Dhurandhar 2 | ರಣವೀರ್ ಸಿಂಗ್ ಅಭಿನಯದ ‘ಧುರಂಧರ್ 2’ ಚಿತ್ರದ ‘ಆರಿ ಆರಿ’ ಹಾಡು ಬಿಡುಗಡೆ

ಆದಿತ್ಯ ಧರ್ ನಿರ್ದೇಶನ ಹಾಗೂ ರಣವೀರ್ ಸಿಂಗ್ ನಟನೆಯ ಬಹುನಿರೀಕ್ಷಿತ 'ಧುರಂಧರ್: ದಿ ರಿವೇಂಜ್' (ಧುರಂಧರ್ 2) ಚಿತ್ರವು ಭಾರತೀಯ ಚಿತ್ರರಂಗದಲ್ಲಿ ಹೊಸ ಸಂಚಲನ ಸೃಷ್ಟಿಸಿದೆ. ಬಿಡುಗಡೆಗೆ ದಿನಗಣನೆ ಬಾಕಿ ಇರುವಂತೆಯೇ, ಚಿತ್ರವು ಮುಂಗಡ ಬುಕಿಂಗ್‌ನಲ್ಲಿ ಐತಿಹಾಸಿಕ ಮೈಲಿಗಲ್ಲುಗಳನ್ನು ಸ್ಥಾಪಿಸುತ್ತಿದ್ದು, ಪ್ರೇಕ್ಷಕರಲ್ಲಿ ಚಿತ್ರದ ಬಗ್ಗೆ ಇರುವ ಕ್ರೇಜ್ ಅನ್ನು ಸಾಬೀತುಪಡಿಸಿದೆ. ಕೇವಲ ಟ್ರೈಲರ್‌ನಿಂದಲೇ ಕುತೂಹಲ ಮೂಡಿಸಿದ್ದ ಈ ಸಿನಿಮಾ, ಈಗ ತನ್ನ ಅದ್ಭುತ ಸಂಗೀತ ಮತ್ತು ಅಂಕಿಅಂಶಗಳ ಮೂಲಕ ಬಾಲಿವುಡ್‌ನ ದೊಡ್ಡ ಚಿತ್ರಗಳ ದಾಖಲೆಗೆ ಸವಾಲು ಹಾಕುತ್ತಿದೆ.

'ಆರಿ ಆರಿ ಆರಿ, ವೇ ತೇರಿ ಮೇರಿ ಏಕ್ ಜಿಂದಗಿ' ಹಾಡು

'ಆರಿ ಆರಿ' ಹಾಡಿನ ಗತ್ತು ಮತ್ತು ಬಾಂಬೆ ರಾಕರ್ಸ್ ಮ್ಯಾಜಿಕ್

ಸಿನಿಮಾದ ಪ್ರಚಾರಕ್ಕೆ ಹೊಸ ವೇಗ ನೀಡಿರುವುದು ಇತ್ತೀಚೆಗಷ್ಟೇ ಬಿಡುಗಡೆಯಾದ 'ಆರಿ ಆರಿ' ಹಾಡು. 2007ರಲ್ಲಿ ಇಡೀ ದೇಶವನ್ನೇ ಕುಣಿಸಿದ್ದ 'ಬಾಂಬೆ ರಾಕರ್ಸ್' ತಂಡದ ಜನಪ್ರಿಯ ಗೀತೆಯನ್ನು ಈ ಚಿತ್ರಕ್ಕಾಗಿ ಅಧಿಕೃತವಾಗಿ ಮರುಸೃಷ್ಟಿಸಲಾಗಿದೆ. ಹಮ್ಜಾ ಮಜಾರಿ ಎಂಬ ಖಡಕ್ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ರಣವೀರ್ ಸಿಂಗ್ ಅವರ ಆಕ್ಷನ್ ದೃಶ್ಯಗಳೊಂದಿಗೆ ಸಂಯೋಜನೆಗೊಂಡಿರುವ ಈ ಹಾಡು, ಸಾಮಾಜಿಕ ಜಾಲತಾಣಗಳಲ್ಲಿ ಕಾಳ್ಗಿಚ್ಚಿನಂತೆ ಹರಡುತ್ತಿದೆ. ಹಳೆಯ ನೆನಪುಗಳನ್ನು ಮರುಕಳಿಸುವಂತೆ ಮಾಡುವ ಈ ಹೈ-ಎನರ್ಜಿ ಸಂಗೀತವು ಪ್ರೇಕ್ಷಕರನ್ನು ಚಿತ್ರಮಂದಿರಕ್ಕೆ ಸೆಳೆಯುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ.

ಮುಂಗಡ ಬುಕಿಂಗ್‌ನಲ್ಲಿ 'ಸ್ತ್ರೀ 2' ದಾಖಲೆ ಉಡೀಸ್

ವ್ಯಾಪಾರ ವಿಶ್ಲೇಷಕ ಸಂಸ್ಥೆ ಸ್ಯಾಕ್ನಿಲ್ಕ್ ವರದಿಯ ಪ್ರಕಾರ, 'ಧುರಂಧರ್ 2' ಭಾರತೀಯ ಮಾರುಕಟ್ಟೆಯಲ್ಲಿ ಅಸಾಧಾರಣ ಮುನ್ನಡೆ ಸಾಧಿಸಿದೆ. ಎಲ್ಲಾ ಭಾಷೆಗಳಿಂದ ಒಟ್ಟು 18.1 ಕೋಟಿ ರೂಪಾಯಿಗಳ ಮುಂಗಡ ಸಂಗ್ರಹವಾಗಿದ್ದು, ಆ ಪೈಕಿ ಹಿಂದಿ ಆವೃತ್ತಿಯೊಂದರಿಂದಲೇ 12.07 ಕೋಟಿ ರೂಪಾಯಿ ಹರಿದುಬಂದಿದೆ. ಈ ಮೂಲಕ ಇತ್ತೀಚಿನ ಸೂಪರ್ ಹಿಟ್ ಸಿನಿಮಾ 'ಸ್ತ್ರೀ 2' ನಿರ್ಮಿಸಿದ್ದ ಪೇಯ್ಡ್ ಪ್ರಿವ್ಯೂ ದಾಖಲೆಯನ್ನು ಈ ಚಿತ್ರ ಹಿಂದಿಕ್ಕಿರುವುದು ವಿಶೇಷ. ದೇಶೀಯ ಮಾರುಕಟ್ಟೆ ಮಾತ್ರವಲ್ಲದೆ, ಉತ್ತರ ಅಮೆರಿಕದ ಟೆಕ್ಸಾಸ್ ಮತ್ತು ಕ್ಯಾಲಿಫೋರ್ನಿಯಾದಂತಹ ನಗರಗಳಲ್ಲಿ ಟಿಕೆಟ್‌ಗಳಿಗಾಗಿ ಭಾರಿ ಪೈಪೋಟಿ ಏರ್ಪಟ್ಟಿದ್ದು, ಈಗಾಗಲೇ 2 ಮಿಲಿಯನ್ ಡಾಲರ್ ಸಂಗ್ರಹದತ್ತ ಸಿನಿಮಾ ದಾಪುಗಾಲು ಹಾಕುತ್ತಿದೆ.

ಮಾರ್ಚ್ 18ರಿಂದ ಜಗತ್ತಿನಾದ್ಯಂತ ಧುರಂಧರನ ದರ್ಬಾರ್

ರಣವೀರ್ ಸಿಂಗ್ ಅವರೊಂದಿಗೆ ಸಂಜಯ್ ದತ್, ಅರ್ಜುನ್ ರಾಂಪಾಲ್ ಮತ್ತು ಆರ್. ಮಾಧವನ್ ಅಂತಹ ಘಟಾನುಘಟಿ ತಾರಾಗಣವನ್ನು ಹೊಂದಿರುವ ಈ ಚಿತ್ರವು ದೊಡ್ಡ ಮಟ್ಟದ ಆಕ್ಷನ್ ಡ್ರಾಮಾವನ್ನು ಭರವಸೆ ನೀಡಿದೆ. ಮಾರ್ಚ್ 18ರಂದು ವಿಶೇಷ ಪೇಯ್ಡ್ ಪ್ರಿವ್ಯೂಗಳ ಮೂಲಕ ಪ್ರದರ್ಶನ ಆರಂಭವಾಗಲಿದ್ದು, ಮಾರ್ಚ್ 19ರಂದು ಕನ್ನಡ ಸೇರಿದಂತೆ ದಕ್ಷಿಣ ಭಾರತದ ಎಲ್ಲಾ ಪ್ರಮುಖ ಭಾಷೆಗಳಲ್ಲಿ ವಿಶ್ವಾದ್ಯಂತ ಅದ್ದೂರಿಯಾಗಿ ಬಿಡುಗಡೆಯಾಗಲಿದೆ. ದಾಖಲೆಗಳ ಸುರಿಮಳೆಯೊಂದಿಗೆ ಆರಂಭವಾಗಿರುವ ಈ ಪಯಣವು ಬಾಕ್ಸ್ ಆಫೀಸ್‌ನಲ್ಲಿ ಇನ್ನೆಷ್ಟು ಹೊಸ ಮೈಲಿಗಲ್ಲುಗಳನ್ನು ಸೃಷ್ಟಿಸಲಿದೆ ಎಂಬುದು ಕುತೂಹಲಕಾರಿಯಾಗಿದೆ.