Season 5| ಶೀಘ್ರದಲ್ಲೇ ಬರಲಿದೆ 'ಪಂಚಾಯತ್ ಸೀಸನ್ 5'

ಭಾರತೀಯ ಒಟಿಟಿ ಲೋಕದಲ್ಲಿ ಭಾರಿ ಜನಪ್ರಿಯತೆ ಗಳಿಸಿರುವ 'ಪಂಚಾಯತ್' ವೆಬ್ ಸರಣಿಯ ಐದನೇ ಸೀಸನ್ ಅಧಿಕೃತವಾಗಿ ಘೋಷಣೆಯಾಗಿದ್ದು, ಫುಲೇರಾ ಗ್ರಾಮದ ಕಥೆ ಹೊಸ ತಿರುವುಗಳೊಂದಿಗೆ ವೀಕ್ಷಕರ ಮುಂದೆ ಬರಲು ಸಜ್ಜಾಗಿದೆ.

ಅಮೆಜಾನ್ ಪ್ರೈಮ್ ವಿಡಿಯೋ ಈ ಜನಪ್ರಿಯ ಗ್ರಾಮೀಣ ಹಿನ್ನೆಲೆಯ ಹಾಸ್ಯ ಹಾಗೂ ಡ್ರಾಮಾ ಸರಣಿಯ ಮುಂದಿನ ಭಾಗವನ್ನು 2026ರಲ್ಲಿ ಬಿಡುಗಡೆ ಮಾಡುವುದಾಗಿ ಖಚಿತಪಡಿಸಿದೆ. ನಾಲ್ಕನೇ ಸೀಸನ್‌ನ ರೋಚಕ ಅಂತ್ಯದ ನಂತರ, ಪ್ರೇಕ್ಷಕರಲ್ಲಿ ಮುಂದೇನಾಗಬಹುದು ಎಂಬ ಕುತೂಹಲ ತೀವ್ರವಾಗಿತ್ತು, ಇದೀಗ ಹೊಸ ಸೀಸನ್‌ನ ಘೋಷಣೆಯು ಅಭಿಮಾನಿಗಳಲ್ಲಿ ಭಾರೀ ಉತ್ಸಾಹ ಮೂಡಿಸಿದೆ.

ನಾಲ್ಕನೇ ಸೀಸನ್‌ನ ಕೊನೆಯಲ್ಲಿ ಫುಲೇರಾ ಗ್ರಾಮದ ರಾಜಕೀಯ ಚಿತ್ರಣ ಸಂಪೂರ್ಣವಾಗಿ ಬದಲಾಗಿತ್ತು. ಗ್ರಾಮ ಪಂಚಾಯತ್ ಚುನಾವಣೆಯಲ್ಲಿ ಮಂಜು ದೇವಿ ಅವರನ್ನು ಕ್ರಾಂತಿ ದೇವಿ ಅತ್ಯಲ್ಪ ಮತಗಳ ಅಂತರದಿಂದ ಸೋಲಿಸಿ ಹೊಸ ಪ್ರಧಾನಿ ಆಗಿ ಅಧಿಕಾರ ವಹಿಸಿಕೊಂಡಿದ್ದರು. ಈ ಅಧಿಕಾರ ಬದಲಾವಣೆಯಿಂದಾಗಿ ಸಚಿವ್ ಜಿ ಖ್ಯಾತಿಯ ಅಭಿಷೇಕ್ ತ್ರಿಪಾಠಿಗೆ ಫುಲೇರಾದಲ್ಲಿ ಕೆಲಸ ಮಾಡಲು ಕಠಿಣ ಮತ್ತು ಪ್ರತಿಕೂಲ ವಾತಾವರಣ ನಿರ್ಮಾಣವಾಗಲಿದೆ ಎಂದು ಸರಣಿಯ ಅಧಿಕೃತ ಸಾರಾಂಶ ಮುನ್ಸೂಚನೆ ನೀಡಿದೆ. ಮತ್ತೊಂದೆಡೆ, ಅಭಿಷೇಕ್ ಕ್ಯಾಟ್ ಪರೀಕ್ಷೆಯಲ್ಲಿ ಉತ್ತಮ ಅಂಕ ಗಳಿಸಿ ತನ್ನ ಉನ್ನತ ಶಿಕ್ಷಣದ ಕನಸನ್ನು ನನಸಾಗಿಸಲು ಸಜ್ಜಾಗುತ್ತಿದ್ದಾನೆ ಮತ್ತು ರಿಂಕಿ ಮೇಲಿನ ತನ್ನ ಪ್ರೀತಿಯನ್ನು ಒಪ್ಪಿಕೊಂಡಿದ್ದಾನೆ. ಹೀಗಾಗಿ ಅವನು ಫುಲೇರಾ ಗ್ರಾಮವನ್ನು ಬಿಟ್ಟು ಹೋಗುತ್ತಾನಾ ಅಥವಾ ಇಲ್ಲವೇ ಎಂಬುದು ಈ ಸೀಸನ್‌ನ ಪ್ರಮುಖ ಆಕರ್ಷಣೆಯಾಗಲಿದೆ.

ಇದರೊಂದಿಗೆ, ಮಾಜಿ ಪ್ರಧಾನ ಜಿ ಅವರ ಮೇಲಿನ ದಾಳಿಯ ಹಿಂದಿನ ರಹಸ್ಯ ಮತ್ತು ಮಂಜು ದೇವಿ ರಾಜಕೀಯವಾಗಿ ಹೇಗೆ ಪುನರಾಗಮನ ಮಾಡಬಹುದು ಎಂಬ ಪ್ರಶ್ನೆಗಳಿಗೆ ಈ ಹೊಸ ಸೀಸನ್‌ನಲ್ಲಿ ಉತ್ತರ ಸಿಗುವ ಸಾಧ್ಯತೆಯಿದೆ.

ಜಿತೇಂದ್ರ ಕುಮಾರ್, ನೀನಾ ಗುಪ್ತಾ, ರಘುಬೀರ್ ಯಾದವ್, ಫೈಸಲ್ ಮಲಿಕ್, ಚಂದನ್ ರಾಯ್ ಮತ್ತು ಸಾನ್ವಿಕಾ ಸೇರಿದಂತೆ ಹಳೆಯ ಪ್ರಮುಖ ತಾರಾಗಣವೇ ಈ ಬಾರಿಯೂ ಮುಂದುವರಿಯಲಿದ್ದು, ಚಂದನ್ ಕುಮಾರ್ ಅವರ ಬರವಣಿಗೆ ಹಾಗೂ ದೀಪಕ್ ಕುಮಾರ್ ಮಿಶ್ರಾ ಅವರ ನಿರ್ದೇಶನದಲ್ಲಿ ಕಥೆ ಮೂಡಿಬರಲಿದೆ. ಸದ್ಯಕ್ಕೆ ಚಿತ್ರೀಕರಣದ ಕೆಲಸಗಳು ಆರಂಭವಾಗಿದ್ದು, ನಿಖರವಾದ ಬಿಡುಗಡೆಯ ದಿನಾಂಕವನ್ನು ಅಮೆಜಾನ್ ಪ್ರೈಮ್ ಇನ್ನು ಘೋಷಿಸಬೇಕಿದೆ.