ನಾನಾ ಪಟೇಕರ್ ಒಟಿಟಿ ಪದಾರ್ಪಣೆ: ಪ್ರಕಾಶ್ ಝಾ ನಿರ್ದೇಶನದ 'ಸಂಕಲ್ಪ್' ಟ್ರೈಲರ್ ಬಿಡುಗಡೆ

ಅಮೆಜಾನ್ ಎಂಎಕ್ಸ್ ಪ್ಲೇಯರ್ ತನ್ನ ಬಹುನಿರೀಕ್ಷಿತ ರಾಜಕೀಯ ಥ್ರಿಲ್ಲರ್ ಸರಣಿ 'ಸಂಕಲ್ಪ್'ನ ಟ್ರೈಲರ್ ಬಿಡುಗಡೆ ಮಾಡಿದ್ದು, ಬಾಲಿವುಡ್‌ನ ಹಿರಿಯ ನಟ ನಾನಾ ಪಟೇಕರ್ ಇದೇ ಮೊದಲ ಬಾರಿಗೆ ಒಟಿಟಿ ಜಗತ್ತಿಗೆ ಕಾಲಿಡುತ್ತಿದ್ದಾರೆ. ಖ್ಯಾತ ನಿರ್ದೇಶಕ ಪ್ರಕಾಶ್ ಝಾ ನಿರ್ದೇಶಿಸುತ್ತಿರುವ ಈ ಸರಣಿಯು ಪ್ರಾಚೀನ ಚಾಣಕ್ಯ-ಚಂದ್ರಗುಪ್ತ ಅವರ ಸಿದ್ಧಾಂತಗಳಿಂದ ಪ್ರೇರಿತವಾಗಿದ್ದು, ಆಧುನಿಕ ಭಾರತದ ರಾಜಕೀಯ ತಂತ್ರಗಾರಿಕೆಯನ್ನು ತೆರೆಯ ಮೇಲೆ ಅನಾವರಣಗೊಳಿಸಲಿದೆ. ನಾನಾ ಪಟೇಕರ್ ಅವರೊಂದಿಗೆ ಮೊಹಮ್ಮದ್ ಝೀಶನ್ ಅಯೂಬ್, ಸಂಜಯ್ ಕಪೂರ್, ನೀರಜ್ ಕಬಿ, ಕುಬ್ರಾ ಸೈತ್ ಮತ್ತು ಕ್ರಾಂತಿ ಪ್ರಕಾಶ್ ಝಾ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.

ಆಧುನಿಕ ಭಾರತದ ಅಧಿಕಾರ ರಾಜಕಾರಣ, ಸೇಡು, ಸೈದ್ಧಾಂತಿಕ ಸಂಘರ್ಷ ಮತ್ತು ಭ್ರಷ್ಟಾಚಾರದ ಸುತ್ತ ಈ ಸರಣಿಯ ಕಥೆ ಸಾಗುತ್ತದೆ. ಸಂಸ್ಕಾರ, ಸತ್ತಾ ಮತ್ತು ಸಮರ್ಪಣ ಎಂಬ ಮೂರು ಮೂಲಾಧಾರಗಳ ಮೇಲೆ ನಿರ್ಮಾಣವಾಗಿರುವ ಈ ಕಥೆಯಲ್ಲಿ ನಾನಾ ಪಟೇಕರ್ ಅವರು 'ಮಾತ್ ಸಾಬ್' ಎಂಬ ಪ್ರಭಾವಿ ತಂತ್ರಜ್ಞನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಸಂಜಯ್ ಕಪೂರ್ ಮತ್ತು ನೀರಜ್ ಕಬಿ ನಡುವಿನ ಸೈದ್ಧಾಂತಿಕ ಹೋರಾಟ ಹಾಗೂ ಗುರುವಿನ ಮೇಲಿನ ಅಚಲ ನಿಷ್ಠೆ ಹೊಂದಿರುವ ಶಿಷ್ಯನಾಗಿ ಮೊಹಮ್ಮದ್ ಝೀಶನ್ ಅಯೂಬ್ ಅವರ ಅಭಿನಯ ಟ್ರೈಲರ್‌ನಲ್ಲಿ ಗಮನ ಸೆಳೆಯುತ್ತಿದೆ.

'ಸಂಕಲ್ಪ್' ಟ್ರೇಲರ್‌ ಇಲ್ಲಿದೆ

ತಮ್ಮ ಓಟಿಟಿ ಪದಾರ್ಪಣೆಯ ಬಗ್ಗೆ ಹರ್ಷ ವ್ಯಕ್ತಪಡಿಸಿರುವ ನಾನಾ ಪಟೇಕರ್, 'ಮಾತ್ ಸಾಬ್' ಪಾತ್ರವು ತಮಗೆ ಹೊಸ ಆಯಾಮವನ್ನು ಪರಿಚಯಿಸಿದೆ ಎಂದು ತಿಳಿಸಿದ್ದಾರೆ. ಪ್ರಕಾಶ್ ಝಾ ಅವರ ಕಥೆಗಳು ಸಮಾಜದ ಕನ್ನಡಿಯಂತಿರುತ್ತವೆ ಎಂದು ಅವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಇನ್ನು ನಿರ್ದೇಶಕ ಪ್ರಕಾಶ್ ಝಾ ಅವರು ಮಾತನಾಡುತ್ತಾ, ಜವಾಬ್ದಾರಿಯುತ ಕಥೆ ಹೇಳುವ ಉದ್ದೇಶದಿಂದ 'ಸಂಕಲ್ಪ್' ನಿರ್ಮಿಸಲಾಗಿದ್ದು, ಇದು ಪ್ರೇಕ್ಷಕರಲ್ಲಿ ಆಳವಾದ ಪ್ರಶ್ನೆಗಳನ್ನು ಮೂಡಿಸಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಈ ಸರಣಿಯಲ್ಲಿ ನಾನಾ ಪಟೇಕರ್ ಮೌಲ್ಯಗಳು ಮತ್ತು ನಿಷ್ಠೆಗೆ ಹೆಸರಾದ ಪ್ರಭಾವಿ ಶಿಕ್ಷಕ 'ಮಾತ್ ಸಾಬ್' ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರೆ, ಮೊಹಮ್ಮದ್ ಝೀಶನ್ ಅಯೂಬ್ ಅವರು ತಮ್ಮ ಗುರು ಮತ್ತು ಕರ್ತವ್ಯದ ನಡುವೆ ಸಿಲುಕಿರುವ ಪ್ರಾಮಾಣಿಕ ಪೊಲೀಸ್ ಅಧಿಕಾರಿಯ ಪಾತ್ರವನ್ನು ನಿರ್ವಹಿಸಿದ್ದಾರೆ. ಗುರು ಮತ್ತು ಶಿಷ್ಯನ ನಡುವಿನ ಸಂಘರ್ಷ, ಅಧಿಕಾರದ ಹಪಾಹಪಿ ಮತ್ತು ನೈತಿಕತೆಯ ನಡುವಿನ ತೆಳು ಗೆರೆಯನ್ನು ಈ ಸರಣಿಯು ಬಹಳ ಮಾರ್ಮಿಕವಾಗಿ ಚಿತ್ರಿಸಿದೆ. 'ಅಪಹರಣ್' ಚಿತ್ರದ ನಂತರ ನಾನಾ ಪಟೇಕರ್ ಮತ್ತು ಪ್ರಕಾಶ್ ಝಾ ಜೋಡಿ ಈ ಸರಣಿಯ ಮೂಲಕ ಮತ್ತೆ ಒಂದಾಗಿರುವುದು ಸಿನಿಪ್ರಿಯರಲ್ಲಿ ಕುತೂಹಲ ಮೂಡಿಸಿದೆ.ಅಮೆಜಾನ್ ಎಂಎಕ್ಸ್ ಪ್ಲೇಯರ್‌ನಲ್ಲಿ ಈ ಸರಣಿಯು ಮಾರ್ಚ್ 11 ರಿಂದ ಪ್ರಸಾರವಾಗಲಿದೆ.