ರಮೇಶ್ ಅರವಿಂದ್ ಅವರ 'ದೈಜಿ' ಚಿತ್ರದ ಪೋಸ್ಟ್ ಪ್ರೊಡಕ್ಷನ್ ಆರಂಭ

ಸ್ಯಾಂಡಲ್‌ವುಡ್‌ನ ನಟ ರಮೇಶ್ ಅರವಿಂದ್ ನಟನೆಯ ಬಹುನಿರೀಕ್ಷಿತ 106ನೇ ಚಿತ್ರ 'ದೈಜಿ' ಈಗ ಸಿನಿರಸಿಕರಲ್ಲಿ ಕುತೂಹಲ ಮೂಡಿಸಿದೆ. 'ಶಿವಾಜಿ ಸುರತ್ಕಲ್' ಸರಣಿಯ ಮೂಲಕ ಯಶಸ್ಸು ಕಂಡಿರುವ ನಿರ್ದೇಶಕ ಆಕಾಶ್ ಶ್ರೀವತ್ಸ ಮತ್ತು ರಮೇಶ್ ಅರವಿಂದ್ ಜೋಡಿ ಈ ಚಿತ್ರಕ್ಕಾಗಿ ಮತ್ತೊಮ್ಮೆ ಒಂದಾಗಿದ್ದು, ಈ ಬಾರಿ ನೈಜ ಘಟನೆಗಳ ಆಧಾರಿತ ಕಥೆಯನ್ನು ತೆರೆಯ ಮೇಲೆ ತರಲು ಸಜ್ಜಾಗಿದೆ.

ಚಿತ್ರದ ವಿಶೇಷವೆಂದರೆ, ಇದು ನಿರ್ಮಾಪಕ ರವಿ ಕಶ್ಯಪ್ ಅವರ ಜೀವನದಲ್ಲಿ ನಡೆದ ಕೆಲವು ನೈಜ ಅನುಭವಗಳನ್ನು ಆಧರಿಸಿದೆ. ಭಾವನಾತ್ಮಕ ಕಥಾಹಂದರ ಹೊಂದಿರುವ ಈ ಸಿನಿಮಾ ತಾಂತ್ರಿಕವಾಗಿ ಅತ್ಯಂತ ಶ್ರೀಮಂತವಾಗಿ ಮೂಡಿಬಂದಿದೆ. ಚಿತ್ರದಲ್ಲಿ ರಮೇಶ್ ಅರವಿಂದ್ ಅವರಿಗೆ ಜೋಡಿಯಾಗಿ ರಾಧಿಕಾ ನಾರಾಯಣ್ ನಟಿಸಿದ್ದು, ನಟ ದಿಗಂತ್ ಪ್ರಮುಖ ಪಾತ್ರವೊಂದರಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಅಷ್ಟೇ ಅಲ್ಲದೆ, ಚಿತ್ರದ ಕಥೆಯ ಗಾತ್ರಕ್ಕೆ ತಕ್ಕಂತೆ ಹಲವಾರು ಅಂತಾರಾಷ್ಟ್ರೀಯ ಕಲಾವಿದರು ಕೂಡ ಈ ಚಿತ್ರದ ಭಾಗವಾಗಿರುವುದು ವಿಶೇಷ.

ತಾಂತ್ರಿಕವಾಗಿ 'ದೈಜಿ' ಅದ್ದೂರಿ ಚಿತ್ರವಾಗಿದ್ದು, ಯುಕೆ ಮೂಲದ ಬೋರ್ನ್‌ಮೌತ್ ಮತ್ತು ಎಡಿನ್‌ಬರ್ಗ್ ಸೇರಿದಂತೆ ವಾರಣಾಸಿ, ಸಕಲೇಶಪುರ, ಮಡಿಕೇರಿ ಹಾಗೂ ಬೆಂಗಳೂರಿನ ಸುಂದರ ತಾಣಗಳಲ್ಲಿ ಚಿತ್ರೀಕರಣ ನಡೆಸಲಾಗಿದೆ.

ಶ್ರೀಷ ಕುಡುವಳ್ಳಿ ಅವರ ಛಾಯಾಗ್ರಹಣ ಹಾಗೂ ಜೂಡಾ ಸ್ಯಾಂಡಿ ಅವರ ಸಂಗೀತ ಈ ಸಿನಿಮಾಕ್ಕಿದೆ. ಸದ್ಯ ಚಿತ್ರೀಕರಣ ಸಂಪೂರ್ಣಗೊಂಡಿದ್ದು, ಚಿತ್ರತಂಡವು ವಿಎಫ್‌ಎಕ್ಸ್ ಮತ್ತು ಮರು-ಧ್ವನಿಮುದ್ರಣದಂತಹ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳಲ್ಲಿ ಬ್ಯುಸಿಯಾಗಿದೆ. ಈ ಎಲ್ಲಾ ಕೆಲಸಗಳು ಮುಗಿದ ನಂತರ ಚಿತ್ರತಂಡ ಅಧಿಕೃತವಾಗಿ ಬಿಡುಗಡೆಯ ದಿನಾಂಕವನ್ನು ಘೋಷಿಸಲಿದೆ.

'ದೈಜಿ' ಸಿನಿಮಾದ ಟೀಸರ್ ಈಗಾಗಲೇ ಬಿಡುಗಡೆಗೊಂಡಿದೆ. ಒಂದು ನಿಮಿಷದ ಈ ಪುಟ್ಟ ತುಣುಕು ಪ್ರೇಕ್ಷಕರನ್ನು ಒಂದು ನಿಗೂಢ ಹಾಗೂ ವಿಭಿನ್ನ ಜಗತ್ತಿಗೆ ಕರೆದೊಯ್ಯುತ್ತದೆ. ನಿರ್ದೇಶಕ ಆಕಾಶ್ ಶ್ರೀವತ್ಸ ಈ ಬಾರಿ ಸೈಕಲಾಜಿಕಲ್ ಹಾರರ್ ಮತ್ತು ಇನ್ವೆಸ್ಟಿಗೇಟಿವ್ ಥ್ರಿಲ್ಲರ್ ಜಾನರ್ ಅನ್ನು ಕೈಗೆತ್ತಿಕೊಂಡಿದ್ದು, ಟೀಸರ್‌ನಲ್ಲಿ ಅದರ ಸುಳಿವು ಸ್ಪಷ್ಟವಾಗಿ ಕಾಣುತ್ತಿದೆ.

ಟೀಸರ್ ಆರಂಭವಾಗುವುದೇ 'ದೈಜಿ' ಎಂಬ ಅತಿಮಾನುಷ ಶಕ್ತಿಯನ್ನು ಆಹ್ವಾನಿಸುವ ವಿಶಿಷ್ಟ ಆಚರಣೆಯ ವಿವರಣೆಯೊಂದಿಗೆ. ಮುಖಕ್ಕೆ ಬಣ್ಣ ಬಳಿದುಕೊಂಡು, ರಕ್ತವನ್ನು ಅರ್ಪಿಸಿ, ಸೂರ್ಯಕಾಂತಿ ಹೂವನ್ನು ಕೈಯಲ್ಲಿ ಹಿಡಿದು ಮೂರು ಬಾರಿ ಚಪ್ಪಾಳೆ ತಟ್ಟುವ ಮೂಲಕ ಈ ಶಕ್ತಿಯನ್ನು ಆಹ್ವಾನಿಸಬಹುದು ಎಂಬ ನಿಗೂಢ ಸಂಪ್ರದಾಯದ ಬಗ್ಗೆ ಟೀಸರ್‌ನಲ್ಲಿ ವಿವರಿಸಲಾಗಿದೆ. ಇಲ್ಲಿ 'ದೈಜಿ' ಎಂದರೆ 'ಆತ್ಮಗಳ ದೇವರು' ಎಂಬ ಅರ್ಥವನ್ನು ನೀಡಲಾಗಿದೆ.

ರಮೇಶ್ ಅರವಿಂದ್ ಅವರು ಇಲ್ಲಿ 'ಸೂರ್ಯ' ಎಂಬ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಅವರ ಲುಕ್ ಮತ್ತು ನಟನೆಯಲ್ಲಿನ ಗಾಂಭೀರ್ಯ ಪ್ರೇಕ್ಷಕರನ್ನು ಸೆಳೆಯುತ್ತದೆ. ಟೀಸರ್‌ನ ದೃಶ್ಯ ವೈಭವವು ಹಾಲಿವುಡ್ ಮಟ್ಟದ ಫೀಲ್ ನೀಡುತ್ತಿದ್ದು, ವಿಶೇಷವಾಗಿ ವಿಎಫ್‌ಎಕ್ಸ್ ಬಳಕೆಯು ಗಮನಾರ್ಹವಾಗಿದೆ. ಶ್ರೀಷ ಕುಡುವಳ್ಳಿ ಅವರ ಛಾಯಾಗ್ರಹಣವು ವಾರಣಾಸಿಯ ಗಂಗೆಯ ದಡದಿಂದ ಹಿಡಿದು ಲಂಡನ್‌ನ ಬೀದಿಗಳವರೆಗೆ ಅತ್ಯಂತ ಸುಂದರವಾಗಿ ಸೆರೆಹಿಡಿಯಲ್ಪಟ್ಟಿದೆ. ಜೂಡಾ ಸ್ಯಾಂಡಿ ಅವರ ಹಿನ್ನೆಲೆ ಸಂಗೀತವು ಟೀಸರ್‌ನ ನಿಗೂಢತೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಚಿತ್ರದಲ್ಲಿ ದಿಗಂತ್ 'ಗಗನ್' ಎಂಬ ಹೆಸರಿನಲ್ಲಿ ರಮೇಶ್ ಅರವಿಂದ್ ಅವರ ಸಹೋದರನಾಗಿ ನಟಿಸಿದ್ದು, ರಾಧಿಕಾ ನಾರಾಯಣ್ 'ಭೂಮಿ' ಎಂಬ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಟೀಸರ್‌ನ ಕೊನೆಯಲ್ಲಿ ಬರುವ 'The Beginning' ಎಂಬ ಅಡಿಬರಹವು ಇದು ಕೇವಲ ಒಂದು ಸಿನಿಮಾವಲ್ಲದೆ, ಮುಂದೆ ಒಂದು ಫ್ರಾಂಚೈಸಿ ಅಥವಾ ಸರಣಿಯಾಗಿ ಮುಂದುವರಿಯುವ ಸೂಚನೆ ನೀಡುತ್ತಿದೆ. ಒಟ್ಟಾರೆಯಾಗಿ, 'ದೈಜಿ' ಟೀಸರ್ ಕೇವಲ ಭಯವನ್ನಷ್ಟೇ ಅಲ್ಲದೆ, ಒಂದು ಹೊಸ ರೀತಿಯ ಸೈಕಲಾಜಿಕಲ್ ಪಜಲ್ ಅನ್ನು ಬಿಡಿಸುವ ಕುತೂಹಲವನ್ನು ಪ್ರೇಕ್ಷಕರಲ್ಲಿ ಮೂಡಿಸುವಲ್ಲಿ ಯಶಸ್ವಿಯಾಗಿದೆ.