35 ವರ್ಷಗಳ ಬಳಿಕ ರೀ ರಿಲೀಸ್‌ ಆಗುತ್ತಾ 'ಶಾಂತಿ-ಕ್ರಾಂತಿ'?

ಬಿಡುಗಡೆಯಾಗಿ 35 ವರ್ಷಗಳಾಗಲಿರುವ ಕ್ರೇಜಿ ಸ್ಟಾರ್ ರವಿಚಂದ್ರನ್ ಅಭಿನಯ ಹಾಗೂ ನಿರ್ದೇಶನದ 'ಶಾಂತಿ ಕ್ರಾಂತಿ' ಸಿನಿಮಾ ಮತ್ತೊಮ್ಮೆ ಚರ್ಚೆಯ ಕೇಂದ್ರವಾಗಿದೆ. 1991ರಲ್ಲಿ ಬಾಕ್ಸ್ ಆಫೀಸ್‌ನಲ್ಲಿ ನಿರೀಕ್ಷಿತ ಯಶಸ್ಸು ಕಾಣದ ಈ ಚಿತ್ರ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಹೊಸ ಜೀವ ಪಡೆದಿದ್ದು, ಚಿತ್ರವನ್ನು ಮತ್ತೆ ಥಿಯೇಟರ್‌ಗಳಲ್ಲಿ ಬಿಡುಗಡೆ ಮಾಡಬೇಕೆಂದು ಅಭಿಮಾನಿಗಳು ಅಭಿಯಾನ ಆರಂಭಿಸಿದ್ದಾರೆ.

'ಮೊದಲ ಪ್ಯಾನ್ ಇಂಡಿಯಾ ಸಿನಿಮಾ' ಎಂದು ಅಭಿಮಾನಿಗಳ ಮೆಚ್ಚುಗೆ

ಇತ್ತೀಚಿನ ದಿನಗಳಲ್ಲಿ ಚಿತ್ರದ ಹಾಡುಗಳು, ದೃಶ್ಯಗಳು ಹಾಗೂ ಚಿತ್ರೀಕರಣದ ಅಪರೂಪದ ಮಾಹಿತಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ. "ಈ ಬಾರಿ ಮತ್ತೆ ಬಿಡುಗಡೆ ಮಾಡಿ, ನಾವು ಯಶಸ್ವಿಗೊಳಿಸುತ್ತೇವೆ" ಎಂಬ ಅಭಿಪ್ರಾಯಗಳನ್ನು ಅಭಿಮಾನಿಗಳು ಹಂಚಿಕೊಳ್ಳುತ್ತಿದ್ದಾರೆ. ಹಲವರು 'ಶಾಂತಿ ಕ್ರಾಂತಿ'ಯೇ ಭಾರತದ ಮೊದಲ ಪ್ಯಾನ್ ಇಂಡಿಯಾ ಸಿನಿಮಾ ಎಂದು ಬಣ್ಣಿಸುತ್ತಿದ್ದಾರೆ. ಇಂದಿನಂತೆ ಡಬ್ ಮಾಡದೇ, ನಾಲ್ಕು ಭಾಷೆಗಳಲ್ಲಿ ಏಕಕಾಲಕ್ಕೆ ವಿಭಿನ್ನ ಕಲಾವಿದರೊಂದಿಗೆ ಸಿನಿಮಾ ನಿರ್ಮಾಣವಾಗಿದ್ದದ್ದು ಇದರ ವಿಶೇಷತೆ.

ಆ ಕಾಲದ ಅತ್ಯಂತ ದುಬಾರಿ ಕನ್ನಡ ಸಿನಿಮಾ

1980ರ ದಶಕದ ಅಂತ್ಯದಲ್ಲಿ ರವಿಚಂದ್ರನ್ ಈ ಚಿತ್ರವನ್ನು ಘೋಷಿಸಿದಾಗ ಕನ್ನಡ ಚಿತ್ರರಂಗದಲ್ಲಿ ಇಂತಹ ಪ್ರಯೋಗವೇ ನಡೆದಿರಲಿಲ್ಲ. ಸುಮಾರು 10 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಾಣವಾದ ಈ ಸಿನಿಮಾ ಆ ಕಾಲದ ಅತ್ಯಂತ ದುಬಾರಿ ಕನ್ನಡ ಚಿತ್ರವಾಗಿತ್ತು.

ನಾಲ್ಕು ಭಾಷೆ, ನಾಲ್ಕು ಸ್ಟಾರ್‌ಗಳ ಸಂಯೋಜನೆ

1988ರ ಮಕ್ಕಳ ದಿನಾಚರಣೆಯಂದು ಚಿತ್ರದ ಮುಹೂರ್ತ ನೆರವೇರಿಸಲಾಗಿತ್ತು. ಕನ್ನಡದಲ್ಲಿ ರವಿಚಂದ್ರನ್, ತೆಲುಗಿನಲ್ಲಿ ನಾಗಾರ್ಜುನ ಹಾಗೂ ತಮಿಳು ಮತ್ತು ಹಿಂದಿ ಆವೃತ್ತಿಯಲ್ಲಿ ರಜನಿಕಾಂತ್ ನಾಯಕನಾಗಿ ನಟಿಸಿದ್ದರು. ಕನ್ನಡದಲ್ಲಿ ರಮೇಶ್ ಅರವಿಂದ್ ನಿರ್ವಹಿಸಿದ್ದ ಪಾತ್ರವನ್ನು ಉಳಿದ ಭಾಷೆಗಳಲ್ಲಿ ರವಿಚಂದ್ರನ್ ಅವರೇ ನಿರ್ವಹಿಸಿದ್ದರು. ಜೂಹಿ ಚಾವ್ಲಾ, ಖುಷ್ಬು ಹಾಗೂ ಅನಂತ್ ನಾಗ್ ನಾಲ್ಕೂ ಭಾಷೆಗಳಲ್ಲೂ ಅಭಿನಯಿಸಿದ್ದರು.

ಚಿತ್ರೀಕರಣದ ವೇಳೆ ಎದುರಾದ ಸವಾಲುಗಳು

ಚಿತ್ರೀಕರಣ ಆರಂಭವಾದ ಕೆಲವೇ ದಿನಗಳಲ್ಲಿ ಸಿನಿಮಾ ಕೈಬಿಡುವ ಆಲೋಚನೆಯನ್ನು ರವಿಚಂದ್ರನ್ ಮಾಡಿದ್ದರೆಂಬ ವರದಿಗಳಿವೆ. ಆದರೆ ನಿರ್ಮಾಪಕರಾದ ಅವರ ತಂದೆ ಎನ್. ವೀರಸ್ವಾಮಿ, ಈಗಾಗಲೇ ರಜನಿಕಾಂತ್ ಮತ್ತು ನಾಗಾರ್ಜುನ ಅವರ ದಿನಾಂಕಗಳು ನಿಗದಿಯಾಗಿರುವುದರಿಂದ ಸಿನಿಮಾ ನಿಲ್ಲಿಸಬಾರದು ಎಂದು ಮನವೊಲಿಸಿ ಯೋಜನೆಯನ್ನು ಮುಂದುವರಿಸಲು ಪ್ರೇರೇಪಿಸಿದ್ದರು.

ಬಾಕ್ಸ್ ಆಫೀಸ್‌ನಲ್ಲಿ ಸೋಲು, ಸಂಗೀತದಲ್ಲಿ ಶಾಶ್ವತ ಗೆಲುವು

1991ರ ಸೆಪ್ಟೆಂಬರ್ 19ರಂದು ಕನ್ನಡ ಮತ್ತು ತೆಲುಗು ಆವೃತ್ತಿಗಳು ಬಿಡುಗಡೆಯಾದರೆ, ಅಕ್ಟೋಬರ್ 2ರಂದು ತಮಿಳು ಹಾಗೂ ಹಿಂದಿ ಆವೃತ್ತಿಗಳು ಬಿಡುಗಡೆಯಾದವು. ಭಾರೀ ಬಜೆಟ್, ದೊಡ್ಡ ತಾರಾಗಣ ಇದ್ದರೂ ಸಿನಿಮಾ ವಾಣಿಜ್ಯವಾಗಿ ನಿರೀಕ್ಷಿತ ಯಶಸ್ಸು ಗಳಿಸಲಿಲ್ಲ.

ಆದರೆ ಹಂಸಲೇಖ ಅವರ ಸಂಗೀತ ಮಾತ್ರ ಇಂದಿಗೂ ಅಭಿಮಾನಿಗಳ ಮನಸ್ಸಿನಲ್ಲಿ ಜೀವಂತವಾಗಿದೆ. 'ಹುಟ್ಟೋದ್ಯಾಕೆ ಸಾಯೋದ್ಯಾಕೆ', 'ಮಧ್ಯರಾತ್ರಿಲಿ ಹೈವೇ ರಸ್ತೇಲಿ' ಹಾಗೂ 'ಗಾಳಿಯೋ ಗಾಳಿಯೋ' ಹಾಡುಗಳು ಇಂದಿಗೂ ಜನಪ್ರಿಯವಾಗಿವೆ.

ರೀ-ರಿಲೀಸ್ ಆಗುತ್ತಾ 'ಶಾಂತಿ ಕ್ರಾಂತಿ'?

ಇದೀಗ 35 ವರ್ಷಗಳ ಬಳಿಕ ಚಿತ್ರದ ಸೋಲಿಗಿಂತ ಅದರ ಮಹತ್ವಾಕಾಂಕ್ಷೆಯ ಬಗ್ಗೆ ಹೆಚ್ಚು ಚರ್ಚೆಯಾಗುತ್ತಿದೆ. ಇಂದಿನ ಪ್ಯಾನ್ ಇಂಡಿಯಾ ಸಿನಿಮಾ ಪರಿಕಲ್ಪನೆಗೆ ಹಲವು ವರ್ಷಗಳ ಮುಂಚೆಯೇ ರವಿಚಂದ್ರನ್ ಇಂತಹ ಪ್ರಯೋಗ ಮಾಡಿದ್ದರು ಎಂಬ ಅಭಿಪ್ರಾಯ ಅಭಿಮಾನಿಗಳದ್ದು. ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚುತ್ತಿರುವ ಬೇಡಿಕೆಗೆ ಸ್ಪಂದಿಸಿ 'ಶಾಂತಿ ಕ್ರಾಂತಿ' ಮತ್ತೆ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.