ವಿಶಾಖಪಟ್ಟಣದಲ್ಲಿ ತಲೆ ಎತ್ತಲಿದೆ ಏಷ್ಯಾದ ಅತಿದೊಡ್ಡ 'ಗೂಗಲ್ ಡೇಟಾ ಸೆಂಟರ್': ಏನಿದರ ವಿಶೇಷ?

ಆಂಧ್ರಪ್ರದೇಶದ ಕೈಗಾರಿಕಾ ಇತಿಹಾಸದಲ್ಲಿ ಹೊಸ ಶಕೆ ಆರಂಭವಾಗುತ್ತಿದೆ. ಜಾಗತಿಕ ಟೆಕ್ ದೈತ್ಯ ಗೂಗಲ್, ತನ್ನ ಬೃಹತ್ 1 ಗಿಗಾವ್ಯಾಟ್ (GW) ಸಾಮರ್ಥ್ಯದ ಡೇಟಾ ಸೆಂಟರ್ ಮತ್ತು ಕೃತಕ ಬುದ್ಧಿಮತ್ತೆ (AI) ಹಬ್ ನಿರ್ಮಾಣಕ್ಕಾಗಿ ಕರಾವಳಿ ನಗರಿ ವಿಶಾಖಪಟ್ಟಣವನ್ನು ಆಯ್ಕೆ ಮಾಡಿದೆ. ಅಮೆರಿಕದ ಹೊರಗೆ ಗೂಗಲ್ ಸ್ಥಾಪಿಸುತ್ತಿರುವ ಅತಿದೊಡ್ಡ ಡೇಟಾ ಸೆಂಟರ್ ಇದಾಗಿದೆ.

ಸುಮಾರು 15 ಬಿಲಿಯನ್ ಡಾಲರ್ (ಅಂದಾಜು 1.25 ಲಕ್ಷ ಕೋಟಿ ರೂ.) ಹೂಡಿಕೆಯೊಂದಿಗೆ ಈ ಮಹತ್ವಾಕಾಂಕ್ಷೆಯ ಯೋಜನೆ ಸಾಕಾರಗೊಳ್ಳುತ್ತಿದೆ. ಏಪ್ರಿಲ್ 28 ರಂದು ಈ ಬೃಹತ್ ಯೋಜನೆಗೆ ಅಧಿಕೃತವಾಗಿ ಶಂಕುಸ್ಥಾಪನೆ ನೆರವೇರಲಿದೆ.

ಐತಿಹಾಸಿಕ ಉದ್ಘಾಟನೆ ಮತ್ತು ಗಣ್ಯರ ಭಾಗಿ

ಏಪ್ರಿಲ್ 28ರಂದು ನಡೆಯಲಿರುವ ಈ ಮಹತ್ವದ ಕಾರ್ಯಕ್ರಮದಲ್ಲಿ ಆಂಧ್ರಪ್ರದೇಶದ ಮುಖ್ಯಮಂತ್ರಿ ನಾರಾ ಚಂದ್ರಬಾಬು ನಾಯ್ಡು, ಐಟಿ ಸಚಿವ ನಾರಾ ಲೋಕೇಶ್ ಹಾಗೂ ಗೂಗಲ್ ಕ್ಲೌಡ್ ಸಿಇಒ ಥಾಮಸ್ ಕುರಿಯನ್ ಭಾಗವಹಿಸಿ ಭೂಮಿಪೂಜೆ ನೆರವೇರಿಸಲಿದ್ದಾರೆ. ಗೂಗಲ್ ತನ್ನ ಅಂಗಸಂಸ್ಥೆಯಾದ 'ರೈದಾನ್ ಇನ್ಫೋಟೆಕ್' ಮೂಲಕ, ಅದಾನಿ ಎಂಟರ್ ಪ್ರೈಸಸ್ ನ ಪಾಲುದಾರಿಕೆಯಲ್ಲಿ ಈ ಯೋಜನೆಯನ್ನು ಜಾರಿಗೊಳಿಸುತ್ತಿದೆ. ಈ ತಿಂಗಳ ಅಂತ್ಯದಲ್ಲಿ ಕಾಮಗಾರಿ ಆರಂಭವಾಗಲಿದ್ದು, 2028ರ ವೇಳೆಗೆ ಈ ಬೃಹತ್ ಪ್ರಾಜೆಕ್ಟ್ ಸಂಪೂರ್ಣವಾಗಿ ಕಾರ್ಯಾರಂಭ ಮಾಡುವ ನಿರೀಕ್ಷೆಯಿದೆ.

600 ಎಕರೆಗೂ ಹೆಚ್ಚು ಭೂಮಿ ಮಂಜೂರು

ಈ ಬೃಹತ್ ಡೇಟಾ ಸೆಂಟರ್ ನಿರ್ಮಾಣಕ್ಕಾಗಿ ಆಂಧ್ರ ಸರ್ಕಾರವು ವಿಶಾಖಪಟ್ಟಣಂ ಮತ್ತು ಅನಕಪಲ್ಲಿ ಜಿಲ್ಲೆಗಳ ವ್ಯಾಪ್ತಿಯಲ್ಲಿ ಒಟ್ಟು 601.4 ಎಕರೆ ಭೂಮಿಯನ್ನು ಮಂಜೂರು ಮಾಡಿದೆ. ಆರಂಭದಲ್ಲಿ 480 ಎಕರೆ ನೀಡಲು ಉದ್ದೇಶಿಸಲಾಗಿತ್ತಾದರೂ, ಯೋಜನೆಯ ವ್ಯಾಪ್ತಿಯನ್ನು ಪರಿಗಣಿಸಿ ಫೆಬ್ರವರಿಯಲ್ಲಿ ಭೂಮಿಯ ಪ್ರಮಾಣವನ್ನು ಹೆಚ್ಚಿಸಲಾಗಿದೆ. ತರ್ಲವಾಡದಲ್ಲಿ 266.6 ಎಕರೆ, ರಂಬಿಲ್ಲಿಯಲ್ಲಿ 174.8 ಎಕರೆ, ಆದಿವಿವರಂ/ಮುಡಸರ್ಲೋವಾ ಭಾಗದಲ್ಲಿ 160 ಎಕರೆ ಭೂಮಿಯನ್ನು ಹಂಚಿಕೆ ಮಾಡಲಾಗಿದೆ.

ಈ ಯೋಜನೆಗಾಗಿ ಆಂಧ್ರ ಸರ್ಕಾರವು ಗೂಗಲ್ ಗೆ ಆಕರ್ಷಕ ರಿಯಾಯಿತಿಗಳನ್ನು ನೀಡಿದ್ದು, 15 ವರ್ಷಗಳ ಕಾಲ ಉಚಿತ ವಿದ್ಯುತ್, ಹತ್ತು ವರ್ಷಗಳ ಕಾಲ ಶೇ. 25ರ ದರದಲ್ಲಿ ನೀರು ಪೂರೈಕೆ, ಅತಿ ಕಡಿಮೆ ಬೆಲೆಗೆ ಭೂಮಿ ಹಸ್ತಾಂತರ ಹಾಗೂ ಸುಮಾರು 2,245 ಕೋಟಿ ರೂ. ಮೌಲ್ಯದ ಎಸ್ ಜಿಎಸ್ ಟಿ (SGST) ಮರುಪಾವತಿ ಸೌಲಭ್ಯಗಳನ್ನು ಒದಗಿಸಿದೆ.

ಆಂಧ್ರಪ್ರದೇಶಕ್ಕೆ ಆಗುವ ಪ್ರಮುಖ ಪ್ರಯೋಜನಗಳೇನು?

ಈ ಯೋಜನೆಯು ಆಂಧ್ರಪ್ರದೇಶದ ಆರ್ಥಿಕತೆಗೆ ದೊಡ್ಡ ಮಟ್ಟದ ಉತ್ತೇಜನ ನೀಡಲಿದ್ದು, ರಾಜ್ಯದ ಜಿಎಸ್ ಡಿಪಿ (GSDP) ಗಣನೀಯವಾಗಿ ಹೆಚ್ಚಾಗಲಿದೆ. ತೆರಿಗೆಯ ರೂಪದಲ್ಲಿ ಸರ್ಕಾರಕ್ಕೆ ಭಾರಿ ಆದಾಯ ಹರಿದುಬರಲಿದೆ.

* ಭಾರಿ ಉದ್ಯೋಗ ಸೃಷ್ಟಿ: ಈ ಯೋಜನೆಯಿಂದ ಕನಿಷ್ಠ 30,000 ಕ್ಕೂ ಹೆಚ್ಚು ಉದ್ಯೋಗಗಳು ಸೃಷ್ಟಿಯಾಗುವ ಅಂದಾಜಿದೆ. ಡೇಟಾ ಸೆಂಟರ್ ನಿರ್ವಹಣೆ, ಕ್ಲೌಡ್ ಕಂಪ್ಯೂಟಿಂಗ್ ಮತ್ತು ಎಐ ವಿಭಾಗಗಳಲ್ಲಿ 5,000 ದಿಂದ 6,000 ಉನ್ನತ ಮಟ್ಟದ ನೇರ ಐಟಿ ಉದ್ಯೋಗಗಳು ಲಭ್ಯವಾಗಲಿವೆ. ಜೊತೆಗೆ ನಿರ್ಮಾಣ, ಲಾಜಿಸ್ಟಿಕ್ಸ್ ಮತ್ತು ಶುದ್ಧ ಇಂಧನ ವಲಯಗಳಲ್ಲಿ 20,000 ದಿಂದ 30,000 ಕ್ಕೂ ಹೆಚ್ಚು ಪರೋಕ್ಷ ಉದ್ಯೋಗಾವಕಾಶಗಳು ತೆರೆದುಕೊಳ್ಳಲಿವೆ.

* ಎಐ ರಾಜಧಾನಿಯಾಗಿ ವಿಶಾಖಪಟ್ಟಣ: ಗೂಗಲ್ ನಂತಹ ದೈತ್ಯ ಕಂಪನಿಯ ಆಗಮನದಿಂದ ವಿಶಾಖಪಟ್ಟಣವು ಅಂತರರಾಷ್ಟ್ರೀಯ ಐಟಿ ಭೂಪಟದಲ್ಲಿ 'ಎಐ ರಾಜಧಾನಿ'ಯಾಗಿ ಗುರುತಿಸಿಕೊಳ್ಳಲಿದೆ. ಇದು ಮೈಕ್ರೋಸಾಫ್ಟ್ ಮತ್ತು ಅಮೆಜಾನ್ ನಂತಹ ಇತರ ದೈತ್ಯ ಕಂಪನಿಗಳನ್ನು ಆಕರ್ಷಿಸಲು ವೇದಿಕೆಯಾಗಲಿದೆ.

* ಹೈ-ಸ್ಪೀಡ್ ಇಂಟರ್ನೆಟ್ ಮತ್ತು ಡಿಜಿಟಲ್ ಮೂಲಸೌಕರ್ಯ: ಗೂಗಲ್ ಇಲ್ಲಿ ಅಂತರರಾಷ್ಟ್ರೀಯ ಸಬ್-ಸೀ ಕೇಬಲ್ ಗೇಟ್ ವೇ (subsea gateway) ನಿರ್ಮಿಸುತ್ತಿದ್ದು, ಇದು ಮುಂಬೈ ಮತ್ತು ಚೆನ್ನೈನಂತೆ ವಿಶಾಖಪಟ್ಟಣವನ್ನೂ ಪ್ರಮುಖ ಡೇಟಾ ಸಂಪರ್ಕ ಕೇಂದ್ರವಾಗಿಸಲಿದೆ. ಮೆಟ್ರೋ ಫೈಬರ್ ಲೈನ್‌ಗಳು ಮತ್ತು ಕೇಬಲ್ ಲ್ಯಾಂಡಿಂಗ್ ಸ್ಟೇಷನ್‌ಗಳ ಸ್ಥಾಪನೆಯಿಂದ ರಾಜ್ಯದ ಡಿಜಿಟಲ್ ಮೂಲಸೌಕರ್ಯ ಸಂಪೂರ್ಣವಾಗಿ ಆಧುನೀಕರಣಗೊಳ್ಳಲಿದೆ.

* ಹಸಿರು ಇಂಧನ ಮತ್ತು ಸ್ಟಾರ್ಟ್‌ಅಪ್‌ಗಳಿಗೆ ಉತ್ತೇಜನ: ಈ ಡೇಟಾ ಕೇಂದ್ರಗಳನ್ನು ದಿನದ 24 ಗಂಟೆಯೂ ಇಂಗಾಲ-ಮುಕ್ತ (ಕ್ಲೀನ್ ಎನರ್ಜಿ) ವಿದ್ಯುತ್‌ನಿಂದ ನಡೆಸುವ ಗುರಿಯನ್ನು ಗೂಗಲ್ ಹೊಂದಿದೆ. ಇದಕ್ಕಾಗಿ ರಾಜ್ಯದಲ್ಲಿ ಸೌರ ಮತ್ತು ಪವನ ವಿದ್ಯುತ್ ಯೋಜನೆಗಳ ಮೇಲೆ ಹೆಚ್ಚುವರಿ ಹೂಡಿಕೆಯಾಗುವ ಸಾಧ್ಯತೆಯಿದೆ. ಅಲ್ಲದೆ, ಅದಾನಿ ಗ್ರೂಪ್ ತನ್ನ ಜಿಪಿಯು (GPU) ಸಾಮರ್ಥ್ಯದ ಒಂದು ಭಾಗವನ್ನು ಭಾರತೀಯ ಎಐ ಸ್ಟಾರ್ಟ್‌ಅಪ್‌ಗಳಿಗೆ ಮೀಸಲಿಡಲಿದ್ದು, ರಾಜ್ಯದಲ್ಲಿ ಹೊಸ ಟೆಕ್ ಕಂಪನಿಗಳ ಬೆಳವಣಿಗೆಗೆ ಇದು ನಾಂದಿ ಹಾಡಲಿದೆ.

ಒಟ್ಟಾರೆಯಾಗಿ, ಈ ಯೋಜನೆಯು ವಿಶಾಖಪಟ್ಟಣವನ್ನು ಕೇವಲ ಪ್ರವಾಸಿ ತಾಣವಾಗಿ ಮಾತ್ರವಲ್ಲದೆ, ವಿಶ್ವ ದರ್ಜೆಯ 'ತಂತ್ರಜ್ಞಾನ ಮತ್ತು ದತ್ತಾಂಶ ಕೇಂದ್ರ'ವನ್ನಾಗಿ ಪರಿವರ್ತಿಸಲಿದೆ. ಇದು ಮುಂಬರುವ ಪೀಳಿಗೆಗೆ, ವಿಶೇಷವಾಗಿ ಎಂಜಿನಿಯರಿಂಗ್ ವಿದ್ಯಾರ್ಥಿಗಳಿಗೆ ಸ್ಥಳೀಯವಾಗಿ ಅಂತರರಾಷ್ಟ್ರೀಯ ಮಟ್ಟದ ಉದ್ಯೋಗಗಳನ್ನು ಒದಗಿಸುವ ಮೂಲಕ ಆಂಧ್ರಪ್ರದೇಶದ ಸಮಗ್ರ ಅಭಿವೃದ್ಧಿಗೆ ದಿಕ್ಸೂಚಿಯಾಗಲಿದೆ.