'ಇಕ್ಕಿಸ್' ಮೊದಲ ದಿನದ ಕಲೆಕ್ಷನ್ ಎಷ್ಟು? ಬಾಕ್ಸ್ ಆಫೀಸ್‌ನಲ್ಲಿ ಅಗಸ್ತ್ಯ ನಂದಾ ಮಿಂಚು

ಅಮಿತಾಬ್ ಬಚ್ಚನ್ ಅವರ ಮೊಮ್ಮಗ ಅಗಸ್ತ್ಯ ನಂದಾ ಅಭಿನಯದ ಬಹುನಿರೀಕ್ಷಿತ ಯುದ್ಧ ಆಧಾರಿತ ಸಿನಿಮಾ 'ಇಕ್ಕಿಸ್' ಗುರುವಾರ ಅದ್ಧೂರಿಯಾಗಿ ತೆರೆಕಂಡಿದೆ. ಚಿತ್ರದ ಘೋಷಣೆಯಾದಾಗಿನಿಂದಲೂ ಅಗಸ್ತ್ಯ ಅವರ ನಟನೆಯ ಬಗ್ಗೆ ಅಭಿಮಾನಿಗಳಲ್ಲಿ ಕುತೂಹಲ ಮನೆಮಾಡಿತ್ತು. ವಿಶೇಷವೆಂದರೆ, ಬಾಲಿವುಡ್‌ನ ಹಿರಿಯ ನಟ ಧರ್ಮೇಂದ್ರ ಅವರ ಅಗಲಿಕೆಯ ನಂತರ ತೆರೆಕಂಡ ಅವರ ಕೊನೆಯ ಸಿನಿಮಾ ಇದಾಗಿದ್ದು, ಪ್ರೇಕ್ಷಕರಲ್ಲಿ ಭಾವನಾತ್ಮಕ ಕನೆಕ್ಷನ್ ಉಂಟುಮಾಡಿದೆ.

ಮೊದಲ ದಿನದ ಕಲೆಕ್ಷನ್ ಎಷ್ಟು?

ಸೆಕೆಂಡ್ ಲೆಫ್ಟಿನೆಂಟ್ ಅರುಣ್ ಖೇತರ್ಪಾಲ್ ಅವರ ಜೀವನ ಚರಿತ್ರೆಯನ್ನು ಹೊಂದಿರುವ ಈ ಚಿತ್ರವು ಮೊದಲ ದಿನ ಬಾಕ್ಸ್ ಆಫೀಸ್‌ನಲ್ಲಿ ಅಂದಾಜು 7 ಕೋಟಿ ರೂಪಾಯಿ ಗಳಿಸಿದೆ ಎಂದು ಸಾಕ್ನಿಲ್ಕ್ ವರದಿ ತಿಳಿಸಿದೆ. ಅಗಸ್ತ್ಯ ನಂದಾ ಅವರಿಗೆ ಇದು ಮೊದಲ ಸಿನಿಮಾ ಆಗಿರುವುದರಿಂದ ಈ ಮೊತ್ತವನ್ನು ಉತ್ತಮ ಆರಂಭವೆಂದೇ ಪರಿಗಣಿಸಲಾಗಿದೆ. ಇದಕ್ಕೆ ಹೋಲಿಸಿದರೆ, ದೊಡ್ಡ ತಾರಾಗಣ ಹೊಂದಿದ್ದ ರೊಮ್ಯಾಂಟಿಕ್ ಕಾಮಿಡಿ ಸಿನಿಮಾ 'ತು ಮೇರಿ ಮೈ ತೇರಾ' ಮೊದಲ ದಿನ 7.75 ಕೋಟಿ ರೂಪಾಯಿ ಗಳಿಸಿತ್ತು.

ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕರ ಪ್ರತಿಕ್ರಿಯೆ ಶ್ರೀರಾಮ್ ರಾಘವನ್ ನಿರ್ದೇಶನದ ಈ ಚಿತ್ರವು ಜನವರಿ 1, 2026 ರಂದು ಬಿಡುಗಡೆಯಾಗಿದ್ದು, ಮೊದಲ ದಿನ ಹಿಂದಿ ಆವೃತ್ತಿಯಲ್ಲಿ ಶೇ. 31.94 ರಷ್ಟು ಆಕ್ಯುಪೆನ್ಸಿ ಕಂಡಿದೆ. ಧರ್ಮೇಂದ್ರ ಅವರ ಅಂತಿಮ ದರ್ಶನವನ್ನು ಪರದೆಯ ಮೇಲೆ ನೋಡಲು ಅಭಿಮಾನಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಿದ್ದಾರೆ.

'ಧುರಂಧರ್' ಅಬ್ಬರದ ನಡುವೆಯೂ ಸಾಧನೆ

ಕಳೆದ ನಾಲ್ಕು ವಾರಗಳಿಂದ ಬಾಕ್ಸ್ ಆಫೀಸ್‌ನಲ್ಲಿ ಬಿರುಗಾಳಿ ಎಬ್ಬಿಸಿರುವ 'ಧುರಂಧರ್' ಸಿನಿಮಾ ತನ್ನ 28ನೇ ದಿನವೂ (ನಾಲ್ಕನೇ ಗುರುವಾರ) 15.75 ಕೋಟಿ ರೂಪಾಯಿ ಬಾಚಿಕೊಂಡಿದೆ. ಈ ಚಿತ್ರದ ಒಟ್ಟು ಗಳಿಕೆ ಭಾರತದಲ್ಲಿ ಇದೀಗ 739 ಕೋಟಿ ರೂಪಾಯಿಗೆ ಏರಿಕೆಯಾಗಿದೆ. ಈ ದೊಡ್ಡ ಮಟ್ಟದ ಪೈಪೋಟಿಯ ನಡುವೆಯೂ 'ಇಕ್ಕಿಸ್' ತನ್ನದೇ ಆದ ಸ್ಥಾನ ಕಂಡುಕೊಳ್ಳಲು ಪ್ರಯತ್ನಿಸುತ್ತಿದೆ.

'ಇಕ್ಕಿಸ್' ಚಿತ್ರ ಹೇಗಿದೆ?

1971ರ ಇಂಡೋ-ಪಾಕ್ ಯುದ್ಧದ ವೇಳೆ ದೇಶಕ್ಕಾಗಿ ಪ್ರಾಣತ್ಯಾಗ ಮಾಡಿದ ಅರುಣ್ ಖೇತರ್ಪಾಲ್ ಅವರ ಸಾಹಸಗಾಥೆ ಈ ಸಿನಿಮಾ. ಅವರಿಗೆ ಮರಣೋತ್ತರವಾಗಿ ಭಾರತದ ಅತ್ಯುನ್ನತ ಸೇನಾ ಗೌರವವಾದ 'ಪರಮವೀರ ಚಕ್ರ' ನೀಡಿ ಗೌರವಿಸಲಾಗಿತ್ತು. ಮೊದಲು ಡಿಸೆಂಬರ್ 25ರಂದು ಬಿಡುಗಡೆಯಾಗಬೇಕಿದ್ದ ಈ ಚಿತ್ರವು, 'ಧುರಂಧರ್' ಸಿನಿಮಾದ ಅಬ್ಬರದಿಂದಾಗಿ ಜನವರಿ 1ಕ್ಕೆ ಮುಂದೂಡಲ್ಪಟ್ಟಿತ್ತು. ಚಿತ್ರದಲ್ಲಿ ಜೈದೀಪ್ ಅಹ್ಲಾವತ್, ಸಿಕ್ಕಂದರ್ ಖೇರ್ ಸೇರಿದಂತೆ ದೊಡ್ಡ ತಾರಾಗಣವಿದೆ.