![ಉತ್ತರ ಕರ್ನಾಟಕಕ್ಕೆ ಅಭಿವೃದ್ಧಿಯ ಬರ: ಹಿಗ್ಗುತ್ತಲೇ ಇದೆ ಪ್ರಾದೇಶಿಕ ಅಸಮಾನತೆ ಉತ್ತರ ಕರ್ನಾಟಕಕ್ಕೆ ಅಭಿವೃದ್ಧಿಯ ಬರ: ಹಿಗ್ಗುತ್ತಲೇ ಇದೆ ಪ್ರಾದೇಶಿಕ ಅಸಮಾನತೆ](https://karnataka.thefederal.com/h-upload/2024/02/03/428998-capture-2.webp)
ಉತ್ತರ ಕರ್ನಾಟಕಕ್ಕೆ ಅಭಿವೃದ್ಧಿಯ ಬರ: ಹಿಗ್ಗುತ್ತಲೇ ಇದೆ ಪ್ರಾದೇಶಿಕ ಅಸಮಾನತೆ
ಕರ್ನಾಟಕ ಏಕೀಕರಣಗೊಂಡು 67 ವರ್ಷಗಳು ಕಳೆದರೂ ಪ್ರಾದೇಶಿಕ ಅಸಮಾನತೆಯನ್ನು ಹೋಗಲಾಡಿಸುವಲ್ಲಿ ಸರ್ಕಾರಗಳು ನಿರಂತರವಾಗಿ ವಿಫಲವಾಗಿವೆ ಎಂದು ಅಧಿಕಾರಿಗಳು ಒಪ್ಪಿಕೊಂಡಿದ್ದಾರೆ
ಹೆಚ್ಚು ಸಮೃದ್ಧವಾಗಿರುವ ದಕ್ಷಿಣದ ಜಿಲ್ಲೆಗಳಿಂದ ದೂರವಿರುವ ಉತ್ತರದ ಜಿಲ್ಲೆಗಳು ತುಂಬಾ ಹಿಂದುಳಿದಿವೆ. ಆ ಜಿಲ್ಲೆಗಳ ತ್ವರಿತ ಅಭಿವೃದ್ಧಿಯನ್ನು ತಜ್ಞರ ತಂಡವು ಬಯಸುತ್ತಿದೆ. ಐಟಿ ಕೇಂದ್ರ, ರಾಜ್ಯದ ರಾಜಧಾನಿಯಾಗಿರುವ ಬೆಂಗಳೂರನ್ನು ಮೀರಿಸುವಂತೆ ಸಂಪೂರ್ಣ ಕರ್ನಾಟಕ ಬೆಳೆಯಬೇಕು ಎಂದು ಕರ್ನಾಟಕ ರಾಜ್ಯ ಪರಿವರ್ತನಾ ಸಂಸ್ಥೆಯ (SITK) ಉಪಾಧ್ಯಕ್ಷರು ಹೇಳುತ್ತಾರೆ.
ಕರ್ನಾಟಕ ಏಕೀಕರಣಗೊಂಡು 67 ವರ್ಷಗಳಾದರೂ ರಾಜ್ಯದ ಪ್ರಾದೇಶಿಕ ಅಸಮಾನತೆಯನ್ನು ಹೋಗಲಾಡಿಸುವಲ್ಲಿ ಸರ್ಕಾರಗಳು ನಿರಂತರವಾಗಿ ವಿಫಲವಾಗಿವೆ ಎಂದು ಅಧಿಕಾರಿಗಳು ಒಪ್ಪಿಕೊಳ್ಳುತ್ತಾರೆ. ಇದು ಉತ್ತರ ಕರ್ನಾಟಕದಲ್ಲಿ ಸಾಮೂಹಿಕ ಅಸಮಾಧಾನವನ್ನು ಹುಟ್ಟುಹಾಕಿದೆ. ಈ ಪ್ರದೇಶದ ಜನರು ಮತ್ತು ನಾಯಕರು ತಾವು ರಾಜ್ಯದ ಉಳಿದ ಭಾಗಗಳಿಗಿಂತ ಹೆಚ್ಚು ಹಿಂದುಳಿದಿದ್ದೇವೆ ಎಂದು ಭಾವಿಸುತ್ತಾರೆ.
2021ರ ಜನಗಣತಿಯ ಪ್ರಕಾರ 2,45,71,299 ಜನಸಂಖ್ಯೆಯನ್ನು ಹೊಂದಿರುವ ಉತ್ತರ ಕರ್ನಾಟಕವು 14 ಜಿಲ್ಲೆಗಳನ್ನು ಹೊಂದಿದೆ. ದಕ್ಷಿಣ ಕರ್ನಾಟಕಕ್ಕೆ ಹೋಲಿಸಿದರೆ ಆರ್ಥಿಕವಾಗಿ ಉತ್ತರ ಕರ್ನಾಟಕವು ಹಿಂದುಳಿದಿದೆ.
ಸ್ವಾತಂತ್ರ್ಯ ಪೂರ್ವದಲ್ಲಿ ಉತ್ತರ ಕರ್ನಾಟಕದ ವಿವಿಧ ಭಾಗಗಳಲ್ಲಿ ನಿಜಾಮರ ಆಳ್ವಿಕೆ ಇತ್ತು. 1956ರಲ್ಲಿ ರಾಜ್ಯ ಮರುಸಂಘಟನೆಯ ಸಮಯದಲ್ಲಿ ಆ ಪ್ರಾಂತ್ಯ, ಇತರೆಲ್ಲಾ ಪ್ರಾಂತ್ಯಗಳಂತೆ ಮೈಸೂರು ರಾಜ್ಯವನ್ನು ಸೇರಿಕೊಂಡಿತು. ಈ ಪ್ರದೇಶವು ಕೈಗಾರಿಕೆ, ಮೂಲಸೌಕರ್ಯ ಮತ್ತು ಕೃಷಿ ಅಭಿವೃದ್ಧಿಯಲ್ಲಿ ಹಿಂದೆ ಬಿದ್ದಿದೆ.
ಬೆಂಗಳೂರು ಮತ್ತು ಮೈಸೂರು ಸೇರಿದಂತೆ ದಕ್ಷಿಣದ ಜಿಲ್ಲೆಗಳಿಗೆ ಹೋಲಿಸಿದರೆ, ಉತ್ತರ ಕರ್ನಾಟಕದಲ್ಲಿ ರಾಜ್ಯ ಮತ್ತು ಕೇಂದ್ರ ಸರ್ಕಾರದ ಉದ್ಯಮಗಳು ಕಡಿಮೆಯಾಗಿವೆ. ಆರೋಗ್ಯ ಮತ್ತು ಶೈಕ್ಷಣಿಕ ಕ್ಷೇತ್ರಗಳಲ್ಲಿಯೂ ಉತ್ತರ ಕರ್ನಾಟಕ ಭಾಗ ಕಳಪೆ ಗುಣಮಟ್ಟದ್ದಾಗಿದೆ.
ಈ ಎಲ್ಲ ಸಮಸ್ಯೆಗಳಿಂದಾಗಿ ಪ್ರತ್ಯೇಕ ಕರ್ನಾಟಕದ ಕೂಗು ಎದ್ದಿದೆ. ಒಂದು ವೇಳೆ ರಾಜ್ಯದ ಸ್ಥಾನಮಾನವನ್ನು ಪಡೆದರೆ ಉತ್ತಮ ಆರ್ಥಿಕತೆಯತ್ತ ಸಾಧಿಸಬಹುದು ಎಂಬುದು ಪ್ರತ್ಯೇಕ ರಾಜ್ಯದ ಪರ ಇರುವವರ ವಾದ.
ಪ್ರಾದೇಶಿಕ ಅಸಮಾನತೆಯನ್ನು ಕೊನೆಗೊಳಿಸಲು ರಾಜಕೀಯ ಇಚ್ಛಾಶಕ್ತಿಯ ಕೊರತೆ ಎಂದು ಉತ್ತರದ ಜಿಲ್ಲೆಗಳ ಚುನಾಯಿತ ಪ್ರತಿನಿಧಿಗಳನ್ನು ಅಲ್ಲಿನ ಜನ ಸಾಮಾನ್ಯರು ದೂಷಿಸುತ್ತಾರೆ. ಕರ್ನಾಟಕದ ಬಹುತೇಕ ಮುಖ್ಯಮಂತ್ರಿಗಳು ದಕ್ಷಿಣ ಭಾಗದಿಂದ ಬಂದಿದ್ದಾರೆ. ಅವರಿಗೆ ಉತ್ತರಕರ್ನಾಟಕದ ಸಮಸ್ಯೆಗಳ ಬಗ್ಗೆ ಕಾಳಜಿ ಇಲ್ಲ. ಇದು ವಾಸ್ತವ ಸಮಸ್ಯೆ ಎಂಬುದು ಆ ಭಾಗದ ಜನಪ್ರತಿನಿಧಿಗಳ ವಾದ.
ಮಾಜಿ ರಾಜ್ಯಸಭಾ ಸದಸ್ಯ ರಾಜೀವ್ ಗೌಡ ಅವರು, ‘’ ಪ್ರಮುಖವಾಗಿ ರಾಜ್ಯದ ಆರ್ಥಿಕತೆಯು ಕುಸಿದಿದೆ ಮತ್ತು ಬೆಂಗಳೂರು ಕೇಂದ್ರಿತವಾಗಿದೆ’’ ಎಂದು ಒಪ್ಪಿಕೊಳ್ಳುತ್ತಾರೆ.
‘’ಈ ಚಕ್ರವನ್ನು ಹಿಮ್ಮೆಟ್ಟಿಸುವುದು ಸುಲಭವಲ್ಲ. ಅದಕ್ಕಾಗಿಯೇ ಬೆಂಗಳೂರಿನಾಚೆಗಿನ ಚಿಂತನೆಯ ಪರಿಕಲ್ಪನೆಯನ್ನು SITK ಒತ್ತಿಹೇಳುತ್ತದೆ’’ ಎಂದು ಅವರು ʼದಿ ಫೆಡರಲ್ʼ ನೊಂದಿಗೆ ಮಾತನಾಡುತ್ತಾ ಅಭಿಪ್ರಾಯಪಟ್ಟರು.
ಅಭಿವೃದ್ಧಿ ಹೇಗೆ ಸಾಧ್ಯ?
‘’ಹಿಂದುಳಿದಿರುವ ಬಗ್ಗೆ ಯೋಚಿಸುವುದರ ಜೊತೆಗೆ, ಸಂಭವನೀಯ ಸಾಮರ್ಥ್ಯಗಳ ಮೇಲೆ ಗಮನಹರಿಸುವುದು ಮುಖ್ಯವಾಗಿದೆ, ಸ್ಥಳೀಯವಾಗಿ ಉದ್ಯೋಗದ ಅವಕಾಶಗಳನ್ನು ಸೃಷ್ಟಿಸಲು ನಾವು ಮಾರ್ಗಗಳನ್ನು ಕಂಡುಕೊಳ್ಳಬಹುದು'' ಎಂದು ರಾಜೀವ್ ಗೌಡ ಅವರು ಹೇಳಿದರು.
ಬಿಜೆಪಿ ಸರ್ಕಾರವು 2021ರಲ್ಲಿ ವಿಜಯನಗರ ಎನ್ನುವ ಹೊಸ ಜಿಲ್ಲೆಯನ್ನು ರಚಿಸಿತು. ಆ ಬಳಿಕ ಬೆಳಗಾವಿ ಜಿಲ್ಲೆಯನ್ನು ಚಿಕ್ಕೋಡಿ, ಗೋಕಾಕ ಮತ್ತು ಬೆಳಗಾವಿ ಜಿಲ್ಲೆಯಾಗಿ ವಿಭಜಿಸುವ ಕೂಗು ಕೇಳಿಬಂದಿತು. ಅದೇ ರೀತಿ, ತುಮಕೂರು ಜಿಲ್ಲೆಯಿಂದ ಮಧುಗಿರಿ ಜಿಲ್ಲೆ ರಚಿಸಬೇಕು ಎಂಬ ಕೂಗು ಕೇಳಿ ಬಂದಿತು. 2017 ರಿಂದ ಉತ್ತರ ಕರ್ನಾಟಕದಲ್ಲಿ 60 ಹೊಸ ತಾಲೂಕುಗಳನ್ನು ರಚಿಸಲಾಗಿದೆ, ಆದರೆ ಅವುಗಳಿಗೆ ಮೂಲಭೂತ ಮೂಲಸೌಕರ್ಯಗಳನ್ನು ಒದಗಿಸಲಾಗಿಲ್ಲ.
ಈ ಹಿಂದೆ ಕಾಂಗ್ರೆಸ್ ಸರ್ಕಾರವು ಪ್ರಾದೇಶಿಕ ಅಸಮತೋಲನದ ಸಮಸ್ಯೆಗಳನ್ನು ಪರಿಹರಿಸಲು ಸಮಿತಿಯನ್ನು ರಚಿಸಿತು. 2002ರಲ್ಲಿ ಆ ಸಮಿತಿ ವರದಿ ಸಲ್ಲಿಸಿತ್ತು. ಆದರೆ 20 ವರ್ಷ ಕಳೆದರೂ ಸಮಿತಿಯ ಶಿಫಾರಸುಗಳು ಅಕ್ಷರಶಃ ಜಾರಿಯಾಗಿಲ್ಲ. ಡಿಸೆಂಬರ್ 4 ರಿಂದ ಬೆಳಗಾವಿಯಲ್ಲಿ 10 ದಿನಗಳ ಕಾಲ ನಡೆಯಲಿರುವ ವಿಧಾನಮಂಡಲ ಅಧಿವೇಶನದ ಅಜೆಂಡಾ ಉತ್ತರ ಕರ್ನಾಟಕದ ಹಿಂದುಳಿದಿರುವಿಕೆಯನ್ನು ಚರ್ಚಿಸುವುದಾಗಿದೆ.
ವರದಿಗಳ ಪ್ರಕಾರ, 114 ಹಿಂದುಳಿದ ತಾಲ್ಲೂಕುಗಳನ್ನು ಅಭಿವೃದ್ಧಿಪಡಿಸಲು ವಿಶೇಷ ಅಭಿವೃದ್ಧಿ ಯೋಜನೆಯಡಿ 2007 ರಿಂದ 2022 ರವರೆಗೆ ರೂ.30,000 ಕೋಟಿಗಳನ್ನು ಖರ್ಚು ಮಾಡಲಾಗಿದ್ದು, ಆ ಪೈಕಿ ಕೇವಲ 12.5 ಪ್ರತಿಶತದಷ್ಟು ಅನುದಾನ ಮಾತ್ರ ಅಭಿವೃದ್ಧಿಗೆ ಹೋಗಿದೆ.
‘’ಉಪಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ಅವರ ಬ್ರಾಂಡ್ ಬೆಂಗಳೂರಿನಂತೆ, ಉತ್ತರಕರ್ನಾಟಕ ಅಭಿವೃದ್ಧಿಗೆ ಸಿದ್ದರಾಮಯ್ಯ ಸರ್ಕಾರವು ಒಂದು ಬೃಹತ್ ಮಿಷನ್ ಅನ್ನು ಸ್ಪಷ್ಟಪಡಿಸಬೇಕೆಂದು ನಾವು ಬಯಸುತ್ತೇವೆ. ಈಗಿನ ಅಗತ್ಯವು ಏಕೀಕರಣದ ಚೌಕಟ್ಟಾಗಿದೆ. ಅದಕ್ಕಾಗಿಯೇ SITK ಒತ್ತಾಯಿಸುತ್ತಿದೆ’’ ಎಂದು ಗೌಡ ಹೇಳಿದರು.
ಉತ್ತರ ಕರ್ನಾಟಕವನ್ನು ಅಭಿವೃದ್ಧಿಪಡಿಸಲು ಬೇಕಾದ ಅಪಾರ ಸಂಪನ್ಮೂಲ ರಾಜ್ಯಕ್ಕೆ ಇದೆಯೇ?
‘’ನಮ್ಮದು ಉನ್ನತ ಬೆಳವಣಿಗೆಯ ಆರ್ಥಿಕತೆಯನ್ನು ಹೊಂದಿದೆ. ಕಂದಾಯ ಸೋರಿಕೆಯನ್ನು ಕಡಿಮೆ ಮಾಡುವ ಮೂಲಕ ಆದಾಯದ ಮೂಲಗಳನ್ನು ಸುಧಾರಿಸಬೇಕು ಮತ್ತು ವಿವಿಧ ಇಲಾಖೆಗಳ ಮೂಲಕ ಆದಾಯವನ್ನು ಸಂಗ್ರಹಿಸುವಲ್ಲಿ ದಕ್ಷತೆ ತೋರಬೇಕು. ಈ ಎರಡನ್ನೂ ನಿರ್ವಹಿಸಬಹುದು’’ ಎಂದು ಗೌಡ ಉತ್ತರಿಸಿದರು.