Tumbadchi Manjula| ಮರಾಠಿಗೆ ರಿಮೇಕ್ ಆದ ಕನ್ನಡದ ಸೂಪರ್ ಹಿಟ್ 'ಸು ಫ್ರಮ್ ಸೋ' ಸಿನಿಮಾ

ಕನ್ನಡ ಚಿತ್ರರಂಗದಲ್ಲಿ ಕೇವಲ 5 ಕೋಟಿ ರೂಪಾಯಿಗಳ ಅಲ್ಪ ಬಜೆಟ್‌ನಲ್ಲಿ ನಿರ್ಮಾಣಗೊಂಡು, ನೂರಾರು ಕೋಟಿ ರೂಪಾಯಿಗಳನ್ನು ಬಾಚಿಕೊಳ್ಳುವ ಮೂಲಕ ಭಾರಿ ಯಶಸ್ಸು ಕಂಡಿದ್ದ 'ಸು ಫ್ರಮ್ ಸೋ' (ಸುಲೋಚನ ಫ್ರಮ್ ಸೋಮೇಶ್ವರ) ಸಿನಿಮಾ ಈಗ ಸದ್ದಿಲ್ಲದೆ ಮರಾಠಿ ಭಾಷೆಗೆ ರಿಮೇಕ್ ಆಗಿದೆ. ವಿಶೇಷವೆಂದರೆ, ಮರಾಠಿಯ ಈ ರಿಮೇಕ್ ಚಿತ್ರಕ್ಕೆ ಬಾಲಿವುಡ್‌ನ ಪ್ರಸಿದ್ಧ ಚಿತ್ರವೊಂದರ ಲಿಂಕ್ ನೀಡಲಾಗಿದ್ದು, ಸದ್ಯ ಬಿಡುಗಡೆಯಾಗಿರುವ ಟ್ರೇಲರ್ ಪ್ರೇಕ್ಷಕರಿಂದ ಭಾರಿ ಮೆಚ್ಚುಗೆ ಗಳಿಸುತ್ತಿದೆ.

ಕನ್ನಡದಲ್ಲಿ ಶೀರ್ಷಿಕೆ ದೊಡ್ಡದಾಗುತ್ತದೆ ಎಂಬ ಕಾರಣಕ್ಕೆ 'ಸು ಫ್ರಮ್ ಸೋ' ಎಂದು ಇಡಲಾಗಿದ್ದ ಈ ಚಿತ್ರವನ್ನು, ಮರಾಠಿಯಲ್ಲಿ 'ತುಂಬಾಡ್ಚಿ ಮಂಜುಳಾ' ಅಂದರೆ 'ತುಂಬಾಡ್‌ನ ಮಂಜುಳಾ' ಎಂಬ ಹೆಸರಿನಲ್ಲಿ ಮರುನಿರ್ಮಾಣ ಮಾಡಲಾಗಿದೆ. ಈ ವಿಭಿನ್ನ ಟೈಟಲ್ ಇಡುವುದರ ಹಿಂದೆ ಒಂದು ಕುತೂಹಲಕಾರಿ ಕಾರಣವಿದ್ದು, ಈ ಹಿಂದೆ ಬಾಲಿವುಡ್‌ನಲ್ಲಿ ಬಿಡುಗಡೆಯಾಗಿ ತೀವ್ರ ಗಮನ ಸೆಳೆದಿದ್ದ 'ತುಂಬಾಡ್' ಸಿನಿಮಾದ ಹಿನ್ನೆಲೆಯನ್ನು ಇದಕ್ಕೆ ಬಳಸಿಕೊಳ್ಳಲಾಗಿದೆ. ಮಹಾರಾಷ್ಟ್ರದ ರತ್ನಗಿರಿ ಜಿಲ್ಲೆಯಲ್ಲಿರುವ 'ತುಂಬಾಡ್' ಎಂಬ ಹಳ್ಳಿಯ ಕಾಲ್ಪನಿಕ ಕಥೆಯ ಥ್ರಿಲ್ಲರ್ ಶೈಲಿಯನ್ನು ಈ ಸಿನಿಮಾದ ಶೀರ್ಷಿಕೆಗೆ ಕನೆಕ್ಟ್ ಮಾಡಲಾಗಿದೆ ಎಂದು ಹೇಳಲಾಗುತ್ತಿದೆ.

'ತುಂಬಾಡ್ಚಿ ಮಂಜುಳಾ' ಚಿತ್ರವು ಬಹುತೇಕ ಮೂಲ ಕನ್ನಡ ಚಿತ್ರವಾದ 'ಸು ಫ್ರಮ್ ಸೋ' ಮಾದರಿಯಲ್ಲೇ ಮೂಡಿಬಂದಿದ್ದು, ಹಳ್ಳಿಯ ಸೊಗಡಿನ ಕಥೆ ಹಾಗೂ ಕಾಮಿಡಿ ಅಂಶಗಳನ್ನು ಒಳಗೊಂಡಿದೆ. ಕನ್ನಡದ ಟ್ರೇಲರ್‌ನಲ್ಲಿ ಗುರೂಜಿಯ ಪಾತ್ರವನ್ನು ತೋರಿಸಿರಲಿಲ್ಲ, ಆದರೆ ಮರಾಠಿ ಟ್ರೇಲರ್‌ನಲ್ಲಿ ಆ ಪಾತ್ರವನ್ನು ಪರಿಚಯಿಸಿರುವುದು ವಿಶೇಷವಾಗಿದೆ.

ಈ ಚಿತ್ರದಲ್ಲಿ ಮರಾಠಿಯ ಖ್ಯಾತ ನಟರಾದ ಜಿತೇಂದ್ರ ಜೋಶಿ, ಓಂ ಭುಟ್ಕರ್ ಹಾಗೂ ಮಾರ್ಕಂಡ್ ಅನಸ್ಪುರೆ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದು, ವಿವಿಧ್ ಕೊರಗಾಂವ್ಕರ್ ನಿರ್ದೇಶನದ ಜವಾಬ್ದಾರಿ ಹೊತ್ತಿದ್ದಾರೆ. ಒಟ್ಟಾರೆಯಾಗಿ ಸ್ಯಾಂಡಲ್‌ವುಡ್‌ನ ಈ ಚಿತ್ರ ಮರಾಠಿ ಪ್ರೇಕ್ಷಕರನ್ನು ರಂಜಿಸಲು ಸಜ್ಜಾಗಿದೆ.