ಗದ್ದುಗೆ ಗುದ್ದಾಟ| ಸಿಎಂ, ಡಿಸಿಎಂ ಬ್ರೇಕ್ ಫಾಸ್ಟ್ ಮೀಟಿಂಗ್; ಬಿಗಿಪಟ್ಟು ಸಡಿಲಿಸುವರೇ ಡಿಕೆಶಿ?

ನಾಯಕತ್ವ ಗೊಂದಲಕ್ಕೆ ಪರಿಹಾರ ಕಂಡುಕೊಳ್ಳಲು ಪರಸ್ಪರ ಮಾತುಕತೆ ನಡೆಸುವಂತೆ ಹೈಕಮಾಂಡ್ ಸೂಚನೆ ಮೇರೆಗೆ ಸಿಎಂ ಸಿದ್ದರಾಮಯ್ಯ ಹಾಗೂ ಡಿ.ಕೆ ಶಿವಕುಮಾರ್ ಇಂದು ಮಹತ್ವದ ಮಾತುಕತೆ ಆರಂಭಿಸಿದ್ದಾರೆ.

ಪರಸ್ಪರರ ಈ ಮಾತುಕತೆಯು ಗದ್ದುಗೆ ಗುದ್ದಾಟಕ್ಕೆ ತೆರೆ ಎಳೆಯುವುದೇ, ಸಿಎಂ ಹಾಗೂ ಡಿಸಿಎಂ ಇಬ್ಬರೂ ತಮ್ಮ ಬಿಗಿಪಟ್ಟು ಸಡಿಲಿಸುವರೇ ಎಂಬ ಜಿಜ್ಞಾಸೆ ಎದುರಾಗಿದೆ.

ಈಗಾಗಲೇ ಸಿಎಂ ಸಿದ್ದರಾಮಯ್ಯ ಅವರು ಹೈಕಮಾಂಡ್ ತೀರ್ಮಾನಕ್ಕೆ ಬದ್ಧ, ಯಾವುದೇ ನಿರ್ಧಾರ ತೆಗೆದುಕೊಂಡರೂ ಒಪ್ಪಿಕೊಳ್ಳುವೆ ಎಂದು ಹೇಳಿದ್ದಾರೆ. ಡಿಕೆಶಿ ಜತೆಗಿನ ಮಾತುಕತೆ ವೇಳೆಯೂ ಇದನ್ನೇ ಹೇಳುವುದಾಗಿ ಸಿಎಂ ಸಿದ್ದರಾಮಯ್ಯ ಸ್ಪಷ್ಟಪಡಿಸಿದ್ದಾರೆ. ಸಿಎಂ ತಮ್ಮ ಬಿಗಿ ನಿಲುವು ಬದಲಿಸುವುದು ಅನುಮಾನ. ಹೀಗಿರುವಾಗ ಡಿಕೆಶಿ ಮುಂದೆ ನಡೆ ತೀವ್ರ ಕುತೂಹಲ ಮೂಡಿಸಿದೆ.

ಡಿ.ಕೆ.ಶಿವಕುಮಾರ್ ಅವರು ಸಿಎಂ ಎದುರು ಅಧಿಕಾರ ಹಂಚಿಕೆ ವಿಚಾರವನ್ನು ಪ್ರಸ್ತಾಪಿಸಲಿದ್ದು, ಸ್ಥಾನ ಬದಲಾವಣೆಗಾಗಿ ಬಿಗಿಪಟ್ಟು ಹಿಡಿಯುವ ಸಾಧ್ಯತೆ ಇದೆ ಎನ್ನಲಾಗಿದೆ. ಒಪ್ಪಂದದಂತೆ ನಿಮ್ಮ ಅವಧಿ ಪೂರ್ಣಗೊಂಡಿದೆ, ಉಳಿದ ಎರಡೂವರೆ ವರ್ಷ ಅಧಿಕಾರ ತನಗೆ ಅಧಿಕಾರ ಬಿಟ್ಟು ಕೊಡಿ ಎಂದು ಡಿಕೆಶಿ ನೆರವಾಗಿಯೇ ಒತ್ತಾಯಿಸಲಿದ್ದಾರೆ ಎನ್ನಲಾಗಿದೆ.

ರಾಹುಲ್ ಗಾಂಧಿ ಮುಂದೆ ಯಾವುದೇ ಒಪ್ಪಂದ ಆಗಿಲ್ಲ, ಹೈಕಮಾಂಡ್ ಏನೇ ತೀರ್ಮಾನ ಮಾಡಿದರೂ ಒಪ್ಪಿಕೊಳ್ಳುವೆ ಎಂದು ಸಿಎಂ ಹೇಳಲಿದ್ದಾರೆ ಎಂದು ತಿಳಿದುಬಂದಿದೆ.

ಮಾತುಕತೆಯ ಫಲಿತಾಂಶದ ಆಧರಿಸಿ ಹೈಕಮಾಂಡ್ ಸಭೆ

ಸಿಎಂ, ಡಿಸಿಎಂ ನಡುವಿನ ಮಾತುಕತೆಯ ಫಲಿತಾಂಶದ ಮೇಲೆ ದೆಹಲಿಯಲ್ಲಿನ ಹೈವೋಲ್ಟೇಜ್ ಸಭೆ ನಿಂತಿದೆ.

ಮಾತುಕತೆ ಫಲಪ್ರದವಾದರೆ ಹೈಕಮಾಂಡ್ ಹಾದಿ ಸುಲಭವಾಗಲಿದೆ. ಯಾವುದೇ ಒತ್ತಡ ಇರುವುದಿಲ್ಲ. ಒಂದು ವೇಳೆ ಸಿಎಂ ಹಾಗೂ ಡಿಸಿಎಂ ಮಧ್ಯೆ ಮಾತುಕತೆ ಮುರಿದುಬಿದ್ದಲ್ಲಿ ಇಬ್ಬರನ್ನೂ ದೆಹಲಿಗೆ ಕರೆಸಿಕೊಂಡು ಮಾತುಕತೆ ನಡೆಸುವ ಮೂಲಕ ಹೈಕಮಾಂಡ್ ತನ್ನ ನಿರ್ಣಯ ತಿಳಿಸಲಿದೆ. ಅದಕ್ಕೆ ಇಬ್ಬರು ನಾಯಕರು ಬದ್ಧರಾಗಿರಬೇಕಾಗುತ್ತದೆ. ಹಾಗಾಗಿ ಸಿಎಂ-ಡಿಸಿಎಂ ಬ್ರೇಕ್ ಫಾಸ್ಟ್ ಮೀಟಿಂಗ್ ಮಹತ್ವ ಪಡೆದುಕೊಂಡಿದೆ.