹಿಳಾ ಪ್ರಧಾನವೇ 'ಟಾಕ್ಸಿಕ್' ಅಸ್ತ್ರ?

ಚಿತ್ರದ ಟೈಟಲ್ ಪೋಸ್ಟರ್‌ನಿಂದ ಹಿಡಿದು ಇಲ್ಲಿಯವರೆಗೆ ಬಿಡುಗಡೆಯಾಗಿರುವ ನಟಿಯರ ಲುಕ್ ಗಮನಿಸಿದರೆ, ಇದು ಮಹಿಳಾ ಪಾತ್ರಗಳ ಸುತ್ತ ಹೆಣೆಯಲಾದ ಕಥೆ ಎನಿಸುತ್ತಿದೆ.

• ನಯನತಾರಾ: ಅತ್ಯಂತ ಶಕ್ತಿಶಾಲಿ ಮತ್ತು ಗಂಭೀರ ಪಾತ್ರ.

• ಕಿಯಾರಾ ಅಡ್ವಾಣಿ: ಚಿತ್ರದ ಪ್ರಮುಖ ಆಕರ್ಷಣೆ.

• ಹುಮಾ ಖುರೇಷಿ: ಖಳನಾಯಕಿ ಪಾತ್ರದಲ್ಲಿ, ರಗಡ್ ಲುಕ್‌ನಲ್ಲಿ ಅಬ್ಬರಿಸಲು ಸಜ್ಜು.

• ತಾರಾ ಸುತಾರಿಯಾ: ಸೀಕ್ರೆಟ್ ಮಿಷನ್‌ನಲ್ಲಿರುವ ಏಜೆಂಟ್. ಈ ನಾಲ್ವರು ನಟಿಯರು ಚಿತ್ರದ ಯಾವುದೋ ಒಂದು 'ಸೀಕ್ರೆಟ್ ಆಪರೇಷನ್' ಅಥವಾ 'ಕ್ರೈಮ್ ಸಿಂಡಿಕೇಟ್'ನ ಭಾಗವಾಗಿರುವುದು ಪಕ್ಕಾ ಎನ್ನಲಾಗುತ್ತಿದೆ.

ಯಶ್ 40ನೇ ಬರ್ತ್‌ಡೇ ಗಿಫ್ಟ್!

ಜನವರಿ 8 ರಂದು ಯಶ್ ತಮ್ಮ 40ನೇ ಜನ್ಮದಿನವನ್ನು ಆಚರಿಸಿಕೊಳ್ಳುತ್ತಿದ್ದಾರೆ. ಈ ದಿನದಂದು ಚಿತ್ರದ ಬಹುನಿರೀಕ್ಷಿತ ಟೀಸರ್ ಅಥವಾ ವಿಡಿಯೋ ಝಲಕ್ ಬಿಡುಗಡೆಯಾಗುವ ಸಾಧ್ಯತೆ ಇದೆ. ಯಶ್ ಮತ್ತು ಕೆವಿಎನ್ ಪ್ರೊಡಕ್ಷನ್ಸ್ ಜಂಟಿಯಾಗಿ ನಿರ್ಮಿಸುತ್ತಿರುವ ಈ ಸಿನಿಮಾ, ಕನ್ನಡ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ಮೂಡಿಬರುತ್ತಿದೆ. ಮಾರ್ಚ್ 19 ರಂದು ಈ ಸಿನಿಮಾ ವಿಶ್ವಾದ್ಯಂತ ತೆರೆಕಾಣಲಿದ್ದು, ಚಿತ್ರದ ಪ್ರತಿಯೊಂದು ಅಪ್‌ಡೇಟ್ ಕೂಡ ಹಾಲಿವುಡ್ ಮಟ್ಟದ ಗುಣಮಟ್ಟವನ್ನು ಹೊಂದಿರುವುದು ಅಭಿಮಾನಿಗಳಲ್ಲಿ ಕಾತರ ಹೆಚ್ಚಿಸಿದೆ.