ಟಾಕ್ಸಿಕ್ ಬಿಡುಗಡೆ ದಿನಾಂಕ ಬದಲು| ಲೀಕ್ ಆಯ್ತಾ ಯಶ್ ಚಿತ್ರದ ಅಸಲಿ ಸ್ಟೋರಿ...

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ 'ಟಾಕ್ಸಿಕ್' ಚಿತ್ರದ ಬಿಡುಗಡೆ ದಿನಾಂಕ ಮುಂದೂಡಲ್ಪಟ್ಟ ಬೆನ್ನಲ್ಲೇ, ಚಿತ್ರದ ಕಥೆಯ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವದಂತಿಗಳು ಅಭಿಮಾನಿಗಳಲ್ಲಿ ಭಾರಿ ಕುತೂಹಲ ಮೂಡಿಸಿವೆ. ಗೀತು ಮೋಹನ್ ದಾಸ್ ನಿರ್ದೇಶನದ ಈ ಬಹುನಿರೀಕ್ಷಿತ ಚಿತ್ರವು ಜೂನ್ 4 ರಂದು ತೆರೆಕಾಣಲಿದ್ದು, ಚಿತ್ರದ ಕಥಾಹಂದರಕ್ಕೆ ಸಂಬಂಧಿಸಿದಂತೆ ರೆಡ್ಡಿಟ್ ಸೇರಿದಂತೆ ಹಲವು ವೇದಿಕೆಗಳಲ್ಲಿ ಆಸಕ್ತಿದಾಯಕ ಚರ್ಚೆಗಳು ನಡೆಯುತ್ತಿವೆ.

ಪ್ರಮುಖವಾಗಿ ಈ ಚಿತ್ರದಲ್ಲಿ ಯಶ್ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗುತ್ತಿದ್ದು, ಚಿತ್ರದ ಕಥೆಯು ಹಳೆಯ ಕಾಲದ ಗೋವಾದ ಮಾಫಿಯಾ ಲೋಕದ ಹಿನ್ನೆಲೆಯನ್ನು ಹೊಂದಿರಲಿದೆ ಎಂಬ ಮಾಹಿತಿ ವೈರಲ್ ಆಗಿದೆ. ವೈರಲ್ ಆಗಿರುವ ಮಾಹಿತಿಯ ಪ್ರಕಾರ, ಯಶ್ ಅವರು ರಾಯ ಎಂಬ ಗ್ಯಾಂಗ್‌ಸ್ಟರ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದು, ಕಿಯಾರಾ ಅಡ್ವಾಣಿ ನಿರ್ವಹಿಸುತ್ತಿರುವ ನಾಡಿಯಾ ಎಂಬ ಪಾತ್ರದೊಂದಿಗೆ ಅನಿವಾರ್ಯವಾಗಿ ಮಾಡಿಕೊಳ್ಳುವ 'ನಕಲಿ ವಿವಾಹ' ಚಿತ್ರದ ಪ್ರಮುಖ ತಿರುವು ಎನ್ನಲಾಗಿದೆ. ಈ ಮದುವೆಯ ನಂತರ ಕರಾವಳಿಯ ಕಾರ್ಟೆಲ್‌ಗಳನ್ನು ಹತ್ತಿಕ್ಕಲು ಮತ್ತು ಅಧಿಕಾರವನ್ನು ವಶಪಡಿಸಿಕೊಳ್ಳಲು ರಾಯ ಯಾವ ರೀತಿಯ ಹಿಂಸಾತ್ಮಕ ಹಾದಿಯನ್ನು ತುಳಿಯುತ್ತಾನೆ ಎಂಬುದು ಚಿತ್ರದ ಸಾರಾಂಶ ಎಂದು ಹೇಳಲಾಗುತ್ತಿದೆ.

ಗೀತು ಮೋಹನ್ ದಾಸ್ ಅವರ ಹಿಂದಿನ ಚಿತ್ರ 'ಮೂತೋನ್' ಅನ್ನು ಗಮನಿಸಿದರೆ, ಈ ಬಾರಿಯೂ ಅವರು ವಿಭಿನ್ನ ಹಾಗೂ ಬೋಲ್ಡ್ ಆದ ಕಥೆಯನ್ನು ಆಯ್ಕೆ ಮಾಡಿಕೊಂಡಿರಬಹುದು ಎಂಬ ಅಭಿಪ್ರಾಯ ಒಂದು ಕಡೆಯಾದರೆ, ಇದು ಕೇವಲ ಅಭಿಮಾನಿಗಳ ನಡುವಿನ 'ಫ್ಯಾನ್ ವಾರ್' ಅಥವಾ ಕಿಡಿಗೇಡಿಗಳ ಸೃಷ್ಟಿಸಿದ ಸುಳ್ಳು ಕಥೆ ಎಂದು ಮತ್ತೊಂದು ವರ್ಗ ವಾದಿಸುತ್ತಿದೆ. ಟಿಎಂಡಿಬಿ ಅಥವಾ ವಿಕಿಪೀಡಿಯಾದಂತಹ ತಾಣಗಳಲ್ಲಿ ಯಾರೋ ಉದ್ದೇಶಪೂರ್ವಕವಾಗಿ ಇಂತಹ ಕಥೆಯನ್ನು ಸೇರಿಸಿದ್ದಾರೆ ಎಂಬ ಅನುಮಾನವೂ ವ್ಯಕ್ತವಾಗಿದೆ.

ಇನ್ನು ಮಧ್ಯಪ್ರಾಚ್ಯದಲ್ಲಿರುವ ಅನಿಶ್ಚಿತ ಪರಿಸ್ಥಿತಿಯ ಕಾರಣದಿಂದಾಗಿ ಜಾಗತಿಕ ಪ್ರೇಕ್ಷಕರನ್ನು ತಲುಪುವ ಉದ್ದೇಶದಿಂದ ಚಿತ್ರದ ಬಿಡುಗಡೆಯನ್ನು ಮಾರ್ಚ್ 19 ರಿಂದ ಜೂನ್ 4 ಕ್ಕೆ ಮುಂದೂಡಿರುವುದಾಗಿ ಯಶ್ ಅಧಿಕೃತವಾಗಿ ಸ್ಪಷ್ಟಪಡಿಸಿದ್ದಾರೆ. ಒಟ್ಟಾರೆಯಾಗಿ, ಈ ವೈರಲ್ ಕಥೆಯು ನಿಜವೋ ಅಥವಾ ಕೇವಲ ಊಹಾಪೋಹವೋ ಎಂಬುದು ಜೂನ್ ತಿಂಗಳಿನಲ್ಲಿ ಚಿತ್ರ ಬಿಡುಗಡೆಯಾದಾಗಲೇ ಸ್ಪಷ್ಟವಾಗಲಿದೆ.