ಪ್ರೇಮಿಗಳ ದಿನಕ್ಕೆ ರಿ- ರಿಲೀಸ್‌ ಆಗಲಿದೆ ಈ ರೊಮ್ಯಾಂಟಿಕ್‌ ಸಿನಿಮಾ

ಶಾರುಖ್ ಖಾನ್, ಮಾಧುರಿ ದೀಕ್ಷಿತ್ ಮತ್ತು ಐಶ್ವರ್ಯ ರೈ ಮುಖ್ಯಭೂಮಿಕೆಯಲ್ಲಿ ಪಾತ್ರ ನಿರ್ವಹಿಸಿರುವ 'ದೇವದಾಸ್' ಈ ತಿಂಗಳು ಪ್ರೇಮಿಗಳ ದಿನದ ಮುನ್ನಾದಿನದಂದು ಚಿತ್ರಮಂದಿರಗಳಲ್ಲಿ ಮರು ಬಿಡುಗಡೆಯಾಗಲು ಸಿದ್ಧವಾಗಿದೆ. ಇದರೊಂದಿಗೆ ಸಲ್ಮಾನ್ ಖಾನ್ ಅಭಿನಯದ 'ತೇರೆ ನಾಮ್' ಮತ್ತು ಮಣಿರತ್ನಂ ನಿರ್ದೇಶನದ 'ಯುವ' ಚಿತ್ರಗಳೂ ಕೂಡ ರೀ-ರಿಲೀಸ್ ಆಗಲಿದೆ.

2002ರಲ್ಲಿ ಬಿಡುಗಡೆಯಾಗಿದ್ದ 'ದೇವದಾಸ್' ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಯಶಸ್ಸು ಕಂಡಿತ್ತು. ಸಂಜಯ್ ಲೀಲಾ ಬನ್ಸಾಲಿ ನಿರ್ದೇಶನದ ಈ ಚಿತ್ರವು ಶರತ್ ಚಂದ್ರ ಅವರ ಕಾದಂಬರಿಯ ರೂಪಾಂತರವಾಗಿದ್ದು, ಶಾರುಖ್ ಖಾನ್ ಶೀರ್ಷಿಕೆ ಪಾತ್ರದಲ್ಲಿ ನಟಿಸಿದ್ದಾರೆ. ಆ ಕಾಲದ ಅತ್ಯಂತ ದುಬಾರಿ ಭಾರತೀಯ ಚಿತ್ರವಾಗಿದ್ದ ಇದು ಕಾನ್ ಚಲನಚಿತ್ರೋತ್ಸವದಲ್ಲಿ ಪ್ರದರ್ಶನಗೊಂಡಿತ್ತು. ಈ ಸಂಗೀತಮಯ ಪ್ರೇಮಕಥೆಯು ದೇವದಾಸ್ ಮುಖರ್ಜಿ ತನ್ನ ಶ್ರೀಮಂತ ಕುಟುಂಬವು ತಾನು ಪ್ರೀತಿಸಿದ ಹುಡುಗಿಯನ್ನು ಮದುವೆಯಾಗಲು ನಿರಾಕರಿಸಿದ ನಂತರ ಅನುಭವಿಸುವ ನೋವಿನ ಸುತ್ತ ಸುತ್ತುತ್ತದೆ. ಆ ನೋವನ್ನು ಮರೆಯಲು ಮದ್ಯಪಾನ ಮತ್ತು ಕೆಟ್ಟ ಚಟಗಳಿಗೆ ಬಲಿಯಾಗಿ ಅವನ ಜೀವನ ಹೇಗೆ ಹದಗೆಡುತ್ತದೆ ಎಂಬುವುದನ್ನು ಈ ಸಿನಿಮಾ ತೋರಿಸಿಕೊಟ್ಟಿದೆ.

ತೇರೆ ನಾಮ್

ಸಲ್ಮಾನ್ ಖಾನ್ ಮತ್ತು ಭೂಮಿಕಾ ಚಾವ್ಲಾ ನಟನೆಯ ತೇರೆ ನಾಮ್‌, 1999ರ ತಮಿಳು ಚಿತ್ರ ಸೇತುವಿನ ರಿಮೇಕ್ ಆಗಿದೆ. ಈ ಸಿನಿಮಾ ಅಭಿಮಾನಿಗಳ ಹೃದಯದಲ್ಲಿ ವಿಶೇಷ ಸ್ಥಾನ ಪಡೆದಿದ್ದು, ಇದರ ಮರು-ಬಿಡುಗಡೆಗಾಗಿ ಎಲ್ಲರೂ ಕಾತರದಿಂದ ಕಾಯುತ್ತಿದ್ದಾರೆ.

ಯುವ

ಮಣಿರತ್ನಂ ನಿರ್ದೇಶನದ 'ಯುವ' ಚಿತ್ರದಲ್ಲಿ ಅಭಿಷೇಕ್ ಬಚ್ಚನ್, ಅಜಯ್ ದೇವಗನ್, ವಿವೇಕ್ ಒಬೆರಾಯ್, ಇಶಾ ಡಿಯೋಲ್, ರಾಣಿ ಮುಖರ್ಜಿ ಮತ್ತು ಕರೀನಾ ಕಪೂರ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

2004ರ ಈ ಕ್ರೈಮ್ ಥ್ರಿಲ್ಲರ್ ಸಿನಿಮಾ ಸಮಾಜದ ವಿವಿಧ ಸ್ತರಗಳಿಗೆ ಸೇರಿದ ಮೂವರು ಯುವಕರ ಕಥೆ ಮತ್ತು ಒಂದು ವಿಧಿಯಾಟದ ಘಟನೆ ಅವರ ಜೀವನವನ್ನು ಹೇಗೆ ಬದಲಾಯಿಸುತ್ತದೆ ಎಂಬುದರ ಮೇಲೆ ಕೇಂದ್ರೀಕರಿಸಿದೆ.