ಸುದೀಪ್ ಹುಟ್ಟುಹಬ್ಬಕ್ಕೆ ‘ಬಿಲ್ಲ ರಂಗ ಬಾಷಾ’ ಸ್ಪೆಷಲ್ ಪೋಸ್ಟರ್ ಬಿಡುಗಡೆ

ಕಿಚ್ಚ ಸುದೀಪ್ ಅಭಿಮಾನಿಗಳಿಗೆ ಹುಟ್ಟುಹಬ್ಬದಂದು ಚಿತ್ರತಂಡ ಭರ್ಜರಿ ಗಿಫ್ಟ್ ನೀಡಿದೆ. ಸುದೀಪ್ ಅಭಿನಯದ ಬಹುನಿರೀಕ್ಷಿತ ‘ಬಿಲ್ಲ ರಂಗ ಬಾಷಾ: ಫಸ್ಟ್ ಬ್ಲಡ್’ ಸಿನಿಮಾದ ವಿಶೇಷ ಪೋಸ್ಟರ್ ಅನ್ನು ಅವರ ಹುಟ್ಟುಹಬ್ಬದ ಪ್ರಯುಕ್ತ ಬಿಡುಗಡೆ ಮಾಡಲಾಗಿದೆ. ಇದರ ಜೊತೆಗೆ ಸಿನಿಮಾ 2027ರಲ್ಲಿ ವಿಶ್ವಾದ್ಯಂತ ತೆರೆಗೆ ಬರಲಿದೆ ಎಂದು ಚಿತ್ರತಂಡ ಘೋಷಿಸಿದೆ.

ಬಿಡುಗಡೆಯಾಗಿರುವ ಪೋಸ್ಟರ್ ಸಿನಿಮಾದ ಕಥೆಯ ಹಿನ್ನೆಲೆ ಬಗ್ಗೆ ಕುತೂಹಲ ಮೂಡಿಸಿದೆ. 2209ನೇ ವರ್ಷದ ಡಿಸ್ಟೋಪಿಯನ್ ಭವಿಷ್ಯದ ಜಗತ್ತಿನಲ್ಲಿ ಕಥೆ ಸಾಗಲಿರುವ ಈ ಸಿನಿಮಾದಲ್ಲಿ ಸುದೀಪ್ ವಿಭಿನ್ನ ರಗಡ್ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ. ದಟ್ಟ ಗಡ್ಡ, ಉದ್ದನೆಯ ಕಪ್ಪು ಕೂದಲು ಹಾಗೂ ಹಣೆಯ ಮೇಲಿರುವ ಸ್ಟೀಮ್‌ಪಂಕ್ ಶೈಲಿಯ ಏವಿಯೇಟರ್ ಗಾಗಲ್ಸ್ ಸುದೀಪ್ ಅವರ ಲುಕ್‌ಗೆ ಮತ್ತಷ್ಟು ವಿಭಿನ್ನತೆ ನೀಡಿವೆ.

ಹಿಮದಿಂದ ಆವೃತವಾಗಿರುವ ಯುದ್ಧಭೂಮಿಯಲ್ಲಿ ಕಸ್ಟಮೈಸ್ ಮಾಡಲಾದ ವಿಂಟೇಜ್ ಬೈಕ್ ಮೇಲೆ ಸುದೀಪ್ ಸವಾರಿ ಮಾಡುತ್ತಿರುವುದು ಪೋಸ್ಟರ್‌ನ ಪ್ರಮುಖ ಆಕರ್ಷಣೆಯಾಗಿದೆ. ಅವರ ಹಿಂದೆ ಹೊಗೆ ಮತ್ತು ಬೆಂಕಿಯ ನಡುವೆ ಭವಿಷ್ಯದ ಯುದ್ಧದ ಸನ್ನಿವೇಶ ಕಂಡುಬರುತ್ತದೆ. ಸ್ಟೀಮ್‌ಪಂಕ್ ಶೈಲಿಯ ಬೃಹತ್ ಯುದ್ಧ ಯಂತ್ರಗಳು ಹಾಗೂ ಆಕಾಶದಲ್ಲಿ ಹಾರುತ್ತಿರುವ ಪ್ರೊಪೆಲ್ಲರ್ ವಿಮಾನಗಳು ಸಿನಿಮಾದ ವಿಶಿಷ್ಟ ಜಗತ್ತಿನ ಸುಳಿವು ನೀಡುತ್ತಿವೆ.

‘ವಿಕ್ರಾಂತ್ ರೋಣ’ ಬಳಿಕ ಮತ್ತೆ ಸುದೀಪ್–ಅನೂಪ್ ಭಂಡಾರಿ ಜೋಡಿ

‘ಬಿಲ್ಲ ರಂಗ ಬಾಷಾ’ ಸುದೀಪ್ ಮತ್ತು ನಿರ್ದೇಶಕ ಅನೂಪ್ ಭಂಡಾರಿ ಅವರ ಎರಡನೇ ಕಾಂಬಿನೇಷನ್. ಈ ಹಿಂದೆ ಇವರಿಬ್ಬರು ‘ವಿಕ್ರಾಂತ್ ರೋಣ’ ಸಿನಿಮಾದಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದರು. ಆದರೆ ಈ ಬಾರಿ ಫ್ಯಾಂಟಸಿ ಜಗತ್ತಿನಿಂದ ಹೊರಬಂದು ಭವಿಷ್ಯದ ಡಿಸ್ಟೋಪಿಯನ್ ಪ್ರಪಂಚವನ್ನು ಪ್ರೇಕ್ಷಕರಿಗೆ ಪರಿಚಯಿಸಲು ಈ ಜೋಡಿ ಸಜ್ಜಾಗಿದೆ.

ಸಿನಿಮಾದ ಚಿತ್ರೀಕರಣ ಸದ್ಯ ಪ್ರಗತಿಯಲ್ಲಿದ್ದು, ಬೆಂಗಳೂರಿನಲ್ಲಿ ಬೃಹತ್ ಸೆಟ್ ನಿರ್ಮಿಸಲಾಗಿದೆ. ಕಥೆಯಲ್ಲಿನ ಪ್ರಮುಖ ದೃಶ್ಯಗಳನ್ನು ರೂಪಿಸಲು ಸ್ಟೋರಿಬೋರ್ಡ್, 3D ಅನಿಮೇಷನ್ ಮತ್ತು ಡಿಜಿಟಲ್ ಪ್ರಿ-ವಿಜುವಲೈಸೇಷನ್ ತಂತ್ರಜ್ಞಾನಗಳನ್ನು ಬಳಸಲಾಗುತ್ತಿದೆ.

ದೊಡ್ಡ ಪ್ರಮಾಣದ ನಿರ್ಮಾಣ

ಕೆ. ನಿರಂಜನ್ ರೆಡ್ಡಿ ಮತ್ತು ಚೈತನ್ಯ ರೆಡ್ಡಿ ಅವರ ಪ್ರೈಮ್‌ಶೋ ಎಂಟರ್‌ಟೈನ್‌ಮೆಂಟ್ ಬ್ಯಾನರ್ ಅಡಿಯಲ್ಲಿ ಸಿನಿಮಾ ನಿರ್ಮಾಣವಾಗುತ್ತಿದೆ. ‘ಹನುಮಾನ್’ನಂತಹ ಪ್ಯಾನ್-ಇಂಡಿಯಾ ಬ್ಲಾಕ್‌ಬಸ್ಟರ್ ಸಿನಿಮಾವನ್ನು ನಿರ್ಮಿಸಿರುವ ಸಂಸ್ಥೆ ಇದೀಗ ಸುದೀಪ್ ಹಾಗೂ ಅನೂಪ್ ಭಂಡಾರಿ ಕಾಂಬಿನೇಷನ್‌ನಲ್ಲಿ ಈ ಬಿಗ್-ಸ್ಕೇಲ್ ಪ್ರಾಜೆಕ್ಟ್‌ ಕೈಗೆತ್ತಿಕೊಂಡಿದೆ.

ಬೃಹತ್ ಸೆಟ್‌ಗಳು, ಆ್ಯಕ್ಷನ್ ಸೀಕ್ವೆನ್ಸ್‌ಗಳು ಮತ್ತು ದೃಶ್ಯ ಪರಿಣಾಮಗಳಿಗೆ ಸಿನಿಮಾದಲ್ಲಿ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗಿದೆ. ಹೀಗಾಗಿ ಸುದೀಪ್ ವೃತ್ತಿಜೀವನದ ಅತ್ಯಂತ ಮಹತ್ವಾಕಾಂಕ್ಷೆಯ ಚಿತ್ರಗಳಲ್ಲಿ ‘ಬಿಲ್ಲ ರಂಗ ಬಾಷಾ’ ಕೂಡ ಒಂದಾಗುವ ನಿರೀಕ್ಷೆ ಮೂಡಿದೆ.

2027ರಲ್ಲಿ ಹಂತ ಹಂತವಾಗಿ ಪ್ರಮೋಷನ್

ಚಿತ್ರತಂಡ ಸಿನಿಮಾದ ಪ್ರಮೋಷನ್‌ಗೂ ಈಗಾಗಲೇ ಪ್ಲ್ಯಾನ್ ರೂಪಿಸಿದೆ. 2027ರ ಮಾರ್ಚ್‌ನಲ್ಲಿ ಟೀಸರ್ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ಬಳಿಕ ಟ್ರೇಲರ್ ಮತ್ತು ಹಾಡುಗಳನ್ನು ಬಿಡುಗಡೆ ಮಾಡಲು ಯೋಜಿಸಲಾಗಿದೆ. ಬಳಿಕ 2027ರ ಡಿಸೆಂಬರ್‌ನಲ್ಲಿ ಸಿನಿಮಾ ವಿಶ್ವಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.

ಚಿತ್ರದ ತಾರಾಬಳಗದ ಕುರಿತು ಸದ್ಯಕ್ಕೆ ಹೆಚ್ಚಿನ ಮಾಹಿತಿಯನ್ನು ಚಿತ್ರತಂಡ ಬಹಿರಂಗಪಡಿಸಿಲ್ಲ. ಹಿರಿಯ ನಟಿ ಮಾಲಾಶ್ರೀ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ ಎನ್ನಲಾಗಿದ್ದು, ಉಳಿದ ಕಲಾವಿದರ ವಿವರಗಳನ್ನು ಗೌಪ್ಯವಾಗಿಡಲಾಗಿದೆ. ವಿಲಿಯಂ ಡೇವಿಡ್ ಛಾಯಾಗ್ರಹಣ ಹಾಗೂ ಶಿವಕುಮಾರ್ ಪ್ರೊಡಕ್ಷನ್ ಡಿಸೈನ್ ಜವಾಬ್ದಾರಿ ಹೊತ್ತಿದ್ದಾರೆ. ಸದ್ಯ ಬಿಡುಗಡೆಯಾಗಿರುವ ಹುಟ್ಟುಹಬ್ಬದ ಪೋಸ್ಟರ್ ‘ಬಿಲ್ಲ ರಂಗ ಬಾಷಾ’ ಚಿತ್ರದ ಬಗ್ಗೆ ಮತ್ತಷ್ಟು ನಿರೀಕ್ಷೆ ಹುಟ್ಟುಹಾಕಿದ್ದು, 2027ರ ಅಂತ್ಯದ ವೇಳೆಗೆ ಈ ಭವಿಷ್ಯದ ಸೈ-ಫೈ ಜಗತ್ತು ಬೆಳ್ಳಿತೆರೆಗೆ ಬರಲಿದೆ.