Actress Sridevi| ಶ್ರೀದೇವಿಯ ಸೂಪರ್ ಹಿಟ್ ಸಿನಿಮಾ ಮಾಮ್‌ನ ಸೀಕ್ವೆಲ್‌ನಲ್ಲಿ ಮಗಳು ಖುಷಿ

ಬಾಲಿವುಡ್‌ನ ದಿವಂಗತ ಖ್ಯಾತ ನಟಿ ಶ್ರೀದೇವಿ ಅಭಿನಯದ 'ಮಾಮ್' ಚಿತ್ರದ ಸೀಕ್ವೆಲ್ 'ಮಾಮ್ 2' ಚಿತ್ರೀಕರಣ ಅಧಿಕೃತವಾಗಿ ಆರಂಭವಾಗಿದೆ. ಶ್ರೀದೇವಿ ಅವರ ಕಿರಿಯ ಪುತ್ರಿ ಖುಷಿ ಕಪೂರ್ ಈ ಚಿತ್ರದ ಮೂಲಕ ತಮ್ಮ ತಾಯಿಯ ಸಿನಿಮಾದ ಪರಂಪರೆಯನ್ನು ಮುಂದುವರಿಸಲು ಸಜ್ಜಾಗಿದ್ದಾರೆ. ಉತ್ತರ ಪ್ರದೇಶದ ನೋಯ್ಡಾ ಇಂಟರ್ನ್ಯಾಷನಲ್ ಫಿಲ್ಮ್ ಸಿಟಿಯಲ್ಲಿ ಈ ಚಿತ್ರದ ಚಿತ್ರೀಕರಣವು ಭರದಿಂದ ಸಾಗುತ್ತಿದೆ. ವಿಶೇಷವೆಂದರೆ, ಯಮುನಾ ಎಕ್ಸ್‌ಪ್ರೆಸ್‌ವೇನಲ್ಲಿ ನೂತನವಾಗಿ ನಿರ್ಮಾಣವಾಗಿರುವ ಈ ಫಿಲ್ಮ್ ಸಿಟಿಯಲ್ಲಿ ಚಿತ್ರೀಕರಣಗೊಳ್ಳುತ್ತಿರುವ ಮೊದಲ ಚಿತ್ರ ಎಂಬ ಹೆಗ್ಗಳಿಕೆಗೆ 'ಮಾಮ್ 2' ಪಾತ್ರವಾಗಿದೆ.

ಗಿರೀಶ್ ಕೊಹ್ಲಿ ನಿರ್ದೇಶನದ ಈ ಚಿತ್ರದಲ್ಲಿ ಖುಷಿ ಕಪೂರ್ ಅವರೊಂದಿಗೆ ಬೆಂಗಾಲಿ ನಟ ಜಿಶು ಸೇನ್ ಗುಪ್ತ ಮತ್ತು ಕರೀಷ್ಮಾ ತನ್ನಾ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. 2017ರಲ್ಲಿ ಬಿಡುಗಡೆಯಾಗಿದ್ದ 'ಮಾಮ್' ಚಿತ್ರವು ದೇವಕಿ ಎಂಬ ತಾಯಿ ತನ್ನ ಮಗಳಿಗಾಗಿ ನ್ಯಾಯಕ್ಕಾಗಿ ಹೋರಾಡುವ ಕಥೆಯನ್ನು ಹೊಂದಿತ್ತು. ಆ ಚಿತ್ರದಲ್ಲಿನ ಅದ್ಭುತ ನಟನೆಗಾಗಿ ಶ್ರೀದೇವಿ ಅವರಿಗೆ ಮರಣೋತ್ತರ ರಾಷ್ಟ್ರ ಪ್ರಶಸ್ತಿ ಲಭಿಸಿತ್ತು. ಈಗ ಅದೇ ಯಶಸ್ಸಿನ ಹಾದಿಯಲ್ಲಿ 'ಮಾಮ್ 2' ಚಿತ್ರವನ್ನು ಸಿದ್ಧಪಡಿಸಲಾಗುತ್ತಿದೆ.

ಶ್ರೀದೇವಿ ಅವರು ಈ ಹಿಂದೆ 'ಮಾಮ್' ಚಿತ್ರದ ಪ್ರಚಾರದ ಸಮಯದಲ್ಲಿ, ತಾವು ಕಥೆಗಳು ವಿಭಿನ್ನವಾಗಿದ್ದರೆ ಮಾತ್ರ ಚಿತ್ರಗಳನ್ನು ಆಯ್ಕೆ ಮಾಡಿಕೊಳ್ಳುವುದಾಗಿ ತಿಳಿಸಿದ್ದರು. ಖುಷಿ ಕಪೂರ್ ಈಗಾಗಲೇ 'ದಿ ಆರ್ಚೀಸ್', 'ಲವ್ಯಾಪ' ಮತ್ತು 'ನಾದಾನಿಯಾನ್' ಚಿತ್ರಗಳಲ್ಲಿ ನಟಿಸಿದ್ದು, ಈಗ ತಮ್ಮ ತಾಯಿಯ ಐಕಾನಿಕ್ ಚಿತ್ರದ ಸೀಕ್ವೆಲ್‌ನಲ್ಲಿ ನಟಿಸುತ್ತಿರುವುದು ಅಭಿಮಾನಿಗಳಲ್ಲಿ ಸಂತಸ ತಂದಿದೆ.

ಈ ಬಗ್ಗೆ ಇತ್ತೀಚೆಗೆ ಮಾಧ್ಯಮಗಳೊಂದಿಗೆ ಮಾತನಾಡಿದ ಬೋನಿ ಕಪೂರ್, "ಮಾಮ್ 2 ಚಿತ್ರದ ಚಿತ್ರೀಕರಣ ಇಲ್ಲಿ ನಡೆಯುತ್ತಿದೆ. ಮೊದಲ ಭಾಗಕ್ಕೆ ಕಥೆ ಬರೆದಿದ್ದ ಗಿರೀಶ್ ಕೊಹ್ಲಿ ಅವರೇ ಈ ಬಾರಿ ನಿರ್ದೇಶನ ಮಾಡುತ್ತಿದ್ದಾರೆ. ನಮ್ಮ ತಂಡದಲ್ಲಿ ವಿವಿಧ ಪ್ರದೇಶಗಳ ಪ್ರತಿಭೆಗಳಿದ್ದಾರೆ. ಬಂಗಾಳದ ಖ್ಯಾತ ನಟ ಜಿಶು ಸೇನ್ ಗುಪ್ತಾ ಮತ್ತು ಕಿರುತೆರೆಯ ಜನಪ್ರಿಯ ನಟಿ ಕರಿಷ್ಮಾ ತನ್ನಾ ಈ ಚಿತ್ರದಲ್ಲಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ" ಎಂದು ತಿಳಿಸಿದ್ದಾರೆ.

ಈ ಚಿತ್ರಕ್ಕೆ ದಕ್ಷಿಣ ಭಾರತದ ಖ್ಯಾತ ಸಾಹಸ ನಿರ್ದೇಶಕ ವಿಜಯನ್ ಆಕ್ಷನ್ ಸಂಯೋಜಿಸುತ್ತಿದ್ದಾರೆ. ಇದು ಕೇವಲ ಸೇಡಿನ ಕಥೆಯಲ್ಲದೆ, ಭಾವನಾತ್ಮಕವಾಗಿಯೂ ಪ್ರೇಕ್ಷಕರಿಗೆ ಹತ್ತಿರವಾಗಲಿದೆ ಎಂದು ಚಿತ್ರತಂಡ ಹೇಳಿಕೊಂಡಿದೆ.