ಯಶ್ ‘ಟಾಕ್ಸಿಕ್‌’ ಭೀತಿಗೆ ‘ಈಥಾ’ ಹಿಂದೆ ಸರಿತಾ?

ಮ್ಯಾಡಾಕ್ ಫಿಲ್ಮ್ಸ್ ಮತ್ತು ನಿರ್ದೇಶಕ ಲಕ್ಷ್ಮಣ್ ಉಟೇಕರ್ ಅವರ ಬಹುನಿರೀಕ್ಷಿತ ಬಯೋಪಿಕ್ ‘ಈಥಾʼಚಿತ್ರದ ಬಿಡುಗಡೆ ದಿನಾಂಕವನ್ನು ಬದಲಿಸಲಾಗಿದೆ. ಶ್ರದ್ಧಾ ಕಪೂರ್ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಈ ಸಿನಿಮಾ ಆಗಸ್ಟ್ 28ರಂದು ತೆರೆಗೆ ಬರಬೇಕಿತ್ತು. ಇದೀಗ ಚಿತ್ರ ಡಿಸೆಂಬರ್ 4ರಂದು ವಿಶ್ವದಾದ್ಯಂತ ಬಿಡುಗಡೆಯಾಗಲಿದೆ.

ಆಗಸ್ಟ್ 28ರಂದು ರಿಲೀಸ್ ಆಗಿದ್ದರೆ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಪ್ಯಾನ್ ಇಂಡಿಯಾ ಸಿನಿಮಾ ಟಾಕ್ಸಿಕ್‌ ಜೊತೆ ‘ಈಥಾʼ ನೇರವಾಗಿ ಬಾಕ್ಸ್ ಆಫೀಸ್ ಕದನಕ್ಕೆ ಇಳಿಯಬೇಕಾಗಿತ್ತು. ಎರಡು ದೊಡ್ಡ ಸಿನಿಮಾಗಳು ಒಂದೇ ದಿನ ಬಿಡುಗಡೆಯಾದರೆ ಚಿತ್ರಮಂದಿರಗಳ ಹಂಚಿಕೆ, ಸಿಂಗಲ್ ಸ್ಕ್ರೀನ್‌ಗಳ ಲಭ್ಯತೆ ಮತ್ತು ಪ್ರಮುಖ ಮಾರುಕಟ್ಟೆಗಳಲ್ಲಿ ಶೋಗಳ ಸಂಖ್ಯೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇತ್ತು. ಹೀಗಾಗಿ‘ಈಥಾʼತಂಡ ಬಿಡುಗಡೆ ದಿನಾಂಕ ಬದಲಿಸುವ ನಿರ್ಧಾರ ಕೈಗೊಂಡಿದೆ.

‘ಟಾಕ್ಸಿಕ್‌’ ಬಳಿಕ ಈಗ ‘ಫೌಜಿ’ ಜೊತೆ ಪೈಪೋಟಿ

ಆಗಸ್ಟ್‌ನ ಕ್ಲ್ಯಾಶ್‌ನಿಂದ ಹಿಂದೆ ಸರಿದಿರುವ ‘ಈಥಾʼಗೆ ಡಿಸೆಂಬರ್‌ನಲ್ಲೂ ಬಾಕ್ಸ್ ಆಫೀಸ್ ಸವಾಲು ಎದುರಾಗಿದೆ. ಡಿಸೆಂಬರ್ 4ರಂದು ಚಿತ್ರ ತೆರೆಗೆ ಬರಲಿದ್ದು, ಅದಕ್ಕೂ ಒಂದು ದಿನ ಮುನ್ನ ಅಂದರೆ ಡಿಸೆಂಬರ್ 3ರಂದು ಪ್ರಭಾಸ್ ಅಭಿನಯದ ಬಹುನಿರೀಕ್ಷಿತ ಆಕ್ಷನ್ ಸಿನಿಮಾ ‘ಈಥಾʼ ಬಿಡುಗಡೆಯಾಗಲಿದೆ.

ಹೀಗಾಗಿ ಯಶ್ ಅವರ ‘ಟಾಕ್ಸಿಕ್‌’ ಜೊತೆಗಿನ ನೇರ ಸ್ಪರ್ಧೆಯನ್ನು ತಪ್ಪಿಸಿಕೊಂಡರೂ, ಶ್ರದ್ಧಾ ಕಪೂರ್ ಅಭಿನಯದ ‘ಈಥಾʼಗೆ ಪ್ರಭಾಸ್ ಅವರ ಸಿನಿಮಾದೊಂದಿಗೆ ಮತ್ತೊಂದು ದೊಡ್ಡ ಪ್ಯಾನ್ ಇಂಡಿಯಾ ಬಾಕ್ಸ್ ಆಫೀಸ್ ಪೈಪೋಟಿ ಎದುರಾಗಲಿದೆ.

ಪ್ರಚಾರಕ್ಕೆ ಹೆಚ್ಚಿನ ಸಮಯ

ಬಿಡುಗಡೆಯನ್ನು ಸುಮಾರು ಮೂರೂವರೆ ತಿಂಗಳು ಮುಂದೂಡಿರುವುದರಿಂದ ‘ಈಥಾʼ ಚಿತ್ರತಂಡಕ್ಕೆ ಪ್ರಚಾರ ಕಾರ್ಯಗಳನ್ನು ಮತ್ತಷ್ಟು ವಿಸ್ತರಿಸಲು ಅವಕಾಶ ಸಿಕ್ಕಿದೆ. ಈ ಅವಧಿಯಲ್ಲಿ ಚಿತ್ರದ ಪ್ರಚಾರವನ್ನು ದೊಡ್ಡ ಮಟ್ಟದಲ್ಲಿ ನಡೆಸುವುದರ ಜೊತೆಗೆ, ಮಲ್ಟಿಪ್ಲೆಕ್ಸ್‌ಗಳು ಮತ್ತು ವಿವಿಧ ಭಾಷೆಗಳ ಮಾರುಕಟ್ಟೆಗಳಲ್ಲಿ ಹೆಚ್ಚಿನ ಸ್ಕ್ರೀನ್‌ಗಳನ್ನು ಪಡೆದುಕೊಳ್ಳಲು ತಂಡ ಪ್ರಯತ್ನಿಸಬಹುದು.

ಮಹಾರಾಷ್ಟ್ರದ ಜನಪದ ಕಲಾವಿದೆಯ ಜೀವನಗಾಥೆ

‘ಮಿಮಿ’ ಮತ್ತು ‘ಜರಾ ಹಟ್ಕೆ ಜರಾ ಬಚ್ಕೆ’ ಚಿತ್ರಗಳ ಮೂಲಕ ಗಮನ ಸೆಳೆದಿರುವ ಲಕ್ಷ್ಮಣ್ ಉಟೇಕರ್ ‘ಈಥಾʼ ಸಿನಿಮಾವನ್ನು ನಿರ್ದೇಶಿಸುತ್ತಿದ್ದಾರೆ. ಮಹಾರಾಷ್ಟ್ರದ ಪ್ರಸಿದ್ಧ ತಮಾಷಾ ಕಲಾವಿದೆ ವಿಠಾಬಾಯಿ ನಾರಾಯಣಗಾಂವ್ಕರ್ ಅವರ ಜೀವನವನ್ನು ಆಧರಿಸಿ ಈ ಬಯೋಪಿಕ್ ರೂಪುಗೊಂಡಿದೆ. ಜನಪದ ರಂಗಭೂಮಿಯಲ್ಲಿ ಅವರು ಗಳಿಸಿದ್ದ ಖ್ಯಾತಿಯಿಂದ ಅವರನ್ನು ‘ತಮಾಷಾ ಸಾಮ್ರಾಜ್ಞಿ’ ಎಂದೂ ಕರೆಯಲಾಗುತ್ತಿತ್ತು.

ಈ ಸಿನಿಮಾದ ಮೂಲಕ ಶ್ರದ್ಧಾ ಕಪೂರ್ ಮೊದಲ ಬಾರಿಗೆ ಪ್ರಮುಖ ಬಯೋಪಿಕ್ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಚಿತ್ರದಲ್ಲಿ ಅವರು ವಿಭಿನ್ನ ಸವಾಲಿನ ಪಾತ್ರವನ್ನು ನಿರ್ವಹಿಸಿದ್ದು, ಅದರ ಝಲಕ್ ಈಗಾಗಲೇ ಟೀಸರ್‌ನಲ್ಲಿ ಕಾಣಿಸಿಕೊಂಡಿದೆ.

ಗರ್ಭಿಣಿ ಕಲಾವಿದೆಯಾಗಿ ಶ್ರದ್ಧಾ

‘ಕಾಕ್ಟೇಲ್ 2’ ಚಿತ್ರದೊಂದಿಗೆ ಬಿಡುಗಡೆಯಾದ ‘ಈಥಾʼ ಟೀಸರ್‌ನಲ್ಲಿ ಶ್ರದ್ಧಾ ಕಪೂರ್ ಅವರ ಲಾವಣಿ ನೃತ್ಯ ವಿಶೇಷ ಗಮನ ಸೆಳೆದಿತ್ತು. ಒಂಬತ್ತು ತಿಂಗಳ ಗರ್ಭಿಣಿಯಾಗಿರುವ ಕಲಾವಿದೆಯ ಪಾತ್ರದಲ್ಲಿ ಅವರು ಕಾಣಿಸಿಕೊಂಡಿರುವ ದೃಶ್ಯಗಳು ಸಿನಿಮಾದ ಕಥೆಯ ಬಗ್ಗೆ ಕುತೂಹಲ ಮೂಡಿಸಿವೆ.

ಶ್ರದ್ಧಾ ಜೊತೆಗೆ ರಣದೀಪ್ ಹೂಡಾ ಮತ್ತು ಮೊಹಮ್ಮದ್ ಜೀಶಾನ್ ಅಯೂಬ್ ಕೂಡ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಇದೀಗ ಡಿಸೆಂಬರ್ 4ರ ಹೊಸ ಬಿಡುಗಡೆ ದಿನಾಂಕದೊಂದಿಗೆ ‘ಈಥಾʼ ಯಾವ ರೀತಿಯ ಬಾಕ್ಸ್ ಆಫೀಸ್ ಫಲಿತಾಂಶ ನೀಡಲಿದೆ ಎಂಬುದು ಕುತೂಹಲ ಮೂಡಿಸಿದೆ.